শুরমা ফারর খবর ছিলটি জবানে ছিলটর খবর
Related Articles
ꠚꠂꠖ꠆ꠖ: ꠚꠤꠚꠞꠣꠞ ꠖꠥꠇ
ꠚꠂꠖ꠆ꠖꠉꠣꠞ: ꠇꠝꠞ ꠃꠖ꠆ꠖꠤꠘ ꠟꠡ꠆ꠇꠞ
ꠀꠁꠎ ꠎꠦꠔꠥꠇꠥ ꠉꠦꠡꠟꠣꠝ ꠛꠤꠍꠞꠣꠔ ꠍꠦꠞꠣꠔ ꠚꠣꠘꠤ ꠖꠦꠅꠀꠔ
ꠀꠈꠔꠣ ꠖꠦꠈꠤ ꠚꠤꠚꠞꠣ ꠈꠎꠐꠣꠎ ꠈꠥꠖꠤꠔ꠆ꠞꠣ ꠄꠈꠐꠣ ꠉꠣꠔ
ꠝꠣꠐꠤꠞ ꠖꠟꠣ ꠛꠁꠎꠣ ꠛꠁꠎꠣ ꠖꠥꠞꠁ ꠘꠤꠎꠣ ꠕꠁꠔ꠆ꠞꠣ
ꠝꠥꠇꠦ ꠝꠥꠇꠦ ꠝꠥꠇ ꠟꠣꠉꠣꠁꠎꠣ ꠇꠤꠔꠣ ꠔꠣꠞꠣ ꠈꠁꠔ꠆ꠞꠣ।
ꠈꠣꠘ ꠚꠣꠔꠣꠁꠎꠣ ꠢꠥꠘꠤꠎꠣ ꠖꠦꠈꠤ ꠖꠣꠞꠥꠘ ꠉꠤꠎꠣꠘꠤ ꠝꠣꠔ
ꠝꠣꠕꠣ ꠛꠠ ꠚꠤꠚꠞꠣ ꠄꠉ꠆ꠉꠦ ꠖꠦꠞ ꠃꠛꠣ ꠟꠣꠔ।
ꠈꠂꠟꠧ ꠒꠣꠇꠤ ꠇꠥꠖꠤ ꠚꠤꠚꠞꠣ ꠛꠠ ꠐꠥꠇꠞꠣ ꠘꠤꠡꠟꠦ
ꠉꠣꠔ ꠈꠥꠖꠤꠔꠦ ꠞꠁꠛꠣ ꠢꠈꠟ ꠉꠦꠞꠣꠘ꠆ꠐꠤ ꠘꠥ ꠖꠤꠡꠟꠦ।
ꠔꠞ ꠁꠉꠥꠘ ꠀꠁꠎ ꠌꠣꠁꠎꠣ ꠖꠦꠈ꠆ꠍꠣꠁ ꠢꠞꠤ ꠢꠞꠤ ꠎꠣꠁꠔ꠆ꠞꠣ
ꠛꠟ ꠖꠦꠃꠀ ꠔ ꠖꠥꠞꠁꠞ ꠇꠕꠣ ꠃꠟ꠆ꠐꠣ ꠛꠖꠘꠣꠝ ꠉꠣꠁꠔ꠆ꠞꠣ।
ꠟꠣꠟꠒꠣꠁꠎꠣꠞꠦ ꠇꠁꠟꠧ ꠒꠣꠇꠤ ꠛꠠ ꠉꠚ ꠘꠥ ꠖꠤꠟꠦ
ꠜꠣꠁꠎꠣꠁꠘ ꠔꠞ ꠀꠁꠎ ꠉꠦꠟꠣ ꠈꠣꠘꠧ ꠐꠥꠇꠞꠣ ꠛꠠ ꠘꠤꠟꠦ।
ꠀꠁꠎꠉꠥ ꠀꠝꠣꠞ ꠛꠠ ꠛꠤꠙꠖ ꠉꠣꠔ ꠇꠥꠖꠣ ꠔꠧ ꠟꠣꠉꠦ
ꠖꠟ ꠖꠦꠈꠣꠁꠎꠣ ꠐꠥꠇꠞꠣ ꠈꠣꠁꠎꠣ ꠀꠁꠎꠉꠥ ꠔꠣꠞꠣ ꠜꠣꠉꠦ।
ꠚꠞꠤꠘꠞ ꠑꠦꠋ ꠝꠣꠍꠞ ꠢꠣꠒ꠆ꠒꠤ ꠎꠦꠔꠣꠃ ꠚꠣꠁꠡꠟꠣꠝ ꠛꠣꠐꠧ
ꠢꠣꠔꠇꠣꠝꠠꠤꠎꠦ ꠘꠤꠟꠣ ꠈꠣꠁꠟꠣ ꠀꠁꠎꠉꠥ ꠔꠣꠞꠣꠅ ꠢꠣꠐꠧ।
ꠁꠛꠣꠞ ꠇꠤꠘ꠆ꠔꠥ ꠍꠤꠘꠌꠤ ꠜꠣꠟꠣ ꠝꠔꠟꠛ ꠍꠥꠐ꠆ꠐꠣꠞ ꠙꠣꠟ
ꠉꠧꠟ ꠅꠁꠎꠣ ꠈꠣꠁꠎꠣ ꠛꠣꠖꠦ ꠛꠣꠎꠣꠁꠘ ꠃꠟ꠆ꠐꠣ ꠔꠣꠟ।
ꠅꠔꠣ ꠈꠁꠎꠣ ꠉꠣꠁꠟꠣꠞ ꠈꠣꠟꠤ ꠝꠥꠇꠧ ꠖꠟꠣꠞ ꠉꠥꠐꠤ
ꠚꠤꠚꠞꠣꠞ ꠘꠦꠔꠣꠞ ꠉꠣꠁꠟ ꠢꠥꠘꠤꠎꠣ ꠀꠐꠥꠔ ꠜꠞ ꠖꠤ ꠃꠑꠤ।
