শুরমা ফারর খবর ছিলটি জবানে ছিলটর খবর
Related Articles
ꠘꠤꠏꠞ ꠟꠤꠚꠤ ꠖꠤꠀ ꠅꠞꠔꠣꠔ ꠍꠤꠟꠐꠤ ꠘꠣꠉꠞꠤ ꠢꠞꠚ ꠖꠤ ꠍꠤꠟꠐꠤ ꠝꠣꠔꠞꠦ ꠐꠤꠇꠣꠁꠀ ꠞꠣꠈꠣ ꠀꠞ ꠀꠞꠣꠁ ꠏꠣꠅꠀꠞ ꠚꠕ ꠕꠣꠈꠣ ꠝꠣꠔꠈꠖꠣꠞꠦ ꠘꠛꠏꠤꠛꠘ ꠖꠤꠛꠣꠞ ꠖꠣꠄ ꠏꠦꠞꠣ ꠈꠣꠍ ꠖꠤꠟꠦ ꠈꠣꠝ ꠈꠞꠞꠣ, ꠄꠞꠣꠞ ꠝꠣꠏꠦ ꠏꠣꠘꠥ ꠀꠞ ꠀꠈꠟꠛꠣꠘ ꠄꠈꠏꠘ ꠍꠤꠟꠐꠤ ꠝꠣꠔꠞꠣ ꠀꠡꠤꠇ ꠅꠁꠟꠣ ꠢꠣꠍꠘꠣꠔ ꠀꠘꠥꠀꠞ ⁕ ꠔꠣꠘꠔꠣꠘꠞ ꠍꠤꠘꠔꠣꠗꠣꠞꠣ, ꠛꠣꠍꠔꠛ ꠡꠚꠘ ꠀꠞ ꠈꠣꠝꠞ ꠢꠚꠟ ꠢꠤꠡꠣꠛꠦ ꠍꠤꠟꠐꠤ ꠏꠛꠣꠘꠦ ꠍꠤꠟꠐꠤ ꠅꠄꠛꠍꠣꠁꠐ ꠡꠥꠞꠝꠣꠚꠣꠠꠞ ꠈꠛꠞ ꠀꠁꠏ ꠅꠈꠣꠘ ꠁꠝꠣ ꠀꠁꠔꠧ ꠚꠣꠞꠍꠧ ⁕ ꠏꠦꠉꠔꠤꠇꠦ ꠢꠣꠍꠘꠣꠔ ꠀꠘꠥꠀꠞꠞ Ιd ꠘꠜꠦꠝ꠆ꠛꠞ Γ0ΙV ꠚꠤꠞꠔꠤꠞ ꠄꠈꠣꠘ ꠟꠦꠈꠣ ꠍꠤꠟꠐꠤ ꠝꠣꠔꠞ ꠘꠛꠏꠤꠅꠘ (সিলটি ভাষা পুনরুদ্ধার) ꠢꠤꠞꠛꠣꠞ ꠘꠄꠀ ꠈꠞꠤ ꠏꠦꠟꠣꠘ ꠅꠟꠣꠘ ꠍꠣꠚꠣꠘꠤ ꠅꠁꠍꠦ ꠏꠣꠔꠦ ꠜꠛꠤꠡ꠆ꠡꠔ ꠍꠣꠃꠍꠤꠞꠤꠄ ꠍꠤꠟꠐꠤ ꠝꠣꠔ ꠟꠁꠀ ꠐꠤꠇ꠆ꠇꠞꠤ ꠈꠣꠝꠈꠣꠏ ꠍꠣꠟꠣꠘꠤ ꠀꠞ ꠖꠤꠡꠣ ꠚꠣꠁꠘ ⁕
• ꠍꠤꠟꠐꠤ ꠝꠣꠔ ꠖꠤꠘꠇꠦ ꠖꠤꠘ ‘ꠘꠣꠁ’ ꠅꠁꠏꠣꠞ ⁕ ꠀꠞꠣꠁ ꠏꠣꠞ ⁕
ꠁ ꠝꠣꠔꠞꠦ ꠛꠣꠍꠣꠁꠀ ꠞꠣꠈꠣ ꠟꠣꠉꠛꠧ ⁕ ꠄꠞ ꠟꠣꠉꠤ ꠘꠣꠉꠞꠤ ꠢꠞꠚ ꠀꠍꠦ, ꠘꠣꠉꠞꠤ ꠢꠞꠚ ꠖꠤꠀ ꠍꠤꠟꠐꠤ ꠝꠣꠔ ꠟꠦꠈꠣ ꠅꠄ ⁕ ꠘꠣꠉꠞꠤ ꠞꠦ ꠈꠦꠃ ꠈꠦꠃ ꠈꠁꠘ ꠘꠣꠉꠞꠤ ꠜꠣꠡꠣ ⁕ ꠁꠇꠐꠣ ꠜꠣꠡꠣ ꠘꠣꠄ ⁕ ꠁꠇꠐꠣ ꠅꠁꠟꠧ- ꠟꠦꠈꠛꠣꠞ ꠢꠞꠚ ⁕ ꠏꠦꠇꠥꠘꠥ ꠜꠣꠡꠣꠞ ꠝꠣꠔ ꠘꠣꠉꠞꠤ ꠖꠤꠀ ꠟꠦꠈꠣ ꠏꠣꠄ ⁕ ꠈꠣꠟꠤ ꠘꠣꠉꠞꠤ ꠖꠤꠀ ꠅꠃ ꠍꠤꠟꠐꠤ ꠝꠣꠔ ꠟꠦꠈꠣ ꠟꠣꠉꠛꠧ, ꠄꠝꠘ ꠇꠥꠘꠥ ꠈꠕꠣ ꠘꠣꠄ ⁕ ꠍꠤꠟꠐꠤ ꠝꠣꠔꠞ ꠍꠞ꠆ꠍꠣ ꠈꠞꠣ ꠅꠁꠟꠧ ꠀꠡꠟ ꠈꠕꠣ ⁕ ꠘꠣꠉꠞꠤ ꠢꠞꠚ ꠖꠤ ꠟꠦꠈꠟꠦꠅꠃ ꠡꠛ ꠕꠣꠇꠤ ꠜꠣꠟꠣ ⁕ ꠁꠇꠐꠣ ꠞꠣꠔꠣꠞꠣꠔꠤ ꠅꠁꠔꠧ ꠘꠣꠄ, ꠡꠝꠄ ꠟꠣꠉꠛꠧ ⁕ ꠀꠈꠔꠣ ꠗꠞꠤ ꠔꠥꠠꠣ ꠈꠧꠈꠖꠤꠘ ‘ꠚꠣꠟꠣꠚꠣꠟꠤ’ ꠉꠞꠟꠦ ꠢꠦꠡꠦ ꠅꠔꠣꠡ ꠅꠁꠛꠣ ⁕ ꠄꠈꠟꠣꠉꠣ ꠔ꠆ꠞꠤꠡ ꠍꠣꠟ꠆ꠟꠤꠡ ꠛꠍꠞ ꠈꠣꠝ ꠈꠞꠅꠃꠇꠣ ꠛꠣꠖꠦ ꠚꠟ ꠚꠣꠁꠛꠣ ⁕ ꠄꠞ ꠀꠉꠦ ꠔꠥꠠꠣ ꠔꠥꠠꠣ ꠚꠟ ꠝꠤꠟꠛꠧ, ꠛꠦꠡꠤ ꠘꠣꠄ ⁕ ꠈꠣꠁꠟ ꠀꠁꠀ ꠀꠁꠎ ꠡꠈꠟꠔꠣꠔ ꠀꠚꠘꠦ ‘ꠚꠕꠝ’ ꠖꠣꠛꠤ ꠈꠞꠟꠦ ꠅꠁꠔꠧ ꠘꠣꠄ ⁕ ꠚꠂꠌꠣꠡ, ꠡꠣꠁꠐ ꠛꠍꠞ ꠗꠞꠤ ꠝꠣꠁꠘꠡꠦ ꠁ ꠟꠣꠁꠘꠧ ꠈꠣꠝ ꠈꠞꠦꠞ ⁕ ꠡꠈꠟꠞ ꠈꠕꠣ ꠁꠀꠖ ꠞꠣꠈꠛꠣ ⁕ ꠈꠣꠟꠤ ꠘꠣꠝ ꠚꠣꠐꠣꠁꠔꠦ ꠍꠣꠁꠟꠦ ꠢꠦꠡꠦ ꠖꠦꠈꠛꠣ ꠀꠚꠘꠦ ꠄꠈꠟꠣ, ꠟꠉꠦ ꠀꠞ ꠈꠦꠃ ꠘꠣꠁ ⁕ ꠄꠈꠐꠣ ꠙꠧꠡ꠆ꠐ ꠖꠤꠟꠦ ꠔꠤꠘꠐꠣꠞ ꠛꠦꠡꠤ ꠟꠣꠁꠇ ꠚꠣꠁꠔꠣ ꠘꠣꠄ ⁕ ‘ꠘꠝꠣꠏꠞ ꠀꠉ’ ꠍꠣꠘꠁꠘ ꠘꠣ ꠏꠣꠘ ⁕ ꠘꠣ ꠛꠦꠏꠣꠞ ?
• ꠍꠤꠟꠐꠤ ꠝꠣꠔꠞꠦ ꠐꠤꠇꠣꠁꠀ ꠞꠣꠈꠔꠦ ꠍꠣꠁꠟꠦ ꠛꠦꠡ ꠇꠤꠍꠥ ꠈꠣꠝ ꠈꠞꠣ ꠟꠣꠉꠛꠧ ⁕ ꠄꠈꠐꠣ ꠈꠣꠝ ꠅꠁꠟꠧ — ꠘꠣꠉꠞꠤꠞꠦ ꠀꠞꠅ ꠃꠘ꠆ꠘꠔ ꠈꠞꠤꠀ ꠇꠝ꠆ꠙꠤꠃꠐꠣꠞꠞ ꠝꠣꠏꠦ, ꠝꠥꠛꠣꠁꠟꠅ ꠡꠈꠟꠦ ꠏꠦꠟꠣ ꠐꠣꠁꠙ ꠈꠞꠤꠀ ꠟꠦꠈꠔꠣ ꠚꠣꠞꠁꠘ, ꠢꠃ ꠛꠦꠛꠍ꠆ꠕꠣ ꠈꠞꠣ ꠟꠣꠉꠛꠧ ⁕ ꠛꠣꠋꠟꠣ ꠢꠞꠚꠦꠅ ꠍꠤꠟꠐꠤ ꠝꠣꠔ ꠟꠦꠇꠤꠀ ꠢꠈꠟ ꠈꠣꠘꠧ ꠙꠃꠍꠣꠘꠤ ꠟꠣꠉꠛꠧ ⁕
ꠍꠤꠟꠐꠤ ꠜꠣꠡꠣꠄ ꠡꠣꠢꠤꠔ꠆ꠔ ꠏꠦꠝꠘ: ꠉꠟ꠆ꠚ, ꠇꠛꠤꠔꠣ, ꠘꠣꠐꠈ, ꠛꠁ, ꠅꠒꠤꠅ ꠔꠣꠁꠀꠞ ꠈꠞꠤꠀ ꠛꠣꠐꠤꠀ ꠖꠦꠅꠀ ꠟꠣꠉꠛꠧ ⁕
• ꠁ ꠏꠦ ꠈꠣꠝ ꠈꠞꠣꠞ ꠈꠕꠣ ꠈꠁꠟꠣꠝ, ꠁ ꠈꠣꠝ ꠈꠣꠘꠣꠁꠘ ꠈꠞꠛꠣꠞ ꠟꠣꠉꠤ ꠀꠝꠞꠣꠞ ꠘꠤꠡ꠆ꠡꠣꠞ꠆ꠕ ꠇꠤꠍꠥ ꠝꠣꠘꠥꠡꠞ ꠖꠞꠈꠣꠞ ⁕ ꠏꠣꠞꠣ ꠘꠣꠝꠞ ꠈꠣꠋꠉꠣꠟ ꠘꠣꠄ, ꠈꠣꠝꠞ ꠚꠣꠉꠟ ⁕ ꠈꠔꠐꠣ ꠙ꠆ꠞꠔꠤꠡ꠆ꠐꠣꠘ ꠀꠞ ꠛꠦꠡ ꠇꠤꠍꠥ ꠍꠤꠘ꠆ꠔꠣꠛꠤꠖ ꠛꠥꠖ꠆ꠖꠤꠀꠟꠣ ꠚꠘ꠆ꠒꠤꠔꠞ ꠖꠞꠈꠣꠞ ꠏꠣꠞꠣ ꠘꠣꠘꠣꠘ ꠇꠃꠡꠟ ꠛꠣꠞ ꠈꠞꠛꠣ, ꠏꠦ ꠇꠃꠡꠟꠦ ꠍꠤꠟꠐꠤ ꠏꠛꠣꠘ ꠛꠤꠟꠥꠚ ꠅꠃꠀ ꠕꠣꠇꠤ ꠛꠣꠍꠔꠧ ꠚꠣꠞꠛꠧ ⁕
• ꠡꠤꠟꠐꠤ ꠜꠣꠡꠣ ꠚꠞꠍꠣꠞ ꠈꠞꠣꠞ ꠟꠣꠉꠤ ꠍꠧꠡꠣꠟ ꠝꠤꠒꠤꠀꠔ ꠘꠣꠘꠣꠘ ꠞꠈꠝ ꠟꠦꠈꠣ ꠙꠧꠡ꠆ꠐ ꠖꠦꠅꠀ ꠅꠄ ⁕ ꠅꠘꠦꠈꠦ ꠖꠤꠔꠦ ꠖꠦꠈꠍꠤ ⁕ ꠈꠦꠃ ꠈꠦꠃ ꠁꠋꠞꠦꠏꠤꠞ ꠍꠤꠟꠐꠤ ꠔꠞꠏꠝꠣ ꠟꠦꠇꠤꠀ ꠖꠦꠁꠘ ⁕ ꠄꠈꠛꠣꠞ ꠖꠦꠈꠟꠣꠝ ꠄꠈꠏꠘꠦ ꠟꠦꠈꠍꠁꠘ:
Who are you? ꠍꠤꠟꠐꠤ ꠔꠞꠏꠝꠣ ꠈꠞꠍꠁꠘ- ꠔꠥꠁ ꠈꠦꠉꠥ? ꠀꠞꠈꠐꠣ ꠟꠦꠈꠣ ꠁꠋꠞꠦꠎꠤ ꠕꠣꠇꠤ ꠍꠤꠟꠐꠤ ꠔꠞꠏꠝꠣ ꠖꠦꠈꠟꠣꠝ- keep quiet- ꠘꠤꠞꠣꠁ ꠕꠣꠈ !
ꠀꠝꠣꠞ ꠝꠘꠦ ꠅꠄ, ꠘꠤꠞꠣꠁ ꠕꠣꠈ ꠘꠣ ꠖꠤꠀ ‘ꠘꠤꠞꠣꠁ ꠕꠣꠈꠁꠘ ꠛꠣ ꠘꠤꠞꠣꠁ ꠕꠣꠈꠅꠃꠇꠣ ꠖꠤꠔꠣ ꠀꠍꠟꠣ ⁕ ꠇꠤꠀꠟ ꠈꠞꠅꠃꠇꠣ, ꠍꠤꠟꠐꠤ ꠜꠣꠡꠣꠄ ꠈꠣꠟꠤ ꠔꠥꠁ ꠍꠣꠠꠣꠅ ꠔꠥꠝꠤ, ꠀꠚꠘꠦ ꠅ ꠀꠍꠦ ⁕ ꠝꠤꠍꠣꠟ (example) ꠖꠤꠟꠦ ꠈꠣꠟꠤ ꠔꠥꠁ ꠈꠁꠀ ꠖꠤꠟꠦ ꠅꠜꠖ꠆ꠞꠔꠣ ꠅꠄ ⁕ ꠔꠥꠝꠤ ꠈꠦ ꠛꠣ ? ꠛꠣ ꠀꠚꠘꠦ ꠈꠦ ? ꠅꠟꠣ ꠟꠦꠇꠤꠀ ꠖꠦꠃꠇꠣ ⁕ ꠄꠞ ꠟꠉꠦ ꠔꠥꠁ ꠈꠦꠉꠥ ꠅ ꠖꠤꠔꠣ ꠚꠣꠞꠁꠘ ⁕ ꠜꠖ꠆ꠞꠜꠣꠛꠦ ꠝꠣꠔꠅꠃꠇꠣ, ꠈꠣꠟꠤ ꠔꠥꠁ ꠔꠥꠇꠣꠞꠤ ꠘꠣ !
• ꠍꠤꠟꠐꠤ ꠏꠛꠣꠘꠦ ꠛꠁ, ꠙꠔ꠆ꠞꠤꠇꠣ, ꠘꠣꠐꠈꠞ ꠛꠁ, ꠇꠛꠤꠔꠣ ꠀꠞ ꠚꠥꠕꠤꠞ ꠛꠁ, ꠙꠧꠡ꠆ꠐꠣꠞ ꠛꠣꠘꠣꠁꠀ ꠙꠞꠌꠣꠞꠞ ꠟꠣꠉꠤ ꠛꠣꠐꠤꠀ ꠖꠦꠅꠀ ꠟꠣꠉꠛꠧ ⁕ ꠁꠔꠣ ꠛꠁꠚꠔ꠆ꠞꠞ ꠝꠣꠏꠦ ꠇꠥꠘ ꠛꠦꠈ꠆ꠔꠤꠞ ꠘꠣꠝ ꠚꠣꠐꠣꠘꠤꠞ ꠍꠦꠡ꠆ꠐꠣ ꠈꠞꠟꠦ ꠟꠣꠜ ꠕꠣꠇꠤ ꠟꠥꠇꠡꠣꠘ ꠛꠦꠡꠤ ꠅꠁꠛ ⁕ ꠁ ꠛꠁ ꠈꠣꠘꠣꠁꠘ ꠀꠚꠣꠔꠔ: ꠛꠣꠋꠟꠣ ꠢꠞꠚꠦ ꠈꠞꠣ ꠏꠣꠁꠔꠧ ꠚꠣꠞꠦ ⁕ ꠚꠞꠦ ꠕꠥꠠꠣ ꠕꠥꠠꠣ ꠈꠞꠤ ꠘꠣꠉꠞꠤ ꠢꠞꠚꠦ ꠛꠖꠟꠣꠘꠤ ꠏꠣꠁꠛꠧ ⁕ ꠀꠞ ꠘꠣꠄ, ꠘꠣꠉꠞꠤ ꠢꠤꠇꠣꠞ ꠀꠡꠣꠄ ꠀꠡꠟ ꠈꠣꠝ ꠛꠣꠖ ꠚꠠꠤ ꠏꠣꠁꠛꠧ ⁕
ꠀꠞ, ꠄꠞ ꠟꠣꠉꠤ ꠘꠤꠡ꠆ꠡꠣꠞ꠆ꠕ, ꠘꠣꠝꠞ ꠈꠣꠋꠉꠣꠟ ꠘꠣꠄ ꠅꠃ ꠟꠣꠈꠣꠘ ꠛꠦꠡꠤ ꠘꠣꠄ, ꠖꠥꠁ ꠔꠤꠘꠎꠘ ꠚꠘ꠆ꠒꠤꠔ ꠝꠣꠘꠥꠡ ꠖꠞꠈꠣꠞ ⁕ ꠀꠞꠅ ꠖꠞꠈꠣꠞ ꠄꠈꠐꠣ ꠛꠣ ꠖꠥꠁꠐꠣ ꠙ꠆ꠞꠔꠤꠡ꠆ꠐꠣꠘ ⁕ ꠄꠇꠣꠒꠦꠝꠤ, ꠚꠣꠃꠘ꠆ꠒꠦꠡꠘ ꠅꠟꠣ ꠇꠤꠌ꠆ꠌꠥ ꠄꠈꠐꠣ ⁕
ꠀꠞ ꠏꠥꠖꠤ ꠀꠝꠣꠞ ꠈꠕꠣ ꠈꠣꠘꠣꠁꠘ ꠀꠚꠘꠣꠞ ꠚꠍꠘ꠆ꠖ ꠟꠣꠉꠦ ꠔꠦ ꠀꠉ ꠛꠣꠠꠅꠃꠇꠣ ⁕ ꠀꠝꠣꠞ ꠀꠞꠅ ꠕꠥꠠꠣ ꠝꠣꠔ ꠀꠍꠦ…
ꠍꠤꠟꠐꠤ ꠝꠣꠔ-ꠈꠕꠣ: ꠁꠇꠐꠣꠞ ꠜꠛꠤꠡ꠆ꠡꠔ-Γ …
ꠀꠝꠣꠞ ꠝꠘꠅ ꠅꠁꠉꠦꠟ ꠄꠇꠐꠣ ꠍꠤꠟꠐꠤ ꠒꠤꠐꠣꠘ (ꠍꠤꠟ꠆ꠟꠈ) ⁕
‘ꠜꠣꠉ ꠘꠣꠁ ꠛꠦꠐꠣꠞ ꠚꠞꠥ ꠛꠤꠀ,
ꠀꠞꠤꠚꠞꠤꠄ ꠈꠣꠁꠔꠣ ꠉꠤꠀ… ⁕’
