ꠛꠣꠋꠟꠣꠖꠦꠡꠞ ꠃꠔ꠆ꠞ-ꠚꠥꠛ ꠇꠥꠘꠣꠞ ꠄꠈꠣꠘ ꠎꠘꠚꠔ ꠡꠥꠘꠣꠝꠉꠂꠘ꠆ꠎꠞ ꠄꠈꠣꠘ ꠔꠣꠎꠣ ꠈꠛꠞ ꠅꠁꠟꠦꠅ ꠝꠥꠢꠥꠞ꠆ꠔꠦ ꠁ ꠈꠕꠣ ꠢꠣꠞꠣ ꠖꠦꠡ ꠜꠣꠁꠞꠣꠟ ꠅꠁꠎꠣꠄ ⁕ ꠍꠡꠣꠟ ꠝꠤꠒꠤꠀꠔ ꠝꠣꠘꠡꠦ ꠇꠤꠞꠣꠄ ꠎꠣꠘꠣꠁꠘ-
ꠡꠢꠤꠖ ꠡꠤꠞꠣꠎ ꠟꠦꠇꠞ ꠉꠣꠟꠣꠔ ꠁꠔ꠆ꠔꠣꠖꠤ ꠙꠄꠘ꠆ꠐ ꠘꠣꠝꠐꠣ ꠟꠦꠈꠣ ꠅꠁꠟ ꠖꠥꠘ?
ꠛꠃꠔꠦ ꠔ ꠛꠃꠔꠔꠣ ꠈꠁꠞꠣ ⁕ ꠈꠦꠃ ꠈꠁꠞꠣ ꠁꠉꠥ ꠕꠣꠈꠔ ꠘꠣꠄ, ꠈꠦꠃ ꠈꠁꠘ ꠐꠥꠞꠤꠡ꠆ꠐꠈꠟꠞ ꠡꠦꠛꠞ ꠟꠣꠉꠤ ꠛꠥꠟꠦ ꠁꠇꠣꠘ ꠈꠞꠣ ꠅꠁꠍꠦ ⁕
ꠝꠣꠘꠡꠦ ꠇꠥꠘꠥ ꠀꠘ꠆ꠖꠥꠍꠣꠘ꠆ꠖꠥ ꠇꠤꠞꠣ ꠖꠦꠈꠣꠁꠞꠣ ꠘꠤ, ꠄꠞ ꠈꠞꠦꠖꠤ ꠔ ꠄꠉꠥ ꠈꠣꠞꠘ ꠀꠍꠦ ⁕ ꠄꠝꠘꠦꠅ ꠁ ꠟꠦꠇꠞ ꠘꠣꠝ ꠛꠣꠇꠇꠣ ꠀꠉꠔꠘꠦ ꠄꠈ ꠞꠈꠝ ꠛꠤꠔꠟꠤꠀ ꠘꠤꠟꠣꠖ꠆ꠞꠤ ꠟꠦꠇ ꠅꠁ ꠉꠦꠍꠦ ⁕ ꠈꠣꠉꠎꠦ ꠈꠟꠝꠦ ꠁꠇꠐꠣ ꠡꠢꠤꠖ ꠡꠤꠞꠣꠎ ꠟꠦꠇ ꠅꠁꠟꠦꠅ ꠢꠈꠟꠞ ꠝꠥꠇ ꠁꠉꠥ ꠘꠤꠟꠣꠖ꠆ꠞꠤ ꠟꠦꠇ ꠘꠣꠝꠦꠃ ꠛꠦꠡꠤ ꠚꠞꠤꠌꠤꠔ ⁕ ꠝꠥꠁ ꠘꠤꠎꠦꠃ ꠄꠉꠎꠘ ꠐ꠆ꠞꠣꠜꠦꠟꠣꠞ⁕ ꠖꠦꠡꠞ ꠘꠣꠘꠣꠘ ꠎꠦꠉꠣꠔ ꠅ ꠀꠝꠣꠞ ꠎꠣꠃꠀ ꠅꠄ ⁕ ꠎꠦꠘꠅ ꠖꠦꠡꠞ ꠛꠦꠡꠤꠞꠜꠣꠉꠦꠃ ꠘꠤꠟꠣꠖ꠆ꠞꠤ ꠘꠣꠝꠦ ꠍꠤꠘꠦ, ꠁꠘ ꠅꠘꠦ ꠀꠞꠛꠣꠞ ꠁ ꠟꠦꠇꠞ ꠟꠣꠉꠣ ꠀꠞꠦꠉꠥ ꠘꠄꠀ ꠘꠣꠝ ⁕ ꠎꠦꠈꠐꠣꠄ ꠀꠡꠟꠦ ꠃ ꠝꠣꠘꠡꠞ ꠇꠤꠞꠣ ꠔꠥꠟꠦ ⁕ ꠚꠣꠈꠣꠃꠞꠣꠁꠘ꠆ꠔꠞ ꠡꠦꠛꠞ ꠖꠣꠄ ꠁ ꠙꠄꠘ꠆ꠐꠞ ꠘꠣꠝ ꠡꠢꠤꠖ ꠡꠤꠞꠣꠎ ꠙꠄꠘ꠆ꠐ ꠘꠣꠄ ꠈꠣꠟꠤ ꠡꠤꠞꠣꠎ ꠙꠄꠘ꠆ꠐ ꠖꠤꠟꠦꠃ ꠅꠁꠔ ⁕
ꠅꠟꠣꠘ ꠘꠣꠄ ꠘꠤ? ꠁꠔ꠆ꠔꠣꠖꠤ ꠙꠄꠘ꠆ꠐ ꠖꠥꠘ ꠅꠁꠔ? ꠄꠞ ꠈꠞꠦꠖꠤ ꠝꠔꠟꠛ ꠇꠤꠔꠣ?
