Breaking News
Home / ꠖꠦꠡꠞ ꠈꠛꠞ / ꠇꠥꠀꠁ ꠉꠦꠟ ꠀꠉꠞꠣꠝꠟꠤ ꠗꠣꠘ ꠃꠘꠣꠞ ꠞꠥꠍꠥꠝ

ꠇꠥꠀꠁ ꠉꠦꠟ ꠀꠉꠞꠣꠝꠟꠤ ꠗꠣꠘ ꠃꠘꠣꠞ ꠞꠥꠍꠥꠝ

ꠁꠛꠣꠞꠇꠥꠞ ꠚꠡꠟꠞ ꠀꠁꠘ꠆ꠖꠣꠔ ꠝꠣꠘꠡꠞ ꠛꠠ ꠟꠦꠏꠣꠞꠔꠤ ꠟꠣꠉꠍꠦ ⁕ ꠈꠖꠤꠘ ꠀꠉꠦ ꠝꠤꠗꠤꠟꠤ ꠘꠣꠝꠞ ꠇꠥꠞꠥꠟꠟꠣ ꠀꠁꠀ ꠏꠦꠏꠣꠔ ꠈꠔꠤ ꠈꠞꠍꠦ • ꠢꠃ ꠟꠦꠏꠣꠞꠔꠤꠅ ꠝꠣꠘꠡꠦ ꠇꠥꠟꠣꠁꠀ ꠃꠐꠔ ꠚꠣꠞꠍꠦ ꠘꠣ ꠄꠞꠝꠣꠏꠦ ꠘꠄꠀ ꠈꠞꠤꠀ ꠀꠁꠀ ꠀꠏꠤꠞ ꠀꠞꠦꠉꠥ ꠇꠥꠞꠥꠟ꠆ꠟꠣ • ꠝꠤꠉꠎꠣꠃꠝ ⁕ ꠁꠛꠣꠄ ꠏꠤꠘꠤꠡꠚꠔ꠆ꠞꠞ ꠅ ꠏꠦ ꠖꠣꠝ • ꠝꠣꠘꠡꠦ ꠚꠣꠞꠤꠀ ꠃꠑꠞꠣ ꠘꠣ ⁕ ꠇꠥꠘꠥꠝꠘ꠆ꠔꠦ ꠏꠦꠘ ꠇꠤꠠꠤꠝꠤꠠꠤ ꠈꠣꠁꠀ ꠍꠟꠞꠣ ⁕ ꠡꠤꠔꠞ ꠀꠘꠣꠏ ꠚꠣꠔꠔꠤꠄ ꠛꠣꠏꠣꠞ ꠜꠞꠣ ꠅꠁꠟꠦꠅ ꠔꠞꠤ ꠔꠣꠞꠈꠣꠞꠤꠔ ꠏꠦꠘ ꠀꠉꠥꠁꠘ ꠖꠣꠝ ⁕ ꠏꠦꠞꠣ ꠘꠤꠖꠇꠥ ꠡꠖꠣꠁ ꠈꠞꠂꠘ • ꠄꠞꠣ ꠈꠠꠣꠄ ꠉꠘꠒꠣꠄ ꠐꠦꠞ ꠚꠣꠁꠞꠣ ꠈꠔ ꠗꠣꠘꠦ ꠈꠔ ꠍꠣꠃꠟ

ꠈꠟꠣꠔ ꠗꠣꠘꠞ ꠈꠣꠝ (©ꠍꠛꠤ ꠁꠘꠐꠣꠞꠘꠦꠐ ꠔꠘꠦ)

ꠗꠣꠘ-ꠍꠣꠃꠟꠞ ꠈꠕꠣ ꠃꠑꠣꠄ ꠝꠘ ꠅꠁꠟ • ꠄꠛꠔꠞꠤ ꠔ ꠢꠈꠟ ꠝꠣꠘꠡꠞ ꠀꠝꠘ ꠗꠣꠘ ꠔꠥꠟꠣ ꠡꠦꠡ ꠘꠣꠄ ⁕ ꠏꠦꠘꠔꠣꠁꠘ ꠀꠉꠛꠣꠐꠦ ꠞꠥꠀꠁꠍꠟꠣ • ꠔꠣꠞꠣꠞ ꠈꠣꠟꠤ ꠗꠣꠘꠍꠣꠘ ꠈꠣꠐꠤꠀ • ꠝꠣꠠꠣ ꠖꠤꠀ • ꠝꠥꠀꠁꠀ • ꠈꠦꠃ ꠈꠦꠃꠞ ꠃꠘꠣ ꠖꠤꠀ ꠇꠤ ꠀꠘꠣ ꠃꠘꠣꠄ ꠅ ꠢꠥꠇꠣꠁꠀ ꠛꠍꠔꠣꠛꠘꠖꠤ ꠇꠤ ꠃꠉꠣꠞ ꠅ ꠔꠥꠟꠣ ꠅꠁꠉꠦꠍ ⁕ ꠘꠄꠀ ꠍꠣꠃꠟꠞ ꠜꠣꠔ ꠍꠣꠠꠣꠅ ꠈꠔꠄ ꠚꠤꠑꠣ ꠢꠣꠘꠖꠦꠡ ꠈꠞꠤꠀ ꠈꠣꠁꠞꠣ ⁕ ꠏꠦꠞꠣ ꠀꠟꠣ ꠜꠣꠔ ꠈꠣꠁꠘ • ꠔꠣꠞꠣꠞ ꠇꠥꠘꠥꠝꠘ꠆ꠔꠦ ꠗꠣꠘ ꠟꠣꠠꠤꠍꠣꠠꠤ ꠢꠥꠇꠣꠁꠟꠟꠦꠅ ꠅꠁꠍꠦ ⁕ ꠅꠁꠟꠦ • ꠏꠦꠞꠣ ꠃꠘꠣ ꠜꠣꠔ ꠈꠣꠁꠘ • ꠔꠣꠞꠣ ꠘꠥ ꠚꠥꠠꠣ ꠛꠦꠚꠦꠍ ꠚꠠꠤꠏꠤꠛꠣ ⁕ ꠇꠥꠞꠥꠟ꠆ꠟꠣ ꠝꠤꠉꠎꠣꠃꠝꠞ ꠃꠍꠤꠟꠟꠣꠄ ꠁ ꠢꠣꠚꠔꠣꠔ ꠃ ꠞꠁꠖ ꠘꠣꠁ • ꠏꠦꠉꠔꠤꠇꠦ ꠗꠣꠘ ꠝꠣꠠꠣ-ꠏꠣꠠꠣ ꠔꠁꠀ ꠝꠣꠘꠡꠦ ꠚꠣꠠꠣꠔ ꠊꠥꠠꠤꠀ ꠔꠁꠞꠣꠈꠍꠦ ⁕ ꠀꠞ ꠀꠅꠞ ꠅꠈꠟꠅ ꠇꠥꠞꠥꠟ꠆ꠟꠣ ꠃꠐꠟꠦ ꠔ ꠉꠔꠤ ꠘꠣꠁ • ꠝꠦꠊꠡꠥꠞ ꠏꠦꠛꠣꠄ ꠏꠣꠁꠛ • ꠚꠣꠘꠤꠞ ꠟꠉꠦ ꠚꠄꠚꠡꠟ ꠢꠈꠟꠔꠣ ꠍꠣꠐꠘꠤ ꠈꠞꠤ ꠟꠣꠁꠛ ⁕

ꠍꠤꠟꠐ ꠅꠘ꠆ꠌꠟꠞ ꠛꠦꠡꠤꠜꠣꠉ ꠝꠣꠘꠡꠦ ꠀꠟꠣ ꠜꠣꠔ ꠈꠣꠁꠟꠦꠅ ꠈꠔꠄ ꠏꠦ ꠃꠘꠣ ꠜꠣꠔ ꠈꠣꠁꠘ ꠘꠣ • ꠁꠟꠣꠘ ꠅ ꠘꠣꠄ ⁕ ꠄꠛ ꠛꠃꠔ ꠏꠣꠉꠣꠔ ꠝꠣꠘꠡꠦ ꠗꠣꠘ ꠈꠣꠐꠣ ꠛꠣꠖꠦ ꠀꠉꠞ ꠟꠣꠈꠣꠘ ꠗꠣꠘ ꠃꠘꠣ ꠖꠦꠁꠘ • ꠃꠘꠣ ꠜꠣꠔ ꠈꠣꠁꠘ ⁕ ꠀꠞꠛꠣꠞ ꠍꠦꠞꠛꠏꠣꠔꠤ ꠈꠣꠘꠤ ꠈꠝ ꠈꠣꠃꠞꠣ ꠀꠞ ꠛꠃꠔ ꠒꠣꠄꠀꠛꠦꠐꠤꠍꠞ ꠛꠦꠝꠣꠞꠤꠄ ꠃꠘꠣ ꠜꠣꠔꠅ ꠈꠣꠁꠘ ⁕ ꠀꠝꠒꠣ ꠢꠥꠞꠥ ꠕꠣꠈꠔꠦ ꠖꠦꠈꠔꠣꠝ ꠀꠝꠞꠣꠞ ꠛꠣꠠꠤꠔ ꠅ ꠅꠟꠣꠘ ꠛꠃꠔꠦ ꠗꠣꠘ ꠃꠘꠣ ꠖꠤꠔꠣ ⁕ ꠀꠉꠦ ꠀꠉꠦ ꠖꠦꠈꠔꠣꠝ ꠀꠐꠣ ꠇꠤ ꠝꠄꠖꠣ ꠔꠘꠦ ꠀꠔꠖꠤ ꠇꠥꠐꠣꠁꠟ ꠍꠣꠃꠟꠞ ꠉꠥꠠꠤꠃ ꠛꠦꠡꠤ ꠀꠍꠤꠟ • ꠅꠘꠦ ꠉꠣꠁꠟ ꠍꠤꠀꠞ ꠃ ꠖꠦꠈꠣ ꠝꠤꠟꠦ ꠘꠣ ꠀꠞ ꠅꠔ ꠈꠡ꠆ꠐ ꠈꠞꠤꠀ ꠈꠦꠞꠣ ꠉꠥꠠꠤ ꠚꠣꠞ ꠖꠤꠛꠣ ⁕ ꠏꠣꠁꠅꠇ • ꠅꠔꠣꠖꠤꠀ ꠈꠣꠁ ꠉꠥꠟꠤꠀ ꠈꠟꠣꠚꠣꠔꠣ ꠖꠤꠀ ꠞꠥꠐꠚꠤꠐꠣ, ꠍꠁꠚꠤꠐꠣ ꠚꠦꠍꠣꠁꠀ ꠗꠣꠘꠞ ꠝꠣꠏꠦ ꠢꠣꠞꠣꠁꠀ ꠄꠈꠟꠉꠦ ꠏꠣꠟ ꠖꠤꠔꠣ ⁕ ꠄꠈꠏꠣꠟꠦ ꠗꠣꠘꠅ ꠃꠘꠣ ꠃꠁꠏꠤꠔ • ꠚꠤꠑꠣꠅ ꠛꠘꠤ ꠏꠣꠁꠔ। ꠗꠣꠘ ꠃꠘꠣ ꠖꠤꠛꠣꠞ ꠟꠣꠉꠤ ꠝꠣꠘꠡꠦ ꠍꠁ • ꠈꠟꠣꠞ ꠚꠣꠡꠇꠥꠟꠣ • ꠛꠣꠡꠞ ꠈꠥꠟ • ꠉꠥꠚꠞꠞ ꠝꠥꠁꠐ ꠇꠤ ꠚꠣꠔꠣꠟꠣꠔꠣ ꠢꠥꠇꠣꠁꠀ ꠕꠥꠏ ꠝꠣꠞꠤ ꠔꠁꠔꠣ ꠀꠘ꠆ꠘꠣꠄ ꠟꠣꠈꠠꠤꠞ ꠃꠉꠣꠞ ꠞꠣꠈꠣ ꠕꠣꠈꠔ ⁕

