শুরমা ফারর খবর ছিলটি জবানে ছিলটর খবর
Related Articles
ꠍꠤꠟꠐꠤ ꠀꠞ ꠍꠤꠟꠐꠤ ꠎꠣꠔꠤꠉꠤꠠꠤꠔꠣ ꠟꠁꠀ Mahbubul A Mazumder (ꠝꠣꠢꠛꠥꠛꠥꠟ ꠀꠣꠝꠤꠘ ꠝꠏꠥꠘꠖꠣꠞ) ꠍꠣꠛꠦ ꠔꠣꠘꠞ ꠚꠦꠁꠍꠛꠥꠇ ꠀꠁꠒꠤ ꠔꠘꠦ ꠄꠉꠥ ꠙꠥꠡ꠆ꠐ ꠍꠣꠞꠤꠍꠟꠣ ⁕ ꠎꠦꠉꠥ ꠅꠛꠤꠇꠟ ꠔꠟꠦꠖꠤ ꠖꠦꠃꠀ ꠅꠁꠍꠦ –
ꠛꠞꠣꠇ ꠛꠦꠟꠤꠞ ꠝꠣꠘꠥ, ꠀꠝꠞꠣ ꠄꠝꠘ ꠄꠈ ꠎꠣꠔꠤ, ꠎꠦꠞꠣ ꠘꠤꠏꠞ ꠚꠞꠤꠍꠄ ꠟꠁꠀ ꠛꠠ ꠛꠦꠇꠤꠀꠟ ⁕ ꠀꠝꠞꠣ ꠝꠘꠈꠄ ꠢꠣꠞꠤ ꠖꠥꠘꠤꠀꠁꠞ ꠛꠤꠕꠞꠦ ꠄꠈꠟꠣ ꠄꠈ ꠎꠣꠔꠤ, ꠎꠦꠞꠣ ꠘꠤꠏꠞ ꠄꠟꠣꠈꠣꠔ, ꠘꠤꠏꠞ ꠛꠣꠏꠣꠞ-ꠀꠐꠅ, ꠁꠍꠇꠥꠟ-ꠇꠟꠦꠏꠅ ꠅꠚꠤꠡꠤꠄꠟꠤ ꠘꠤꠏꠞ ꠝꠣꠁꠞ-ꠛꠣꠡꠣ ꠝꠣꠔꠔꠣꠝ ꠚꠣꠞꠤ ꠘꠣ ⁕ ꠀꠞꠅ ꠖꠥꠇ ꠅꠞ ꠈꠔꠣ ꠎꠦ ꠀꠝꠞꠣ ꠘꠣ ꠡꠥꠡꠣꠞꠦ ꠍꠤꠟꠐꠤ ꠝꠣꠔꠤ, ꠘꠣ ꠛꠣꠋꠟꠣ ꠝꠣꠔ ꠢꠤꠇꠔꠣꠝ ꠚꠣꠞꠤ⁕ ꠀꠞ ꠟꠉꠦ ꠡꠞꠝ ꠔ ꠀꠍꠦꠃ ⁕
Google ꠅ search ꠈꠞꠤꠀ ꠖꠦꠈꠛꠣ, ꠛꠦꠏꠣꠘ ꠢꠤꠡꠣꠛ ꠝꠔꠦ 2025 ꠡꠘꠅ ꠛꠞꠣꠇ ꠛꠦꠟꠤ, ꠔꠤꠚꠥꠞꠣ, ꠍꠤꠟꠦꠐ ꠀꠞ ꠛꠤꠖꠦꠡꠅ ꠕꠣꠈꠞꠣ ꠡꠛ ꠝꠤꠟꠣꠁꠀ ꠍꠤꠟꠦꠐꠤꠞꠦ ꠝꠣꠁꠞ-ꠛꠣꠡꠣ ꠢꠤꠡꠣꠛꠦ ꠝꠣꠔꠞꠣ ꠝꠣꠘꠞ ꠡꠁꠋꠇꠣ ꠚ꠆ꠞꠣꠄ (11.8 million ꠛꠣ ꠄꠈ ꠇꠥꠐꠤ ꠀꠐ ꠟꠣꠈ) ⁕ ꠎꠦꠈꠣꠘꠅ ꠝꠥꠘꠤꠚꠥꠞꠤ ꠝꠥꠐꠦ (17 