শুরমা ফারর খবর ছিলটি জবানে ছিলটর খবর
Related Articles
ꠚꠥꠛꠞ ꠘꠣꠉꠞꠤꠖꠤ ꠍꠤꠟꠐꠤ ꠞꠣꠝꠣꠄꠅꠘ (সিলটি রামায়ণ) ꠒꠣ: ꠡꠥꠘ꠆ꠖꠞꠤꠝꠥꠢꠘ ꠖꠣꠡꠞ ꠟꠦꠈꠣ ꠞꠣꠝꠣꠄꠅꠘꠞ ꠄꠈꠐꠣ ꠡꠣꠞꠡꠋꠇꠦꠚ। ꠁꠘꠅ ꠔꠣꠁꠘ ꠞꠣꠝꠣꠄꠅꠘꠞꠦ ꠍꠤꠟꠐꠤ ꠝꠣꠔꠦ ꠚꠥꠐꠣꠁꠀ ꠔꠥꠟꠍꠂꠘ।
ꠍꠤꠟꠐꠤ ꠞꠣꠝꠣꠄꠅꠘ
ꠒꠣ: ꠡꠥꠘ꠆ꠖꠞꠤꠝꠥꠢꠘ ꠖꠣꠡ
ꠅꠃ ꠎꠦ ꠖꠦꠈ ꠃꠑꠁꠘ ꠡꠥꠞ꠆ꠎ ꠛꠤꠀꠘꠤꠀ ꠛꠦꠟꠣ⁕ ꠢꠃ ꠉꠥꠡ꠆ꠐꠤꠞ ꠞꠣꠎꠣ, ꠖꠡꠞꠕ ꠛꠠ ꠜꠣꠟꠣ⁕⁕
ꠔꠤꠘ ꠛꠤꠀ ꠈꠁꠞꠟꠣ ꠞꠣꠎꠣ ꠚꠥꠠꠣ ꠈꠙꠣꠟ ꠟꠁꠀ⁕ ꠄꠈ ꠞꠣꠘꠤꠞꠅ ꠘꠣ ꠅꠁꠟ ꠄꠈꠉꠥꠅ ꠚꠥꠀ⁕⁕
ꠇꠥꠛꠣꠁꠕꠘꠦ ꠀꠁꠟꠣ ꠝꠥꠘꠤ ꠞꠣꠎꠣꠞ ꠅꠘ꠆ꠖꠞ⁕ (ꠅꠜꠤꠡꠣꠚ ꠖꠤꠛꠣꠞ ꠍꠟꠦ ꠔꠣꠁꠘ ꠖꠤꠟꠣ ꠛꠞ⁕⁕)
ꠉꠣꠐ꠆ꠐꠣ ꠉꠣꠐ꠆ꠐꠣ ꠍꠣꠁꠞ ꠚꠥꠀ ꠅꠁꠟ ꠞꠣꠎꠣꠞ ꠊꠞ⁕⁕ ꠛꠠ ꠞꠣꠘꠤꠞ ꠚꠥꠀ ꠞꠣꠝ, ꠝꠣꠁꠎꠝꠞ ꠜꠞꠔ ꠡꠥꠎꠘ⁕
ꠢꠞꠥ ꠞꠣꠘꠤꠞ ꠖꠥꠁ ꠚꠥꠀ, ꠡꠔ꠆ꠞꠥꠊ꠆ꠘ ꠀꠞ ꠟꠇ꠆ꠇꠘ⁕⁕ ꠖꠡꠞꠕꠦ ꠀꠁꠉ꠆ꠉꠣ ꠖꠤꠟꠣ, ꠞꠣꠝ ꠅꠁꠛꠣ ꠞꠣꠎꠣ⁕
ꠡꠥꠘꠤꠀ ꠡꠥꠇꠤ ꠅꠁꠟꠣ, ꠞꠣꠎ꠆ꠎꠦꠞ ꠎꠔ ꠙ꠆ꠞꠎꠣ⁕⁕ ꠇꠂꠇꠁꠞ ꠛꠣꠚꠦꠞ ꠛꠣꠠꠤꠞ, ꠛꠣꠘ꠆ꠖꠤ ꠈꠚꠣꠟ ꠚꠥꠠꠣ⁕
ꠚꠤꠑ ꠎꠦꠟꠣ ꠝꠘꠅ ꠅꠟꠣ, ꠗꠘꠥꠞ ꠟꠣꠈꠣꠘ ꠔꠦꠠꠣ⁕⁕ ꠇꠂꠇꠁꠞꠦ ꠈꠁꠟ ꠉꠤꠀ, ꠞꠣꠝ ꠞꠣꠎꠣ ꠅꠁꠔ⁕
ꠔꠞ ꠖꠥꠁ ꠍꠣꠅꠀꠟ ꠛꠥꠏꠤ ꠇꠥꠖꠦꠞ ꠎꠣꠃ ꠈꠣꠁꠔ⁕⁕ ꠛꠠꠞ ꠚꠥꠀ ꠞꠣꠎꠣ ꠅꠁꠟꠦ, ꠔꠥꠁꠘ ꠅꠁꠛꠦ ꠛꠣꠘ꠆ꠖꠤ⁕