ꠗꠣꠘ ꠃꠘꠣ ꠖꠤꠛꠣꠞ ꠛꠣꠟꠣ ꠖꠦꠈꠣ ꠏꠣꠁꠔ ꠄꠈꠖ ꠏꠦꠉꠣꠔ ꠝꠣꠘꠡꠦ ꠜꠤꠠ ꠗꠞꠤꠟꠣꠁꠍꠂꠘ ꠇꠤꠌꠌꠣ ꠢꠥꠘꠔꠣ ꠈꠞꠤꠀ ⁕ ꠁꠔꠣ ꠝꠥꠟꠔ ꠖꠦꠈꠣ ꠏꠣꠁꠔ ꠡꠤꠔꠞ ꠝꠃꠡꠥꠝꠅ ⁕ ꠈꠣꠞꠘ ꠁ ꠛꠣꠟꠣ ꠖꠤꠘ ꠕꠣꠈꠦ ꠛꠣꠐꠐꠤ ꠀꠞ ꠞꠣꠁ ꠅꠄ ꠟꠣꠝ꠆ꠙꠣ ⁕ ꠀꠞ ꠡꠛꠍꠦ ꠛꠠ ꠈꠕꠣ ꠁ ꠡꠝꠄ ꠝꠦꠊꠞ ꠒꠞ ꠕꠣꠈꠦ ꠘꠣ ⁕ ꠔ ꠄꠟꠇꠥ ꠈꠕꠣ ꠅꠁꠟ ꠏꠦꠞꠣ ꠇꠤꠌꠌꠣ ꠈꠁꠔꠣ • ꠖꠦꠈꠣ ꠏꠣꠁꠔ ꠄꠁꠘꠔꠣꠁꠘ ꠡꠄ ꠡꠄ ꠇꠤꠌꠌꠣ ꠚꠣꠞꠔꠣ ⁕ ꠏꠦꠉꠔꠤꠇꠦ ꠝꠣꠘꠡꠦ ꠄꠞꠣꠞ ꠇꠤꠌꠌꠣ ꠢꠥꠘꠣꠞ ꠖꠣꠄ ꠢꠣꠞꠣꠖꠤꠘꠇꠥꠞ ꠈꠣꠝꠈꠣꠏ ꠀꠐꠣꠁꠀ ꠖꠟꠣ ꠅꠁꠀ ꠛꠁꠔꠣ ⁕ ꠈꠔꠄ ꠀꠞꠛꠣꠞ ꠢꠥꠇꠇꠣ ꠀꠔ ꠟꠁꠀ ꠀꠁꠔꠣ ꠀꠞ ꠜꠥꠠꠜꠥꠠ ꠈꠞꠤꠀ ꠢꠥꠇꠇꠣ ꠐꠣꠘꠔꠣ ⁕ ꠝꠞ ꠄꠛ ꠁꠀꠖ ꠀꠍꠦ • ꠇꠤꠌꠌꠣ ꠈꠃꠀꠞ ꠛꠁꠟ ꠀꠡꠞ ꠏꠝꠣꠘꠤꠞ ꠟꠣꠉꠤꠘ ꠇꠤ ꠝꠣꠘꠥꠡ ꠅꠛꠣꠄ ꠢꠛꠣꠄ ꠕꠣꠈꠟꠦ ꠏꠦꠘ ꠈꠃꠀ ꠅꠁꠔ-

ꠇꠤꠌꠌꠣ ꠛꠠ ꠇꠤꠍꠇꠤꠍꠣꠘꠤ ꠢꠥꠘꠔꠦ ꠛꠠ ꠡꠈ/ꠝꠃꠏ
ꠄꠈꠏꠘ ꠊꠞ, ꠄꠈꠏꠘ ꠛꠣꠞꠅ ꠇꠥꠝꠝꠦ ꠏꠝꠛ ꠉꠚ
ꠇꠤꠌꠌꠣ ꠛꠠ ꠇꠤꠍꠇꠤꠍꠣꠘꠤ ꠈꠁꠔꠦ ꠛꠠ ꠑꠈ
ꠄꠈꠏꠘ ꠊꠞ, ꠀꠞꠏꠘ ꠛꠣꠞꠅ ꠈꠦꠉꠉꠦ ꠖꠦꠈꠛ ꠒꠚ৷৷

