ꠚꠂꠖ꠆ꠖ: ꠖꠥꠗꠞ ꠡꠣꠉꠞ
ꠚꠂꠖ꠆ꠖꠉꠣꠞ: ꠇꠝꠞ ꠃꠖ꠆ꠖꠤꠘ ꠟꠡ꠆ꠇꠞ
ꠞꠣꠁꠔ ꠚꠥꠀꠁꠀ ꠅꠁꠟ ꠛꠤꠀꠘ
ꠛꠣꠠꠤꠔ ꠀꠁꠟ ꠄꠀ ꠡꠤꠀꠘ।
ꠈꠂꠟ ꠝꠞꠦ ꠟꠂꠔꠣꠄꠘꠤ ꠍꠣꠞ
ꠉꠣꠁꠄ ꠖꠤꠍꠦ ꠄꠈ ꠛꠤꠀꠘ।
ꠄꠈ ꠚꠣꠘꠣꠘꠤꠔ ꠇꠤꠞꠣꠘꠤ ꠚꠥꠟ
ꠖꠥꠁ ꠚꠣꠘꠣꠘꠤ ꠟꠣꠉꠦꠘꠣ
ꠘꠈꠔꠣꠔ ꠕꠣꠇꠤ ꠍꠣꠠꠤ ꠖꠤꠟꠦꠅ
ꠚꠣꠋꠞꠣ ꠘꠣꠄ ꠉꠣꠁ ꠜꠣꠉꠦꠘꠣ।
ꠍꠣꠁꠞꠐꠣ ꠉꠣꠁꠄ ꠖꠣꠔꠤꠍꠦ ꠍꠣꠞ
ꠈꠣꠘꠤꠔ ꠅ ꠔꠣꠁ ꠛꠣꠍꠦꠘꠣ
ꠍꠞꠣ ꠛꠣꠘ꠆ꠗꠣ ꠟꠣꠉꠦꠘꠣ ꠔꠣꠁꠞ
ꠖꠥꠗ ꠇꠤꠞꠣꠁꠔꠦ ꠘꠣꠍꠦꠘꠣ।
ꠚꠥꠟꠤ ꠀꠔꠧ ꠛꠦꠚꠣꠞꠤ ꠈꠄ
ꠉꠣꠁ ꠛꠣꠘ꠆ꠗꠣ ꠀꠝꠣꠞ ꠉꠣꠐꠣꠔ
ꠈꠂꠟ ꠔꠣꠁꠞꠦ ꠍꠤꠘꠛꠣꠄ ꠈꠦꠔ
ꠉꠞꠝ ꠔꠣꠁ ꠚꠣꠈ ꠀꠐꠣꠔ।
ꠝꠦꠘꠣ ꠢꠤꠋꠉꠤ ꠈꠠꠣ ꠟꠣꠟ ꠉꠣꠁ
ꠈꠍꠝꠣ ꠖꠣꠝꠣ ꠛꠣꠁꠌ꠆ꠌꠣ ꠔꠣꠁꠞ
ꠀꠟ ꠎꠦꠝꠘ ꠐꠣꠘꠣꠞ ꠝꠤꠡꠤꠘ
ꠒꠣꠁꠘꠦ ꠛꠣꠃꠄ ꠖꠛꠣꠄ ꠍꠣꠁꠞ।
ꠍꠣꠞ ꠛꠣꠖꠤꠀ ꠢꠞꠣꠁ ꠕꠂꠀ
ꠃꠉꠤ ꠖꠤꠟꠣꠝ ꠉꠣꠐꠣꠞ ꠛꠣꠄ
ꠑꠦꠋꠉꠦ ꠑꠦꠋꠉꠦ ꠟꠣꠉꠦ ꠀꠐꠣꠔ
ꠚꠞꠤꠋꠉꠣ ꠉꠣꠁ ꠟꠂꠔꠣꠝ ꠘꠣꠄ।
ꠛꠦꠚꠣꠞꠤꠄ ꠈꠂꠟ ꠝꠞꠦ
ꠉꠞꠥ ꠀꠚꠘꠦ ꠍꠤꠘꠟꠣꠘꠣ
ꠖꠥꠗꠞ ꠡꠣꠉꠞ ꠖꠤꠍꠟꠣꠝ ꠀꠘꠤ
ꠍꠣꠞꠦ ꠇꠤꠘ꠆ꠔꠥ ꠇꠤꠘꠟꠣꠘꠣ।