Breaking News
Home / ꠖꠦꠡꠞ ꠈꠛꠞ / ꠖꠦꠡꠎꠥꠞꠤ ꠉꠦꠡꠞ ꠛꠦꠔꠣꠁꠀ ꠡꠋꠇꠐ

ꠖꠦꠡꠎꠥꠞꠤ ꠉꠦꠡꠞ ꠛꠦꠔꠣꠁꠀ ꠡꠋꠇꠐ

ꠉꠦꠡ ꠡꠋꠇꠐ ꠝꠣꠐꠤꠞ ꠃꠘ꠆ꠖꠣꠟ ꠞꠣꠘ꠆ꠗꠣ [ꠍꠛꠤ ©ꠘꠦꠐ ꠔꠘꠦ]
ꠉꠦꠡꠞ ꠟꠣꠉꠤ ꠐꠣꠃꠘꠞ ꠝꠣꠘꠡꠦ ꠞꠣꠘꠗꠤꠔꠣ ꠚꠣꠞꠞꠣ ꠘꠣ, ꠈꠦꠃꠈꠦꠃ ꠀꠗꠣꠞꠣꠁꠔꠇꠥ ꠍꠥꠟꠣꠔ ꠈꠣꠘꠤ ꠛꠥꠀꠁꠍꠂꠘ ⁕ ꠖꠥꠁꠖꠤꠘ ꠔꠘꠦ ꠚꠔ꠆ꠞ ꠚꠔ꠆ꠞꠤꠇꠣꠔ ꠈꠛꠞ ꠅ ꠅꠞ ⁕ ꠖꠥꠇ꠆ꠇ ꠈꠡ꠆ꠐꠦ ꠝꠣꠘꠡꠦ ꠈꠣꠃꠞꠤ ꠈꠣꠁꠀ ꠍꠡꠣꠟ ꠝꠤꠒꠤꠀꠔ ꠝꠣꠐꠤꠞ ꠃꠘ꠆ꠖꠣꠟ ꠖꠤ ꠞꠣꠘꠗꠣꠞ ꠍꠛꠤ ꠜꠣꠁꠞꠣꠟ ꠈꠞꠤꠟꠣꠁꠍꠂꠘ ⁕

ꠡꠣꠞꠣ ꠖꠦꠡꠎꠥꠞꠤ ꠉꠦꠡꠞ ꠛꠦꠔꠣꠁꠀ ꠡꠋꠇꠐꠞ ꠖꠣꠄ ꠁꠘꠒ꠆ꠞꠣꠍꠐꠤꠎ ꠅꠈꠟꠅ ꠗꠡ ꠟꠣꠝꠍꠦ ⁕ ꠛꠤꠡꠦꠡ ꠈꠞꠤꠀ ꠉꠣꠎꠤꠙꠥꠞ ꠀꠞ ꠘꠣꠞꠣꠄꠅꠉꠂꠘ꠆ꠎꠞ ꠛꠤꠜꠤꠘ꠆ꠘ ꠚꠦꠐ꠆ꠐꠞꠤꠔ ꠄꠈꠦꠞꠦ ꠎꠤꠝ ꠗꠞꠤꠟ꠆ꠌꠦ ⁕ ꠉꠦꠡ ꠡꠋꠇꠐꠅ ꠉꠣꠎꠤꠚꠥꠞꠞ ꠇꠥꠘꠣꠛꠣꠠꠤ, ꠇꠣꠟꠤꠀꠈꠂꠞ, ꠇꠣꠡꠤꠝꠚꠥꠞ ꠀꠞ ꠄꠞ ꠈꠣꠘꠖꠣꠈꠣꠍꠣꠞ ꠄꠟꠣꠇꠣꠞ ꠛꠦꠡꠤꠞꠜꠣꠉ ꠚꠦꠐ꠆ꠐꠞꠤꠘ꠆ꠔ ꠛꠘ꠆ꠗ ꠅꠁꠛꠣꠞ ꠚꠕ ⁕ ꠉꠦꠍꠦ ꠢꠣꠚꠔꠣ ꠗꠞꠤ ꠁ ꠡꠋꠇꠐ ꠛꠦꠉꠔꠤꠇ ꠅꠁꠀ ꠃꠐꠍꠦ ⁕ ꠞꠥꠎꠉꠣꠞꠈꠟ ꠚꠦꠐ꠆ꠐꠞꠤꠔ ꠀꠁꠞꠣ ꠑꠤꠇ ꠃ, ꠇꠤꠘ꠆ꠔꠥꠇ ꠉꠦꠡ ꠡꠋꠇꠐꠞ ꠟꠣꠉꠤꠘ ꠈꠣꠝ ꠈꠞꠔꠣ ꠚꠣꠞꠞꠣ ꠘꠣ ⁕ ꠁꠛꠣꠄ ꠖꠥꠇꠞ ꠈꠕꠣ ꠀꠞ ꠇꠤꠔꠣ ꠈꠁ; ꠀꠝꠒꠣꠞ ꠍꠤꠟꠐꠞ ꠉꠦꠡ ꠖꠤꠀ ꠢꠣꠞꠣꠖꠦꠡ ꠍꠟꠟꠦꠅ ꠍꠤꠟꠐꠞ ꠘꠤꠎ ꠄꠟꠣꠇꠣꠞ ꠝꠣꠘꠡꠦ ꠄꠛꠔꠞꠤ ꠉꠦꠡ ꠚꠣꠁꠟꠣ ꠘꠣ ⁕

ꠎꠦꠔꠣꠄ ꠚꠦꠐ꠆ꠐꠞꠤ ꠝꠣꠟꠤꠇꠣꠁꠘ ꠚꠠꠤꠉꠦꠍꠂꠘ ꠛꠦꠚꠦꠍꠅ ⁕ ꠞꠥꠎ ꠔꠣꠘꠔꠣꠘꠞꠦ ꠟꠣꠈꠦ ꠛꠤꠈꠦ ꠟꠥꠇꠡꠣꠘ ꠖꠦꠃꠀ ꠟꠣꠉꠦꠞ ⁕ ꠉꠣꠎꠤꠚꠥꠞ ꠀꠞ ꠚꠔꠥꠟ꠆ꠟꠣꠔ ꠈꠈꠖꠤꠘ ꠗꠞꠤ ꠉꠦꠡꠞ ꠙ꠆ꠞꠦꠡꠣꠞ ꠡꠥꠁꠘ꠆ꠘꠔ ꠟꠣꠝꠤꠉꠦꠍꠦ ⁕ ꠎꠣꠔꠦ ꠉꠣꠞꠝꠦꠘ꠆ꠍ ꠚꠦꠐ꠆ꠐꠞꠤ, ꠒꠣꠁꠋ ꠚꠦꠐ꠆ꠐꠞꠤ, ꠁꠍ꠆ꠙꠤꠘꠤꠋ, ꠐꠦꠇ꠆ꠍꠐꠣꠁꠟ, ꠞꠤ-ꠞꠟꠤꠋ ꠝꠤꠟ ꠡꠢ ꠚꠦꠐ꠆ꠐꠞꠤꠘ꠆ꠔꠞ ꠈꠣꠝ ꠛꠘ꠆ꠗ ꠞꠁꠍꠦ ⁕ ꠎꠟꠖꠤ ꠁ ꠡꠝꠂꠡ꠆ꠡꠣꠞ ꠀꠍꠣꠘ ꠘꠣ ꠈꠞꠣ ꠅꠁꠟꠦ ꠛꠤꠖꠦꠡ ꠚꠣꠐꠣꠘꠤ ꠛꠦꠛꠡꠣꠔ ꠃꠛꠣ ꠗꠡ ꠟꠣꠝꠤꠎꠣꠃꠀꠞ ꠀꠡꠁꠋꠇꠣ ꠈꠞꠞꠣ ꠛꠦꠛꠡꠣꠁꠘꠔꠦ ⁕ ꠀꠞ ꠖꠦꠡꠞ ꠅꠞ꠆ꠕꠘꠤꠔꠤ ꠅ ꠔ ꠚꠥꠞꠣ ꠛꠦꠉꠔꠤꠇ ꠅꠁꠎꠤꠛ ⁕