ꠄꠈꠛꠣꠄ ꠇꠤꠌꠌꠣ ꠍꠟꠦꠞ ⁕ ꠀꠞꠛꠣꠄ ꠖꠦꠈꠣ ꠏꠣꠁꠔ ꠈꠣꠝꠟꠣꠁꠘ꠆ꠔꠞ ꠄꠈꠖꠣꠉꠤꠄ ꠗꠣꠘ ꠝꠣꠠꠣ ꠖꠤꠞꠣ • ꠀꠉꠦ ꠔ ꠀꠞ ꠅꠘꠇꠥꠞ ꠟꠣꠈꠣꠘ ꠅꠔ ꠝꠤꠡꠤꠘ ꠃꠡꠤꠘ ꠀꠍ꠆ꠟ ꠘꠣ ⁕ ꠄꠈꠖꠣꠉꠤꠄ ꠝꠣꠠꠣ ꠖꠦꠃꠀ ꠗꠣꠘ ꠏꠣꠇꠤ ꠖꠤꠀ ꠏꠣꠇꠤꠀꠁꠀ ꠃꠘꠣꠔ ꠛꠥꠀꠁꠔꠣ ⁕ ꠝꠦꠘꠔꠤꠘ꠆ꠔꠦ ꠗꠣꠘ ꠏꠣꠠꠤꠀ ꠈꠦꠠ ꠢꠥꠇꠣꠘꠤꠞ ꠟꠣꠉꠤꠘ ꠛꠘ꠆ꠖ ꠘꠣꠁꠟꠦ ꠇꠥꠟꠣ ꠏꠦꠉꠣ ꠇꠤ ꠈꠟꠣꠔ ꠔꠁꠀ ꠀꠁꠔꠣ • ꠏꠦꠈꠍꠣꠁꠘ ꠛꠣꠖꠦ ꠉꠞꠥ-ꠛꠁꠡꠞ ꠈꠣꠘꠤꠞ ꠖꠣꠄ ꠞꠖꠤꠔ ꠢꠥꠇꠣꠘꠤ ꠅꠁꠛ ⁕ ꠗꠣꠘ ꠏꠣꠠꠤꠀ ꠡꠦꠡ ꠅꠁꠟꠦ ꠅꠃ ꠗꠣꠘ ꠢꠤꠞꠛꠣꠞ ꠃꠘꠣꠔ ꠛꠥꠀꠘꠤ ꠅꠁꠔ ⁕ ꠃꠘꠣ ꠖꠦꠃꠀ ꠗꠣꠘ ꠒꠣꠝ ꠘꠣꠁꠟꠦ ꠈꠟꠣꠔ ꠚꠣꠟꠣꠘꠤ ꠅꠁꠔ ⁕ ꠗꠣꠘꠞ ꠟꠉꠦ ꠍꠁ ꠚꠤꠐꠣ ꠇꠤ ꠞꠥꠐ ꠚꠤꠐꠣ ꠅ ꠅꠁꠍꠤꠔ ⁕ ꠏꠦꠈꠣꠘ ꠔꠘꠦ ꠍꠣꠇꠤꠍꠣꠇꠤ ꠈꠞꠤꠀ ꠡꠣꠝꠘꠦ ꠕꠣꠈꠣ ꠡꠛꠞ ꠝꠣꠏꠦ ꠄꠈꠏꠣꠞꠣ ꠈꠞꠤꠀ ꠛꠣꠐꠣ ꠅꠁꠔ ⁕ ꠀꠁꠏꠇꠥꠞ ꠟꠣꠈꠣꠘ ꠔ ꠀꠞ ꠢꠤ ꠏꠛꠣꠘꠣꠔ ꠝꠣꠘꠡꠞ ꠅꠔ ꠛꠦꠚꠡꠣꠁ ꠗꠣꠘꠖꠣ ꠀꠍꠤꠟ ꠘꠣ ⁕ ꠘꠣꠄ ꠢꠤ ꠡꠝꠄ ꠅ ꠅꠘꠇꠥꠞ ꠟꠣꠈꠣꠘ ꠝꠣꠘꠡꠞ ꠐꠣꠁꠘ ꠄꠈꠖꠣꠉꠤꠄ ꠍꠣ-ꠛꠤꠍꠇꠥꠐ • ꠚꠤꠐꠣꠍꠤꠐꠣ ꠛꠦꠍꠣ ꠀꠞꠝ꠆ꠜ ꠈꠞꠤꠖꠤꠔꠣ ⁕

