শুরমা ফারর খবর ছিলটি জবানে ছিলটর খবর
Related Articles
ꠇꠥꠘꠥ ꠄꠈ ꠀꠞꠣꠔ ꠄꠈ ꠟꠣꠈꠞꠤꠚꠣꠞꠞꠣꠄ ꠞꠥꠎ ꠟꠣꠈꠞꠤ ꠈꠣꠐꠣꠔ ꠎꠣꠁꠔ ⁕ ꠛꠦꠐꠣꠉꠥꠔꠣ ꠎꠦ ꠉꠞꠤꠛ ꠀꠍ꠆ꠟ ⁕ ꠞꠥꠎ ꠟꠣꠈꠞꠤ ꠛꠦꠍꠤꠀ ꠎꠦꠔꠣ ꠞꠥꠎꠤ ꠅꠁꠔ, ꠅꠔꠣ ꠖꠤꠀ ꠇꠥꠘꠥ ꠍꠥꠞꠔꠦ ꠈꠣꠁꠀ-ꠚꠤꠘꠖꠤꠀ ꠛꠣꠍꠔ ⁕ ꠄꠈꠖꠤꠘ ꠄꠈ ꠉꠣꠋ ꠚꠣꠞ ꠛꠦꠐꠣ ꠟꠣꠈꠞꠤ ꠈꠣꠐꠣꠔ ꠉꠦꠍꠤꠟ ⁕ ꠢꠘ ꠉꠤꠀ ꠎꠦꠁꠔ ꠉꠣꠍ ꠄꠈꠍꠣꠔ ꠍꠦꠖ ꠝꠣꠞꠍꠦ, ꠅꠃ ꠡꠝꠄ ꠛꠦꠐꠣꠞ ꠀꠔ ꠔꠘꠦ ꠚꠤꠍꠇꠤꠀ ꠇꠥꠠꠣꠟ ꠈꠣꠘ ꠉꠤꠀ ꠉꠣꠋꠉꠞ ꠘꠤꠘꠅ ꠚꠞꠤꠎꠣꠄ ⁕ ꠉꠣꠋꠉ ꠁꠇꠣꠘ ꠄꠈꠛꠣꠄ ꠎꠦꠟꠣꠘ ꠉꠞꠣꠘꠣꠟꠣ ꠀꠍ꠆ꠟ, ꠀꠞꠛꠣꠄ ꠉꠣꠋꠉꠅ ꠇꠥꠝꠁꠞꠞꠅ ꠒꠞꠜꠄ ꠀꠍ꠆ꠟ ⁕ ꠎꠦꠉꠔꠤꠇꠦ ꠘꠤꠞꠥꠚꠣꠄ ꠅꠁꠀ ꠟꠣꠈꠞꠤꠈꠣꠐꠞꠣꠄ ꠉꠣꠍꠞ ꠎꠞꠅ ꠛꠁꠀ ꠈꠣꠘꠔꠦ ꠟꠣꠉꠟ ⁕
ꠛꠦꠐꠣ ꠅꠔ ꠉꠞꠤꠛ ꠀꠍ꠆ꠟ ꠎꠦ ꠀꠞꠈꠣꠘ ꠇꠥꠠꠣꠟ ꠅ ꠎꠦ ꠟꠁꠔ ꠁ ꠝꠥꠖꠔ ꠀꠍꠤꠟ ꠘꠣ ⁕ ꠔꠃ ꠇꠤꠔꠣ ꠈꠞꠣ ꠎꠣꠄ, ꠉꠣꠍꠞ ꠔꠟꠦ ꠛꠁꠀ ꠅꠈꠣꠘ ꠅ ꠗꠥꠘ ꠈꠞꠣꠔ ꠀꠍ꠆ꠟ ⁕ ꠎꠔꠃ ꠗꠥꠘ ꠗꠞꠦ ꠔꠔꠃ ꠍꠃꠇ ꠛꠣꠁꠀ ꠚꠣꠘꠤ ꠚꠞꠦ ⁕
ꠅꠟꠣꠘ ꠄꠈꠔꠤꠛꠂꠟ ꠎꠣꠃꠀꠉꠤ ꠛꠣꠖꠦ ꠀꠈꠔꠣ ꠖꠦꠃꠟꠣ ꠄꠉꠥ ꠉꠣꠋꠉꠞ ꠝꠥꠞ ꠔꠘꠦ ꠜꠣꠁꠀ ꠔꠣꠞꠦ ꠎꠤꠇꠣꠄ, ꠈꠣꠘꠞꠣꠄ ꠈꠦꠘꠦ ꠛꠣ ꠔꠥꠝꠤ?
ꠟꠣꠈꠞꠤꠚꠣꠞꠞꠣꠄ ꠈꠁꠟ, ꠝꠥꠁ ꠎꠦ ꠉꠞꠤꠛ, ꠝꠞ ꠇꠥꠠꠣꠟ ꠈꠣꠘꠔꠣ ꠚꠣꠘꠤꠔ ꠚꠞꠤ ꠉꠦꠍ, ꠅꠃ ꠈꠣꠘꠖꠤꠀꠞ ⁕
ꠖꠦꠃꠟꠣꠄ ꠈꠁꠟ, ꠅꠢ ꠀꠁꠌ꠆ꠌꠣ, ꠔꠥꠝꠣꠞ ꠇꠥꠠꠣꠟ ꠝꠥꠁ ꠀꠘꠤꠀ ꠖꠤꠟꠣꠁꠞꠣꠝ, ꠘꠣ ꠈꠣꠘꠖꠤꠀ ꠢꠣꠔ ꠅꠁꠎꠣꠃ ꠔꠥꠝꠤ ⁕ ꠅꠈꠣꠘ ꠈꠁꠀꠃ ꠚꠐꠈꠞꠤ ꠉꠣꠋꠉ ꠜꠥꠞ ꠖꠤꠀ ꠄꠉꠥ ꠡꠥꠘꠣꠞ ꠇꠥꠠꠣꠟ ꠀꠘꠤꠀ ꠖꠦꠃꠟꠣꠄ ꠢꠤꠞꠤ ꠎꠤꠇꠣꠁꠟ, ꠅꠉꠥ ꠘꠤ ꠔꠥꠝꠣꠞ?
ꠟꠣꠈꠞꠤꠈꠣꠐꠞꠣꠄ ꠜꠣꠟꠣꠝꠘ꠆ꠔꠦ ꠍꠣꠁꠀ ꠎꠥꠀꠚ ꠖꠤꠟ, ꠘꠣ ꠘꠣ, ꠁꠉꠥ ꠝꠞ ꠘꠣꠄ ⁕
ꠟꠉꠦꠟꠉꠦ ꠖꠦꠃꠟꠣꠄ ꠢꠤꠞꠛꠣꠞ ꠚꠣꠘꠤꠔ ꠜꠥꠞ ꠖꠤꠀ ꠄꠈꠣꠘ ꠞꠥꠚꠣꠞ ꠇꠥꠠꠣꠟ ꠀꠘꠟ ꠀꠞ ꠔꠣꠘꠞꠦ ꠀꠉꠞ ꠟꠣꠈꠣꠘ ꠎꠤꠇꠣꠁꠟ, ꠔꠦ ꠅꠈꠣꠘ ꠘꠤ ꠔꠥꠝꠣꠞ?
