ꠢꠣꠄꠞꠦ ꠝꠎꠣꠞ ꠈꠣꠘꠤ [হায়রে মজার খানি]
———–ꠀꠎꠣꠖ ꠞꠢꠝꠣꠘ [আজাদ রহমান]
ꠢꠤꠖꠟ ꠢꠥꠇꠁꠘꠞ ꠍꠣꠔꠘꠤ ꠀꠞ
ꠃꠘꠣ ꠍꠣꠃꠟꠞ ꠜꠣꠔ,
ꠟꠣꠟ ꠈꠞꠤꠀ ꠝꠣꠈꠣꠁ ꠝꠣꠈꠣꠁ
ꠈꠣꠁꠟꠦ ꠛꠣꠠꠦ ꠎꠣꠔ।
ꠈꠍꠥꠞ ꠟꠔꠣ ꠈꠣꠑꠟ ꠛꠤꠍꠤ
ꠟꠉꠦ ꠁꠍꠣ ꠝꠣꠍ,
ꠁꠔꠣ ꠈꠣꠘꠤ ꠔꠁꠀ ꠈꠦꠘꠦ
ꠅꠛꠣꠄ ꠢꠛꠣꠄ ꠎꠣꠍ!
ꠢꠥꠞꠥ ꠝꠣꠍꠞ ꠍꠣꠟꠘꠞ ꠝꠣꠏꠦ
ꠀꠖꠣ ꠎꠣꠝꠤꠞ ꠖꠤꠟꠦ,
ꠝꠣ-ꠚꠥꠠꠤ ꠀꠞ ꠛꠣꠚꠦ ꠚꠥꠀꠄ
ꠡꠝꠣꠘ ꠔꠣꠟꠦ ꠉꠤꠟꠦ।
ꠛꠤꠞꠁꠘ ꠜꠣꠔꠞ ꠟꠉꠦ ꠎꠣꠞꠣ
ꠈꠣꠄ ꠘꠣ ꠁꠟꠤꠡ ꠜꠣꠎꠣ,
ꠁꠔꠣ ꠝꠣꠘꠥꠡ ꠢꠥꠇꠘꠣ ꠈꠁꠟꠎꠣ
ꠚꠤꠔ ꠅꠁꠔꠘꠣꠄ ꠔꠣꠎꠣ।
ꠢꠣꠔꠈꠞꠣꠖꠤ ꠉꠞꠥꠞ ꠝꠣꠋꠡ
ꠈꠣꠁꠍꠦ ꠘꠣ ꠎꠦ ꠚꠥꠀ,
ꠁꠉꠥ ꠚꠥꠞꠣ ꠈꠣꠑꠟ ꠘꠣꠄ
ꠛꠠꠎꠥꠞ ꠄꠈ ꠞꠥꠀ।
ꠃꠞꠤꠞ ꠟꠉꠦ ꠈꠣꠋꠟꠣ ꠝꠣꠍ
ꠢꠣꠄꠞꠦ ꠝꠎꠣꠞ ꠔꠞꠈꠣꠞꠤ,
ꠢꠣꠈꠣꠟꠥꠇꠤꠞ ꠉꠣꠟꠣꠔ ꠛꠣꠠꠤ
ꠅꠃꠀ ꠜꠤꠡꠘ ꠖꠞꠈꠣꠞꠤ।
ꠖꠣꠞꠇꠤꠘꠣ ꠀꠞ ꠝꠈꠣ ꠖꠤꠀ
ꠀꠝꠠꠣꠞ ꠛꠃꠟꠦꠞ ꠐꠦꠋꠉꠣ,
ꠈꠣꠠꠣꠈꠣꠠꠤ ꠟꠣꠉꠤꠎꠣꠁꠔ
ꠅꠁꠔ ꠈꠔ ꠛꠦꠋꠉꠣ।
ꠄꠝꠠꠣ ꠘꠣꠁꠟꠦ ꠈꠣꠍꠣ ꠔꠦꠔꠁ
ꠟꠉꠦ ꠢꠥꠞꠥ ꠝꠣꠍ,
ꠖꠦꠈꠤꠀ ꠛꠥꠏꠟꠣꠝ ꠇꠤꠔꠣꠞ ꠟꠣꠉꠤ
ꠘꠣꠈ ꠎꠥꠛꠠꠣꠁꠀ ꠈꠣꠍ