ꠘꠣꠘꠣꠘ ꠝꠣꠘꠡꠞ ꠛꠣꠠꠤꠔ ꠈꠣꠝ ꠈꠞꠣꠔ ꠉꠤꠀ ꠄꠈꠅ ꠝꠦꠘꠔꠤꠘꠔꠦꠅ ꠏꠦ ꠡꠥꠘ꠆ꠖꠞ ꠡꠥꠘ꠆ꠖꠞ ꠇꠤꠌꠌꠣꠁꠘ ꠏꠣꠘꠔꠣ ⁕ ꠔꠃ ꠔꠣꠞꠣꠞ ꠈꠣꠝ ꠡꠦꠡ ꠅꠁꠟꠦ ꠝꠣꠘꠡꠦ ꠔꠣꠞꠣꠞꠦ ꠒꠣꠇꠤꠀ ꠀꠘꠔꠣ ꠈꠝꠍꠦ ꠄꠈꠖꠐꠣꠅ ꠇꠤꠌꠌꠣ ꠢꠥꠘꠣꠘꠤꠞ ꠟꠣꠉꠤ ⁕ ꠅꠟꠣꠘ ꠃ ꠄꠈ ꠡꠝꠄ ꠉꠣꠃꠖꠦꠡ ꠇꠤꠌꠌꠣꠞ ꠀꠡꠞ ꠚꠣꠔꠔꠣ ꠝꠣꠘꠡꠦ ⁕ ꠄꠈꠅ ꠛꠁꠟ ꠝꠣꠘꠡꠦ ꠏꠦꠟꠣꠘ ꠇꠤꠌꠌꠣ ꠢꠥꠘꠤꠀ ꠀꠡꠤꠀ ꠚꠤꠐ ꠅꠁꠔꠣ • ꠅꠟꠣꠘ ꠄꠈꠅ ꠛꠁꠟ ꠇꠤꠌꠌꠣ ꠢꠥꠘꠤꠀ ꠖꠥꠇꠇꠦ ꠈꠣꠘꠖꠤ ꠖꠤꠔꠣ ⁕ ꠄꠈꠅ ꠇꠤꠌꠌꠣꠞ ꠡꠝꠄ ꠔ ꠝꠣꠘꠡꠦ ꠔꠣꠟꠘꠤꠞꠣꠁ ꠅꠁꠀ ꠢꠥꠘꠔꠣ ⁕ ꠇꠤꠌꠌꠣ ꠈꠃꠞꠣꠄ ꠏꠦꠛꠟꠣ ꠔꠣꠘ ꠀꠞ ꠛꠣꠟꠣ ꠟꠣꠉꠔ ꠘꠣ • ꠔꠃ ꠏꠥꠖꠤꠘ ꠔꠣꠁꠘ ꠈꠁꠟꠔꠣ ꠅꠃ ꠏꠦ ꠄꠈꠐꠣ ꠖꠦꠡ • ꠝꠞ ꠇꠤꠌꠌꠣ ꠡꠦꠡ ⁕ ꠔꠦ ꠔ ꠀꠞ ꠃꠚꠣꠄ ꠀꠍꠤꠟ ꠘꠣ ⁕ ꠢꠥꠘꠞꠣ ꠅꠈꠟꠦ ꠈꠣꠏ ꠈꠁꠔꠣ- ꠡꠥꠘꠣ ꠘꠥ ꠞꠦꠛꠣ ꠐꠣꠇꠥꠜꠣꠁ/ꠖꠣꠖꠣꠜꠣꠁ/ꠍꠣꠍꠣ ꠇꠤ ꠀꠞ ꠇꠥꠘꠥ ꠘꠣꠝꠦ ꠏꠦ ꠏꠦꠟꠣꠘ ꠒꠣꠈꠔꠣ • ꠅꠃ ꠡꠦꠡꠐꠣ • ꠀꠞ ꠈꠣꠟꠤ ꠄꠈꠐꠣ ꠈꠁꠟꠦ ꠃ ꠡꠦꠡ ⁕ ꠔꠃ ꠄꠈꠅ ꠛꠣꠟꠣ ꠔꠣꠁꠘ ꠏꠥꠀꠚ ꠖꠤꠔꠣ- ꠇꠤꠌꠌꠣ ꠏꠔ • ꠝꠤꠌꠌꠣ ꠔꠔ। ꠚꠁ ꠏꠔ • ꠢꠣꠍꠣ ꠔꠔ ⁕ ꠇꠤꠘꠔꠥꠇ ꠢꠈꠟꠞ ꠈꠕꠣ ꠔꠣꠁꠘ ꠀꠞ ꠚꠣꠟꠣꠁꠔꠣ ꠚꠣꠞꠔꠣ ꠘꠣ ⁕ ꠛꠣꠖꠦ ꠖꠦꠈꠣ ꠏꠣꠁꠔ ꠄꠞꠛꠣꠖꠦ ꠀꠞꠅ ꠢꠣꠔꠈꠣꠘ ꠇꠤꠌꠌꠣ ꠈꠃꠀ-ꠢꠥꠘꠣ ꠅꠁꠉꠦꠍꠦ! ꠢꠄꠔ ꠅꠟꠣꠘ ꠃ ꠍꠟꠔ ꠄꠉꠥꠞ ꠛꠣꠖꠦ ꠀꠞꠉꠥ • ꠏꠦꠝꠟꠣꠘ ꠍꠟꠤꠀ ꠀꠁꠍꠦ ꠀꠏꠣꠞ ꠛꠞꠍ ꠔꠘꠦ ⁕ ꠢꠤ ꠏꠝꠣꠘꠣꠔ ꠀꠁꠏꠇꠥꠞ ꠝꠔ ꠅꠔ ꠐꠤꠜꠤꠐꠣꠛꠤ ꠀꠍꠤꠟ ꠘꠣ • ꠀꠍꠤꠟ ꠘꠣ ꠁꠘꠐꠣꠞꠘꠦꠐ ꠛꠤꠘꠐꠣꠞꠘꠦꠐ ꠅ ⁕ ꠔꠄ ꠝꠣꠘꠡꠞ ꠝꠣꠏꠦ ꠀꠍꠤꠟ ꠝꠤꠟ-ꠝꠣꠄꠀ-ꠝꠢꠛꠛꠔ!

