শুরমা ফারর খবর ছিলটি জবানে ছিলটর খবর
Related Articles
ꠈꠛꠞꠤꠀ – ꠀꠛꠥꠟ ꠢꠣꠍꠘꠣꠔ ꠍꠥꠟꠣꠁꠝꠣꠘ
ꠡꠥꠘꠣꠝꠉꠁꠘ
ꠀꠅꠞꠞ ꠚꠣꠞꠅ ꠁ ꠡꠝꠅꠄ ꠛꠤꠀꠟ ꠅꠁꠎꠣꠞ ꠅꠁꠎꠣꠞ। ꠝꠣꠁꠘꠍꠦ ꠔꠣꠠꠣꠔꠣꠠꠤ ꠈꠞꠞꠣ ꠢꠈꠟꠔꠣ ꠀꠐꠣꠅꠀ ꠊꠞꠅ ꠎꠣꠁꠔꠣꠉꠤ। ꠈꠦꠃ ꠈꠟꠣꠔ ꠝꠦꠁꠟꠟꠣ ꠖꠦꠅꠀ ꠈꠦꠞ ꠖꠟꠣ ꠈꠞꠞꠣ,ꠈꠦꠃ ꠈꠦꠞꠅꠞ ꠜꠥꠟꠣ ꠢꠣꠎꠣꠁꠞꠣ। ꠈꠦꠃ ꠈꠟꠣꠔ ꠢꠥꠇꠣꠘꠤꠔ ꠖꠦꠅꠀ ꠗꠣꠘ ꠐꠣꠁꠘꠘꠣ ꠄꠈ ꠎꠣꠉꠣꠔ ꠖꠟꠣ ꠈꠞꠞꠣ,ꠈꠦꠃ ꠐꠥꠇꠞꠤꠖꠤ ꠝꠣꠔꠣꠔ ꠈꠞꠤ ꠗꠣꠘ ꠛꠣꠠꠤꠔ ꠘꠤꠞꠣ। ꠎꠦꠁꠘꠔꠣꠁꠘ ꠅꠔ ꠡꠝꠄ ꠗꠣꠘ ꠈꠣꠐꠣꠔ ꠛꠦꠡꠔ ꠀꠍꠟꠣ ꠔꠣꠞꠣꠞ ꠛꠃꠔꠞꠦ ꠢꠣꠁꠘꠎꠣꠞ ꠀꠉꠦ ꠛꠣꠠꠤꠔ ꠚꠤꠞꠔꠣ ꠅꠁꠛꠣ। ꠀꠅꠞꠅ ꠗꠣꠘ ꠈꠣꠐꠣꠞ ꠡꠤꠎꠘꠅ ꠀꠅꠞ ꠚꠣꠞꠞ ꠝꠣꠁꠘꠡꠞ ꠁꠔꠣ ꠡꠣꠜꠣꠛꠤꠇ ꠛꠤꠡꠅꠄ। ꠁ ꠡꠝꠅꠄ ꠊꠞꠅ ꠃꠐꠦ ꠡꠣꠃꠖꠦꠞ ꠛꠥꠞꠅ ꠚꠟꠘ। ꠎꠥꠉ ꠎꠥꠉ ꠗꠞꠤ ꠛꠁꠡꠣꠇꠅ ꠁꠟꠣꠈꠣꠘ ꠅꠁꠀ ꠀꠞ। ꠢꠣꠞꠣ ꠛꠍꠞꠞ ꠈꠥꠞꠣꠇꠤ,ꠡꠘꠋꠡꠣꠞꠅꠞ ꠈꠞꠍ ꠁ ꠗꠣꠘ ꠛꠦꠁꠌꠌꠣꠅꠃ ꠅꠄ। ꠛꠦꠡꠤꠞ ꠜꠣꠉ ꠚꠞꠤꠛꠣꠞꠅꠞ ꠚꠞꠗꠣꠘ ꠀꠄ ꠅꠞ ꠎꠣꠉꠣ ꠁ ꠗꠣꠘ। ꠇꠤꠘꠔꠥ ꠚꠡꠟ ꠔꠥꠟꠣꠞ ꠁ ꠡꠝꠄꠐꠣꠅ ꠝꠣꠏꠦꠝꠣꠏꠦ ꠈꠐꠤꠘ ꠅꠁꠎꠣꠄ। ꠅꠐꠣꠁꠝꠦ ꠝꠦꠉ,ꠢꠤꠟ,ꠉꠥꠟꠣ ꠀꠁꠀ ꠇꠤꠡꠇ ꠢꠈꠟꠞ ꠢꠣꠎꠣꠁꠟ ꠢꠈꠟ ꠀꠃꠎꠘ ꠔꠍꠘꠍ ꠅꠁꠎꠣꠄ। ꠅꠡꠝꠄꠅꠞ ꠚꠣꠁꠘꠘꠦ ꠜꠣꠤꠡꠡꠣ ꠎꠣꠄꠉꠤ ꠡꠚꠘ। ꠉꠦꠍꠦ ꠡꠥꠇꠇꠥꠞꠛꠣꠞ ꠛꠤꠀꠟꠦ ꠡꠥꠘꠣꠝꠉꠘꠎ ꠎꠤꠟꠣꠞ ꠛꠤꠡꠝꠛꠞꠚꠥꠞ ꠃꠚꠎꠤꠟꠣꠞ ꠝꠣꠎꠣꠁꠞ ꠉꠡꠃꠔ ꠉꠦꠟꠦ ꠝꠣꠁꠘꠍꠞ ꠀꠢꠣꠇꠣꠞꠤ ꠅꠃ ꠢꠥꠘꠣ ꠎꠣꠄ ꠛꠦꠡꠤ। ꠈꠦꠃꠞ ২০-৩০ ꠇꠤꠀꠞ ꠈꠦꠃꠞ ৫০-১০০ ꠇꠤꠀꠞ ꠎꠝꠤꠘꠅꠞ ꠗꠣꠘ ꠚꠣꠘꠤꠔ ꠛꠥꠞꠤ ꠉꠦꠍꠦ। ꠖꠥꠁ ꠔꠤꠘ ꠇꠤꠀꠞ ꠎꠝꠤꠘꠅꠞ ꠗꠣꠘ ꠀꠞꠣꠁꠍꠁꠘ ꠁꠟꠣꠈꠣꠘ ꠝꠣꠘꠥꠡꠅꠞ ꠡꠘꠋꠈꠣ ꠢꠤꠡꠣꠘꠅꠞ ꠛꠣꠞꠦ। ꠝꠣꠎꠣꠁꠞ ꠉꠣꠃꠞ ꠁꠎꠎꠔ ꠀꠟꠤ ꠈꠁꠘ,ꠀꠝꠞꠣꠞ ꠅꠃ ꠄꠇ ꠈꠦꠞꠔꠅꠃ,ꠈꠣꠟꠤ ꠛꠥꠞꠅ ꠈꠦꠔ। ꠀꠉꠘ ꠝꠣꠁꠀ ꠈꠦꠔ ꠘꠣꠁ। ꠞꠤꠘꠛꠤꠘ ꠈꠞꠤ ꠈꠦꠔ ꠈꠞꠟꠣꠝ ꠡꠛ ꠚꠣꠘꠤꠞ ꠔꠟꠅ। ꠅꠘꠦ ꠈꠣꠁꠔꠣꠝ ꠘꠣ ꠞꠤꠘ ꠖꠤꠔꠣꠝ। ꠁꠎꠎꠔ ꠣꠟꠤ ꠈꠁꠘ, ꠘꠤꠎꠞ ꠀꠞ ꠚꠞꠣꠞ ꠝꠤꠟꠣꠁꠀ ꠈꠞꠍꠣꠞ ꠀꠅꠞꠅ ꠘꠄ ꠇꠤꠀꠞ ꠎꠝꠤꠘꠅ ꠛꠥꠞꠅ ꠗꠣꠘ ꠈꠞꠍꠤꠟꠣꠝ,ꠄꠞ ꠝꠣꠏꠦ ꠖꠥꠁ ꠇꠤꠀꠞ ꠎꠝꠤꠘꠅꠞ ꠗꠣꠘ ꠔꠥꠟꠔꠣꠝ ꠚꠣꠞꠍꠤ,ꠛꠣꠇꠤ ꠡꠣꠔ ꠇꠤꠀꠞ ꠗꠣꠘ ꠄꠛꠅ ꠚꠣꠘꠤꠞ ꠘꠤꠍꠦ। ꠁꠎꠎꠔ ꠀꠟꠤ ꠈꠁꠘ,ꠀꠝꠣꠞ ꠛꠥꠎ ꠅꠁꠍꠦ ꠔꠣꠇꠤ ꠈꠦꠔ ꠈꠞꠤ,ꠟꠦꠈꠣꠚꠞꠣ ꠈꠞꠍꠤꠘꠣ,ꠈꠦꠞ ꠈꠞꠤ ꠈꠣꠁ। ꠀꠝꠤ ꠛꠥꠠꠣ ꠝꠣꠘꠥꠡ,ꠇꠣꠎꠇꠣꠝ ꠈꠞꠔꠣꠝ ꠚꠣꠞꠤꠘꠣ,ꠀꠟ ꠛꠣꠅꠀꠘꠤ,ꠗꠣꠘ ꠞꠅꠀꠘꠤ ꠝꠣꠁꠘꠡꠞꠦꠖꠤ ꠈꠞꠣꠁꠍꠤ। ꠁꠔꠣ ꠈꠞꠔꠦ ꠉꠤꠀ ১৫-১৬ ꠀꠎꠣꠞ ꠐꠦꠈꠣ ꠈꠞꠍ ꠅꠁꠍꠦ। ꠞꠤꠘ ꠀꠍꠦ ৩৫ ꠀꠎꠣꠞ ꠐꠦꠈꠣ। ꠞꠤꠘꠅꠞ ꠟꠣꠉꠤ ꠝꠣꠁꠘꠡꠦ ꠍꠣꠚ ꠖꠦꠞ,ꠎꠦꠉꠥꠘ ꠚꠣꠁꠍꠤ ꠍꠤꠘꠔꠣ ꠈꠞꠞꠣꠝ ꠁꠉꠥꠘ ꠖꠤꠟꠣꠁꠝꠥ। ꠇꠤꠘꠔꠥ ꠎꠦꠉꠥꠘ ꠚꠣꠁꠍꠤ ꠁꠉꠥꠁꠘ ꠅꠃ ꠚꠍꠤꠀ ꠎꠣꠞꠉꠤ। ꠚꠞꠤꠛꠣꠞꠅꠞ ꠛꠃ,ꠖꠥꠁ ꠚꠥꠞꠤ ꠀꠝꠤ ꠡꠢ ꠀꠝꠞꠣ ꠍꠣꠁꠞ ꠎꠘꠅꠞ ꠜꠞꠘ ꠚꠥꠡꠘꠅꠞ ꠖꠣꠁꠞꠞ ꠀꠝꠣꠞ ꠈꠣꠘꠖꠅ। ꠛꠣꠇꠤ ꠚꠥꠞꠤꠘ ꠀꠞ ꠔꠣꠞꠣꠞ ꠛꠣꠁꠌꠌꠣꠁꠘ ꠅ ꠝꠣꠈꠦꠝꠣꠈꠦ ꠀꠄ। ꠝꠣꠡꠅ ꠈꠝ ꠈꠁꠞꠣ ꠅꠁꠟꠦꠅ ৫০ ꠡꠦꠞ ꠍꠣꠃꠟꠅꠞ ꠖꠞꠈꠣꠞ ꠚꠞꠦ। ꠁꠎꠎꠔ ꠀꠟꠤ ꠈꠁꠘ,ꠅꠈꠘ ꠈꠦꠝꠘꠦ ꠍꠟꠝꠥ ꠀꠟꠟꠣꠄ ꠎꠣꠘꠁꠘ। ꠇꠥꠐꠥꠝ ꠈꠦꠡ ꠢꠈꠟꠦ ꠇꠤꠍꠥ ꠡꠣꠁꠎꠎ ꠈꠞꠁꠘ,ꠔꠣꠞꠣ ꠎꠥꠖꠤ ꠖꠦꠁꠘ,ꠅꠃꠐꠣꠅꠃ ꠅꠈꠘ ꠜꠞꠡꠣ। ꠛꠃꠔ ꠖꠤꠘ ꠁꠟꠣꠈꠣꠘ ꠚꠣꠁꠘꠘꠦ ꠗꠣꠘ ꠘꠤꠍꠦꠘꠣ,ꠁꠛꠣꠞ ꠀꠅꠞꠞ ꠎꠝꠤꠘ ꠄꠈ ꠞꠣꠁꠔꠦ ꠔꠟ ꠈꠞꠤꠟꠣꠁꠍꠦ। ꠚꠡꠤꠟ ꠔꠟꠣꠁꠀ ꠎꠣꠅꠀꠞ ꠁ ꠡꠥꠁꠘꠘꠔꠣ ꠈꠣꠟꠤ ꠁꠎꠎꠔ ꠀꠟꠤꠞ ꠘꠣꠄ। ꠀꠅꠞ ꠚꠣꠞꠞ ꠢꠈꠟ ꠉꠣꠃꠔ ꠅꠈꠘ ꠘꠤꠞꠛ ꠈꠣꠘꠖꠣꠞ ꠝꠔꠅ ꠝꠣꠁꠘꠡꠞ ꠢꠣꠢꠣꠇꠣꠞ ꠍꠟꠦꠞ। ꠝꠣꠈꠦꠝꠣꠈꠦ ꠁꠟꠣꠈꠣꠘ ꠚꠞꠤꠡꠔꠤꠔꠤꠞ ꠡꠣꠝꠘꠦ ꠚꠞꠁꠘ ꠔꠣꠞꠣ,ꠎꠦ ꠡꠝꠄ ꠄꠣ ꠃꠔꠡꠛ ꠈꠞꠣꠞ ꠈꠔꠣ,ꠁꠐꠣꠅꠃ ꠃꠁꠀ ꠃꠐꠍꠦ ꠐꠤꠇꠇꠣ ꠕꠣꠈꠣꠞ ꠘꠤꠡꠛꠖ ꠟꠠꠣꠁ। ꠁ ꠟꠠꠣꠁ ꠅꠈꠘ ꠢꠈꠟ ꠀꠅꠞ ꠚꠣꠞꠞ ꠉꠣꠃꠞꠅꠃ ꠍꠟꠦꠞ। ꠔꠣꠞ ꠛꠣꠖꠦꠅ ꠈꠦꠃ ꠀꠔ ꠀꠐꠣꠀ ꠛꠅꠀꠔ ꠘꠣꠄ। ꠚꠞꠤꠛꠣꠞꠅꠞ ꠛꠦꠐꠣ,ꠛꠦꠐꠤ,ꠛꠣꠁꠌꠌꠣꠁꠘ ꠢꠈꠟ ꠝꠤꠟꠟꠣ ꠡꠣꠝꠤꠟ ꠅꠁꠍꠅꠘ ꠁ ꠡꠘꠋꠉꠞꠣꠝꠅ। ꠈꠦꠁ ꠚꠡꠘꠤꠞ ꠔꠟꠦ ꠛꠥꠞꠤ ꠎꠣꠅꠀ ꠗꠣꠘ ꠔꠥꠟꠞꠣ। ꠈꠡꠁꠐꠐꠣ ꠀꠘꠣ ꠗꠣꠘ ꠚꠁꠌꠌꠣ ꠉꠦꠞꠣ ꠀꠁꠌꠌꠦ,ꠞꠁꠖꠅ ꠖꠤꠀ ꠁ ꠗꠣꠘ ꠢꠥꠇꠣꠘꠤꠞ ꠍꠦꠡꠐꠣ ꠍꠟꠦꠞ। ꠞꠁꠖ ꠃꠐꠣꠄ ꠚꠁꠌꠌꠣ ꠎꠣꠅꠀ ꠗꠣꠘ ꠢꠥꠇꠣꠁꠔꠦ ꠇꠤꠍꠥ ꠡꠥꠜꠤꠗꠣ ꠅꠞ।
-ꠀꠛꠥꠟ ꠢꠣꠡꠘꠣꠔ ꠍꠥꠟꠣꠄꠝꠣꠘ,ꠡꠥꠘꠣꠝꠉꠘꠎ।
