Breaking News
Home / ꠍꠤꠟꠐꠞ ꠡꠣꠁꠔ꠆ꠔ / ꠝꠣꠢꠔꠣꠛ ꠡꠣꠢ ꠚꠇꠤꠞꠞ “ꠡꠥꠘꠣ ꠚꠣꠇꠤ ꠉ” ꠉꠤꠔ ꠈꠣꠘ ꠎꠦꠎꠣꠔ ꠘꠣꠝ ꠚꠣꠁꠍꠦ ꠇꠥꠟꠟꠦꠉꠣꠄ

ꠝꠣꠢꠔꠣꠛ ꠡꠣꠢ ꠚꠇꠤꠞꠞ “ꠡꠥꠘꠣ ꠚꠣꠇꠤ ꠉ” ꠉꠤꠔ ꠈꠣꠘ ꠎꠦꠎꠣꠔ ꠘꠣꠝ ꠚꠣꠁꠍꠦ ꠇꠥꠟꠟꠦꠉꠣꠄ

ꠅꠋꠇꠦꠞ ꠍꠤꠟꠐꠤ ꠛꠤꠀꠞ ꠉꠣꠘꠣꠁꠘ ꠝꠣꠘꠦꠃ ꠄꠈꠦꠈ ꠈꠣꠘ ꠡꠥꠘꠣꠞ ꠍꠣꠇ꠆ꠇꠣ ꠈꠣꠟꠤ ꠍꠤꠟꠐꠞ ꠢꠥꠘꠞꠣ ꠅꠈꠟꠞ ꠐꠣꠁꠘ ꠘꠣꠄ, ꠘꠘ-ꠍꠤꠟꠐꠤ ꠅꠈꠟꠞ ꠐꠣꠁꠘ ꠅ ꠡꠝꠣꠘ ꠚꠍꠘ꠆ꠖꠞ ⁕ ꠎꠦꠟꠣꠘ ꠇꠞꠘꠣ ꠝꠞꠇꠤꠞ ꠛꠟꠣꠞ ꠛꠣꠖꠦ ꠀꠁꠟꠣꠞꠦ ꠘꠄꠀ ꠖꠣꠝꠣꠘ ꠎꠦ ꠜꠣꠁꠞꠣꠟ ꠅꠁꠍꠤꠟ ⁕ ꠅꠟꠣꠘ ꠁ ꠚꠤꠞꠣ ꠀꠞꠛꠣꠞ ꠝꠣꠢꠔꠣꠛ ꠡꠣꠢ ꠚꠇꠤꠞꠞ “ꠡꠥꠘꠣ ꠚꠣꠇꠤ ꠉ” ꠉꠤꠔ ꠈꠣꠘ ꠎꠦꠎꠣꠔ ꠘꠣꠝ ꠚꠣꠁꠍꠦ ꠇꠥꠟꠟꠦꠉꠣꠄ ⁕

“ꠄꠈꠛꠣꠞ ꠈꠁꠟꠣꠃ ꠔꠥꠝꠤ ꠞꠣꠎꠤ ꠀꠝꠤ ꠊꠐꠇ ꠚꠣꠑꠣꠁꠝꠥ

ꠔꠥꠝꠣꠄ ꠟꠁꠀ ꠀꠝꠤ ꠡꠣꠞꠣ ꠍꠤꠟꠦꠐ ꠡꠢꠞ ꠊꠥꠞꠣꠁꠝꠥ।

ꠀꠝꠦꠞꠤꠇꠣ ꠙꠦꠞꠤꠍ ꠡꠢꠞ ꠎꠣꠁꠝꠥ, ꠎꠣꠁꠝꠥ ꠞꠦ ꠟꠘ꠆ꠒꠘ

ꠝꠤꠒꠤꠟꠤꠡ꠆ꠐꠞ ꠡꠛ ꠖꠦꠡ ꠊꠥꠞꠝꠥ, ꠈꠣꠟꠤ ꠀꠝꠞꠣ ꠎꠦ ꠖꠥꠁꠎꠘ।”

ꠝꠣꠢꠔꠣꠛ ꠡꠣꠢ ꠚꠇꠤꠞ (ꠍꠛꠤ ©ꠔꠣꠘ ꠄꠚꠛꠤ ꠔꠘꠦ)

ꠁꠀꠖ꠆ꠞꠣ ꠝꠣꠢꠔꠣꠛ ꠡꠣꠢ ꠚꠇꠤꠞꠞ “ꠡꠥꠘꠣ ꠚꠣꠇꠤ ꠉ” ꠉꠤꠔ ꠈꠣꠘ ꠖꠦꠡ-ꠛꠤꠖꠦꠡ ꠇꠥꠟꠟꠦꠉꠣꠄ ꠎꠦꠎꠣꠔ ꠘꠣꠝ ꠚꠣꠁꠍꠦ ⁕ ꠁꠇꠣꠘ ꠔꠣꠘ ꠄꠈ ꠛꠠꠃ ꠚꠣꠃꠀ ⁕ ꠁꠃꠐꠤꠃꠛ, ꠐꠤꠇꠐꠇ, ꠁꠘ꠆ꠍꠐꠣꠉ꠆ꠞꠣꠝ, ꠚꠦꠁꠍꠛꠥꠇ ꠡꠢ ꠡꠛ ꠈꠣꠘꠅ ꠝꠣꠔꠣꠝꠣꠔꠤ ⁕ ꠅꠈꠘꠤꠝꠣ ꠈꠣꠟꠤ ꠃꠀꠢꠦꠖ ꠁꠍꠐꠥꠒꠤꠅꠞ ꠁꠃꠐꠤꠃꠛ ꠌꠦꠘꠦꠟꠃ ꠖꠥꠁ ꠇꠥꠐꠤ ꠛꠣꠞꠞ ꠛꠦꠡꠤ ꠖꠦꠈꠣ ꠅꠁꠀ ꠢꠣꠞꠍꠦ ⁕ ꠖꠥꠁ ꠢꠣꠚꠔꠣꠔ ꠃ ꠉꠣꠘ ꠁꠇꠣꠘꠦ ꠀꠐ ꠝꠤꠟꠤꠅꠘ ꠖꠦꠈꠘꠦꠃꠀꠟꠣꠞ ꠘꠎꠞꠅ ꠀꠁꠌ꠆ꠌꠤꠟ ⁕

ꠁꠘ꠆ꠐꠣꠞꠘꠦꠐ ꠖꠥꠘꠤꠀꠔ ꠝꠣꠔꠣꠝꠣꠔꠤ ꠅꠃꠀ ꠁ ꠉꠣꠘꠅ ꠉꠟꠣ ꠝꠤꠟꠣꠁꠍꠂꠘ ꠃꠀꠢꠦꠖ ꠀꠞ ꠍ꠆ꠞꠣꠛꠘꠤꠄ ⁕ ꠡꠥꠞ ꠈꠞꠍꠂꠘ ꠃꠀꠢꠦꠖꠦ ⁕ ꠇꠤꠀꠟ ꠈꠞꠟꠦꠅ ꠢꠥꠘꠣ ꠎꠣꠄ “ꠡꠥꠘꠣ ꠚꠣꠇꠤ ꠉ” ꠉꠣꠘꠞ ꠈꠕꠣ ꠅꠘꠦ ꠝꠣꠘꠡꠞ ꠝꠥꠇꠦ ꠝꠥꠇꠦ ⁕ ꠛꠤꠡꠦꠡ ꠈꠞꠤꠀ ꠅꠘꠇꠦꠞ ꠡꠐꠈꠣꠐ ꠛꠤꠀꠞ ꠍꠤꠎꠘꠅ ꠅ ꠛꠣꠟꠣ ꠃ ꠢꠥꠘꠣ ꠎꠣꠄ ⁕

ꠃꠀꠢꠦꠖ-ꠍ꠆ꠞꠣꠛꠘꠤ (ꠍꠛꠤ ©ꠄꠚꠛꠤ)

