ꠍꠤꠟꠐ ꠅꠘ꠆ꠌꠟ ꠔꠣꠞ ꠘꠤꠎ ꠃꠍꠥꠟ ꠟꠂꠀ ꠖꠦꠡꠛꠤꠖꠦꠡ ꠘꠣꠝꠈꠞꠣ⁕ ꠇꠤꠘꠔꠥꠇ ꠛꠃꠔ ꠍꠤꠟꠐꠤ ꠃꠍꠥꠟ ꠖꠤꠘꠖꠤꠘ ꠀꠞꠤꠎꠣꠞ⁕ ꠅꠟꠣꠘ ꠄꠈ ꠃꠍꠥꠟ ꠅꠁꠟ ꠉꠣꠎꠤꠞ ꠉꠣꠘ⁕ ꠔꠄ, ꠄꠛ ꠛꠃꠔ ꠉꠣꠅ ꠉꠦꠞꠣꠝꠅ ꠝꠣꠘꠡꠞ ꠝꠥꠇꠅ ꠖꠥꠄꠈꠐꠣ ꠉꠣꠎꠤꠞ ꠉꠣꠘ ꠢꠥꠘꠣ ꠎꠣꠄ⁕ ꠄꠈꠡꠝꠄ ꠀꠉꠘ ꠝꠣꠁꠀ ꠗꠣꠘ ꠔꠥꠟꠣꠞ ꠛꠣꠖꠦꠅ ꠍꠤꠟꠐ ꠅꠘ꠆ꠌꠟ ꠎꠥꠠꠤ ꠉꠣꠎꠤꠞ ꠉꠣꠘꠞ ꠀꠡꠞ ꠛꠁꠔ⁕
ꠎꠦꠁꠘ ꠉꠣꠎꠤꠞ ꠜꠥꠝꠤꠇꠣꠔ ꠕꠣꠈꠂꠘ, ꠔꠣꠘ ꠚꠥꠡꠣꠇ-ꠀꠡꠣꠇ ꠕꠣꠈꠦ ꠅꠁꠘ꠆ꠘ ꠟꠣꠈꠣꠘ⁕ ꠗꠥꠔꠤꠞ ꠟꠉꠦ ꠡꠦꠞꠅꠀꠘꠤ ꠀꠞ ꠛꠤꠡꠦꠡ ꠎꠣꠔꠤ ꠚꠣꠉꠠꠤ⁕ ꠀꠔ ꠕꠣꠈꠔ ꠄꠉꠥ ꠀꠡꠣ (ꠔ꠆ꠞꠤꠡꠥꠟ) ꠀꠞ ꠟꠉꠦ ꠔꠥꠠꠣ ꠝꠣꠘꠥꠡ⁕ ꠉꠣꠎꠤꠄ ꠚꠄꠟꠣ ꠀꠡꠣꠉꠥ ꠝꠣꠐꠤꠞ ꠝꠣꠏꠦ ꠉꠣꠠꠤꠀ ꠍꠣꠘꠔꠦꠞꠣ ꠞꠋꠉꠣꠁꠟ ꠔꠦꠞꠚꠣꠟ ꠐꠣꠋꠉꠣꠁꠀ ꠍꠣꠋꠉꠣꠞꠤ ꠔꠣꠁꠀꠞ ꠈꠞꠔꠣ, ꠛꠣꠖꠦ ꠛꠘ꠆ꠖꠘꠣ ꠉꠣꠁꠀ ꠀꠡꠞ ꠎꠝꠣꠁꠀ ꠔꠥꠟꠔꠣ⁕ ꠅꠟꠣꠘ ꠄꠉꠥ ꠛꠘ꠆ꠖꠘꠣ—
ꠚꠥꠛꠦ ꠛꠘ꠆ꠖꠘꠣ ꠈꠞꠤ ꠚꠥꠛꠦ ꠃꠖꠄ ꠡꠥꠞ꠆ꠎꠞ
ꠄꠈꠛꠣꠄ ꠃꠖꠄ ꠅꠁꠀ ꠇꠥꠟ꠆ꠟꠦꠉꠣꠄ ꠚꠡꠞ
ꠚꠌ꠆ꠌꠤꠝꠦ ꠛꠘ꠆ꠖꠘꠣ ꠈꠞꠤ ꠝꠇ꠆ꠇꠣ ꠜꠣꠟꠣ ꠁꠍꠕꠣꠘ
ꠎꠦꠘꠅ ꠚꠄꠖꠣ ꠅꠁꠟ ꠇꠤꠔꠣꠛ ꠀꠞ ꠇꠥꠞꠀꠘ
ꠃꠔꠞꠦ ꠛꠘ꠆ꠖꠘꠣ ꠈꠞꠤ ꠢꠤꠝꠣꠟꠄ ꠚꠞ꠆ꠛꠔ
ꠎꠦꠘꠅ ꠎꠘ꠆ꠝ ꠘꠤꠍꠦ ꠝꠣꠟꠣꠝꠞ ꠚꠣꠔ꠆ꠔꠞ
ꠖꠇꠘꠦ ꠛꠘ꠆ꠖꠘꠣ ꠈꠞꠤ ꠈꠣꠟꠤꠖꠢ ꠡꠣꠉꠞ
ꠎꠦꠘꠅ ꠛꠣꠘꠤꠎ꠆ꠎ ꠈꠞꠦ ꠍꠣꠖ ꠡꠅꠖꠣꠉꠞ⁕