ꠚꠁꠖ꠆ꠖ: ꠎꠖꠤ ꠚꠣꠞꠍ ꠎꠣꠟꠣꠁꠔꠦ
ꠚꠁꠖ꠆ꠖꠉꠣꠞ: ꠇꠝꠞ ꠃꠖ꠆ꠖꠤꠘ ꠟꠡ꠆ꠇꠞ
——————————-
ꠎꠖꠤ ꠚꠣꠞꠍ ꠎꠣꠟꠣꠁꠔꠦ
ꠔꠞꠦ ꠔꠥꠘ ꠍꠣꠟꠣꠁꠔꠦ
ꠔꠦ ꠕꠣꠈ꠆ ꠀꠘꠣ ꠈꠣꠁꠀ
ꠚꠣꠞꠛꠦ ꠈꠣꠝꠅ ꠟꠣꠉꠣꠁꠔꠦ।
ꠚꠣꠞꠍꠘꠣꠔꠦ ꠎꠣꠟꠣꠘꠤ
ꠟꠣꠜ ꠝꠥꠘꠣꠚꠣ ꠚꠣꠁꠛꠦꠘꠤ
ꠢꠥꠖ꠆ꠖꠣꠢꠥꠖ꠆ꠖꠤ ꠃꠚꠣꠡ ꠕꠣꠇꠤ
ꠔꠘꠥ ꠖꠥꠞ꠆ꠛꠟ ꠈꠞꠔꠦꠘꠤ।
ꠖꠦꠈꠣꠖꠦꠇꠤ ꠛꠣꠎꠣꠞ ꠈꠞꠍ
ꠛꠦꠇ꠆ꠇꠣꠞ ꠈꠦꠘꠦ ꠃꠚꠣꠡ ꠝꠞꠍ꠆
ꠉꠥꠍꠣ ꠚꠣꠘꠤ ꠅꠄꠘꠣ ꠔꠦ
ꠖꠦꠈꠣꠁꠟ ꠞꠥꠎꠣ ꠈꠦꠘꠦ ꠗꠞꠍ꠆।
ꠅꠉꠥ ꠜꠣꠟꠣ ꠢꠉꠥ ꠛꠣꠖ
ꠇꠤꠉꠥꠞ ꠚꠥꠠꠤ ꠘꠐꠤ ꠛꠞꠛꠣꠖ
ꠞꠥꠎꠣ ꠗꠞꠤ ꠉꠤꠛꠔ ꠈꠞꠍ꠆
ꠚꠣꠁꠛꠦꠘꠤ ꠔꠥꠘ꠆ ꠞꠥꠎꠣꠞ ꠡꠣꠖ।
ꠎꠥꠀꠘ ꠍꠥꠉꠞꠤ ꠀꠐꠤꠀ ꠎꠣꠞ
ꠍꠇꠦ ꠔꠞ ꠔꠣꠁꠞꠦ ꠍꠣꠞ
ꠝꠣꠕꠣꠔ ꠔꠇꠤ ꠝꠥꠈꠅ ꠞꠥꠎꠣ
ꠔꠥꠘ꠆ ꠇꠤꠎꠣꠔ ꠞꠥꠎꠣꠖꠣꠞ।
ꠉꠥꠍꠣ ꠟꠥꠜ ꠉꠤꠛꠔ ꠈꠞꠣ
ꠍꠣꠠꠤꠀ ꠅ ꠝꠘꠝꠞꠣ
ꠇꠥ ꠛꠣꠡꠘꠣ ꠝꠘꠅ ꠎꠔ
ꠝꠘꠅ ꠕꠣꠇꠤ ꠚꠣꠟꠣꠁ ꠏꠞꠣ।
ꠝꠘꠞ ꠜꠤꠔ꠆ꠞꠦ ꠞꠤꠚꠥ ꠡꠔ
ꠅꠔꠣꠞꠦ ꠔꠥꠘ꠆ ꠈꠁꠟ꠆ꠟꠦ ꠉꠔ
ꠞꠥꠎꠣ ꠘꠝꠣꠎ ꠟꠣꠁꠛ꠆ꠛ ꠈꠣꠝꠅ
ꠅꠁꠟꠦ ꠘꠤꠎꠦ ꠡꠋꠎꠔ।
ꠟꠣꠟꠍ ꠉꠥꠍꠣ ꠝꠘꠅ ꠞꠂꠟꠦ
ꠈꠣꠝ ꠛꠣꠡꠘꠣꠄ ꠘꠣꠞꠤ ꠍꠂꠟꠦ
ꠞꠥꠎꠣ ꠁꠔꠣ ꠅꠁꠛꠘꠤ ꠔꠞ
ꠢꠤꠋꠡꠣ ꠘꠤꠘ꠆ꠖꠣ ꠝꠘꠅ ꠕꠂꠟꠦ।
ꠀꠔ꠆ꠝꠣꠞꠦ ꠔꠞ ꠖꠦ ꠎꠣꠔ꠆ꠔꠣ
ꠍꠣꠢꠤꠖꠣꠞꠦ ꠖꠤꠍꠘꠣ ꠚꠣꠔ꠆ꠔꠣ
ꠞꠥꠎꠣ ꠈꠛꠥꠟ ꠅꠁꠉꠦꠟꠦ
ꠝꠣꠚ ꠅꠁꠛ ꠡꠛ ꠈꠍꠥꠞ ꠈꠣꠔ꠆ꠔꠣ।
ꠝꠘꠞ ꠎꠔ ꠈꠣꠞꠣꠚ ꠗꠣꠘ꠆ꠖꠣ
ꠎꠣꠟꠣꠁ ꠚꠣꠟꠣ ꠀꠉꠦ ꠛꠣꠘ꠆ꠖꠣ
ꠅꠃ ꠎꠣꠟꠣꠘꠤ ꠚꠣꠁꠟ꠆ꠟꠦ ꠔꠥꠘ꠆
ꠚꠣꠁꠛꠦ ꠞꠥꠎꠣ ꠗꠞꠣꠞ ꠉꠥꠘ।