ꠈꠦꠘꠦ ꠁꠇꠐꠣ ꠝꠘꠅ ꠅꠁꠟꠧ, ꠈꠁꠟꠔꠣꠝ ꠘꠤ ? ꠔꠦ ꠚꠠꠤꠀ ꠏꠣꠃꠇꠣ, ꠚꠣꠁꠛꠣꠘꠦ ⁕
ꠖꠥꠁꠔꠤꠘ ꠛꠍꠞ ꠀꠉꠦ ꠟꠦꠈꠍꠤꠟꠣꠝ-ꠍꠤꠟꠐꠤ ꠝꠣꠔ: ꠁꠇꠐꠣꠞ ꠜꠛꠤꠡ꠆ꠡꠔ ⁕ ꠡꠛꠦ ꠡꠝꠣꠖꠞ ꠈꠞꠍꠤꠟꠣ ꠀꠝꠣꠞ ꠢꠤ ꠟꠦꠈꠣꠐꠣ ⁕ ꠁ ꠖꠥꠁꠔꠤꠘ ꠛꠍꠞꠦ ꠛꠃꠔꠔꠣ ꠛꠖꠟꠤ ꠉꠦꠍꠦ ⁕ ꠄꠈꠘ ꠀꠞꠧ ꠇꠤꠍꠥ ꠝꠣꠔ ꠝꠣꠔꠣꠞ ꠖꠞꠈꠣꠞ ꠝꠘꠧ ꠅꠞ ⁕ ꠛꠃꠔ ꠝꠣꠔ ꠀꠍꠦ, ꠡꠛꠔꠣ ꠄꠈꠛꠣꠞꠦ ꠝꠣꠔꠤꠀ ꠟꠣꠜ ꠘꠣꠄ ⁕ ꠕꠥꠠꠣ ꠕꠥꠠꠣ ꠈꠞꠤ ꠝꠣꠔꠤ… ꠟꠣꠄ ꠟꠣꠄ ꠢꠈꠟ ꠝꠣꠔ ꠅꠃ ꠝꠣꠔꠣ ꠏꠣꠁꠛꠧ ⁕ ꠔꠦ ꠡꠛ ꠈꠕꠣꠞ ꠚꠄꠟꠣ ꠈꠕꠣ ꠅꠁꠟꠧ ꠉꠤꠀ-
ꠍꠤꠟꠐꠤ ꠝꠣꠔ ꠀꠍ꠆ꠔꠦ ꠀꠍ꠆ꠔꠦ ‘ꠘꠣꠁ’ ꠅꠁ ꠏꠣꠞꠉꠤ ⁕
ꠁꠇꠐꠣꠞꠦ ꠐꠤꠇꠣꠁꠀ ꠞꠣꠈꠣ ꠟꠣꠉꠛꠧ ⁕ ꠄꠞ ꠟꠣꠉꠤ ꠇꠤꠍꠥ ꠛꠦꠛꠍ꠆ꠕꠣ ꠘꠦꠅꠀ ꠟꠣꠉꠛꠧ ⁕ ꠎꠦ ꠈꠣꠝ ꠉꠥꠁꠘ ꠈꠞꠣ ꠟꠣꠉꠛꠧ:
Ι
ꠄꠈꠐꠣ ꠅꠁꠟꠧ ‘ꠍꠤꠟꠐꠤ ꠢꠞꠚ’, ꠏꠣꠞꠦ ꠈꠄ ꠘꠣꠉꠞꠤ ꠟꠤꠚꠤ, ꠁꠇꠐꠣꠞꠦ ꠀꠞꠧ ꠃꠘ꠆ꠘꠔ ꠈꠞꠣ ꠟꠣꠉꠛꠧ ⁕ ꠀꠞ ꠡꠛ ꠝꠣꠁꠘꠡꠞ ꠉꠦꠍꠦ ꠚꠃꠍꠣꠁꠀ ꠖꠦꠅꠀ ꠟꠣꠉꠛꠧ ⁕ ꠔꠦ ꠄꠈꠣꠘ ꠈꠕꠣ ꠝꠘꠧ ꠞꠣꠈꠣ ꠟꠣꠉꠛꠧ, ꠍꠤꠟꠐꠤ ꠝꠣꠔ ꠛꠣ ꠏꠛꠣꠘꠞ ꠟꠣꠉꠤ ꠅꠃ ꠘꠣꠉꠞꠤ ꠢꠞꠚ ⁕ ꠘꠣꠉꠞꠤꠞ ꠀꠉꠦ ꠍꠤꠟꠐꠤ ꠏꠛꠣꠘ ꠀꠁꠍꠦ ⁕ ꠡꠛꠦ ꠈꠣꠟꠤ ꠘꠣꠉꠞꠤ ꠘꠣꠉꠞꠤ ꠈꠞꠟꠦ ‘ꠍꠤꠟꠐꠤ ꠜꠣꠡꠣ ꠚꠞꠌꠣꠞꠞ ꠡꠛ ꠈꠣꠝ ꠅꠁꠔꠧ ꠘꠣꠄ ⁕ ꠏꠥꠖꠤ ꠡꠛ ꠈꠣꠟꠤ ꠘꠣꠉꠞꠤ ꠟꠁꠀ ꠛꠦꠍ꠆ꠔꠅ ꠅꠁ ꠏꠣꠁꠘ, ꠔꠦ ꠝꠣꠁꠞꠦ ꠝꠣꠍ ꠝꠣꠞꠤꠀ ꠈꠣꠛꠣꠁꠛꠧ ꠈꠦ? ꠈꠕꠣꠞ ꠝꠣꠁꠘꠤ ꠅꠁꠟ, ꠄꠈ ꠗꠥꠞꠣ ꠘꠣꠄ, ꠢꠈꠟ ꠛꠣꠄꠖꠤ ꠈꠣꠝ ꠈꠞꠣ ꠟꠣꠉꠛꠧ ⁕ ꠏꠦ ꠏꠦꠛꠣꠄꠖꠤ ꠈꠣꠝ ꠈꠞꠞꠣ, ꠡꠛꠞꠦ ꠡꠣꠛ꠆ꠛꠣꠡꠤ ꠖꠦꠅꠀ ꠟꠣꠉꠛꠧ ⁕ ꠀꠚꠘꠦ ꠏꠦꠈꠐꠣ ꠈꠞꠞꠣ, ꠀꠞꠈꠏꠘꠦ ꠏꠥꠖꠤ ꠀꠚꠘꠣꠞ ꠟꠉꠦ ꠀꠁꠀ ꠡꠞꠤꠇ ꠘꠣ ꠅꠄ, ꠔꠦ ꠢꠦ ꠛꠣꠖ ꠅꠁ ꠉꠦꠟꠧ ꠉꠤ, ꠁꠟꠣ ꠇꠥꠘꠥ ꠈꠕꠣ ꠘꠣꠄ ⁕ ꠁꠟꠣ ꠏꠥꠖꠤ ꠝꠘꠧ ꠈꠞꠁꠘ ꠔꠦ ꠈꠣꠝ ꠛꠦꠡꠤ ꠅꠁꠔꠧ ꠘꠣꠄ, ꠛꠤꠛꠣꠖ ꠏꠉꠠꠣ ꠈꠞꠣ ꠅꠃ ꠡꠣꠞ ꠅꠁꠛꠧ ⁕ ꠍꠤꠟꠐꠤ ꠏꠛꠣꠘ ꠚꠞꠌꠣꠞ ꠅꠞ ꠈꠣꠝꠅ ꠛꠣꠗꠣ ꠀꠁꠛ ⁕ ꠏꠥꠖꠤ ꠀꠚꠘꠦ ꠁꠟꠣ ꠝꠘꠧ ꠈꠞꠁꠘ ꠔꠦ ꠀꠚꠘꠦ ꠅ ꠝꠘꠧ ꠞꠣꠈꠛꠣ, ꠜꠣꠟꠣ ꠈꠞꠔꠦ ꠉꠤꠀ ꠛꠥꠞꠣ ꠗꠞꠣꠁꠟꠤꠞꠣ ⁕ ꠅꠞ꠆ꠔꠣꠔ ꠟꠣꠜ ꠈꠞꠣꠔ ꠉꠤꠀ ꠈꠔꠤ ꠈꠞꠞꠣ ꠀꠚꠘꠦ ⁕
Γ
ꠖꠥꠁ ꠟꠝ꠆ꠛꠞ ꠈꠣꠝ ꠅꠁꠟꠧ ꠉꠤꠀ, ꠍꠤꠟꠐꠤ ꠏꠛꠣꠘꠦ ꠟꠦꠈꠣ ꠛꠦꠡ ꠇꠤꠍꠥ ꠛꠁ ꠚꠔ꠆ꠞ ꠍꠣꠚꠣꠘꠤ ꠟꠣꠉꠛꠧ ⁕ ꠍꠤꠟꠐꠤ ꠜꠣꠡꠣꠞ ‘ꠡꠣꠢꠤꠔ꠆ꠔ ꠍꠤꠡ꠆ꠐꠤ’ ꠈꠞꠣ ꠟꠣꠉꠛꠧ ⁕ ꠏꠔꠖꠤꠘ ꠡꠈꠟꠞ ꠝꠣꠏꠦ ꠍꠤꠟꠐꠤ ꠘꠣꠉꠞꠤ ꠚꠃꠍꠤꠍꠦꠘꠣ, ꠅꠔꠖꠤꠘ ꠛꠣꠋꠟꠣ ꠢꠞꠚꠦ ꠍꠤꠟꠐꠤ ꠝꠣꠔꠞ ꠛꠁ ꠚꠔ꠆ꠞ ꠍꠣꠚꠣꠁꠀ ꠢꠈꠟ ꠏꠣꠉꠣꠄ ꠚꠃꠍꠣꠘꠤ ꠟꠣꠉꠛꠧ ⁕ ꠄꠞ ꠟꠉꠦ ꠍꠤꠟꠐꠤ ꠉꠣꠘ, ꠇꠛꠤꠔꠣ, ꠘꠣꠐꠈꠞ ꠅꠒꠤꠅ ꠜꠤꠒꠤꠅ ꠛꠣꠘꠣꠁꠀ ꠏꠣꠉꠣꠄ ꠏꠣꠉꠣꠄ ꠚꠃꠍꠣꠘꠤ ꠟꠣꠉꠛꠧ ⁕ ꠍꠤꠟꠐꠤ ꠝꠣꠔ ꠈꠁꠟꠦ ꠅꠃ ꠈꠣꠟꠤ ꠀ’ꠡꠤ-ꠔꠣꠝꠡꠣ ꠘꠣꠄ, ꠖꠥꠇꠇꠞ ꠇꠛꠤꠔꠣ, ꠉꠣꠘ, ꠘꠣꠐꠈ ꠛꠣꠘꠣꠘꠤ ꠟꠣꠉꠛꠧ ⁕ ꠡꠥꠇꠦ ꠖꠥꠇꠇꠦ ꠎꠤꠛꠘ ⁕ ꠄꠞꠟꠣꠉꠤ ꠅꠃ ꠀꠡꠤ’ꠞ ꠟꠉꠦ ꠖꠥꠇꠇꠞ ꠈꠕꠣꠅ ‘ꠡꠣꠢꠤꠔ꠆ꠔ’ꠔ ꠀꠅꠀ ꠏꠞꠥꠞꠤ⁕ ꠡꠣꠢꠤꠔ꠆ꠔ ꠡꠛꠞ ꠈꠣꠝ ꠘꠣꠄ ⁕ ꠡꠛ ꠡꠣꠢꠤꠔ꠆ꠔꠤꠇꠅ ꠘꠣꠄ ⁕ ꠄꠞ ꠟꠣꠉꠤ ꠏꠦꠞꠣ ꠡꠣꠢꠤꠔ꠆ꠔꠤꠇ ꠀꠍꠁꠘ, ꠔꠣꠞꠣ ꠀꠃꠉꠉꠣꠁꠀ ꠀꠅꠀ ꠖꠞꠈꠣꠞ ⁕ ꠄꠈ ꠖꠥꠁꠐꠣ ‘ꠍꠤꠟꠐꠤ ꠜꠣꠡꠣ ꠄꠇꠣꠒꠦꠝꠤ ꠛꠣ ꠚꠣꠃꠘ꠆ꠒꠦꠡꠘ’ ꠉꠑꠘ ꠈꠞꠣ ꠖꠞꠈꠣꠞ, ꠏꠦꠞꠣ ꠛꠁ ꠍꠣꠚꠣꠘꠤ, ꠚꠞꠌꠣꠞ, ꠡꠜꠣ, ꠍꠦꠝꠤꠘꠣꠞ ꠈꠞꠛꠣ ꠛꠌ꠆ꠌꠞꠞ ꠛꠣꠞꠧꠝꠣꠡ ⁕
