ꠄꠈꠡꠝꠄꠇꠥ ꠢꠣꠞꠣ ꠍꠤꠟꠐ ꠎꠥꠠꠤ ꠈꠣꠟꠤ ꠀꠠꠣ ꠎꠋꠉꠟ ꠀꠍ꠆ꠟ⁕ ꠎꠣꠞꠖꠣꠄ ꠔꠣꠘꠤꠅ ꠝꠣꠘꠡꠦ ꠅꠔꠣ ꠀꠠꠘꠁꠘ ꠍꠚꠣ ꠈꠞꠤꠀ ꠛꠤꠍꠞꠣ ꠔꠣꠁꠀꠞ ꠈꠞꠔꠣ⁕ ꠘꠣꠘꠣꠘ ꠎꠣꠔꠞ ꠔꠞꠈꠣꠞꠤ ꠚꠟꠣꠁꠔꠣ⁕ ꠇꠤꠘ꠆ꠔꠥꠇ ꠖꠦꠈꠣ ꠎꠣꠁꠔ ꠇꠥꠘꠥꠇꠥꠘꠥ ꠛꠤꠍꠞꠣꠁꠘ꠆ꠔꠞ ꠚꠄꠚꠡꠟ ꠎꠋꠟꠤ ꠎꠣꠘꠥꠀꠞꠣꠁꠘ꠆ꠔꠦ ꠇꠥꠐꠤꠟꠍꠦ⁕ ꠁꠟꠣꠘ ꠔꠣꠞꠣꠞ ꠈꠡꠐꠞ ꠚꠡꠟ ꠘꠡ꠆ꠐ ꠅꠃꠀ ꠔꠣꠞꠣ ꠛꠞꠖꠣꠡ ꠈꠞꠔ ꠚꠣꠞꠔ ꠘꠣ⁕ ꠎꠣꠞꠖꠣꠄ ꠈꠦꠔꠥꠀꠟ ꠝꠣꠘꠥꠡ ꠅꠈꠟ ꠝꠤꠟꠤ ꠜꠣꠛꠘꠣꠔ ꠚꠠꠟꠣ ꠇꠤꠟꠣꠘ ꠅꠔꠣꠞ ꠀꠔ ꠔꠘꠦ ꠞꠦꠢꠣꠁ ꠚꠣꠅꠀ ꠎꠣꠄ⁕ ꠛꠣꠖꠦ ꠢꠈꠟꠦ ꠇꠥꠐꠛꠥꠖ꠆ꠖꠤ ꠈꠞꠤꠀ ꠄꠉꠥ ꠚꠘ꠆ꠖꠤ ꠀꠐꠟꠣ⁕ ꠎꠦꠔꠣ ꠎꠦꠔꠣ ꠈꠦꠔꠞ ꠚꠄꠚꠡꠟꠣ ꠎꠘ꠆ꠔꠥ ꠎꠣꠘꠥꠀꠞꠦ ꠈꠣꠁꠀ ꠇꠥꠐꠤꠟꠣꠄ, ꠅꠔꠣꠔ ꠔꠣꠞꠣ ꠚꠣꠘꠈꠍꠥ, ꠝꠥꠠꠣꠈꠍꠥ, ꠈꠣꠟꠣꠈꠍꠥ ꠡꠥꠖ꠆ꠖꠣ ꠎꠦꠔꠣ ꠈꠍꠥ ꠈꠣꠁꠟꠦ ꠉꠟꠣꠔ ꠈꠣꠟꠤ ꠈꠍꠈꠍ ꠈꠞꠦ ꠅꠔꠣ ꠛꠤꠍꠣꠁꠀ ꠖꠦꠅꠀ ꠅꠁꠟ⁕
ꠘꠤꠡꠣꠛꠣꠟꠣ ꠍꠣꠁꠞꠛꠣꠄ ꠘꠤꠞꠣꠁ ꠅꠁꠉꠦꠟꠦ ꠎꠋꠟꠤ ꠎꠣꠘꠥꠀꠞꠣꠁꠘ꠆ꠔꠦ ꠎꠦꠁꠔ ꠛꠤꠍꠞꠣꠁꠘ꠆ꠔ ꠏꠣꠚꠣꠁꠀ ꠚꠠꠟ, ꠢꠦꠁꠔ ꠈꠍꠥ ꠈꠣꠁꠀ ꠍꠤꠇ꠆ꠞꠣꠁꠀ ꠖꠃꠠ ꠀꠞꠝ꠆ꠜ ꠈꠞꠟ⁕ ꠝꠣꠘꠡꠦꠅ ꠟꠣꠐꠤꠍꠐꠣ ꠟꠁꠀ ꠁꠔꠣꠞꠦ ꠇꠥꠟ꠆ꠟꠦꠉꠣꠄ ꠈꠦꠖꠣꠘꠤꠔ ꠟꠣꠉꠟ⁕ ꠀꠞ ꠈꠁꠔ ꠟꠣꠉꠟ ꠈꠍꠥ ꠈꠣꠁꠟꠦ ꠈꠍꠈꠍ ꠈꠞꠦ⁕ ꠄꠈꠞꠣꠁꠔꠦ ꠁꠔꠣ ꠎꠋꠟꠤ ꠎꠣꠘꠥꠀꠞꠣꠁꠘ ꠎꠦ ꠍꠣꠠꠍꠤꠟ, ꠀꠞ ꠇꠥꠘꠥꠖꠤꠘ ꠀꠁꠀ ꠈꠦꠔ ꠝꠥꠇ ꠖꠤꠍꠦ ꠘꠣ⁕ ꠝꠣꠘꠡꠞ ꠛꠥꠖ꠆ꠖꠤ ꠈꠣꠐꠣꠘꠤꠄ ꠀꠍꠔꠣ ꠍꠤꠟꠐ ꠅꠘꠌꠟꠞ ꠛꠤꠍꠞꠣꠁꠘ ꠄꠈꠞꠣꠁꠔꠦ ꠛꠘꠥꠀ ꠚꠡꠥꠁꠘ꠆ꠔꠞ ꠚꠣꠘꠣ ꠔꠘꠦ ꠛꠣꠍꠤꠉꠦꠟ⁕ ꠢꠃ ꠔꠘꠦ ꠍꠤꠟꠐꠞ ꠝꠣꠘꠡꠦ ꠘꠣꠟꠤ, ꠟꠣꠁ ꠘꠣꠄ ꠎꠦꠍꠣꠔꠣ ꠇꠤꠔ꠆ꠔꠣꠞ ꠟꠉꠦ ꠈꠍꠥ ꠇꠤꠔ꠆ꠔꠣꠅ ꠈꠞꠣ ꠡꠥꠞꠥ ꠈꠞꠟ⁕