শুরমা ফারর খবর ছিলটি জবানে ছিলটর খবর
Related Articles
ꠝꠣꠟꠖꠤꠚꠞ ꠛꠣꠖꠦ ꠛꠣꠋꠟꠣꠖꠦꠡꠅ ꠄꠘ꠆ꠒꠤꠀ ꠀꠃꠐ ꠙ꠆ꠞꠉ꠆ꠞꠣꠝ ꠡꠥꠞꠥ ꠅꠁꠟꠦ ꠖꠦꠡꠅ ꠄꠘ꠆ꠒꠤꠀꠞ ꠘꠣꠘꠣꠘ ꠎꠥꠟꠥꠝ, ꠎꠛꠞꠖꠍ꠆ꠔꠤꠝꠥꠟꠇ ꠈꠣꠝꠞ ꠈꠕꠣ ꠝꠣꠘꠡꠣꠁꠘ꠆ꠔꠦ ꠢꠋꠇꠦ ꠟꠁꠀ ꠀꠁꠔꠣ ꠕꠣꠈꠂꠘ ⁕ ꠎꠦ ꠉꠔꠤꠇꠦ ꠁ ꠇꠦꠝꠙꠦꠁꠘꠞ ꠈꠛꠞ ꠀꠟ-ꠎꠣꠎꠤꠞꠣ ꠡꠁꠔꠦ ꠛꠤꠖꠦꠡꠤ ꠈꠛꠞꠞ ꠈꠣꠉ꠆ꠎ ꠅ ꠍꠣꠚꠣ ꠅꠄ ⁕
ꠛꠣꠋꠟꠣꠖꠦꠡꠞ ꠊꠞꠥꠀ ꠛꠤꠡꠄꠅ ꠄꠘ꠆ꠒꠤꠀꠞ ꠀꠞꠅ ꠄꠉꠥ ꠘꠎꠤꠞꠛꠤꠢꠤꠘ ꠀꠔꠖꠦꠃꠀꠞ ꠈꠕꠣ ꠎꠣꠘꠣꠁꠀ ꠝꠣꠘꠡꠦ ꠘꠣꠘꠣꠘ ꠝꠣꠔꠣꠝꠣꠔꠤ ꠈꠞꠞꠣ ⁕ ꠈꠈꠖꠤꠘ ꠀꠉꠦ ꠝꠣꠘꠡꠞ ꠝꠣꠔꠣꠝꠣꠔꠤꠄ ꠛꠣꠞꠂꠀ ꠀꠄ ꠄꠘ꠆ꠒꠤꠀꠄ ꠇꠤꠟꠣꠘ ꠛꠣꠋꠟꠣꠖꠦꠡꠞ ꠀꠇꠣꠡꠡꠤꠝꠣ ꠛꠦꠛꠀꠞ ꠈꠞꠤꠀ ꠛꠌ꠆ꠌꠞ ꠄꠈ ꠛꠤꠟꠤꠅꠘ ꠒꠟꠣꠞ ꠟꠥꠐꠤꠀ ꠘꠦꠞꠉꠤ ⁕ ꠁ ꠚꠤꠞꠔꠤ ꠎꠣꠘꠣ ꠉꠦꠟ ꠛꠣꠋꠟꠣꠖꠦꠡꠞ ꠘꠤꠎꠡ꠆ꠡ ꠔꠦꠟ ꠍꠚꠣꠊꠞ ꠇꠤ ꠞꠤꠚꠣꠁꠘꠣꠞꠤ ꠍꠦꠐꠀꠙ ꠈꠞꠔꠦ ꠘꠣ ꠖꠤꠀ ꠁ ꠈꠣꠔ ꠔꠘꠦ ꠛꠍꠞꠦ ꠙꠦꠞꠣꠄ ꠄꠈ ꠛꠤꠟꠤꠅꠘ ꠒꠟꠣꠞ ꠞꠥꠎꠤ ꠈꠞꠦꠞ ꠄꠘ꠆ꠒꠤꠀꠄ ⁕
ꠄꠘ꠆ꠒꠤꠀ ꠡꠞꠈꠣꠞꠞ ꠄꠉꠥ ꠇꠘꠍꠣꠟꠐꠦꠘ꠆ꠍꠤ ꠖꠣꠉꠤꠞ ꠛꠣꠗꠣꠞ ꠈꠣꠞꠘꠦ ꠛꠣꠋꠟꠣꠖꠦꠡꠦ ꠄꠉꠥ ꠞꠤꠚꠣꠁꠘꠣꠞꠤ ꠍꠦꠐꠀꠙ ꠈꠞꠔ ꠚꠣꠞꠦꠞ ꠘꠣ ⁕ ꠎꠦꠉꠔꠤꠇꠦ ꠚꠞꠔꠦꠈ ꠚꠤꠞꠣ ꠛꠣꠋꠟꠣꠖꠦꠡꠞ ꠙꠦꠞꠣꠄ 10 ꠀꠎꠣꠞ ꠇꠥꠐꠤ ꠐꠦꠈꠣ ꠇꠤ ꠄꠈ ꠛꠤꠟꠤꠅꠘ ꠒꠟꠣꠞ ꠖꠦꠞꠤ ꠈꠞꠍ ꠅꠞ ⁕ ꠅꠔꠣ ꠘꠤ ꠔꠦ ꠈꠣꠟꠤ, ꠔꠕꠣꠈꠕꠤꠔ ꠐꠦꠘ꠆ꠒꠣꠞ ꠛꠣꠎꠤꠞ ꠏꠞꠤꠀꠄ ꠁ ꠐꠦꠈꠣꠈꠞꠤ ꠄꠘ꠆ꠒꠤꠀꠘ ꠛꠤꠜꠤꠘ꠆ꠘ ꠇꠝ꠆ꠙꠣꠘꠤꠄ ꠀꠔꠣꠁꠀ ꠘꠦꠞꠉꠤ ⁕
ꠎꠦꠢꠦꠔꠥ ꠛꠣꠋꠟꠣꠖꠦꠡ ꠘꠤꠎꠡ꠆ꠡ ꠞꠤꠚꠣꠁꠘꠣꠞꠤ ꠍꠦꠐꠀꠙ ꠈꠞꠤꠟꠔꠦ ꠚꠣꠞꠟꠦꠃ ꠁ 1 ꠛꠤꠟꠤꠅꠘ ꠒꠟꠣꠞ ꠅꠘꠂꠔꠤꠇꠜꠣꠛꠦ ꠈꠣꠝꠣꠘꠤꠞ ꠚꠕ ꠛꠘ꠆ꠗ ꠅꠁꠎꠤꠛ, ꠄꠟ꠆ꠟꠣꠉꠤ ꠄꠘ꠆ꠒꠤꠀꠄ ꠁꠇꠐꠣ ꠅꠁꠔꠦ ꠖꠦꠞ ꠘꠣ ⁕ ꠔꠄ ꠅꠘꠇꠦꠞ ꠛꠣꠋꠟꠣꠖꠦꠡꠤꠘ ꠔꠣꠁꠎ꠆ꠎꠛ ꠛꠘꠤꠉꠦꠍꠂꠘ ꠎꠦ ꠀꠝꠞꠣꠞ ꠡꠞꠇꠣꠞꠦ ꠄꠘ꠆ꠒꠤꠀꠘ ꠁꠔꠣ ꠎꠛꠞꠖꠍ꠆ꠔꠤ ꠇꠤ ꠛꠦꠁꠘꠍꠣꠚꠤ ꠛꠤꠡꠄ ꠐꠥꠡꠛ꠆ꠖ ꠈꠞꠦꠞꠦ ꠘꠣ ꠖꠦꠇꠤꠀꠘ⁕ ꠃꠚꠔꠦ ꠝꠣꠘꠡꠦ ꠀꠚꠍꠥꠍ ꠀꠞ ꠊꠤꠘ꠆ꠘꠣ ꠎꠣꠘꠣꠁꠀ ꠅꠘꠟꠣꠁꠘꠅ ꠘꠣꠘꠣꠘ ꠚꠔꠤꠛꠣꠖ ꠈꠞꠤꠀ ꠎꠣꠘꠣꠁꠞꠣ ꠎꠦ ꠡꠞꠇꠣꠞꠦ ꠘꠣꠘꠣ ꠜꠣꠛꠦ ꠘꠤꠎ ꠔꠘꠦ ꠄꠘ꠆ꠒꠤꠀꠞꠦ ꠞꠥꠎꠤꠞ ꠛꠦꠛꠍ꠆ꠔꠣ ꠈꠞꠤꠀ ꠖꠦꠞ ⁕ ꠛꠃꠔ ꠝꠣꠘꠡꠦ ꠎꠣꠘꠣꠁꠘ ꠅꠘꠦ ꠡꠞꠈꠣꠞꠞ ꠉꠦꠍ ꠔꠘꠦ ꠚꠖꠇ꠆ꠇꠦꠙ ꠀꠡꠣ ꠈꠞꠤꠀ ꠀꠞ ꠟꠣꠜ ꠘꠣꠁ ⁕ ꠝꠣꠘꠥꠡꠣꠁꠘ꠆ꠔꠦ ꠢꠤꠞꠤ ꠎꠣꠘꠣꠁꠘ ꠛꠣꠋꠟꠣꠖꠦꠡꠞ ꠖꠦꠡꠚꠦꠝꠤꠇ ꠝꠣꠘꠡꠞ ꠖꠣꠁꠔ꠆ꠔ ꠅꠁꠟ ꠉꠤꠀ ꠄꠘ꠆ꠒꠤꠀꠞ ꠁꠔꠣ ꠎꠛꠞꠖꠍ꠆ꠔꠤ ꠞꠥꠇꠤꠀ ꠖꠦꠃꠀ ⁕
