ꠎꠋꠉꠟꠞ ꠈꠣꠘꠖꠣꠔ ꠉꠣꠋꠉꠞ ꠚꠣꠠ ꠄꠈ ꠚꠣꠐꠣꠄ ꠘꠤꠔ ꠊꠣꠡ ꠈꠣꠘꠤꠔ ꠎꠣꠁꠔ ⁕ ꠇꠤꠘꠔꠥꠇ ꠁꠉꠥꠄ ꠢꠣꠔꠞꠣꠘꠤ ꠘꠣ ꠎꠣꠘꠣꠄ ꠉꠣꠋꠉꠞ ꠢꠤ ꠚꠣꠠ ꠎꠣꠁꠔ ꠚꠣꠞꠔ ꠘꠣ ⁕ ꠈꠣꠟꠤ ꠢꠤ ꠚꠣꠠꠞ ꠊꠣꠡ ꠖꠦꠇꠤꠀ ꠟꠤꠟꠇꠣꠁꠔ ꠀꠞ ꠀꠚꠍꠥꠍ ꠈꠞꠔ ⁕ ꠄꠈ ꠚꠤꠞꠣ ꠄꠅꠔ ꠝꠣꠁꠀ ꠖꠤꠘ ꠉꠣꠋ ꠅꠈꠣꠘ ꠢꠥꠇꠣꠁꠀ ꠚꠣꠘꠤ ꠄꠈꠦꠞꠦ ꠝꠥꠞ ꠉꠤꠀ ꠟꠣꠉꠟ ⁕ ꠚꠣꠐꠣꠄ ꠝꠘꠦ ꠝꠘꠦ ꠈꠁꠟ ꠅꠃ ꠃ ꠡꠥꠎꠥꠉ ꠎꠣꠄ ꠉꠣꠋ ꠚꠣꠠ ꠅꠁꠀ ꠢ ꠚꠣꠠ ꠉꠤꠀ ꠊꠣꠡ ꠈꠣꠃꠀꠞ ⁕ ꠢꠣꠍꠣꠞ ꠛꠥꠟ ꠢꠣꠍꠣ ꠚꠣꠐꠣꠄ ꠉꠣꠋ ꠚꠣꠠ ꠅꠁꠀ ꠀꠞꠚꠣꠠ ꠉꠤꠀ ꠝꠘꠞ ꠡꠥꠇꠦ ꠈꠣꠘꠤꠔ ꠟꠣꠉꠟ; ꠇꠥꠝꠘꠦꠖꠤ ꠎꠦ ꠢꠣꠁꠘ꠆ꠏꠣ ꠅꠁꠀ ꠀꠁꠟ ꠁꠇꠣꠘ ꠔꠣꠞ ꠇꠤꠀꠟ ꠃ ꠀꠍꠤꠟ ꠘꠣ ⁕ ꠛꠤꠚꠖ ꠚꠠꠤꠀ ꠢꠘꠃ ꠢꠦ ꠝꠦ ꠝꠦ ꠈꠞꠔ ꠕꠣꠈꠦ ꠀꠞ ꠞꠣꠁꠔ ꠈꠣꠐꠣꠁꠔꠦ ꠛꠣꠁꠖ꠆ꠖ ꠅꠄ ⁕ ꠀꠘ꠆ꠖꠣꠞ ꠉꠥꠘ꠆ꠖꠣꠁꠞ ꠈꠣꠟꠤ ꠄꠈꠣꠘ ꠉꠣꠔ ꠚꠣꠁꠀ ꠢꠘ ꠞꠣꠔꠇꠥꠞ ꠟꠣꠉꠤꠘ ꠔꠣꠘꠔꠤꠔ ꠟꠄ ⁕ ꠀꠡꠟꠦ ꠢꠦ ꠎꠦꠘꠅ ꠐꠣꠁ ꠟꠁꠍꠤꠟ, ꠁꠉꠥ ꠀꠍꠤꠟ ꠛꠣꠉꠞ ꠀꠍ꠆ꠔꠣꠘꠣ! ꠞꠣꠁꠔ ꠛꠣꠊꠦ ꠀꠁꠀ ꠖꠦꠈꠦ ꠔꠣꠞ ꠀꠍ꠆ꠔꠣꠘꠣ ꠈꠦꠉꠥꠄ ꠖꠈꠟ ꠈꠞꠤꠀ ꠞꠣꠇꠤ ꠖꠤꠍꠦ ⁕ ꠛꠣꠊꠦ ꠎꠤꠇꠣꠄ ‘ꠀꠝꠣꠞ ꠊꠞ ꠇꠤꠉꠥ ꠛꠣ?’
ꠃꠔ꠆ꠔꠞꠦ ꠚꠣꠐꠣꠄ ꠇꠤꠔꠣ ꠈꠁꠔ ꠚꠄꠟꠣ ꠄꠈꠔꠤꠟ ꠗꠥꠘ ꠗꠞꠦ ⁕ ꠛꠣꠖꠦ ꠏꠥꠀꠚ ꠖꠦꠄ-
ꠍꠥꠍꠤ ꠝꠥꠇ ꠉꠥꠍꠤ ꠖꠣꠠꠤ
ꠘꠄꠘꠄ/ꠊꠘꠊꠘ ꠝꠥꠇ ꠟꠣꠠꠤ
ꠖꠦꠃꠞ/ꠡꠤꠋꠢꠞ ꠛꠣꠉꠘꠣ ꠘꠞꠢꠞꠤꠖꠣꠡ
ꠀꠐꠣꠞ ꠛꠣꠊ ꠚꠣꠁꠟꠦ ꠔꠃ ꠈꠞꠤ ꠉꠦꠞꠣꠡ ।
ꠛꠣꠊꠞ ꠔ ꠁꠇꠣꠘ ꠢꠥꠘꠤꠀ ꠈꠟꠟꠣꠔ ꠛꠣꠎ ꠚꠠꠣꠞ ꠉꠔꠤ ⁕ ꠎꠦ ꠉꠔꠤꠇꠦ ꠛꠣꠊꠦ ꠎꠣꠘꠞ ꠒꠞꠦ ꠖꠦꠄ ꠖꠃꠠ! ꠀꠞ ꠀꠈꠟ ꠈꠣꠐꠣꠁꠀ ꠚꠣꠐꠣ ꠎꠣꠘꠦ ꠛꠣꠍꠤꠎꠣꠄ!