শুরমা ফারর খবর ছিলটি জবানে ছিলটর খবর
Related Articles
ꠍꠤꠟꠐꠤ ꠝꠣꠔ ꠈꠣꠘꠔꠣꠞꠦ ꠛꠣꠋꠟꠣꠖꠦꠡꠞ ꠖꠥꠍꠞꠣ ꠞꠣꠡꠐꠤꠅ ꠝꠣꠔꠞ ꠡꠣꠄ ꠀꠞ ꠍꠤꠟꠐ ꠒꠤꠜꠤꠡꠘꠞꠦ ꠘꠤꠏꠡꠣꠡꠘꠞ ꠖꠣꠛꠤ ꠏꠣꠘꠣꠁꠀ ꠟꠘꠒꠘꠞ ꠢꠣꠁ ꠇꠝꠤꠡꠘꠅ ꠍꠤꠟꠐꠤ ꠚꠣꠘ꠆ꠌꠣꠁꠔꠞ ꠝꠥꠟ ꠇꠝꠤꠐꠤꠞ ꠌꠤꠀꠞꠝꠦꠘ ꠘꠣꠍꠤꠞ ꠃꠖ꠆ꠖꠤꠘ ꠀꠢꠝꠖ ꠌꠃꠗꠥꠞꠤꠄ ꠚꠗꠣꠘꠝꠘꠔ꠆ꠞꠤ ꠡꠦꠈ ꠢꠣꠍꠤꠘꠣꠞ ꠐꠣꠁꠘ ꠚꠦꠡ ꠈꠞꠣꠞ ꠖꠣꠄ ꠄꠈꠐꠥꠝꠣ ꠁꠀꠖꠚꠔ꠆ꠞ ꠏꠝꠣ ꠖꠦꠁꠘ।
ꠁ ꠁꠀꠖꠘꠣꠝꠣ ꠡꠝꠛꠣꠞ (৩০ ꠅꠇꠐꠥꠛꠞ) ꠛꠤꠀꠘꠦ ꠟꠘꠒꠘꠞ ꠛꠣꠋꠟꠣꠖꠦꠡ ꠄꠝꠛꠦꠍꠤ ꠝꠤꠡꠘꠞ ꠢꠦꠒ ꠝꠣꠢꠚꠥꠏꠣ ꠍꠥꠟꠔꠣꠘꠣꠞ ꠀꠔꠅ ꠉꠍꠣꠘꠤ ꠅꠄ। ꠁꠀꠖꠘꠣꠝꠣ ꠈꠣꠘꠔꠣꠔ ꠉꠣꠃꠀ ꠅꠄ ꠍꠤꠟꠐꠤ ꠝꠣꠔ ꠀꠞ ꠍꠤꠟꠐꠤ ꠘꠣꠉꠞꠤ ꠟꠤꠚꠤ ꠄꠈꠦꠞꠦ ꠝꠤꠍꠝꠣꠞ ꠅꠁꠛꠣꠞ ꠚꠕꠅ। ꠁ ꠝꠣꠔꠞꠦ ꠡꠛꠞꠟꠣꠉꠤꠘ ꠀꠞ ꠛꠣꠋꠟꠣꠖꠦꠡꠞ ꠀꠞꠈꠣꠘ ꠝꠥꠟ ꠝꠣꠔꠞ ꠡꠣꠄ ꠖꠤꠟꠣꠃꠀ ꠅꠘꠇꠦ ꠡꠝꠄꠞ ꠛꠦꠚꠣꠞ। ꠛꠣꠋꠟꠣꠖꠦꠡꠞ ꠙꠦꠞꠣꠄ ১ ꠇꠥꠐꠤ ꠝꠣꠘꠡꠦ ꠍꠤꠟꠐꠤ ꠝꠣꠔꠦ ꠝꠣꠔꠂꠘ। ꠄꠘꠒꠤꠀ ꠀꠞ ꠖꠥꠘꠤꠀꠞ ꠀꠞ ꠖꠦꠡꠣꠁꠘ꠆ꠔ ꠄꠞꠔꠘꠦ ꠛꠟꠘ ꠝꠣꠁꠘꠡꠦ ꠍꠤꠟꠐꠤ ꠝꠣꠔꠖꠤ ꠝꠣꠔꠦ। ꠁ ꠝꠣꠔꠞ ꠅꠇ꠆ꠇꠞ ꠅꠁꠟ ꠉꠤꠀ ꠍꠤꠟꠐꠤ ꠘꠣꠉꠞꠤ ꠟꠤꠚꠤ। ꠍꠤꠟꠐꠤ ꠝꠣꠔ ꠈꠣꠘꠔꠣ ꠀꠞ ꠍꠤꠟꠐꠤ ꠘꠣꠉꠞꠤ ꠟꠤꠚꠤꠘ ꠛꠣꠋꠟꠣꠖꠦꠡ ꠡꠞꠈꠣꠞꠞ ꠡꠤꠇꠞꠤꠔꠤ ꠘꠣ ꠚꠣꠃꠀꠞ ꠉꠔꠤꠇꠦ ꠄꠈꠦꠞꠦ ꠝꠤꠍꠝꠣꠞ ꠅꠁꠏꠤꠛꠣꠞ ꠟꠣꠈ। ꠄꠞꠖꠣꠄ, ꠏꠔꠃ ꠏꠟꠖꠤ ꠚꠣꠞꠣ ꠏꠣꠄ ꠁ ꠝꠣꠔ ꠈꠣꠘꠔꠣꠞꠦ ꠖꠥꠍꠞꠣ ꠞꠣꠡꠐꠤꠅꠝꠣꠔ ꠝꠣꠘꠣꠞ ꠟꠣꠉꠤ ꠡꠣꠄ ꠖꠦꠃꠀ ꠏꠠꠥꠞꠤ।
ꠁꠀꠖꠘꠣꠝꠣꠔ ꠀꠞꠅ ꠉꠣꠃꠀ ꠅꠁꠍꠦ ꠏꠦꠘ ꠘꠣ-ꠚꠥꠞꠣꠘꠤ ꠗꠘꠖꠃꠟꠟꠦ ꠟꠦꠚꠐꠣꠁꠟ ꠍꠤꠟꠐ ꠒꠤꠜꠤꠡꠘꠞꠦ ꠘꠤꠏꠡꠣꠡꠘꠞ ꠏꠤꠝꠝꠣꠄ ꠖꠦꠃꠀ ꠖꠞꠈꠣꠞ।
ꠁꠀꠖꠘꠣꠝꠣꠔ ꠛꠣꠋꠟꠣꠖꠦꠡꠞ ꠁꠀꠖꠞꠣꠇꠥꠞ ꠁꠟꠦꠇꠡꠘ ꠟꠁꠀ ꠏꠦ ꠉꠞꠖꠤꠡ ꠍꠟꠦꠞ, ꠁꠔꠣ ꠡꠝꠤꠟ ꠈꠞꠣꠞ ꠖꠣꠄ “ꠍꠤꠟꠐꠤ ꠚꠣꠘ꠆ꠌꠣꠁꠔ” ꠅꠞ ꠚꠞꠣꠝꠤꠡ ꠅꠁꠟ ꠜꠥꠐꠉꠣꠃꠀ ꠡꠞꠈꠣꠞ ꠇꠤ ꠚꠣꠍꠣꠚꠣꠍꠤ ꠘꠣꠈꠞꠞꠣ ꠡꠞꠈꠣꠞꠞ ꠟꠣꠉꠤꠘ ꠉꠘꠜꠥꠐ ꠈꠞꠤꠀ ꠉꠞꠖꠤꠡ ꠈꠣꠘ ꠔꠘꠦ ꠀꠍꠣꠘ ꠝꠤꠟꠣ।
ꠘꠣꠍꠤꠞ ꠃꠖ꠆ꠖꠤꠘ ꠀꠢꠝꠖ ꠌꠃꠗꠥꠞꠤꠄ ꠄꠞꠣꠉꠦ ꠎꠣꠔꠤꠡꠋꠉ ꠝꠤꠡꠘꠅ ꠅ ꠍꠤꠟꠐꠤ ꠝꠣꠔꠞ ꠟꠣꠉꠤꠘ ꠅꠟꠣꠘ ꠁꠀꠖꠘꠣꠝꠣ ꠚꠣꠑꠣꠁꠍꠟꠣ।
