শুরমা ফারর খবর ছিলটি জবানে ছিলটর খবর
Related Articles
ꠄꠇꠐꠣ ꠛꠐ ꠛꠤꠇꠇꠧ – ꠀꠛꠥꠟ ꠢꠣꠍꠘꠣꠔ ꠍꠥꠟꠣꠁꠝꠣꠘ
ꠀꠝꠤ ꠉꠤꠀꠘꠤ,ꠛꠤꠉꠉꠣꠘꠤ,ꠉꠛꠦꠡꠇ ꠛꠣ ꠇꠥꠘꠥ ꠚꠘꠒꠤꠔ ꠘꠣꠄ। ꠝꠘꠅꠞ ꠝꠣꠎꠦ ꠇꠤꠌꠍꠥ ꠀꠁꠟꠦꠅꠃ ꠁꠐꠣ ꠟꠁꠀ ꠟꠦꠈꠣꠟꠦꠈꠤ ꠈꠞꠤ। ꠜꠣꠟꠣ ꠇꠤꠌꠌꠥꠞꠦ ꠡꠝꠝꠣꠘ ꠀꠞ ꠡꠝꠞꠔꠘ ꠈꠞꠤ,ꠛꠣꠖ ꠇꠤꠌꠌꠥ ꠖꠦꠈꠟꠦ ꠚꠔꠤꠛꠣꠖ ꠈꠞꠔꠣꠝ ꠘꠣ ꠚꠣꠞꠟꠦꠅ ꠡꠣꠚꠥꠐ ꠖꠦꠁꠘꠣ। ꠀꠁꠎꠥꠞ ꠟꠦꠈꠣ ꠀꠟꠟꠣꠝꠣ ꠚꠥꠟꠔꠟꠤ ꠡꠣꠛ ꠞꠦ ꠟꠁꠀ,ꠎꠦꠁꠘꠅꠞ ꠚꠥꠞꠣ ꠘꠣꠝ ꠡꠣꠢ ꠡꠥꠚꠤ ꠢꠎꠞꠔ ꠝꠣꠅꠟꠣꠘꠣ ꠝꠥꠢꠣꠝꠝꠖ ꠀꠛꠖꠥꠟ ꠟꠔꠤꠢ ꠍꠖꠞꠤ ꠚꠥꠟꠔꠟꠤ ꠡꠣꠛ ꠇꠤꠛꠟꠣ। ꠔꠣꠁꠘ ꠃꠚ ꠝꠢꠣꠖꠦꠡꠅꠞ ꠘꠣꠝ ꠈꠞꠣ ꠚꠤꠞ,ꠎꠥꠉꠅꠞ ꠡꠦꠞꠣ ꠀꠟꠤꠝ ꠀꠍꠟꠣ। ꠎꠦ ꠎꠣꠉꠣꠔ ꠚꠤꠞ ꠢꠈꠟꠦ ꠝꠥꠞꠤꠖꠣꠘ ꠢꠈꠟꠞ ꠖꠦꠅꠀ ꠟꠤꠟꠟꠣ ꠖꠤ ꠈꠣꠁꠘ ꠚꠞꠁꠘ ꠅꠃ ꠎꠣꠉꠣꠔ ꠚꠥꠟꠔꠟꠤ ꠡꠣꠛꠦ ꠔꠣꠁꠘꠅꠞ ꠛꠣꠚꠞ ꠈꠣꠟꠤ ꠡꠝꠙꠖꠅꠞ ꠄꠈꠐꠣ ꠅꠋꠡ ꠃꠁꠟ ꠈꠁꠞꠣ ꠖꠤꠀ ১৯৪৭ ꠡꠣꠟꠅ ꠚꠔꠤꠡꠐꠣ ꠈꠞꠁꠘ”ꠖꠣꠞꠥꠟ ꠇꠤꠞꠣꠔ ꠝꠎꠤꠖꠤꠀ ꠚꠥꠟꠔꠟꠤ ꠐꠣꠡꠐ”। ꠖꠣꠞꠥꠟ ꠇꠤꠞꠣꠔ ꠚꠔꠤꠡꠐꠣꠞ ꠚꠞ ꠔꠣꠇꠤ ꠀꠁꠎ ꠝꠣꠘꠔꠦ ꠖꠦꠡ ꠛꠤꠖꠦꠡꠅꠞ ꠈꠈ ꠇꠥꠐꠤ ꠝꠣꠁꠘꠡꠦ ꠚꠥꠞꠣ ꠛꠤꠘꠣ ꠐꠦꠈꠣꠄ ꠡꠢꠤꠢ ꠡꠥꠖꠖ ꠈꠞꠤ ꠇꠥꠞꠀꠘ ꠝꠣꠎꠤꠖ ꠚꠞꠣ ꠢꠤꠇꠍꠁꠘ। ꠎꠦ ꠡꠝꠄ ꠁ ꠃꠚ ꠝꠢꠣꠖꠦꠡꠅꠞ ꠝꠣꠁꠘꠡꠦ ꠜꠥꠟ ꠜꠣꠟ ꠃꠌꠌꠣꠞꠘꠦ ꠚꠛꠤꠔꠞ ꠇꠥꠞꠀꠘ ꠝꠣꠎꠤꠖ ꠚꠞꠔꠣ ꠅꠃ ꠡꠝꠄ ꠔꠞꠥꠘ ꠛꠄꠡꠅ ꠚꠥꠟꠔꠟꠤ ꠡꠣꠛꠦ ꠐꠤꠇ ꠃꠌꠌꠣꠞꠘꠦ ꠔꠣꠎꠛꠤꠖꠅꠞ ꠟꠉꠦ ꠇꠥꠞꠀꠘ ꠝꠣꠎꠤꠖ ꠔꠦꠟꠣꠅꠀꠔ ꠈꠞꠣꠞ ꠎꠞꠥꠞꠔ ꠛꠥꠁꠎꠎꠣ ꠚꠄꠟꠣ ꠘꠤꠎꠦ ꠁꠟꠝꠦ ꠇꠤꠞꠣꠔꠅꠞ ꠡꠘꠖ ꠟꠁꠘ। ꠄꠞ ꠛꠣꠖꠦ ꠁ ꠈꠦꠖꠝꠔꠞꠦ ꠝꠣꠁꠘꠡꠞ ꠉꠦꠍꠦ ꠟꠁꠀ ꠎꠣꠁꠘ,ꠝꠣꠁꠘꠡꠞꠦ ꠁꠔꠣꠔ ꠀꠘꠣꠞ ꠟꠣꠉꠤ ꠔꠣꠁꠘ ꠝꠘ ꠖꠤꠀ ꠈꠣꠝ ꠈꠞꠁꠘ। ꠖꠣꠞꠥꠟ ꠇꠤꠞꠣꠔ ꠚꠔꠤꠡꠐꠣ ꠀꠞ ꠁ ꠚꠔꠤꠡꠐꠣꠘꠅꠞ ꠖꠤꠘ ꠖꠤꠘ ꠃꠘꠘꠔꠤ ꠡꠣꠛ ꠇꠤꠛꠟꠣꠞ ꠄꠈꠐꠣ ꠇꠣꠞꠣꠝꠔ ꠀꠝꠤ ꠝꠘꠅ ꠈꠞꠤ। ꠚꠥꠟꠔꠟꠤ ꠡꠣꠛꠁꠞ ꠀꠞꠈꠐꠣ ꠇꠣꠞꠣꠝꠔ ꠀꠝꠤ ꠝꠘꠅ ꠈꠞꠤ ꠔꠣꠁꠅꠞ ꠀꠐ ꠡꠘꠔꠣꠘ। ꠀꠟꠟꠣꠢ ꠡꠥꠛꠢꠣꠘꠣꠔꠣꠟꠣꠞ ꠖꠣꠘ ꠡꠣꠛ ꠇꠤꠛꠟꠣꠞ ꠀꠐ ꠡꠘꠔꠣꠘꠅꠞ ꠝꠣꠎꠦ ꠀꠐꠅ ꠎꠘ ꠅꠃ ꠛꠣꠋꠟꠣꠖꠦꠡꠅꠞ ꠚꠄꠟꠣ ꠡꠣꠞꠤꠞ ꠀꠟꠤꠝ,ꠅꠟꠝꠦ ꠇꠤꠞꠣꠔꠅꠞ ꠡꠘꠖ ꠟꠅꠀ ꠀꠞ ꠁꠡꠟꠣꠝꠤ ꠡꠤꠇꠇꠣꠞ ꠡꠛ ꠔꠣꠇꠤ ꠛꠠ ꠒꠤꠉꠞꠤ ꠚꠣꠅꠀ। ꠄꠝꠘ ꠇꠤ ꠀꠟꠟꠣꠝꠣ ꠡꠣꠛ ꠇꠤꠛꠟꠣꠞ ꠘꠣꠔꠤ ꠢꠈꠟꠅ ꠁꠡꠟꠣꠝꠤ ꠡꠤꠇꠇꠣꠄ ꠡꠛ ꠔꠣꠇꠤ ꠛꠠ ꠒꠤꠉꠞꠤ ꠘꠦꠅꠡ। ꠀꠝꠤ ꠎꠣꠘꠤꠘꠣ ꠛꠣꠋꠟꠣꠖꠦꠡꠅ ꠛꠣ ꠛꠤꠡꠡꠞ ꠇꠥꠘ ꠖꠦꠡꠅ ꠁꠟꠣꠈꠣꠘ ꠘꠎꠤꠞ ꠀꠍꠦꠘꠤ ꠎꠦ-ꠘꠤꠎꠦ ꠛꠠ ꠀꠟꠤꠝ,ꠙꠤꠞ ꠔꠣꠁꠘꠅꠞ ꠀꠅꠟꠣꠖ ꠢꠈꠟꠅ ꠛꠠꠛꠠ ꠒꠤꠉꠞꠤ ꠟꠅꠀ ꠀꠟꠤꠝ। ꠁꠐꠣꠞꠦ ꠄꠈꠐꠣ ꠇꠣꠞꠣꠝꠔ ꠔꠣꠇꠤ ꠇꠥꠘꠥ ꠅꠋꠡꠦ ꠈꠝ ꠝꠘꠅ ꠈꠞꠤꠘꠣ ꠀꠝꠤ। ꠚꠥꠟꠔꠟꠤ ꠡꠣꠛꠅꠞ ꠍꠦꠟꠦ,ꠘꠣꠔꠤ ꠢꠈꠟꠅꠞ ꠝꠣꠎꠦ ꠈꠈꠎꠘꠞꠦ ꠈꠣꠘꠖꠣꠔꠣꠇꠤ ꠖꠦꠈꠣꠞ ꠜꠣꠁꠉꠉ ꠀꠝꠣꠞ ꠅꠁꠍꠦ। ꠛꠤꠡꠦꠡ ꠈꠞꠤ ꠔꠣꠁꠘꠅꠞ ꠛꠠ ꠡꠘꠔꠣꠘ ꠀꠟꠟꠣꠝꠣ ꠁꠝꠣꠖ ꠃꠖꠖꠤꠘ ꠍꠖꠞꠤ ꠚꠥꠟꠔꠟꠤ ꠞ: ꠔꠣꠁꠘꠅꠞ ꠈꠣꠘꠖꠣꠔ ꠈꠄꠈꠛꠣꠞ ꠉꠦꠍꠤ। ꠔꠣꠞꠣꠞ ꠛꠤꠘꠁ ꠀꠍꠞꠘ,ꠝꠣꠁꠘꠡꠞ ꠟꠉꠦ ꠡꠥꠘꠖꠞ ꠛꠦꠛꠢꠣꠞ ꠁꠔꠣꠞ ꠇꠥꠘꠥ ꠔꠥꠟꠘꠣ ꠅꠄꠘꠣ। ꠔꠣꠞꠣ ꠎꠦ ꠁ ꠃꠚ ꠝꠢꠣꠖꠦꠡꠅꠞ ꠎꠝꠣꠘꠣꠞ ꠡꠦꠡꠐ ꠅꠟꠤꠞ ꠡꠘꠔꠣꠘ,ꠘꠣꠔꠤ,ꠎꠝꠤꠖꠣꠞ ꠛꠋꠡꠞ ꠀꠅꠟꠣꠖ ꠁꠔꠣ ꠟꠁꠀ ꠔꠣꠞꠣꠞ ꠉꠦꠍꠦ ꠛꠤꠘꠖꠥ ꠚꠞꠤꠝꠣꠘ ꠅꠢꠋꠇꠣꠞ ꠀꠝꠤ ꠖꠦꠈꠍꠤꠘꠣ। ꠁ ꠖꠦꠡꠅ ꠛꠃꠔ ꠜꠘꠒ ꠚꠤꠞ ꠀꠍꠁꠘ। ꠀꠞ ꠁ ꠜꠘꠒ ꠚꠤꠞ ꠢꠈꠟꠅꠞ ꠟꠣꠉꠤ ꠁ ꠖꠦꠡꠅꠞ ꠝꠣꠁꠘꠡꠞ ꠄꠈꠐꠣ ꠅꠋꠡꠞ ꠝꠣꠎꠦ ꠚꠤꠞ,ꠝꠥꠞꠡꠤꠖ,ꠡꠥꠚꠤꠛꠣꠖ ꠟꠁꠀ ꠘꠦꠉꠦꠐꠤꠜ ꠗꠣꠞꠘꠣ ꠀꠍꠦ। ꠚꠥꠟꠔꠟꠤ ꠡꠣꠛꠅꠞ ꠃꠚꠣꠔꠅꠞ ꠛꠣꠖꠦ ꠔꠣꠁꠘ ꠊꠥꠝꠣꠁꠀ ꠀꠍꠁꠘ ꠔꠣꠁꠘꠅꠞ ꠛꠣꠠꠤ ꠄꠞꠤꠀꠞ ꠜꠤꠔꠞꠦ ꠎꠦ ꠝꠍꠤꠖ ꠀꠍꠦ ꠁ ꠝꠍꠤꠖꠅꠞ ꠃꠔꠔ ꠍꠣꠁꠐꠅ। ꠀꠚꠘꠣꠞꠣ ꠎꠦꠁꠘꠔꠣꠁꠘ ꠚꠥꠟꠔꠟꠤ ꠡꠣꠛ ꠛꠣꠠꠤ ꠉꠦꠍꠁꠘ ꠘꠣ,ꠔꠣꠁꠘꠅꠞ ꠝꠣꠎꠣꠞ ꠖꠦꠈꠍꠁꠘꠘꠣ ꠇꠥꠘꠥ ꠖꠤꠘ ꠔꠣꠞꠣ ꠎꠥꠖꠤ ꠎꠣꠁꠘ ꠔꠦ ꠚꠄꠟꠣ ꠖꠦꠁꠇꠇꠣ ꠅꠛꠣꠇ ꠅꠁꠎꠤꠛꠣ। ꠎꠦꠞꠣ ꠎꠦꠞꠣ ꠖꠦꠁꠇꠇꠣ ꠀꠚꠘꠦ ꠅꠛꠣꠇ ꠅꠁꠛꠣ ꠁꠔꠣ ꠅꠁꠟꠅ-ꠁ ꠝꠣꠎꠣꠞꠅꠞ ꠡꠤꠝꠣꠘꠣꠞ ꠜꠤꠔꠞꠦ ꠇꠥꠘꠥ ꠖꠣꠘ ꠛꠣꠇꠡ ꠘꠣꠁ। ꠔꠣꠁꠘꠅꠞ ꠝꠣꠎꠣꠞꠅ ꠜꠈꠔꠅ ꠢꠈꠟꠦ ꠀꠉꠞ ꠛꠣꠔꠔꠤ ꠎꠣꠟꠣꠘꠤ,ꠉꠥꠟꠣꠙꠎꠟ ꠍꠤꠐꠣꠘꠤꠞ ꠇꠥꠘꠥ ꠛꠦꠛꠡꠔꠣ ꠘꠣꠁ। ꠔꠣꠁꠘꠅꠞ ꠝꠣꠎꠣꠞꠅ ꠐꠦꠈꠣ ꠁꠐꠣꠝꠣꠞꠤ ꠖꠦꠅꠀꠅ ꠚꠥꠞꠣꠚꠥꠞꠤ ꠘꠤꠡꠦꠖ। ꠔꠣꠁꠘꠅꠞ ꠝꠣꠎꠣꠞꠅꠞ ꠜꠤꠔꠞꠦ ꠘꠝꠣꠎ ꠚꠞꠣꠞꠅ ꠇꠥꠘꠥ ꠛꠦꠛꠡꠔꠣ ꠘꠣꠁ। ꠀꠚꠘꠦ ꠀꠝꠣꠞ ꠁꠔꠣ ꠚꠁꠞꠣ ꠇꠤꠛꠣꠞꠔꠅ ꠍꠤꠘꠔꠣ ꠈꠞꠞꠣ ꠖꠣꠘ ꠛꠣꠇꠡ ꠘꠣꠁ ꠔꠦ ꠁꠇꠣꠘꠅꠞ ꠝꠡꠎꠤꠖ,ꠝꠣꠎꠣꠞ,ꠄꠔꠤꠝ ꠈꠣꠘꠣ,ꠝꠣꠖꠞꠦꠡꠣ ꠁꠔꠣ ꠍꠟꠦ ꠇꠤꠟꠣ? ꠝꠣꠎꠣꠞꠅꠞ ꠜꠤꠔꠞꠦ ꠘꠝꠣꠎꠅꠞ ꠛꠦꠛꠡꠔꠣ ꠘꠣ ꠔꠣꠈꠟꠦ ꠝꠥꠡꠟꠟꠤ ꠢꠈꠟꠦ ꠘꠣꠝꠣꠎ ꠚꠞꠁꠘ ꠇꠥꠀꠁ? ꠚꠄꠟꠣ ꠃꠔꠔꠞ ꠅꠁꠟꠅ,ꠚꠥꠟꠔꠟꠤ ꠡꠣꠛ ꠛꠣꠠꠤ ꠖꠣꠘ ꠘꠦꠁꠘ ꠔꠛꠦ ꠁꠐꠣ ꠞꠤꠍꠤꠐꠅꠞ ꠝꠣꠗꠗꠝꠦ। ꠡꠚꠘꠦ ꠎꠥꠖꠤ ꠛꠞꠔꠝꠣꠘ ꠖꠣꠁꠔꠔꠡꠤꠟ ꠚꠤꠞ ꠀꠟꠟꠣꠝꠣ ꠁꠝꠣꠖ ꠃꠖꠖꠤꠘ ꠍꠖꠞꠤ ꠞ: ꠅꠞ ꠝꠥꠟꠣꠇꠣꠔꠅꠞ ꠟꠣꠉꠤ ꠎꠣꠁꠘ ꠀꠞ ꠀꠞꠅ ꠚꠤꠞ ꠢꠈꠟꠅꠞ ꠟꠣꠈꠣꠘ ꠔꠣꠁꠘꠅꠞ ꠀꠔꠅ ꠐꠦꠈꠣ ꠖꠤꠔꠣ ꠍꠣꠁꠘ ꠔꠦ ꠔꠣꠁꠘ ꠘꠤꠔꠣ ꠘꠣ। ꠔꠣꠁꠘ ꠀꠚꠘꠣꠞꠦ ꠎꠣꠉꠣ ꠖꠦꠈꠣꠁꠀ ꠖꠤꠀ ꠈꠁꠛꠣ,ꠢꠃ ꠅꠈꠣꠘꠅ ꠎꠣꠁꠘ ꠀꠞ ꠇꠥꠘ ꠈꠣꠔꠅ ꠐꠦꠈꠣ ꠖꠤꠔꠣ ꠔꠣꠞꠣꠞꠦ ꠈꠁꠘ,ꠐꠦꠈꠣ ꠖꠤꠡ ꠞꠤꠍꠤꠐ ꠟꠁꠘ। ꠖꠥꠁ ꠘꠝꠛꠞ ꠃꠔꠔꠞ ꠅꠁꠟꠅ,ꠔꠣꠁꠘꠅꠞ ꠝꠣꠎꠣꠞ ꠄꠞꠤꠀꠞ ꠜꠤꠔꠞꠦ ꠘꠣꠝꠣꠎ ꠚꠞꠣꠞ ꠛꠦꠛꠡꠔꠣ ꠘꠣ ꠔꠣꠈꠟꠦꠅ ꠝꠣꠎꠣꠞꠅꠞ ꠈꠣꠘꠖꠣꠔ ꠝꠍꠤꠖ ꠡꠍꠦ ꠁꠇꠣꠘꠅ ꠉꠤꠀ ꠝꠥꠍꠟꠟꠤ ꠢꠈꠟꠦ ꠘꠝꠣꠎ ꠚꠞꠁꠘ। ꠝꠣꠎꠣꠞꠅꠞ ꠝꠣꠎꠦ ꠐꠦꠈꠣ ꠁꠐꠣ ꠝꠣꠞꠤ ꠘꠣ ꠚꠣꠟꠣꠘꠤ,ꠉꠥꠟꠣꠙꠎꠟ ꠘꠣ ꠍꠤꠐꠣꠘꠤ,ꠀꠉꠞ ꠛꠣꠔꠔꠤ ꠘꠣ ꠎꠣꠟꠣꠘꠤ,ꠡꠦꠎꠖꠣ ꠘꠣ ꠖꠦꠅꠀ ꠛꠣ ꠘꠝꠣꠎ ꠘꠣ ꠚꠞꠣꠞ ꠛꠤꠡꠄꠉꠥꠁꠘ ꠇꠑꠤꠘ ꠘꠎꠞꠖꠣꠞꠤꠞ ꠝꠣꠎꠦ ꠞꠣꠈꠣ ꠅꠄ। ꠚꠥꠟꠔꠟꠤ ꠡꠣꠛ ꠛꠣꠠꠤꠔ ꠚꠥꠀꠁꠘꠔꠞ ꠄꠈꠐꠣ ꠀꠞ ꠚꠥꠞꠤꠘꠔꠞ ꠄꠈꠐꠣ ꠄꠔꠤꠝꠈꠣꠘꠣ ꠚꠥꠞꠣꠚꠥꠞꠤ ꠛꠠ ꠡꠣꠛꠁꠞ ꠀꠘꠒꠣꠞꠦ ꠚꠞꠤꠌꠣꠟꠤꠔꠅ ꠅꠄ। ꠚꠥꠞꠥꠚꠥꠞꠥ ꠚꠥꠞꠥꠔꠡꠁꠘ ꠚꠣꠟ ꠛꠣꠁꠘꠖꠣ ꠉꠥꠡꠟ ꠈꠞꠣꠔ ꠀꠅꠀ,ꠛꠠ ꠡꠣꠛꠅꠞ ꠔꠣꠞꠣꠞꠦ ꠎꠔꠘ ꠘꠦꠅꠀ ꠁꠔꠣ ꠖꠦꠈꠟꠦ ꠀꠚꠘꠣꠞ ꠝꠘ ꠡꠣꠘꠔꠤ ꠚꠣꠁꠛ। ꠎꠦꠞꠣ ꠇꠥꠘꠥꠖꠤꠘ ꠚꠥꠟꠔꠟꠤ ꠡꠣꠛ ꠛꠣꠠꠤ ꠉꠦꠍꠁꠘꠘꠣ,ꠚꠥꠟꠔꠟꠤ ꠡꠣꠛ ꠛꠣꠠꠤ ꠡꠝꠙꠞꠇꠦ ꠎꠣꠞꠣꠞ ꠜꠥꠟ ꠗꠣꠞꠘꠣ ꠀꠍꠦ ꠔꠣꠞꠣꠞꠦ ꠈꠁꠞꠣꠝ,ꠚꠥꠟꠔꠟꠤ ꠡꠣꠛ ꠛꠣꠠꠤ ꠎꠤꠀꠞꠔꠅꠞ ꠟꠣꠉꠤ ꠎꠥꠖꠤ ꠘꠣꠅ ꠎꠣꠁꠘ ꠅꠘꠔꠔꠅ ꠄꠈꠛꠣꠞ ꠛꠦꠞꠣꠘꠤꠔ ꠎꠣꠁꠘ। ꠀꠚꠘꠣꠞ ꠗꠣꠞꠘꠣ ꠚꠣꠟꠐꠤꠎꠤꠛꠅ। ꠀꠚꠘꠦ ꠚꠥꠟꠔꠟꠤ ꠡꠣꠛ ꠛꠣꠠꠤ ꠛꠣ ꠚꠥꠟꠔꠟꠤ ꠡꠣꠛꠅꠞ ꠀꠅꠟꠣꠖ ꠢꠈꠟꠅꠞ ꠜꠈꠞꠅ ꠎꠥꠖꠤ ꠘꠣꠅ ꠅꠁꠔꠣ ꠚꠣꠞꠁꠘ ꠅꠘꠔꠔꠅ ꠔꠣꠞꠣꠞ ꠛꠤꠡꠄ ꠈꠣꠞꠣꠚ ꠝꠘꠔꠛꠛ ꠈꠞꠔꠣꠘꠣ। ꠄꠝꠘ ꠄꠈꠎꠘ ꠇꠣꠝꠦꠟ ꠚꠤꠞꠅꠞ ꠡꠝꠧꠞꠇꠦ ꠛꠣ ꠔꠣꠁꠘꠅꠞ ꠀꠅꠟꠣꠖ ꠢꠈꠟꠁꠞ ꠛꠤꠀꠚꠣꠞꠦ ꠈꠣꠞꠣꠚ ꠝꠘꠔꠁꠛꠛ ꠈꠞꠣꠞ ꠀꠉꠦ ꠀꠟꠟꠣꠞ ꠈꠔꠣ ꠡꠞꠘ ꠈꠞꠁꠘ ꠎꠣꠘꠥ। ꠀꠟꠟꠣꠢ ꠇꠤꠘꠔꠥ ꠡꠛꠔꠣꠇꠤ ꠛꠠ ꠛꠤꠍꠣꠞꠇ। ꠎꠣꠎꠣꠇꠣꠟꠟꠣꠢ ꠈꠣꠁꠞꠣꠘ।