ꠈꠔ ꠝꠥꠖꠔ ꠗꠞꠤ ꠍꠟꠣ ꠞꠥꠍꠥꠝ ꠢꠣꠞꠣꠇ꠆ꠇꠣꠞꠣ ꠚꠣꠟꠐꠤ ꠉꠦꠟ ⁕ ꠘꠣꠘꠖꠤꠛꠤꠘꠖꠤ ꠝꠤꠡꠤꠘ ꠀꠁꠟ • ꠈꠦꠔꠉꠤꠞꠍꠤ ꠈꠝꠤ ꠉꠦꠟ ⁕ ꠇꠤꠌꠌꠣ ꠈꠃꠞꠣ ꠈꠔ ꠝꠄꠝꠥꠞꠛꠛꠤꠘ ꠖꠥꠘꠤꠀ ꠍꠣꠠꠤꠀ ꠉꠦꠟꠣꠉꠤ ⁕ ꠛꠄꠡꠞ ꠜꠣꠞꠦ ꠈꠔꠁꠘ ꠏꠦ ꠅꠘꠦ ꠊꠞꠛꠁꠐꠤ ⁕ ꠚꠡꠟꠞ ꠀꠁꠘ꠆ꠖꠣꠔ ꠄꠛ ꠚꠡꠟ ꠚꠟꠦ • ꠃꠉꠣꠞꠞ ꠏꠦꠉꠣꠔ ꠅꠘꠦ ꠁꠝꠥꠉꠣꠞ (cold storage) ꠜꠞꠦ ⁕ ꠔꠄ ꠝꠘꠦ ꠝꠘꠦ ꠏꠤꠇꠣꠁ ꠇꠥꠀꠁ ꠉꠦꠟ ꠀꠉꠞꠣꠝꠟꠤ ꠗꠣꠘ ꠃꠘꠣꠞ ꠞꠥꠍꠥꠝ ⁕