ꠀꠝꠞ ꠖꠤꠘꠞ ꠈꠣꠍꠣ ꠀꠝ
ꠟꠉꠦ ꠒꠤꠝꠣ ꠚꠥꠐꠤ,
ꠁꠎꠣꠔ ꠝꠎꠣꠞ ꠍꠣꠟꠘ ꠘꠣꠁ ꠀꠞ
ꠝꠤꠟꠦ ꠘꠣ ꠔꠣꠞ ꠎꠥꠐꠤ।
ꠝꠥꠇꠤꠞ ꠟꠉꠦ ꠁꠟꠤꠡꠣ ꠝꠣꠍ
ꠇꠤꠎꠣꠔ ꠝꠎꠣꠞ ꠈꠣꠘꠤ,
ꠛꠦꠡꠦꠛꠣ ꠄꠈ ꠊ꠆ꠞꠣꠘ ꠛꠣꠞꠁꠔ
ꠞꠣꠘꠔꠣ ꠀꠝꠣꠞ ꠘꠣꠘꠤ।
ꠈꠝꠟꠣ ꠎꠣꠝꠤꠞ ꠈꠣꠁꠀ ꠀꠉꠦ
ꠛꠣꠈꠟ ꠢꠥꠇꠣꠁ ꠔꠁꠔꠣ,
ꠝꠎꠣꠞ ꠄꠈꠐꠣ ꠊ꠆ꠞꠣꠘꠞ ꠟꠣꠉꠤ
ꠍꠣꠟꠘꠞ ꠝꠣꠏꠦ ꠖꠤꠔꠣ।
ꠉꠣꠁꠐ ꠝꠣꠞꠤꠀ ꠎꠖꠤ ꠞꠣꠘ꠆ꠖꠁꠘ
ꠘꠣꠟꠤ ꠚꠣꠔꠣꠞ ꠡꠥꠞꠥ,
ꠈꠣꠛꠣꠁ ꠎꠥꠖꠤ ꠜꠣꠟꠣ ꠈꠞꠤ
ꠝꠣꠘꠛꠣꠄ ꠝꠞꠦ ꠉꠥꠞꠥ।
ꠢꠥꠇꠘꠣ ꠃꠞꠤꠞ ꠛꠤꠍꠤ ꠜꠣꠎꠤꠀ
ꠈꠍꠥꠞ ꠍꠣꠟꠘꠅ ꠖꠤꠟꠦ,
ꠞꠥꠌꠤ ꠘꠣꠁ ꠎꠣꠞ, ꠈꠣꠁꠔꠘꠣꠄ ꠈꠄ
ꠢꠦꠅ ꠖꠦꠇꠤ ꠉꠤꠟꠦ।
ꠞꠥꠎꠐ ꠚꠣꠔꠣ ꠟꠉꠦ ꠖꠤꠀ
ꠃꠞꠤ ꠛꠤꠍꠤꠞ ꠓꠥꠚꠣ,
ꠈꠣꠘꠖꠣꠘꠤ ꠄꠈ ꠍꠣꠟꠘ ꠞꠦ ꠜꠣꠁ
ꠖꠦꠈꠟꠦ ꠍꠤꠠꠦ ꠢꠥꠚꠣ।
ꠖꠥꠗ, ꠖꠁ, ꠍꠥꠋꠉꠣ ꠚꠤꠑꠣ
ꠢꠈꠟꠞ ꠀꠍꠦ ꠍꠤꠘꠣ,
ꠍꠣꠃꠟꠞ ꠉꠥꠠꠣꠞ ꠝꠦꠠꠣ ꠚꠤꠑꠣ
ꠈꠣꠅꠀ ꠟꠣꠉꠦ ꠎꠣꠘꠣ।
ꠈꠔ ꠈꠁꠝꠥ ꠘꠣꠁ ꠇꠤꠘꠣꠞꠣ
ꠅꠁꠔꠘꠣꠄ ꠞꠦ ꠡꠦꠡ,
ꠎꠣꠘꠦ ꠍꠣꠁꠟꠦ ꠍꠤꠟꠦꠐ ꠀꠁꠅ
ꠈꠣꠛꠣꠁ ꠖꠤꠝꠥ ꠛꠦꠡ।
—————————————-
1b/09/Γ019 ꠁꠋ
ꠇꠥꠟꠣꠃꠠꠣ, ꠝꠥꠟꠤꠛꠣꠎꠣꠞ, ꠍꠤꠟꠐ।