ꠚꠦꠐ꠆ꠐꠞꠤꠞ ꠝꠣꠟꠤꠇ ꠅꠈꠟꠦ ꠎꠣꠘꠣꠁꠘ, ꠛꠄꠟꠣꠞ ꠍꠟꠣꠘꠤꠞ ꠟꠣꠉꠤ ꠚꠔꠤ ꠊꠘꠚꠥꠐꠅ ꠚꠘ꠆ꠒ ꠙꠤꠄꠍꠀꠁ ꠉꠦꠡꠞ ꠙ꠆ꠞꠦꠡꠣꠞ ꠕꠣꠈꠣ ꠖꠞꠈꠣꠞ ⁕ ꠎꠦꠎꠣꠉꠣꠔ ꠛꠃꠔ ꠚꠦꠐ꠆ꠐꠞꠤꠔ ꠙ꠆ꠞꠦꠡꠣꠞ ꠈꠝꠤꠀ ꠚꠔꠤ ꠊꠘꠚꠥꠐ ꠄꠈ ꠔꠘꠦ ꠖꠥꠁ ꠙꠤ’ꠄꠍ’ꠀꠁꠔ ꠀꠁꠀ ꠟꠣꠝꠤꠉꠦꠍ ⁕ ꠇꠥꠘꠥꠈꠣꠘꠅ ꠔ ꠡꠥꠁꠘ꠆ꠘꠔ ꠟꠣꠝꠣꠁꠟ ⁕ ꠔꠣꠞꠣ ꠈꠁꠘ, ꠄꠈꠛꠣꠄ ꠒꠟꠣꠞ ꠊꠣꠐꠔꠤ, ꠀꠞꠛꠣꠄ ꠉꠦꠡ ꠡꠋꠇꠐ ꠍꠟꠣꠔ ꠕꠣꠈꠟꠦ ꠁ ꠍꠦꠇ꠆ꠐꠞꠞ ꠃꠚꠞꠦ ꠛꠠ ꠄꠈ ꠊꠞꠖꠤꠡ ꠟꠣꠝꠤꠀ ꠀꠁꠛ꠆ꠛ ⁕

ꠚꠣꠡꠣꠚꠣꠡꠤ ꠉꠦꠡ ꠡꠋꠇꠐꠦ ꠛꠣꠡꠣꠀꠟꠣ ꠅꠈꠟꠦ ꠎꠦꠎꠣꠔ ꠢꠦꠖꠣꠔ ꠚꠣꠁꠞꠣ ⁕ ꠘꠣ ꠚꠣꠞꠔꠦ ꠛꠣꠁꠖ꠆ꠖ ꠅꠁꠀ ꠅꠘꠦ ꠛꠣꠡꠣ-ꠛꠣꠠꠤꠘ꠆ꠔ ꠞꠣꠘ꠆ꠗꠣꠛꠣꠞꠣ ꠝꠣꠐꠤꠞ ꠃꠘ꠆ꠖꠣꠟ ꠖꠤꠀ ꠍꠟꠦꠞ, ꠇꠥꠘꠥ ꠎꠦꠉꠣꠐ ꠍꠤꠟꠤꠘ꠆ꠒꠣꠞꠞ ꠉꠦꠡꠖꠤ ⁕ ꠍꠤꠟꠤꠘ꠆ꠒꠣꠞꠞ ꠄꠝꠘꠦꠅ ꠎꠦ ꠖꠣꠝ; ꠅꠘꠦ ꠔ ꠡꠥꠎꠥꠉ ꠚꠣꠁꠀ ꠍꠤꠟꠤꠘ꠆ꠒꠣꠞ ꠉꠦꠡ ꠛꠦꠛꠡꠣꠁꠘ꠆ꠔꠦ ꠖꠣꠝ ꠘꠤꠞꠣ ꠎꠣꠞ ꠎꠦꠟꠣꠘ ꠈꠥꠡꠤ ꠅꠟꠣꠘ ⁕ ꠎꠦꠔꠣꠞꠖꠣꠄ ꠛꠣꠡꠣꠀꠟꠣ ꠅꠈꠟꠦ ꠉꠥꠔꠚꠥꠟꠣꠁꠀ ꠀꠍꠂꠘ ⁕ ꠍꠤꠄꠘꠎꠤ ꠙꠣꠝ꠆ꠙ ꠅ ꠉꠦꠡ ꠡꠋꠇꠐ ⁕ ꠟꠣꠘꠤꠔ ꠉꠦꠡ ꠘꠣꠁ ⁕ ꠙ꠆ꠞꠣꠄ ꠚꠞꠔꠦꠈ ꠙꠣꠝ꠆ꠙꠣꠁꠘ꠆ꠔ ꠙ꠆ꠞꠣꠁꠜꠦꠐ ꠉꠣꠞꠤꠘ꠆ꠔꠞ ꠟꠣꠝ꠆ꠙꠣ ꠟꠣꠋꠉꠣꠁꠞ ꠖꠦꠈꠣ ꠎꠣꠁꠞ ⁕ ꠉꠦꠍꠦ ꠛꠥꠗꠛꠣꠞ ꠡꠞꠦꠎꠝꠤꠘꠅ ꠛꠤꠜꠤꠘ꠆ꠘ ꠚꠦꠐ꠆ꠐꠞꠤꠔ ꠀꠞ ꠛꠣꠡꠣꠛꠣꠞꠤꠔ ꠍꠇ꠆ꠇꠞꠖꠤꠀ ꠀꠞ ꠃꠚꠞ ꠎꠤꠝ꠆ꠝꠣꠖꠣꠞꠣꠁꠘ꠆ꠔꠞ ꠟꠉꠦ ꠝꠣꠔꠤꠀ ꠁꠔꠣ ꠔꠁꠔ꠆ꠔ ꠚꠣꠃꠀ ꠉꠦꠍꠦ ꠈꠞꠤꠀ ꠎꠣꠘꠣꠁꠍꠂꠘ ꠈꠛꠞꠤꠀ ꠅꠈꠟꠦ ⁕

ꠙꠦꠐ꠆ꠞꠛꠣꠋꠟꠣꠞ ꠃꠚꠞꠞ ꠍꠣꠈꠞꠤꠉꠤꠞꠞ ꠈꠕꠣꠝꠔꠅ ꠚꠐꠈꠞꠤꠀ ꠁ ꠡꠋꠇꠐ ꠔꠘꠦ ꠀꠍꠣꠘ ꠚꠣꠃꠀꠞ ꠡꠝ꠆ꠜꠣꠛꠘꠣ ꠘꠣꠁ ⁕ ꠘꠣꠞꠣꠄꠅꠉꠂꠘ꠆ꠎ ꠎꠃꠘꠅ ꠉꠦꠡ ꠛꠣꠐꠣ ꠛꠘ꠆ꠗ ꠞꠣꠇꠤꠀ ꠡꠣꠞ ꠝꠣꠘꠣꠘꠤꠔ ꠉꠦꠡ ꠖꠦꠃꠀ ꠅꠁꠞ ⁕ ꠎꠥꠖꠤꠘ ꠅ ꠡꠣꠞ ꠘꠣ ꠝꠣꠘꠣꠁꠀ ꠅ ꠀꠞꠈꠣꠘꠕꠘꠦ ꠀꠘꠣ ꠎꠣꠁꠔ ꠚꠣꠞꠦ, ꠇꠤꠘ꠆ꠔꠥꠇ ꠚꠦꠐ꠆ꠐꠞꠤꠘ꠆ꠔ ꠉꠦꠡꠞ ꠇꠥꠘꠥ ꠛꠤꠇꠟ꠆ꠚ ꠘꠣꠁ ⁕ ꠀꠝꠖꠣꠘꠤꠔ ꠇꠥꠘꠥ ꠇꠥꠘꠥ ꠎꠤꠘꠤꠡꠞ ꠛꠣꠘꠣꠘꠤꠞ ꠔꠘꠦꠅ ꠈꠞꠍ ꠈꠝ ꠚꠠꠦ ⁕ ꠅꠘꠦ ꠝꠣꠘꠡꠦ ꠈꠁꠞꠣ ꠡꠞꠈꠣꠞꠞꠦꠃ ꠑꠤꠇ ꠈꠞꠣ ꠟꠣꠉꠛ ꠇꠥꠘꠐꠣ ꠀꠉꠦ ꠎꠞꠥꠞꠤ ⁕