ꠎꠦꠞꠣ ꠄꠞ ꠚꠇꠇꠦ ꠀꠍꠂꠘ, ꠔꠣꠘꠔꠣꠘꠞ ꠐꠣꠁꠘ ꠚꠍ꠆ꠘ ꠞꠁꠟ ⁕
ꠝꠦꠉꠣꠎꠤꠘ ꠅꠘꠥꠡ꠆ꠐꠣꠘ ꠁꠔ꠆ꠔꠣꠖꠤ ꠄꠞꠣꠉꠦ ꠖꠦꠡꠞ ꠘꠣꠘꠣꠘ ꠚꠣꠈꠣꠘꠤꠞ ꠎꠦꠉꠣꠔ ꠈꠞꠣ ꠅꠁꠍꠦ, ꠔꠄ ꠖꠦꠡꠞ ꠇꠥꠘꠥꠈꠣꠘꠞ ꠚꠣꠈꠣꠘꠤꠞ ꠄꠟꠣꠇꠣꠔ ꠁꠔ꠆ꠔꠣꠖꠤꠞ ꠘꠣꠝꠦ ꠁꠔ꠆ꠔꠣꠖꠤ ꠙꠄꠘ꠆ꠐ ꠘꠣꠝ ꠞꠣꠈꠣ ꠅꠁꠍꠦ ꠘꠣ ⁕
ꠔꠦ ꠁꠇꠣꠘꠅ ꠖꠥꠘ ꠁꠟꠣꠘ ꠈꠞꠣ ꠅꠁꠔ? ꠛꠦꠛꠡꠣꠁ ꠇꠥꠘꠥ ꠡꠣꠞ꠆ꠔ ꠀꠍꠦ ꠘꠤ ꠅꠈꠣꠘ ꠎꠣꠘꠣꠁꠀ ꠛꠦꠝꠔꠣꠎ ꠅꠁꠀ ꠇꠤꠞꠣꠄ ꠝꠣꠘꠡꠦ ꠙꠥꠡ꠆ꠐ ꠈꠞꠔꠣ ꠕꠣꠈꠂꠘ ⁕ ꠔꠣꠞꠣ ꠎꠣꠘꠣꠁꠘ ꠁꠔꠣ ꠁꠐꠚꠣꠔ꠆ꠔꠞꠞ ꠉꠞꠣꠈꠣꠝ ꠚꠈꠞꠤꠔꠤꠚꠦꠝꠤꠘ꠆ꠔꠞ ꠐꠣꠁꠘ ꠇꠥꠘꠥꠟꠣꠈꠣꠘ ꠅ ꠝꠣꠘꠤꠀ ꠟꠁꠛꠣꠞ ꠘꠣꠄ ⁕ ꠄꠞꠖꠣꠄ, ꠎꠦꠟꠣꠘ ꠎꠔ ꠎꠟꠖꠤ ꠚꠣꠞꠣ ꠎꠣꠄ, ꠁꠔꠣ ꠢꠞꠣꠁꠀ ꠘꠤꠀ ꠄꠈꠎꠘ ꠛꠤꠞ ꠡꠢꠤꠖ ꠝꠥꠇ꠆ꠔꠤꠎꠥꠖ꠆ꠖꠣꠞ ꠘꠣꠝꠞꠦ ꠔꠟ ꠘꠣ ꠈꠞꠤꠀ ꠀꠞ ꠟꠦꠇ ꠅꠞ ꠡꠥꠘ꠆ꠖꠞ꠆ꠎ ꠞꠇ꠆ꠇꠣ ꠈꠞꠣꠔ ꠡꠛꠦ ꠡꠣꠖ ꠖꠦꠃꠇꠣ ⁕
ꠅꠃ ꠒꠣꠈꠦ ꠡꠣꠄ ꠖꠤꠀ ꠝꠣꠘꠡꠦ ꠝꠣꠔꠣꠝꠣꠔꠤ ꠎꠥꠞꠖꠣꠞ ꠈꠞꠦ ⁕ ꠢꠦꠡꠝꠦꠡ ꠝꠣꠘꠡꠞ ꠈꠣꠃꠞꠤ ꠀꠞ ꠝꠣꠔꠣꠝꠣꠔꠤꠄ ꠚꠡꠣꠡꠘꠦ ꠁꠔ꠆ꠔꠣꠖꠤ ꠙꠄꠘ꠆ꠐ [ityadi point – ইত্যাদি পয়েন্ট] ꠜꠣꠋꠉ꠆ꠔ ꠈꠞꠤꠀ ꠛꠣꠁꠖ꠆ꠖ ꠅꠄ ⁕