5/5 - (4 votes)

About Abu Sayeed

ꠝꠥꠁ ꠀꠛꠥ ꠍꠣꠁꠖ, ꠡꠥꠞꠝꠣ ꠚꠣꠞꠞ ꠈꠛꠞ ꠅꠄꠛꠍꠣꠁꠐꠞ ꠍꠣꠚꠣꠃꠞꠣ⁕ ꠛꠣꠋꠟꠣ ꠀꠞ ꠁꠋꠟꠤꠡ ꠚꠔꠞꠤꠇꠣꠁꠘ꠆ꠔ ꠟꠦꠈꠣꠟꠦꠇꠤꠞ ꠅꠜꠤꠉ꠆ꠉꠔꠣ ꠔꠘꠦ ꠝꠞ ꠝꠣꠁꠅꠞꠝꠣꠔ ꠍꠤꠟꠐꠤꠔꠦꠅ ꠟꠦꠈꠣꠞ ꠔꠣꠉꠤꠖ ꠛꠥꠗ ꠈꠞꠤ⁕ ꠅꠘꠟꠣꠁꠘꠅ ꠍꠤꠟꠐꠤ ꠅꠈꠟꠞ ꠟꠣꠉꠤ ꠝꠣꠉꠘꠣ ꠢꠤꠇꠣꠞ ꠟꠣꠈ ꠏꠤꠘꠤꠡ ꠛꠤꠡꠦꠡ ꠈꠞꠤ ꠍꠤꠟꠐꠤꠘ꠆ꠔꠞ ꠁꠔꠤꠀꠡ, ꠞꠍꠝ, ꠈꠣꠘꠤꠛꠘꠤ, ꠡꠣꠁꠔ꠆ꠔ ꠡꠛꠞ ꠀꠔ ꠀꠔ ꠚꠃꠍꠣꠘꠤꠞ ꠈꠣꠝ ꠈꠞꠞꠣꠝ, ꠏꠣꠔꠦ ꠁꠔꠣ ꠈꠣꠟꠤ ꠉꠛꠦꠡꠇ ꠅꠈꠟꠞ ꠐꠣꠁꠘ ꠘꠣ ꠕꠣꠇꠤꠀ ꠢꠈꠟꠞ ꠀꠔꠅ ꠉꠤꠀ ꠔꠣꠘ ꠚꠣꠄ⁕ ꠁꠔꠣ ꠖꠦꠇꠤꠀ ꠀꠞꠅ ꠝꠣꠘꠥꠡꠣꠁꠘ ꠀꠉꠥꠀꠁꠀ ꠀꠁꠘ⁕ ꠟꠉꠦ ꠕꠣꠈꠣꠞ ꠀꠞ ꠚꠣꠄꠚꠞꠣꠝꠤꠡ ꠖꠤꠀ ꠡꠣꠖ ꠖꠤꠛꠣꠞ ꠟꠣꠉꠤ ꠡꠛꠞꠦ ꠡꠥꠇꠥꠞ⁕

Check Also

ꠉꠞꠥꠞ ꠉꠥꠍ꠆ꠔꠞ ꠛꠣꠎꠣꠞꠅ ꠎꠦꠎꠣꠔ ꠀꠍꠣꠐꠣ ꠚꠞꠤꠍꠕꠤꠔꠤ

ꠈꠈꠚꠤꠞꠣ ꠔꠘꠦ ꠛꠣꠋꠟꠣꠖꠦꠡꠞ ꠞꠥꠎꠇꠥꠞ ꠛꠣꠎꠣꠞꠅ ꠎꠤꠘꠤꠡꠞ ꠖꠣꠝ ꠛꠉꠔꠤꠇ ⁕ ꠎꠦꠉꠔꠤꠇꠦ ꠝꠣꠘꠡꠦ ꠎꠦꠎꠣꠔ ꠢꠦꠖꠣꠔ ꠚꠣꠁꠞꠣ ⁕ …