শুরমা ফারর খবর ছিলটি জবানে ছিলটর খবর
Related Articles
ꠖꠥꠘꠤꠀꠞ ꠢꠈꠟ ꠖꠦꠡꠧ ꠏꠦꠟꠣꠘ ꠝꠣꠔ ꠛꠖꠟꠤꠔꠦꠃ ꠕꠣꠈꠦ • ꠅꠟꠣꠘ ꠔꠣꠞ ꠛꠣꠘꠣꠘꠞꠤꠔꠤꠅ ꠛꠖꠟꠣꠘꠤ ꠅꠄ ⁕ ꠏꠣꠔꠦ ꠏꠥꠉ ꠚꠣꠟꠐꠣꠞ ꠟꠉꠦ ꠟꠉꠦ ꠢꠈꠟ ꠇꠤꠍꠤꠝꠞ ꠝꠣꠘꠡꠦꠅ ꠛꠣꠟꠣꠟꠤꠟꠣꠄ ꠛꠥꠏꠔꠣ ꠚꠣꠞꠁꠘ ⁕ ꠏꠦ ꠉꠔꠤꠇꠦ ꠖꠦꠈꠣ ꠏꠣꠄ ꠇꠥꠟꠟꠦ ꠄꠈꠡꠧ ꠇꠤ ꠚꠂꠘ꠆ꠌꠣꠡ ꠛꠞꠍ ꠀꠉꠞ ꠛꠃꠔ ꠖꠦꠡꠞ ꠛꠃꠔ ꠝꠣꠔꠦ ꠟꠦꠈꠣ ꠅꠘꠦ ꠛꠖꠟꠤꠉꠦꠍ ⁕ ꠛꠃꠔ ꠘꠣꠝꠈꠞꠣ ꠁꠋꠟꠤꠡ ꠡꠣꠁꠔ꠆ꠔꠞ ꠈꠄꠈꠡꠧ ꠛꠞꠍ ꠀꠉꠞ ꠟꠦꠈꠣ ꠅꠘꠦ ꠛꠖꠟꠣꠁꠀ ꠘꠄꠀ ꠘꠄꠀ ꠛꠃꠔ ꠔꠞꠏꠝꠣ ꠛꠣꠞꠁꠍꠦ ⁕ ꠔꠄ ꠛꠣꠇꠇꠣ ꠈꠔꠛꠣꠞ ꠛꠣꠃꠇ ꠈꠞꠣ ꠅꠁꠟꠦꠅ ꠛꠣꠋꠟꠣꠖꠦꠡꠧ ꠄꠛꠔꠞꠤ ꠡꠋꠁꠍꠇ꠆ꠞꠤꠔ ꠜꠤꠔꠔꠤꠇ ꠛꠃꠔ ꠛꠣꠘꠣꠘ ꠞꠁꠍꠦ • ꠏꠦꠔꠣ ꠟꠦꠈꠣꠔ ꠝꠣꠘꠡꠞ ꠛꠃꠔ ꠜꠥꠟ ꠅꠄ ⁕ ꠏꠦꠔꠣ ꠟꠁꠀ ꠚꠔ꠆ꠞ ꠚꠔꠞꠤꠇꠣꠔ ꠚꠞꠏꠘ꠆ꠔ ꠞꠣꠎꠎꠤꠞ ꠟꠦꠈꠣꠟꠦꠈꠤ ꠅꠄ ⁕ ꠛꠣꠘꠣꠘ ꠐꠤꠇ ꠈꠞꠣꠞ ꠟꠣꠉꠤ ꠛꠣꠋꠟꠣ ꠄꠇꠣꠒꠦꠝꠤ ꠡꠢ ꠡꠞꠈꠣꠞꠤ • ꠛꠦꠡꠞꠈꠣꠞꠤ ꠘꠣꠘꠣꠘ ꠚꠔꠤꠡꠐꠣꠘ ꠅꠈꠟꠦ ꠛꠃꠔ ꠐꠦꠈꠣ ꠈꠠꠤ ꠈꠞꠍꠣꠁꠀ ꠅ ꠄꠛꠧ ꠇꠥꠟ ꠇꠤꠘꠣꠞꠣ ꠚꠣꠁꠞꠣ ꠘꠣ ⁕ ꠁ ꠏꠣꠉꠣꠔ ꠀꠝꠞꠣꠞ ꠍꠤꠟꠐꠤ ꠅꠈꠟꠞ ꠘꠣ ꠀꠍꠦ ꠡꠞꠈꠣꠞꠤ ꠡꠣꠖ ꠖꠦꠅꠞꠣ • ꠀꠞ ꠘꠣ ꠀꠍꠦ ꠁꠟꠣꠘ ꠇꠥꠘꠥ ꠡꠤꠇꠞꠤꠔꠧ ꠉꠥꠁꠐ ⁕ ꠏꠦꠔꠣꠞ ꠖꠣꠄ ꠖꠦꠈꠣ ꠏꠣꠄ ꠛꠣꠋꠟꠣꠄ ꠟꠦꠈꠣꠚꠠꠞꠣ ꠛꠃꠔꠦ ꠔꠣꠘꠔꠣꠘꠞ ꠢꠤꠇꠣ ꠀꠉꠞꠣꠝꠟꠤ ꠛꠣꠘꠣꠘ ꠞꠤꠔꠤ ꠖꠤꠀ ꠅꠘꠇꠦꠞ ꠍꠤꠟꠐꠤ ꠍꠣꠃꠍꠤꠠꠤ ꠅꠈꠟꠞꠦ ꠍꠤꠟꠐꠤ ꠘꠣꠉꠞꠤ ꠗꠞꠣꠁꠀ ꠖꠤꠟꠣꠁꠟꠔꠣ ꠍꠣꠁꠘ ⁕
