শুরমা ফারর খবর ছিলটি জবানে ছিলটর খবর
Related Articles
ꠝꠥꠟꠤꠛꠣꠎꠣꠞꠞ ꠛꠠꠟꠦꠈꠣꠔ ꠊꠥꠝꠣꠁꠀ ꠕꠣꠈꠣꠞ ꠛꠣꠟꠣ ꠛꠤꠡꠣꠈ꠆ꠔ ꠢꠣꠚꠞ ꠇꠣꠝꠠꠦ ꠝꠥ. ꠍꠣꠁꠚꠥꠞ ꠞꠢꠝꠣꠘ (২৭) ꠘꠣꠝꠞ ꠄꠈ ꠚꠥꠀꠞ ꠝꠃꠔ ꠅꠁꠍꠦ⁕ ꠃꠚꠎꠤꠟꠣꠞ ꠛꠞ꠆ꠘꠤ ꠁꠘꠤꠅꠘꠞ ꠀꠢꠝꠖꠚꠥꠞ ꠉꠣꠅ ꠅ ꠁ ꠊꠐꠘꠣ ꠊꠐꠦ⁕
ꠉꠦꠍꠦ ꠛꠤꠞꠡꠁꠔꠛꠣꠞ ꠖꠤꠘꠝꠣꠞꠤ ꠞꠣꠁꠔꠞ ꠎꠦꠍꠣ ꠛꠣꠟꠣ ꠄꠈ ꠡꠝꠄ ꠊꠥꠝꠞ ꠝꠣꠏꠦ ꠔꠣꠞꠦ ꠢꠣꠚꠦ ꠘꠦꠍ ꠝꠣꠞꠦ ꠈꠞꠤ ꠗꠣꠞꠘꠣ ꠈꠞꠣ ꠅꠄ⁕ ꠘꠤꠢꠔ ꠍꠣꠁꠚꠥꠞ ꠞꠢꠝꠣꠘ ꠛꠞ꠆ꠘꠤ ꠁꠘꠤꠅꠘꠞ ꠀꠢꠝꠖꠙꠥꠞ ꠉꠣꠅꠞ ꠀꠛ꠆ꠖꠥꠟ ꠀꠢꠣꠖꠞ ꠚꠥꠀ⁕
ꠕꠣꠘꠤꠅ ꠡꠔ꠆ꠞ ꠔꠘꠦ ꠎꠣꠘꠣ ꠎꠣꠄ, ꠍꠣꠁꠚꠥꠞ ꠞꠢꠝꠣꠘ ꠚꠞꠤꠛꠣꠞꠞ ꠟꠉꠦ ꠍꠤꠟꠐ ꠕꠣꠈꠔꠣ⁕ ꠁꠖ ꠃꠚꠟꠇ꠆ꠇꠦ ꠉꠦꠍꠦ ꠛꠤꠞꠡꠁꠔꠛꠣꠞ ꠔꠣꠁꠘ ꠛꠣꠠꠤꠔ ꠀꠁꠘ⁕ ꠞꠣꠁꠔꠇꠥ ꠔꠣꠁꠘ ꠄꠈꠟꠣ ꠝꠣꠐꠤꠔ ꠊꠥꠝꠣꠁꠘ⁕
ꠉꠦꠍꠦꠈꠣꠁꠟ ꠡꠥꠇ꠆ꠇꠥꠞꠛꠣꠞ (৩১ꠡꠦ ꠎꠥꠟꠣꠁ) ꠝꠣꠖꠣꠘ ৩ꠐꠣ ꠚꠞ꠆ꠎꠘ꠆ꠔ ꠔꠣꠘ ꠇꠥꠘꠥ ꠟꠠꠍꠠ ꠝꠤꠟꠌꠤꠟ ꠘꠣ⁕ ꠛꠣꠖꠦ ꠚꠣꠠꠣꠚꠠꠡꠤ ꠊꠞꠞ ꠖꠞꠎꠣ ꠜꠣꠋꠉꠤ ꠜꠤꠔꠞꠦ ꠢꠣꠝꠣꠁꠀ ꠝꠣꠐꠤꠔ ꠔꠣꠞ ꠟꠣꠡ ꠚꠠꠤ ꠕꠣꠈꠔꠦ ꠖꠦꠈꠁꠘ⁕ ꠔꠣꠞ ꠈꠝꠞꠞ ꠈꠣꠘ꠆ꠖꠣꠔ ꠢꠣꠚꠞ ꠘꠦꠍꠞ ꠖꠣꠉ ꠞꠁꠍꠦ⁕
ꠛꠞ꠆ꠘꠤ ꠁꠘꠤꠅꠘꠞ ꠜꠣꠞꠚꠣꠅꠀ ꠌꠤꠀꠞꠝꠦꠘ ꠡꠣꠢꠣꠛ ꠃꠖ꠆ꠖꠤꠘ ꠉꠦꠍꠦꠈꠣꠁꠟ ꠡꠥꠇ꠆ꠇꠥꠞꠛꠣꠞ ꠞꠣꠁꠔ ꠈꠁꠘ, ꠚꠄꠟꠣꠛꠣꠄ ꠝꠘꠈꠞꠣ ꠅꠞ- ꠢꠣꠚꠞ ꠈꠣꠝꠠꠦ ꠍꠣꠁꠚꠥꠞꠞ ꠝꠃꠔ ꠅꠁꠍꠦ⁕
ꠛꠠꠟꠦꠈꠣ ꠕꠣꠘꠣꠞ ꠚꠥꠟꠤꠡ ꠚꠞꠤꠖꠞ꠆ꠡꠇ (ꠔꠖꠘ꠆ꠔ) ꠞꠔꠘ ꠖꠦꠛꠘꠣꠕꠦ ꠈꠁꠘ, ꠚꠄꠟꠣꠛꠣꠄ ꠢꠣꠚꠦ ꠈꠣꠝꠠꠣꠁꠍꠦ ꠈꠞꠤ ꠝꠘꠈꠞꠣ ꠅꠞ⁕
