শুরমা ফারর খবর ছিলটি জবানে ছিলটর খবর
Related Articles
ꠚꠂꠖ꠆ꠖ: ꠘꠤꠎ ꠝꠔꠟꠛꠤ [নিজ মতলবী]
____ꠞꠣꠎꠤꠘꠞ ꠛꠣꠚ ꠍꠟꠤꠝ ꠌꠃꠗꠥꠞꠤ [রাযীনর বাফ সলিম চৌধুরী]
ꠘꠤꠎ ꠝꠔꠟꠛꠤ ꠝꠣꠘꠥ ꠀꠍꠁꠘ
ꠢꠈꠟ ꠎꠣꠉꠣꠔ ꠜꠞꠣ
ꠛꠃꠔ ꠛꠍꠞ ꠟꠉꠦ ꠍꠟꠤꠀꠅ
ꠎꠣꠄ ꠘꠣ ꠁꠉꠥꠁꠘ ꠗꠞꠣ।
ꠘꠤꠎ ꠝꠔꠟꠛꠤ ꠝꠣꠘꠞ ꠀꠍꠦ
ꠛꠃꠔ ꠎꠣꠔꠞ ꠝꠥꠇꠥꠡ
ꠍꠣꠟ ꠍꠟꠘꠦ ꠗꠞꠣ ꠎꠣꠄ ꠘꠣ
ꠁꠔꠣꠞ ꠜꠤꠔꠞꠤ ꠖꠥꠡ।
ꠘꠤꠎ ꠝꠔꠟꠛꠤ ꠝꠣꠘꠥ ꠉꠥꠁꠘꠔꠦ
ꠄꠈꠐꠣ ꠎꠤꠘꠤꠡ ꠛꠥꠏꠁꠘ
ꠖꠥꠘꠤꠀ ꠎꠣꠃꠇ ꠎꠟꠤꠀ ꠚꠥꠠꠤꠀ
ꠔꠣꠞꠣꠃ ꠎꠦꠘ ꠛꠣꠍꠁꠘ।
ꠘꠤꠎ ꠝꠔꠟꠛꠤ ꠝꠣꠘꠞ ꠉꠚ
ꠜꠦꠈꠣ ꠟꠣꠉꠛꠣꠄ ꠢꠥꠘꠟꠦ
ꠞꠣꠁꠔ ꠚꠥꠀꠄ ꠔꠣꠞꠣꠞ ꠛꠣꠋꠉꠦ
ꠔꠣꠞꠣ ꠛꠥꠏꠤ ꠃꠑꠟꠦ।
ꠘꠤꠎ ꠝꠔꠟꠛꠤ ꠝꠣꠘꠥ ꠅꠈꠟꠦ
ꠚꠣꠠꠣ ꠝꠣꠞꠁꠘ ꠉꠘꠤꠀ
ꠀꠈꠟ ꠈꠇꠞꠤ ꠝꠥꠐꠤꠞ ꠜꠤꠔꠞꠦ
ꠢꠣꠞꠣꠁꠔꠣ ꠍꠣꠁꠘ ꠖꠥꠘꠤꠀ।
ꠘꠤꠎ ꠝꠔꠟꠛꠤ ꠝꠣꠘꠥ ꠁꠉꠥꠁꠘ
ꠜꠦꠈꠦ-ꠜꠣꠈꠦ ꠍꠟꠁꠘ
ꠚꠞꠞ ꠡꠝ꠆ꠙꠖ ꠈꠞꠍ ꠈꠞꠟꠦ
ꠖꠞꠣꠎ ꠖꠤꠟꠦ ꠈꠞꠁꠘ।
ꠘꠤꠎ ꠝꠔꠟꠛꠤ ꠝꠣꠘꠥ ꠎꠖꠤ
ꠗꠞꠔ ꠚꠣꠞꠦ ꠟꠉ
ꠝꠡꠣꠞ ꠟꠣꠈꠣꠘ ꠔꠥꠇꠣꠁ ꠖꠦꠈꠛ
ꠇꠥꠘꠛꠣꠄ ꠉꠦꠍꠦ ꠞꠉ।
ꠘꠤꠎ ꠝꠔꠟꠛꠤ ꠝꠣꠘꠞ ꠈꠕꠣ
ꠃꠁꠟꠤꠀꠝ ꠄ ꠈꠁꠘ
ꠁꠘꠍꠣꠘ ꠎꠣꠔꠤꠞ ꠟꠣꠉꠤ ꠔꠣꠞꠣ
ꠐꠣꠐꠣ ꠙꠠ꠆ꠒꠣ ꠅꠁꠘ।
ꠘꠤꠎ ꠝꠔꠟꠛꠤ ꠝꠣꠘꠞ ꠎꠔ
ꠈꠣꠄꠎ-ꠈꠣꠔꠤꠞ ꠀꠍꠁꠘ
ꠍꠦꠇꠣ ꠈꠣꠁꠀ ꠄꠞꠣ ꠟꠣꠄꠟꠣꠄ
ꠘꠣꠟꠦ ꠘꠣꠟꠦ ꠀꠐꠁꠘ।
ꠘꠤꠎ ꠝꠔꠟꠛꠤꠞ ꠝꠣꠔ ꠢꠥꠘꠤꠀ
ꠉꠥꠘꠤ ꠝꠣꠘꠡꠦ ꠈꠁꠘ
ꠔꠣꠞꠣꠞ ꠝꠔꠟꠛ ꠃꠖ꠆ꠖꠣꠞ ꠅꠁꠟꠦꠃ
ꠢꠞꠤꠀ ꠉꠤꠀ ꠜꠁꠘ।
ꠘꠤꠎ ꠝꠔꠟꠛꠤ ꠝꠣꠘꠥ ꠕꠣꠇꠤ
ꠢꠞꠤꠀ ꠕꠣꠇꠤꠅ ꠢꠈꠟꠦ
ꠘꠣꠁꠟꠦ ꠛꠥꠏꠛꠣꠄ ꠝꠤꠐꠣ ꠝꠣꠔꠞ
ꠍꠣꠐ꠆ꠐꠣꠞ ꠝꠣꠏꠦ ꠚꠠꠟꠦ।
ꠘꠤꠎ ꠝꠔꠟꠛꠤꠞ ꠑꠉꠣ ꠕꠣꠇꠤ
ꠀꠟ꠆ꠟꠣꠄꠎ ꠛꠣꠍꠣꠁ ꠞꠣꠈꠃꠇ
ꠖꠥꠀ ꠈꠞꠤ ꠔꠣꠞꠣꠞ ꠜꠤꠔꠞꠦꠅ
ꠀꠈꠟ ꠛꠥꠖ꠆ꠖꠤ ꠅꠃꠇ।