ꠅꠕꠍ ꠔꠣꠘꠔꠣꠘꠞ ꠁꠀꠖ ꠞꠣꠈꠣ ꠃꠍꠤꠔ • ꠍꠤꠟꠐꠤ ꠄꠈꠣꠘ ꠐꠣꠘ ꠐꠥꠘꠞ ꠝꠣꠔ • ꠏꠦ ꠏꠣꠉꠣꠔ ꠛꠣꠋꠟꠣ ꠔꠔꠣ ꠞꠣꠠꠤ ꠃꠚꠜꠣꠡꠣꠔ ꠁꠔꠣ ꠘꠣꠁ ⁕ ꠐꠣꠘ ꠐꠥꠘꠞ ꠈꠣꠞꠘꠦ ꠇꠥꠟꠟꠦ ꠖꠥꠁ ꠅꠇꠇꠞꠤ ꠄꠉꠥ ꠍꠤꠟꠐꠤ ꠟꠚ꠆ꠏ ꠛꠔꠔꠣꠟꠟꠤꠡꠐꠣ ꠝꠣꠘꠦ ꠛꠥꠏꠣꠁꠔꠧ ꠚꠣꠞꠦ ⁕ ꠀꠞꠛꠞꠄ ꠛꠣꠋꠟꠣ ꠔꠘꠦ ꠍꠤꠟꠐꠤ ꠀꠃꠀꠏ ꠅ ꠀꠞꠟꠣꠈꠣꠘ ⁕ ꠍꠤꠟꠐꠤ ꠝꠣꠔꠈꠕꠣꠔ ꠏꠦꠔꠣ ꠀꠃꠀꠏ ꠀꠍꠦ • ꠛꠣꠋꠟꠣꠔ ꠁꠔꠣ ꠘꠣꠄ ⁕ ꠏꠦꠔꠣꠞ ꠟꠣꠉꠤ ꠀꠁ•ꠙꠤ•ꠄ ꠀꠘꠝꠣꠘ ꠍꠤꠟꠐꠤ ꠛꠣꠘꠣꠘ ꠛꠣꠃꠇ ꠈꠞꠣꠞ ꠟꠣꠉꠤ ꠍꠤꠟꠐꠤ ꠀꠃꠀꠏ ꠃ ꠄꠈꠝꠣꠔ꠆ꠞ ꠚꠕ ⁕ ꠀꠝꠞꠣꠞ ꠍꠤꠟꠐꠤ ꠚꠥꠕꠤꠘ ꠀꠉꠦ ꠏꠦꠟꠣꠘ ꠟꠦꠈꠣ ꠅꠁꠍꠦ • ꠅꠘꠦ ꠁꠔꠣꠞꠦ ꠖꠥꠀꠞꠤ ꠀꠗꠥꠘꠤꠇ ꠖꠥꠘꠤꠀꠞ ꠀꠁ•ꠙꠤ•ꠄ ꠀꠘꠝꠣꠘ ꠍꠤꠟꠐꠤ ꠛꠣꠘꠣꠘꠦ ꠟꠦꠈꠟꠦ ꠛꠣꠋꠟꠣ ꠛꠣꠘꠣꠘꠞ ꠟꠉꠦ ꠚꠞꠤꠍꠤꠔ ꠘꠣꠄ ꠖꠥꠘꠤꠀꠞ ꠀꠞꠏꠣꠉꠣꠞ ꠍꠤꠟꠐꠤꠘꠔꠦꠅ ꠝꠥꠐꠣꠝꠥꠐꠤ ꠈꠣꠘꠖꠣꠈꠣꠍꠣꠞ ꠀꠃꠀꠏꠦ ꠍꠤꠟꠐꠤ ꠚꠠꠔꠣ ꠚꠣꠞꠛꠣ ⁕ ꠀꠞ ꠁꠟꠣꠘ ꠔ ꠁꠃꠞꠥꠙꠞ ꠡꠣꠁꠔ꠆ꠔꠞ ꠝꠣꠏꠦ ꠄꠈꠦꠞꠦ ꠡꠣꠗꠣꠞꠘ ꠄꠉꠥ ꠛꠦꠚꠣꠞ ⁕ ꠏꠦꠁꠘ ꠔꠣꠁꠘ ꠖꠦꠈꠔꠣ ꠚꠣꠞꠁꠘ ꠘꠣ • ꠢꠥꠘꠔꠣ ꠚꠣꠞꠁꠘ ꠘꠣ ꠢꠈꠟꠞ ꠐꠣꠁꠘ ꠄꠈ ꠍꠃꠇꠦ ꠖꠦꠈꠣ ꠅꠁꠟꠧ ⁕ ꠅꠃ ꠉꠔꠤꠇꠦ ꠢꠣꠞꠣ ꠖꠥꠘꠤꠀꠞ • ꠢꠈꠟ ꠇꠤꠍꠤꠝꠞ ꠍꠤꠟꠐꠤꠘꠔꠞ ꠈꠕꠣ ꠍꠤꠘꠔꠣ ꠈꠞꠤꠀ • ꠍꠤꠟꠐꠤ ꠝꠣꠔ ꠟꠁꠀ ꠘꠣꠘꠣꠘ ꠏꠘꠞ ꠉꠛꠦꠡꠘꠣꠞ ꠃꠚꠞꠦ ꠜꠞꠈꠞꠤ ꠡꠥꠞꠝꠣ ꠚꠣꠞꠞ ꠈꠛꠞ ꠍꠣꠚꠣ ꠅꠞ ⁕