ꠝꠣꠘꠥꠁꠘ꠆ꠔꠞ ꠚꠍꠘ꠆ꠖꠞ ꠍꠣꠋꠉ ꠕꠣꠈꠣ ꠍꠤꠟꠐꠤꠝꠣꠔꠦ ꠁ ꠉꠣꠘꠞ ꠟꠦꠈꠞꠣ ꠅꠁꠟꠣ ꠉꠤꠀ ꠝꠣꠢꠔꠣꠛ ꠡꠣꠢ ꠚꠇꠤꠞ ⁕ ꠔꠣꠁꠘ ꠈꠣꠟꠤ ꠛꠣꠋꠟꠣꠖꠦꠡ ꠘꠤ ꠇꠥꠘꠥ, ꠚꠛꠣꠡꠞ ꠝꠣꠏꠦꠅ ꠄꠈꠎꠘ ꠘꠣꠝꠤꠀꠟꠣ ꠉꠤꠔꠤꠈꠣꠞ, ꠡꠥꠞꠈꠣꠞ ꠀꠞ ꠛꠣꠃꠟꠣ ꠉꠣꠘ ꠉꠣꠃꠞꠣ ⁕ ꠔꠣꠘ ꠀꠝꠖꠣ ꠉꠣꠘꠣꠁꠘ ꠢꠥꠘꠞꠣ ꠅꠈꠟꠞ ꠐꠣꠁꠘ ꠎꠦꠎꠣꠔ ꠙꠍꠘ꠆ꠖꠣꠟꠣ ⁕ ꠔꠣꠘ ꠚꠞꠔꠦꠈꠐꠣ ꠉꠣꠘꠞ ꠝꠣꠏꠦ ꠎꠦꠝꠟꠣꠘ ꠚꠥꠐꠤꠀ ꠃꠐꠍꠦ ꠔꠦꠞ ꠡ ꠉꠣꠋꠉꠦ ꠚꠦꠍꠣꠁꠟ ꠁ ꠖꠦꠡꠞ ꠃꠎꠣꠘ-ꠜꠣꠐꠤꠞ ꠝꠣꠘꠡꠞ ꠖꠥꠇ-ꠡꠥꠇ ꠀꠞ ꠀꠘꠘ꠆ꠖ-ꠖꠥꠞꠖꠡꠣꠞ ꠈꠕꠣ ⁕ ꠅꠟꠣꠘ ꠀꠝꠞꠣꠞ ꠞꠤꠔꠤ-ꠞꠦꠃꠀꠎ ꠀꠞ ꠁꠔꠤꠀꠡꠞꠅ ꠔꠣꠘ ꠚꠣꠁꠍꠦ ⁕ ꠉꠥꠘꠤꠀꠟꠣ ꠁ ꠡꠤꠟ꠆ꠙꠤ ꠝꠣꠢꠔꠣꠛ ꠡꠣꠢ ꠚꠇꠤꠞꠞ ꠎꠘꠝ ꠍꠤꠟꠐꠞ ꠉꠥꠟꠣꠚꠉꠂꠘ꠆ꠎ ꠃꠚꠎꠤꠟꠣꠔ ⁕ ꠔꠄ ꠔꠣꠁꠘ ꠅꠘꠇꠦ ꠡꠚꠞꠤꠛꠣꠞꠦ ꠟꠘ꠆ꠒꠘ ꠕꠣꠈꠂꠘ ⁕

ꠉꠤꠔꠤꠈꠣꠞ ꠝꠣꠢꠔꠣꠛ ꠡꠣꠢ ꠚꠇꠤꠞꠞ ꠉꠤꠔ Shona Phaki (ꠡꠥꠘꠣ ꠚꠣꠇꠤ) ꠍꠣꠋꠉꠤꠘꠣꠝ ꠖꠤ Γ0ΓΓ ꠚꠤꠞꠣꠞ 11 ꠘꠜꠦꠝ꠆ꠛꠞ ꠟꠘ꠆ꠒꠘ ꠚꠛꠣꠡꠤ ꠍꠤꠟꠐꠤ ꠘꠣꠖꠤꠝ ꠃꠀꠢꠦꠖꠞ ꠁꠃꠐꠤꠃꠛꠅ ꠃꠀꠢꠦꠖ ꠁꠍꠐꠥꠒꠤꠅ ꠘꠣꠝꠞ ꠌꠦꠘꠦꠟꠅ ꠍꠣꠠꠣ ꠅꠁꠍꠤꠟ ⁕ ꠛꠤꠟꠣꠔ ꠕꠣꠈꠣ ꠜꠣꠁꠞꠣꠟ ꠅꠃꠀ ꠉꠣꠘ ꠁꠇꠐꠣꠞ ꠉꠣꠃꠞꠣ ꠘꠣꠖꠤꠝ ꠃꠀꠢꠤꠖꠞ ꠛꠣꠠꠤ ꠝꠥꠟꠤꠛꠣꠎꠣꠞ ⁕ ꠀꠞꠛꠣꠄ ꠍ꠆ꠞꠣꠛꠘꠤ ꠝꠥꠔꠍꠥꠖ꠆ꠖꠤ ꠅꠁꠟꠣ ꠍꠤꠐꠣꠉꠣꠋꠉꠤ ꠚꠥꠞꠤ ꠎꠦꠁꠘ ꠁꠐꠣꠟꠤꠔ ꠕꠣꠈꠂꠘ ⁕