ꠜꠞꠔ ꠞꠣꠎꠣ ꠅꠁꠛꠣꠞ ꠟꠣꠉꠤ, ꠚꠠ ꠉꠤꠀ ꠈꠣꠘ꠆ꠖꠤ⁕⁕ ꠁꠔꠣ ꠢꠥꠘꠤ ꠇꠂꠇꠁꠞ ꠝꠣꠕꠣ, ꠍꠃꠞꠋꠉꠤ ꠖꠤꠟꠣꠁꠟ⁕
ꠉꠥꠡꠣ ꠈꠞꠤ ꠃꠚꠣꠡ ꠕꠣꠇꠤ ꠝꠣꠐꠤꠞ ꠃꠚꠞ ꠢꠥꠁꠟ⁕⁕ ꠖꠡꠞꠕꠦ ꠡꠥꠘꠤ ꠈꠁꠟꠣ, ꠁꠔꠣ ꠈꠞ ꠇꠤꠔꠣ⁕
ꠅꠃ ꠖꠘ꠆ꠒꠦ ꠖꠤꠔꠣꠝ ꠚꠣꠞꠤ, ꠔꠥꠝꠤ ꠍꠣꠅ ꠎꠦꠔꠣ⁕⁕ ꠇꠂꠇꠁ ꠃꠑꠤꠀ ꠈꠁꠟꠣ ꠞꠣꠝꠞꠦ ꠚꠣꠑꠣꠅ ꠛꠘ⁕
ꠀꠝꠣꠞ ꠜꠞꠔꠞꠦ ꠛꠅꠀꠅ ꠞꠣꠎ-ꠡꠤꠋꠢꠣꠡꠘ⁕⁕ ꠡꠥꠀꠞꠣꠘꠤꠞ ꠈꠕꠣ ꠢꠥꠘꠤ ꠞꠣꠎꠣ ꠉꠟꠤ ꠉꠦꠟꠣ⁕
ꠈꠁꠟꠣ, ꠈꠣꠘ꠆ꠖꠤꠅ ꠘꠣ ꠉꠥ ꠡꠥꠘꠣ, ꠔꠥꠝꠣꠞ ꠈꠕꠣꠁ ꠜꠣꠟꠣ⁕⁕ ꠞꠣꠝ ꠉꠦꠟꠣ ꠛꠘꠛꠣꠡ, ꠜꠞꠔ ꠛꠠ ꠛꠥꠇꠣ⁕
ꠡꠤꠋꠢꠣꠡꠘ ꠀꠘꠤ ꠞꠣꠈꠟꠣ, ꠞꠣꠝꠞ ꠚꠣꠖꠥꠇꠣ⁕⁕ ꠛꠣꠉꠦ ꠚꠣꠁꠀ ꠛꠃ, ꠍꠥꠞꠤ ꠈꠞꠟꠣ ꠞꠣꠛꠘ⁕
ꠛꠣꠘ꠆ꠖꠞ ꠟꠁꠀ ꠈꠞꠁꠘ ꠞꠣꠝ, ꠎꠥꠖ꠆ꠖꠞ ꠀꠄꠃꠎꠘ⁕⁕ ꠛꠥꠖ꠆ꠖꠤꠝꠣꠘ ꠎꠣꠝ꠆ꠛꠥꠛꠣꠘ ꠈꠁꠟ ꠟꠅ ꠑꠦꠟꠣ⁕
ꠟꠋꠇꠣꠔ ꠅꠈꠘ ꠈꠅ ꠎꠣꠁꠔꠣꠄ ꠇꠥꠘ ꠢꠣꠟꠣ⁕⁕ ꠚꠣꠟ ꠖꠤꠀ ꠢꠘꠥꠝꠣꠘ ꠡꠣꠉꠞ ꠅꠁꠟ ꠚꠣꠞ⁕
ꠟꠦꠁꠋꠎꠞ ꠀꠉꠥꠘ ꠖꠤꠀ ꠈꠁꠞꠟ ꠟꠋꠇꠣ ꠍꠣꠞꠈꠣꠞ⁕⁕ ꠁꠛꠣꠁꠖꠤ ꠉꠣꠍ ꠖꠤꠀ, ꠛꠣꠘ꠆ꠖꠞꠦ ꠛꠣꠘꠣꠁꠟ ꠚꠥꠟ⁕
ꠛꠣꠘ꠆ꠖꠞꠦ ꠞꠣꠁꠇ꠆ꠇꠡꠦ ꠎꠥꠖ꠆ꠖ ꠟꠣꠁꠉꠟ ꠔꠥꠝꠥꠟ⁕⁕ ꠞꠣꠇ꠆ꠇꠁꠡꠞ ꠛꠋꠡ ꠢꠈꠟ ꠃꠎꠣꠠ ꠈꠞꠤꠀ⁕
ꠢꠥꠇ ꠢꠥꠇ ꠈꠞꠦ ꠛꠣꠘ꠆ꠖꠞ ꠟꠦꠋꠉꠥꠠ ꠘꠣꠍꠣꠁꠀ⁕⁕ ꠛꠣꠘ꠆ꠖꠞ ꠉꠥꠡ꠆ꠐꠤ ꠟꠁꠀ ꠞꠣꠝ ꠎꠥꠖ꠆ꠖ ꠇꠁꠞꠟꠣ ꠜꠤꠡꠘ⁕
ꠞꠣꠛꠘ ꠝꠣꠞꠤ ꠡꠤꠔꠣ ꠃꠖ꠆ꠖꠣꠞ ꠅꠔ꠆ꠔ ꠞꠣꠝꠣꠄꠅꠘ⁕⁕