ꠟꠣꠈ), ꠛꠠ (14 ꠟꠣꠈ) ꠅꠁꠀꠅ ꠔꠣꠞꠣ ꠉꠝꠝꠦꠘ꠆ꠐ ꠔꠣꠇꠤ ꠅꠚꠤꠡꠤꠄꠟ ꠡꠤꠇꠞꠤꠔꠤ ꠚꠣꠁꠘ, ꠁꠍꠇꠥꠟ-ꠇꠟꠦꠏꠅ ꠢꠞꠥꠔꠣꠁꠘ ꠔꠦ ꠚꠠꠤꠔꠣ ꠚꠣꠞꠁꠘ, ꠅꠚꠤꠍ-ꠀꠖꠣꠟꠔꠅ ꠛꠦꠛꠀꠞ ꠈꠞꠔꠣ ꠚꠣꠞꠁꠘ, ꠁꠛꠦꠘ ꠛꠤꠗꠣꠘ ꠡꠛꠣ ꠛꠣ ꠟꠥꠇ ꠡꠛꠣꠔ ꠛꠥꠇ ꠚꠥꠟꠣꠁꠀ ꠛꠈꠔꠤꠔꠣ ꠖꠤꠔꠣ ꠚꠣꠞꠁꠘ, ꠀꠝꠞꠣ ꠄꠞ ꠔꠣꠇꠤ ꠛꠘꠌꠤꠔ ⁕
ꠍꠃꠇ ꠉꠥꠞꠣꠁꠟꠦ ꠖꠦꠈꠣ ꠎꠣꠄ, ꠁꠃꠞꠥꠚ, ꠄꠡꠤꠀ ꠛꠣ ꠀꠚ꠆ꠞꠤꠇꠣ ꠝꠢꠣꠖꠦꠡꠅ ꠁꠟꠣ ꠁꠟꠣ ꠖꠦꠡ ꠅꠈꠟ ꠀꠍꠦ ꠎꠦꠐꠣꠔ ꠄꠈ ꠛꠣꠡꠣꠄ ꠝꠣꠔꠞꠣ ꠝꠣꠘꠥ ꠉꠘꠤꠀ 5 ꠔꠣꠇꠤ 6 ꠟꠣꠈ ꠅꠁꠛꠣ, ꠝꠕꠤꠘ ꠔꠣꠞꠣ ꠘꠤꠏꠞ ꠛꠣꠡꠣꠞꠦ ꠍꠣꠠꠤꠀ ꠖꠤꠍꠁꠘ ꠘꠣ, ꠔꠣꠞꠣꠞ ꠘꠤꠏꠞ ꠚꠞꠤꠍꠄ ꠟꠁꠀ ꠖꠥꠘꠤꠀꠁꠞ ꠛꠥꠇꠥꠔ ꠝꠣꠕꠣ ꠃꠍꠣ ꠈꠞꠤꠀ ꠛꠣꠍꠤꠔꠞꠣ ⁕
ꠀꠝꠞꠣꠞ ꠘꠤꠏꠞ ꠅꠔ ꠚꠥꠞꠣꠘ ꠟꠤꠙꠤ (ꠘꠣꠉꠞꠤ), ꠚꠥꠕꠕꠤ, ꠢꠈꠟ ꠎꠣꠔꠞ ꠡꠛ꠆ꠖ, ꠚꠠꠝ, ꠏꠝꠤꠘꠅꠞ ꠈꠣꠉꠏ-ꠚꠣꠔꠤ ꠀꠞ ꠡꠛꠔꠣꠇꠤ ꠛꠠ ꠎꠤꠘꠤꠡ, ꠅꠔ ꠛꠠ ꠄꠈ ꠎꠘꠡꠁꠋꠇꠣ ꠕꠣꠈꠣꠞ ꠛꠣꠖꠦꠅ ꠀꠁꠏ ꠀꠝꠞꠣ ꠀꠞꠈ ꠛꠣꠡꠣꠄ ꠁꠍꠇꠥꠟ ꠚꠠꠣ ꠟꠣꠉꠦ, ꠅꠚꠤꠡꠤꠄꠟ ꠈꠣꠝ-ꠈꠣꠏ ꠈꠞꠣ ꠟꠣꠉꠦ ⁕ ꠀꠁꠏ ꠛꠞꠣꠈ ꠛꠦꠟꠤꠞ ꠇꠥꠘꠅ ꠚꠞꠤꠍꠄ ꠘꠣꠁ, ꠛꠣꠞꠦ ꠈꠦꠃ ꠍꠤꠘꠁꠘ ꠘꠣ… ꠞꠣꠁꠎꠎꠞ ꠘꠣꠝ ꠀꠡꠣꠝ, ꠀꠞ ꠀꠝꠞꠣ ꠛꠦꠋꠉꠟꠤ ꠅꠁꠀ ꠛꠣꠍꠤꠀꠞ ⁕⁕