ꠎꠦꠎꠣꠉꠣꠔ ꠅꠋꠇꠦ ꠝꠣꠔ꠆ꠞ ꠈꠈ ꠊꠘ꠆ꠐꠣꠄ ꠜꠤꠒꠤꠅ ꠈꠞꠤꠀ ꠝꠣꠘꠡꠦ ꠉꠣꠘ ꠝꠣꠘꠣꠁꠟꠣꠄ, ꠁꠘ ꠜꠣꠁꠞꠣꠟ ꠉꠣꠘ ꠁꠇꠐꠣ ꠛꠃꠔ ꠈꠡ꠆ꠐ-ꠔꠖꠛꠤꠞꠞ ꠛꠣꠖꠦ ꠐꠣꠘꠣ ꠈꠈꠝꠣꠡ ꠞꠤꠀꠞꠍꠣꠟ ꠈꠞꠤꠀ ꠘꠦꠐꠅ ꠀꠁꠍꠤꠟ ⁕

5/5 - (1 vote)

About Abu Sayeed

ꠝꠥꠁ ꠀꠛꠥ ꠍꠣꠁꠖ, ꠡꠥꠞꠝꠣ ꠚꠣꠞꠞ ꠈꠛꠞ ꠅꠄꠛꠍꠣꠁꠐꠞ ꠍꠣꠚꠣꠃꠞꠣ⁕ ꠛꠣꠋꠟꠣ ꠀꠞ ꠁꠋꠟꠤꠡ ꠚꠔꠞꠤꠇꠣꠁꠘ꠆ꠔ ꠟꠦꠈꠣꠟꠦꠇꠤꠞ ꠅꠜꠤꠉ꠆ꠉꠔꠣ ꠔꠘꠦ ꠝꠞ ꠝꠣꠁꠅꠞꠝꠣꠔ ꠍꠤꠟꠐꠤꠔꠦꠅ ꠟꠦꠈꠣꠞ ꠔꠣꠉꠤꠖ ꠛꠥꠗ ꠈꠞꠤ⁕ ꠅꠘꠟꠣꠁꠘꠅ ꠍꠤꠟꠐꠤ ꠅꠈꠟꠞ ꠟꠣꠉꠤ ꠝꠣꠉꠘꠣ ꠢꠤꠇꠣꠞ ꠟꠣꠈ ꠏꠤꠘꠤꠡ ꠛꠤꠡꠦꠡ ꠈꠞꠤ ꠍꠤꠟꠐꠤꠘ꠆ꠔꠞ ꠁꠔꠤꠀꠡ, ꠞꠍꠝ, ꠈꠣꠘꠤꠛꠘꠤ, ꠡꠣꠁꠔ꠆ꠔ ꠡꠛꠞ ꠀꠔ ꠀꠔ ꠚꠃꠍꠣꠘꠤꠞ ꠈꠣꠝ ꠈꠞꠞꠣꠝ, ꠏꠣꠔꠦ ꠁꠔꠣ ꠈꠣꠟꠤ ꠉꠛꠦꠡꠇ ꠅꠈꠟꠞ ꠐꠣꠁꠘ ꠘꠣ ꠕꠣꠇꠤꠀ ꠢꠈꠟꠞ ꠀꠔꠅ ꠉꠤꠀ ꠔꠣꠘ ꠚꠣꠄ⁕ ꠁꠔꠣ ꠖꠦꠇꠤꠀ ꠀꠞꠅ ꠝꠣꠘꠥꠡꠣꠁꠘ ꠀꠉꠥꠀꠁꠀ ꠀꠁꠘ⁕ ꠟꠉꠦ ꠕꠣꠈꠣꠞ ꠀꠞ ꠚꠣꠄꠚꠞꠣꠝꠤꠡ ꠖꠤꠀ ꠡꠣꠖ ꠖꠤꠛꠣꠞ ꠟꠣꠉꠤ ꠡꠛꠞꠦ ꠡꠥꠇꠥꠞ⁕

Check Also

ꠄꠈꠖꠤꠘꠞ ꠝꠦꠊꠦ ꠢꠛꠤꠉꠂꠘ꠆ꠎ ꠚꠣꠘꠤ ꠟꠣꠉꠤꠉꠦꠍ

ꠢꠛꠤꠉꠂꠘ꠆ꠎ ꠡꠁꠔꠦ ꠁ ꠈꠈꠖꠤꠘ ꠔꠘꠦ ꠍꠤꠟꠐꠞ ꠘꠣꠘꠣꠘ ꠄꠟꠣꠇꠣꠔ ꠈꠦꠍꠣ ꠝꠦꠊ ꠀꠞ ꠏꠞꠤ ꠖꠤꠞ ⁕ ꠔꠄ …