Rate this post

About Abu Sayeed

ꠝꠥꠁ ꠀꠛꠥ ꠍꠣꠁꠖ, ꠡꠥꠞꠝꠣ ꠚꠣꠞꠞ ꠈꠛꠞ ꠅꠄꠛꠍꠣꠁꠐꠞ ꠍꠣꠚꠣꠃꠞꠣ⁕ ꠛꠣꠋꠟꠣ ꠀꠞ ꠁꠋꠟꠤꠡ ꠚꠔꠞꠤꠇꠣꠁꠘ꠆ꠔ ꠟꠦꠈꠣꠟꠦꠇꠤꠞ ꠅꠜꠤꠉ꠆ꠉꠔꠣ ꠔꠘꠦ ꠝꠞ ꠝꠣꠁꠅꠞꠝꠣꠔ ꠍꠤꠟꠐꠤꠔꠦꠅ ꠟꠦꠈꠣꠞ ꠔꠣꠉꠤꠖ ꠛꠥꠗ ꠈꠞꠤ⁕ ꠅꠘꠟꠣꠁꠘꠅ ꠍꠤꠟꠐꠤ ꠅꠈꠟꠞ ꠟꠣꠉꠤ ꠝꠣꠉꠘꠣ ꠢꠤꠇꠣꠞ ꠟꠣꠈ ꠏꠤꠘꠤꠡ ꠛꠤꠡꠦꠡ ꠈꠞꠤ ꠍꠤꠟꠐꠤꠘ꠆ꠔꠞ ꠁꠔꠤꠀꠡ, ꠞꠍꠝ, ꠈꠣꠘꠤꠛꠘꠤ, ꠡꠣꠁꠔ꠆ꠔ ꠡꠛꠞ ꠀꠔ ꠀꠔ ꠚꠃꠍꠣꠘꠤꠞ ꠈꠣꠝ ꠈꠞꠞꠣꠝ, ꠏꠣꠔꠦ ꠁꠔꠣ ꠈꠣꠟꠤ ꠉꠛꠦꠡꠇ ꠅꠈꠟꠞ ꠐꠣꠁꠘ ꠘꠣ ꠕꠣꠇꠤꠀ ꠢꠈꠟꠞ ꠀꠔꠅ ꠉꠤꠀ ꠔꠣꠘ ꠚꠣꠄ⁕ ꠁꠔꠣ ꠖꠦꠇꠤꠀ ꠀꠞꠅ ꠝꠣꠘꠥꠡꠣꠁꠘ ꠀꠉꠥꠀꠁꠀ ꠀꠁꠘ⁕ ꠟꠉꠦ ꠕꠣꠈꠣꠞ ꠀꠞ ꠚꠣꠄꠚꠞꠣꠝꠤꠡ ꠖꠤꠀ ꠡꠣꠖ ꠖꠤꠛꠣꠞ ꠟꠣꠉꠤ ꠡꠛꠞꠦ ꠡꠥꠇꠥꠞ⁕

Check Also

ꠄꠘ꠆ꠒꠤꠀꠞ ꠛꠒꠣꠞꠞ ꠜꠤꠔꠞꠦ ꠚꠞꠤ ꠕꠣꠈꠣ ꠛꠣꠋꠟꠣꠖꠦꠡꠤ ꠚꠥꠀ ꠝꠣꠍꠥꠝ ꠀꠢꠝꠖꠞ (1☽) ꠟꠣꠡ ꠉꠍꠣꠘꠤ

ꠍꠤꠟꠐꠞ ꠈꠣꠘꠣꠁꠊꠣꠐ ꠃꠚꠎꠤꠟꠣꠞ ꠟꠣꠉꠣ ꠄꠘ꠆ꠒꠤꠀꠞ ꠛꠒꠣꠞꠞ ꠜꠤꠔꠞꠦ ꠚꠞꠤ ꠕꠣꠈꠣ ꠛꠣꠋꠟꠣꠖꠦꠡꠤ ꠡꠤꠀꠘ ꠚꠥꠀ ꠝꠣꠍꠥꠝ ꠀꠢꠝꠖꠞ (1☽) …