ꠉꠣꠃ ꠖꠦꠡꠧꠞ ꠅꠡꠤꠇꠇꠤꠔ ꠝꠣꠁꠘꠡꠞ ꠝꠥꠇꠧ ꠀꠛꠧ ꠍꠤꠟꠐꠤ ꠝꠣꠔ ꠛꠢꠣꠟ ꠀꠍꠦ ⁕ ꠅꠁꠟꠦ, ꠏꠦꠞꠣ ꠟꠦꠈꠣꠚꠠꠣ ꠈꠞꠤꠀ ꠡꠤꠇꠇꠤꠔ ꠅꠁꠍꠁꠘ, ꠄꠞꠣ ꠛꠦꠡꠤꠞ ꠜꠣꠉꠦ ꠍꠤꠟꠐꠤ ꠝꠣꠔ ꠝꠣꠔꠤꠔꠣ ꠚꠣꠞꠁꠘ ꠘꠣ ⁕ ꠏꠥꠖꠤ ꠛꠣ ꠝꠣꠔꠤꠔꠣ ꠚꠣꠞꠁꠘ, ꠔꠦ ꠟꠦꠈꠛꠣꠞ ꠈꠕꠣ ꠈꠁꠟꠦ ꠖꠦꠈꠣ ꠏꠣꠄ ꠀꠗꠣ ꠕꠣꠇꠤ ꠛꠦꠡꠤ ꠛꠣꠋꠟꠣ ꠀꠞ ꠁꠋꠟꠤꠡ ꠖꠤꠀ ꠜꠞꠣꠁ ꠟꠣꠁꠍꠁꠘ !! ꠄꠞꠣꠞ ꠛꠦꠡꠤꠞ ꠜꠣꠉꠦ, ꠁ ꠈꠕꠣ ꠛꠥꠏꠔꠣꠅ ꠚꠣꠞꠁꠘ ꠘꠣ ꠏꠦ ꠔꠣꠁꠘ ꠍꠤꠟꠐꠤ ꠝꠣꠔ ꠚꠣꠃꠞꠤꠟꠣꠁꠍꠁꠘ ⁕ ꠔꠣꠁꠘ ꠏꠦꠔꠣ ꠝꠣꠔꠞꠣ ꠛꠣ ꠟꠦꠈꠞꠣ, ꠢꠤꠞꠛꠣꠞ ꠈꠁꠞꠣ ‘ꠁꠇꠐꠣ ꠍꠤꠟꠐꠤ’, ꠀꠡꠟꠦ ꠁꠇꠐꠣ ꠍꠤꠟꠐꠤ ꠘꠣꠄ ⁕ ꠁꠇꠐꠣꠞ ꠛꠦꠡꠤꠞ ꠜꠣꠉ ꠛꠣꠋꠟꠣ ꠀꠞ ꠇꠤꠍꠥ ꠁꠋꠟꠤꠡ ⁕ ꠔꠦ ꠔꠣꠞꠣꠞꠦ ꠁ ꠈꠕꠣ ꠈꠁꠟꠦꠅ ꠡꠢꠏꠦ ꠝꠣꠘꠔꠦ ꠞꠣꠏꠤ ꠅꠁꠘꠘꠣ ⁕ ꠘꠣꠘꠣꠘ ꠛꠤꠀꠇꠇꠣ ꠖꠦꠈꠣꠁꠘ ⁕ ꠛꠥꠏꠣꠁꠀ ꠈꠁꠟꠦ, ꠁ ꠈꠕꠣ ꠝꠣꠘꠁꠘ – ꠔꠣꠁꠘ ꠏꠦ ꠟꠚꠏ ꠈꠁꠍꠁꠘ, ꠁꠇꠐꠣ ꠍꠤꠟꠐꠤ ꠘꠣꠄ ⁕ ꠔꠃ ꠏꠥꠇ꠆ꠔꠤ ꠖꠦꠈꠣꠁꠘ, ꠛꠣꠁꠞꠣ ꠕꠣꠇꠤ ꠟꠚꠎ ꠛꠣ ꠡꠛ꠆ꠖ ꠀꠘꠤꠀ ꠔꠣꠁꠘ ꠍꠤꠟꠐꠤ ꠎꠛꠣꠘ ꠞꠦ ‘ꠡꠝꠞꠤꠖ꠆ꠖ’ ꠈꠞꠣꠞ ꠌꠦꠡ꠆ꠐꠣꠔ ꠀꠍꠁꠘ⁕ ꠛꠥꠏꠟꠣꠘꠤ ?
ꠝꠣꠔ ꠢꠥꠘꠃꠇꠣ ꠛꠦꠐꠣꠞ !
ꠘꠤꠏꠦ ꠝꠣꠔꠔꠧ ꠚꠣꠞꠦꠘꠣ ꠍꠤꠟꠐꠤ ꠀꠞ ꠈꠄ, ꠢꠦ ꠛꠥꠟꠦ ꠍꠤꠟꠐꠤ ꠏꠛꠣꠘꠞꠦ ꠚꠥꠇ꠆ꠔ (ꠡꠝꠞꠤꠖ꠆ꠖ) ꠉꠞꠦꠞ ! ‘ꠜꠣꠉ ꠘꠣꠁ ꠛꠦꠐꠣꠞ ꠚꠞꠥ ꠛꠤꠀ, ꠀꠞꠤ ꠚꠞꠤꠄ ꠈꠣꠁꠔꠣ ꠉꠤꠀ !’ ꠁꠔꠣꠞ ꠅꠁꠟ ꠅꠃ ꠢꠣꠟꠔ ! ꠀꠐꠣ ꠢꠤꠇꠛꠣꠞ ꠀꠉꠦ ꠖꠃꠠ ꠝꠣꠞꠣꠞ ꠌꠦꠡ꠆ꠐꠣ ꠈꠞꠟꠦ ꠄꠞ ꠚꠟ ꠇꠤꠔꠣ ꠈꠁꠔꠣꠝ ꠘꠤ ? ꠄꠞ ꠚꠟ ꠅꠁꠟꠧ- ꠀꠍꠣꠠ ꠈꠣꠁꠀ ꠃꠚꠁꠔ ꠅꠁꠀ ꠚꠠꠣ ⁕
৩
ꠔꠤꠘ ꠘꠝ꠆ꠛꠞ ꠏꠦ ꠈꠕꠣ ‘ꠛꠥꠏꠣ ꠀꠞ ꠁꠀꠖ ꠞꠣꠈꠣ’ ꠖꠞꠈꠣꠞ, ꠁꠇꠐꠣ ꠅꠁꠟꠧ-ꠘꠤꠡ꠆ꠡꠣꠞ꠆ꠕ ꠜꠣꠛꠦ ꠈꠣꠝ ꠈꠞꠣ ꠟꠣꠉꠛꠧ ⁕ ꠇꠥꠘꠥ ꠛꠦꠇ꠆ꠔꠤꠉꠔ ꠚꠣꠄꠖꠣ ꠢꠣꠍꠤꠟ ꠈꠞꠣꠞ ꠍꠤꠘ꠆ꠔꠣ ꠛꠣꠖ ꠖꠤꠀ ꠍꠤꠟꠐꠤ ꠜꠣꠡꠣꠞ ꠚꠞꠞꠍꠣꠞ ꠈꠞꠣ ꠟꠣꠉꠛꠧ ⁕ ꠍꠤꠟꠐꠤ ꠜꠣꠡꠣꠞ ꠈꠕꠣ ꠈꠁꠀ ꠛꠦꠡ ꠈꠞꠤ ꠍꠣꠘ꠆ꠖꠣ ꠔꠥꠟꠤꠀ ꠇꠤꠍꠥ ꠚꠄꠍꠣ ꠏꠦꠛꠧ/ꠚꠇꠦꠐꠧ ꠓꠥꠇꠣꠁꠛꠣꠞ ꠍꠤꠘ꠆ꠔꠣ ꠝꠣꠕꠣ ꠕꠣꠇꠤ ꠛꠣꠖ ꠖꠤꠔꠣ ꠅꠁꠛꠧ ⁕ ꠀꠞꠈ ꠈꠕꠣ ꠈꠁ ? ꠍꠤꠟꠐꠤ ꠏꠛꠣꠘ ꠟꠁꠀ ꠀꠚꠘꠣꠞ ꠈꠣꠝ, ꠀꠚꠘꠣꠞ ꠡꠋꠉ꠆ꠞꠣꠝ ꠏꠥꠖꠤ ꠅꠄ, ꠔꠦ ꠈꠦ ꠙ꠆ꠞꠕꠝ ꠀꠞ ꠈꠦ ২ꠅ, ꠁꠔꠣ ꠖꠤ ꠇꠤꠔꠣ ꠈꠞꠔꠣ ? ꠛꠣꠞ ꠛꠣꠞ ‘ꠙ꠆ꠞꠕꠝ ꠖꠣꠛꠤ’ ꠔꠥꠟꠍꠦ ꠈꠦ, ꠚꠄꠟꠣ ꠚꠘ꠆ꠐ ꠛꠣꠘꠣꠁꠍꠦ ꠈꠦ .. ꠁꠔꠣ ꠝꠣꠔꠟꠦ ꠇꠤꠔꠣ ꠍꠤꠟꠐꠤ ꠏꠛꠣꠘ ꠚꠞꠍꠣꠞꠅ ꠟꠣꠜ ꠀꠍꠦꠘꠤ ?
ꠀꠚꠘꠣꠞ ꠟꠣꠜ ꠅꠁꠔꠧ ꠚꠣꠞꠦ, ꠅꠁꠟꠦ ꠍꠤꠟꠐꠤ ꠜꠣꠡꠣꠞ ꠇꠥꠘꠥ ꠟꠣꠜ ꠘꠣꠄ ⁕ ꠝꠣꠘꠥꠡ ꠛꠦ-ꠀꠇ꠆ꠇꠟ ꠘꠣꠄ, ꠔꠣꠞꠣ ꠛꠥꠏꠛꠣ ꠈꠦ ꠈꠣꠐꠤ ꠍꠤꠟꠐꠤ ꠏꠛꠣꠘ ꠚꠞꠍꠣꠞ ꠍꠣꠁꠘ, ꠀꠞ ꠈꠦ ꠘꠣꠝ ꠚꠣꠐꠣꠘꠤ ꠍꠣꠁꠘ ⁕ ꠀꠚꠘꠦ ꠄꠈꠝꠘꠦ ꠈꠣꠝ ꠈꠞꠟꠦ ꠄꠞ ꠡꠤꠇꠞꠤꠔꠤ ꠏꠞꠥꠞ ꠚꠣꠁꠛꠣ ⁕ ꠀꠞ ꠘꠣ ꠚꠣꠁꠟꠦ ꠅꠃ ꠇꠤꠔꠣ ? ꠀꠚꠘꠦ ꠔꠧ ꠁ ꠜꠣꠡꠣꠞ ꠟꠣꠉꠤ ꠈꠣꠝ ꠈꠞꠞꠣ, ꠘꠣꠝꠞ ꠟꠣꠉꠤ ꠘꠣꠄ ⁕ ꠔꠦ ꠛꠣꠖ ꠖꠦꠃꠇꠣ ꠈꠦ ꠚꠄꠟꠣ ꠀꠞ ꠈꠦ ꠖꠤꠔꠤꠅ, ꠁ ꠍꠤꠘ꠆ꠔꠣ ꠛꠣꠖ ꠖꠦꠃꠇꠣ ⁕ ꠀꠚꠘꠦ ꠏꠦ ꠈꠣꠝ ꠚꠄꠟꠣ ꠈꠞꠍꠁꠘ ꠁꠇꠐꠣ, ꠀꠚꠘꠦ ꠈꠁꠔꠣ ꠘꠣ, ꠈꠁꠔꠧ ꠀꠞ ꠖꠡꠏꠘꠦ ⁕
ꠀꠞ ꠏꠥꠖꠤ ꠀꠚꠘꠦ ꠘꠤꠏꠦ ꠘꠤꠏꠞ ꠓꠥꠟ ꠛꠣꠏꠣꠘꠤꠔ ꠟꠣꠉꠤ ꠏꠣꠁꠘ, ꠔꠦ ꠙ꠆ꠞꠝꠣꠘ ꠅꠁꠛꠧ, ꠀꠚꠘꠦ ꠍꠤꠟꠐꠤ ꠜꠣꠡꠣꠞ ꠚꠞꠍꠣꠞ ꠘꠣꠄ, ꠘꠤꠏꠞ ꠚꠞꠍꠣꠞ ꠍꠣꠁꠘ ⁕ ꠀꠞꠧ ꠇꠤꠍꠥ ꠏꠤꠘꠤꠡ ꠈꠁ…
ꠄꠈ ꠗꠞꠘꠞ ꠝꠣꠘꠥꠡ ꠀꠍꠁꠘ, ꠈꠦꠃ ꠍꠤꠟꠐꠤ ꠝꠣꠔꠈꠕꠣ ꠟꠦꠈꠟꠦ ꠅꠃ, ꠜꠥꠟ ꠗꠞꠣ ꠡꠥꠞꠥ ꠈꠞꠁꠘ⁕ ‘ꠛꠣꠘꠣꠘ ꠜꠥꠟ, ꠛꠣꠘꠣꠘ ꠅꠟꠣ ꠅꠁꠔꠧ, ꠢ’ꠟꠣ ꠅꠁꠔꠧ, ꠁꠇꠐꠣ ꠍꠤꠟꠐꠤ ꠝꠣꠔ ꠅꠁꠍꠦꠘꠣ’, ꠀꠞꠧ ꠈꠔꠔꠣ ⁕ ꠁꠟꠣ ꠈꠞꠤꠀ ꠀꠚꠘꠦ ꠝꠣꠘꠥꠡꠞꠦ ꠒꠞ ꠖꠦꠈꠣꠃꠇꠣ ꠘꠣ ⁕ ꠝꠣꠘꠥꠡ ꠜꠣꠉꠣꠃꠇꠣ ꠘꠣ ⁕ ꠄꠈꠐꠣ ꠜꠣꠡꠣꠞꠦ ꠀꠞꠛꠣꠞ ꠀꠗꠣꠝꠞꠣ ꠕꠣꠇꠤ ꠏꠤꠔꠣ ꠈꠞꠔꠦ ꠅꠁꠟꠦ ꠛꠃꠔ ꠏꠤꠘꠤꠡ ꠛꠤꠛꠦꠍꠘꠣ ꠈꠞꠣ ꠟꠣꠉꠦ ⁕ ꠖꠥꠁ ꠄꠈꠏꠘꠦ ꠜꠥꠟ ꠅꠃ ꠟꠦꠈꠃꠇꠘꠣ ! ꠟꠦꠈꠦꠞ ꠏꠦꠘꠦ, ꠅꠈꠐꠣ ꠅꠃ ꠢꠣꠘ꠆ꠖꠦꠡ ⁕ ꠀꠃꠇꠣ ꠀꠚꠣꠔꠔ: ꠛꠦꠡꠤ ꠝꠣꠘꠥꠡꠞꠦ ꠡꠣꠝꠤꠟ ꠈꠞꠤ, ꠜꠥꠟ ꠡꠥꠖ꠆ꠖ ꠡꠈꠟ ꠏꠣꠔ ꠝꠤꠟꠣꠁꠀ ꠀꠉꠦ ꠛꠣꠠꠤ ⁕ ꠈꠦꠃ ꠜꠥꠟ ꠟꠦꠈꠟꠦ ꠀꠚꠘꠦ ꠔꠣꠞꠦ ꠡꠞꠝꠤꠘ꠆ꠖꠣ ꠘꠣ ꠈꠞꠤꠀ ꠘꠤꠏꠦ ꠘꠤꠏꠦ ꠀꠟꠣꠖꠣ ꠜꠣꠛꠦ ꠡꠥꠖ꠆ꠖꠐꠣ ꠚꠞꠍꠣꠞ ꠈꠞꠃꠇꠣ ꠏꠦꠟꠣ ꠕꠥꠠꠣ ꠀꠉꠦ ꠀꠝꠤ ꠟꠦꠈꠍꠤ ⁕ ꠜꠥꠟ ꠈꠣꠞꠣ ꠈꠞꠁꠘ ꠅꠃ ꠈꠕꠣ ꠀꠝꠤꠅ ꠈꠁꠀ ꠖꠤꠍꠤ ⁕ ꠛꠦꠈꠔꠤ ꠛꠤꠡꠦꠡꠞꠦ ꠡꠞꠝ ꠘꠣ ꠖꠤꠀꠅ ꠡꠋꠡꠥꠗꠘꠞ ꠡꠥꠏꠥꠉ ꠀꠍꠦ ⁕ ꠡꠣꠝꠘꠣ ꠡꠣꠝꠘꠤ ꠖꠥꠡ ꠘꠣ ꠗꠞꠤꠀ ꠡꠣꠛꠣꠡꠤ ꠖꠦꠅꠇꠣ ꠔꠣꠘꠞꠦ, ꠔꠣꠁꠘ ꠏꠦꠘ ꠍꠤꠟꠐꠤ ꠟꠦꠈꠞꠣ ꠄꠞ ꠟꠣꠉꠤ ⁕ ꠀꠞ ꠇꠤꠍꠥ ꠍꠤꠟꠐꠤ ꠝꠣꠔ ꠘꠤꠏꠦ ꠡꠑꠤꠇ ꠜꠣꠛꠦ ꠟꠦꠈꠤꠀ ꠚꠣꠑꠣꠁꠀ ꠖꠦꠃꠇꠣ, ꠏꠦ ꠜꠥꠟ ꠟꠦꠈꠁꠘ, ꠔꠣꠘꠞꠦ ⁕ ꠀꠝꠤ ꠏꠣꠘꠤ ꠁꠟꠣ ꠈꠧꠈ ꠏꠘꠞꠦ ꠏꠣꠞꠣ ꠁ ꠟꠣꠈꠣꠘ ꠈꠞꠁꠘ ⁕ ꠔꠣꠞꠣꠞꠦ ꠡꠥꠇꠞꠤꠀ ꠏꠣꠘꠣꠁ, ꠗꠁꠘ꠆ꠘꠛꠣꠖ ꠖꠦꠁ ⁕
ꠢꠦꠡ-ꠝꠦꠡ ꠝꠣꠔ:
ꠀꠝꠤ ꠏꠦꠔꠣ ꠅꠔꠡꠝꠄ ꠗꠞꠤ ꠈꠁꠟꠣꠝ, ꠁꠔꠣ ꠈꠕꠣ ꠀꠚꠘꠣꠞ ꠚꠍꠘ꠆ꠖ ꠘꠣ ꠅꠁꠟꠦꠅ ꠅꠡꠥꠛꠤꠗꠣ ꠘꠣꠁ ⁕ ꠀꠚꠘꠣꠞ ꠃꠚꠞꠦ ꠀꠝꠣꠞ ꠡ꠆ꠞꠖ꠆ꠖꠣ ꠅ ꠝꠢꠛ꠆ꠛꠔꠞ ꠈꠝꠔꠤ ꠅꠁꠔꠧ ꠘꠣꠄ ⁕ ꠀꠡꠣ ꠈꠞꠤ ꠀꠚꠘꠦꠅ ꠀꠝꠞꠣ ꠏꠣꠞꠣ ꠍꠤꠟꠐꠤ-ꠏꠛꠣꠘꠞꠦ ꠜꠣꠟꠣ ꠚꠣꠁꠀ ꠁꠇꠐꠣꠞ ꠚꠞꠍꠣꠞ ꠈꠞꠔꠣꠝ ꠍꠣꠁ, ꠔꠣꠞꠣꠞ ꠟꠉꠦ ꠝꠤꠟ ꠝꠢꠛ꠆ꠛꠔ ꠞꠣꠈꠛꠣ ⁕ ꠀꠚꠘꠣꠞ ꠚꠄ-ꠚꠞꠣꠝꠤꠡ ꠖꠤꠛꠣ ⁕
ꠀꠞ ꠏꠥꠖꠤ ꠀꠝꠣꠞ ꠈꠕꠣ ꠈꠣꠘꠣꠁꠘ ꠀꠚꠘꠣꠞ ꠚꠍꠘ꠆ꠖ ꠟꠣꠉꠦ ꠔꠦ ꠀꠉ ꠛꠣꠠꠅꠃꠇꠣ ⁕ ꠀꠃꠇꠣ, ꠢꠈꠟꠦ ꠝꠤꠟꠤ ꠈꠣꠝ ꠈꠞꠤ ⁕