ꠟꠣꠈꠞꠤꠈꠣꠐꠞꠣꠄ ꠢꠤꠞꠛꠣꠞ ꠜꠣꠟꠣꠝꠘ꠆ꠔꠦ ꠟꠣꠞꠤꠍꠣꠞꠤ ꠍꠣꠁꠀ ꠎꠥꠀꠚ ꠖꠤꠟ, ꠘꠣ ꠘꠣ ꠛꠣ, ꠁꠉꠥꠅ ꠝꠞ ꠘꠣꠄ ⁕
ꠛꠣꠖꠦ ꠖꠦꠃꠟꠣꠄ ꠀꠞꠛꠣꠞ ꠜꠥꠞ ꠖꠤꠀ ꠟꠥꠀꠞ ꠄꠉꠥ ꠇꠥꠠꠣꠟ ꠀꠘꠤꠀ ꠛꠦꠐꠣꠞꠦ ꠖꠦꠈꠣꠁꠟ ⁕ ꠟꠣꠈꠞꠤꠚꠣꠞꠞꠣꠄ ꠢꠦꠡꠝꠦꠡ ꠘꠤꠎꠞ ꠇꠥꠠꠣꠟ ꠈꠣꠘꠔꠣ ꠍꠤꠘ꠆ꠔ ꠚꠣꠞꠤꠀ ꠇꠥꠡꠤꠄ ꠈꠁꠟ, ꠅꠄ, ꠅꠈꠣꠘꠔꠣ ꠃ ꠝꠞ ⁕
ꠟꠣꠈꠞꠤꠈꠣꠐꠞꠣꠞ ꠁꠝꠣꠘꠖꠣꠞꠤ ꠖꠦꠇꠤꠀ ꠖꠦꠃꠟꠣꠞ ꠝꠘꠛꠞꠤ ꠉꠦꠟ ⁕ ꠖꠦꠃꠟꠣꠄ ꠛꠦꠐꠣꠞꠦ ꠔꠣꠞ ꠇꠥꠠꠣꠟ ꠔ ꠖꠤꠟꠃ, ꠟꠉꠦ ꠡꠥꠘꠣꠞ ꠀꠞ ꠞꠥꠚꠣꠞ ꠇꠥꠠꠣꠟ ꠖꠄꠈꠣꠘ ꠅ ꠛꠟꠘ ꠖꠤꠀ ꠚꠣꠘꠤꠞ ꠝꠣꠏꠦ ꠝꠤꠟꠣꠁ ꠉꠦꠟ ⁕
ꠅꠔꠈꠣꠘ ꠡꠥꠘꠣ ꠀꠞ ꠞꠥꠚꠣ ꠚꠣꠁꠀ ꠟꠣꠈꠞꠤꠈꠣꠐꠞꠣ ꠛꠦꠐꠣ ꠉꠞꠤꠛꠤ ꠢꠣꠟꠔ ꠔꠘꠦ ꠅꠛꠍꠔꠣꠡꠣꠟꠤ ꠅꠁꠉꠦꠟ ⁕ ꠅꠃ ꠇꠥꠠꠣꠟ ꠖꠄꠈꠣꠘ ꠛꠦꠍꠤꠀ ꠛꠦꠐꠣꠄ ꠛꠣꠇꠇꠣ ꠐꠦꠈꠣ ꠚꠣꠁꠟ, ꠅꠔꠣ ꠖꠤꠀ ꠃ ꠛꠦꠐꠣꠞ ꠖꠤꠘ ꠡꠥꠇꠦ ꠡꠣꠘꠔꠤꠔꠦ ꠈꠣꠐꠔ ꠟꠣꠉꠟ ⁕
ꠁꠛꠣꠄꠖꠤ ꠅꠁꠟ ꠇꠤꠔꠣ, ꠀꠞꠦꠉꠥ ꠟꠣꠈꠞꠤꠚꠣꠞꠞꠣꠄ ꠔꠣꠞ ꠉꠦꠍ ꠔꠘꠦ ꠁ ꠉꠚ ꠢꠥꠘꠣꠞ ꠛꠣꠖꠦ ꠟꠣꠟꠍ ꠟꠣꠉꠤꠉꠦꠟ ⁕ ꠛꠣꠖꠦ ꠢꠃ ꠟꠣꠈꠞꠤꠚꠣꠞꠞꠣꠄ ꠄꠈꠖꠤꠘ ꠍꠤꠚꠤꠍꠤꠚꠤ ꠢꠃ ꠉꠣꠋꠉꠞ ꠈꠣꠘꠖꠣꠔ ꠉꠤꠀ ꠉꠣꠍ ꠈꠣꠐꠣꠔ ꠟꠣꠉꠤꠀ ꠁꠌ꠆ꠌꠣ ꠈꠞꠤ ꠛꠦꠐꠣꠞ ꠀꠔꠞ ꠇꠥꠠꠣꠟ ꠚꠣꠘꠤꠔ ꠍꠣꠞꠤ ꠖꠤꠟ ⁕ ꠄꠞꠛꠣꠖꠦ ꠛꠦꠐꠣꠄ ꠘꠥ ꠈꠣꠘꠖꠣꠞ ꠜꠣꠘ ꠗꠞꠟ ⁕ ꠛꠦꠐꠣꠞ ꠈꠣꠘꠖꠘ ꠢꠥꠘꠤꠀ ꠢꠃ ꠖꠦꠃꠟꠣꠞ ꠢꠤꠞꠛꠣꠞ ꠃꠖꠄ ꠅꠄ ⁕ ꠀꠉꠞ ꠟꠣꠈꠣꠘ ꠄꠛꠟꠣꠅ ꠚꠄꠟꠣ ꠄꠉꠥ ꠡꠥꠘꠣꠞ ꠇꠥꠠꠣꠟ ꠀꠘꠤꠀ ꠎꠤꠇꠣꠁꠟ, ꠄꠉꠥ ꠘꠤ ꠛꠣ ꠔꠥꠝꠣꠞ?
ꠞꠖꠤꠞ ꠚꠞꠦ ꠡꠥꠘꠣꠞ ꠇꠥꠠꠣꠟ ꠈꠣꠘ ꠏꠟꠝꠟꠣꠁꠀ ꠃꠐꠟ ⁕ ꠁꠇꠣꠘ ꠖꠦꠇꠤꠀ ꠃ ꠟꠣꠈꠞꠤꠚꠣꠞꠞꠣꠞ ꠍꠃꠇ ꠖꠄꠐꠣ ꠍꠈꠝꠈ ꠈꠞꠤꠀ ꠃꠐꠟ ⁕ ꠢꠦ ꠟꠉ ꠟꠉ ꠎꠥꠀꠚ ꠖꠤꠟ, ꠅꠄ ꠅꠄ, ꠅꠈꠐꠣ ꠃ ꠝꠟ ⁕
ꠖꠦꠃꠟꠣꠄ ꠚꠐꠐꠣꠞꠤ ꠎꠦ ꠒꠥꠛ ꠝꠣꠞꠤ ꠈꠁ ꠉꠦꠟ, ꠀꠞ ꠃꠐꠍꠦ ꠘꠣ ⁕
ꠟꠣꠟꠍꠣꠟꠣ ꠟꠣꠈꠞꠤꠚꠣꠞꠞꠣꠄ ꠢꠣꠄ ꠢꠣꠄ ꠈꠞꠔꠦ ꠟꠣꠉꠟ ꠀꠞ ꠘꠤꠎꠞ ꠍꠘ꠆ꠘꠣꠔ ꠘꠤꠎꠦ ꠃ ꠕꠣꠛꠣꠁꠔꠦ ꠟꠣꠉꠟ ⁕ ꠀꠞ ꠈꠁꠟ, ꠢꠣꠄ! ꠢꠣꠄ ꠞꠦ! ꠀꠘꠖꠥ ꠝꠣꠔꠣꠔ ꠉꠦꠟꠣꠝ ꠖꠥꠘ, ꠄꠞꠖꠣꠄ ꠃ ꠔ ꠅꠟꠣꠘ ꠢꠦꠖꠣꠔ ꠝꠤꠐꠍꠦ! ꠡꠥꠘꠣ ꠀꠞ ꠞꠥꠚꠣꠞ ꠇꠥꠠꠣꠟ ꠝꠤꠟꠣ ꠔ ꠖꠥꠞꠞ ꠈꠕꠣ, ꠘꠤꠎꠞ ꠃ ꠎꠦꠈꠣꠘ ꠀꠍꠤꠟ ꠅꠈꠣꠘ ꠃ ꠇꠥꠀꠁꠟꠣꠝ ⁕
