শুরমা ফারর খবর ছিলটি জবানে ছিলটর খবর
Related Articles
ꠛꠃꠔ ꠖꠤꠘ ꠀꠉꠞ ꠈꠕꠣ। ꠀꠝꠈꠣꠐꠟꠞ ꠡꠝꠄ, ꠄꠈ ꠛꠦꠐꠤ ꠔꠣꠘ ꠜꠣꠁꠞ ꠟꠉꠦ ꠛꠣꠚꠞ ꠛꠣꠠꠤ ꠍꠥꠀꠞꠤꠖꠤ ꠎꠣꠅꠀꠔ ꠀꠍꠟꠣ। ꠛꠣꠇ꠆ꠇꠣ ꠡꠝꠄ ꠗꠞꠤ ꠍꠥꠀꠞꠤ ꠛꠁꠔꠦ ꠛꠁꠔꠦ ꠔꠣꠞꠣ ꠢꠦꠞꠣꠘ ꠅꠁꠉꠦꠍ꠆ꠟ। ꠎꠣꠞꠖꠣꠄ, ꠄꠈ ꠛꠘꠞ ꠈꠣꠘ꠆ꠖꠣꠔ ꠀꠁꠀ ꠍꠥꠀꠞꠤꠞ ꠛꠦꠐꠣꠁꠘ ꠉꠦꠟ ꠚꠣꠘꠤ ꠚꠤꠀꠔ। ꠜꠣꠁ ꠔ ꠀꠞ ꠛꠁꠘꠞꠦ ꠄꠈꠟꠣ ꠔꠁꠀ ꠎꠣꠁꠔꠣ ꠚꠣꠞꠁꠘ ꠘꠣ। ꠔꠣꠁꠘ ꠍꠥꠀꠞꠤꠞ ꠈꠣꠘ꠆ꠖꠣꠔ ꠛꠁꠕꠣꠈꠟꠣ ꠀꠞ ꠛꠁꠘꠞꠦ ꠎꠘ꠆ꠔꠥ ꠎꠣꠘꠥꠀꠞ ꠔꠘꠦ ꠚꠠ ꠖꠤꠔꠦ ꠟꠣꠉꠟꠣ। ꠀꠈꠔꠣ ꠀꠠꠣ ꠔꠘꠦ ꠄꠉꠥ ꠛꠣꠊ ꠛꠣꠞꠁꠀ ꠀꠁꠟ। ꠛꠁꠘꠦ ꠜꠣꠁꠞꠦ ꠒꠣꠇꠤꠀ ꠈꠁꠟꠣ ꠖꠥꠞꠁ ꠉꠤꠀ ꠟꠥꠇꠣꠁꠔꠣ। ꠇꠤꠘ꠆ꠔꠥꠇ, ꠜꠣꠁꠄ ꠝꠣꠏꠚꠕ ꠛꠁꠘꠦ ꠄꠈꠟꠣ ꠔꠁꠀ ꠢꠠꠟꠣ ꠘꠣ। ꠛꠣꠖꠦꠘꠥ ꠛꠣꠊꠦ ꠀꠁꠀ ꠔꠘꠞꠦ ꠈꠣꠁꠟꠤꠟ। ꠛꠁꠘꠦ ꠔ ꠁꠇꠣꠘ ꠖꠦꠇꠤꠀ ꠛꠦꠢꠥꠡ।
ꠁꠛꠣꠄ, ꠍꠥꠀꠞꠤꠞ ꠛꠦꠐꠣꠁꠘ ꠀꠁꠀ ꠁꠔꠣ ꠖꠦꠇꠤꠀ ꠔ ꠚꠥꠞꠣ ꠛꠦꠛꠣꠐ ꠛꠘꠤꠉꠦꠍꠁꠘ। ꠔꠣꠞꠣ ꠛꠃꠔ꠆ꠔꠣ ꠈꠞꠤꠀ ꠛꠦꠐꠤꠞ ꠢꠥꠡ ꠀꠘꠟꠣ। ꠢꠥꠡ ꠀꠁꠔꠦꠅ ꠔꠣꠁꠘ ꠍꠤꠟꠟꠣꠁꠀ ꠈꠣꠘ꠆ꠖꠘ ꠀꠞꠝ꠆ꠜ ꠈꠞꠟꠣ। ꠀꠞ ꠈꠁꠔꠦ ꠟꠣꠉꠟꠣ, “ꠝꠞ ꠜꠣꠁꠞꠦ ꠛꠘꠞ ꠛꠣꠊꠦ ꠈꠣꠁꠟ꠆ꠍꠦ। ꠝꠞ ꠎꠔ ꠖꠥꠇ!”
ꠛꠦꠐꠤꠞ ꠞꠥꠖꠘ ꠢꠥꠘꠤꠀ ꠍꠣꠁꠞꠛꠣꠄ ꠔꠘ ꠝꠣꠘꠥꠡ ꠀꠁꠀ ꠖꠟꠣ ꠅꠁꠟ! ꠛꠦꠐꠤꠞ ꠀꠢꠣꠎꠣꠞꠤ ꠖꠦꠇꠤꠀ ꠝꠣꠘꠡꠦꠅ ꠈꠣꠘ꠆ꠖꠘ ꠀꠐꠈꠣꠁꠀ ꠞꠣꠈꠔꠣ ꠚꠣꠞꠟꠣ ꠘꠣ। ꠛꠦꠐꠤꠄ ꠖꠥꠁ ꠀꠔ ꠔꠥꠟꠤꠀ ꠚꠞꠤꠀꠖ ꠎꠣꠘꠣꠁꠟꠣ ꠁ ꠎꠤꠛꠘ ꠞꠣꠇꠤꠀ ꠔꠣꠁꠘ ꠇꠤꠔꠣ ꠈꠞꠔꠣ! ꠄꠞ ꠔꠘꠦ ꠚꠡꠥ ꠚꠇ꠆ꠇꠤ ꠅꠁꠀ ꠃꠠꠣ ꠃ ꠛꠣꠟꠣ। ꠢꠣꠍꠣꠞ ꠛꠥꠟ ꠢꠣꠍꠣ, ꠔꠣꠁꠘ ꠘꠥ ꠢꠈꠟꠞ ꠝꠣꠏꠔꠘꠦ ꠚꠣꠇꠤ ꠅꠁꠀ ꠃꠠꠣꠟ ꠖꠤ ꠉꠣꠍꠞ ꠒꠣꠟ ꠉꠤꠀ ꠛꠁꠟꠣ। ꠀꠞ ꠛꠤꠔꠣꠚ ꠅꠁꠀ ꠞꠥꠖꠘ ꠈꠞꠔꠦ ꠕꠣꠈꠟꠣ। ꠄꠞꠛꠣꠖ ꠔꠘꠦ ꠈꠣꠐꠟꠞ ꠡꠝꠄ ꠀꠁꠟꠦꠃ ꠔꠘ ꠀꠢꠣꠎꠣꠞꠤ ꠢꠥꠘꠣ ꠎꠣꠄ, “ꠇꠥꠇꠥ, ꠇꠥꠇꠥ! ꠈꠣꠐꠟ ꠚꠣꠈꠍꠦ। ꠀꠝꠣꠞ ꠜꠣꠁꠞꠦ ꠛꠘꠞ ꠛꠣꠊꠦ ꠈꠣꠁꠟ꠆ꠍꠦ। ꠝꠞ ꠎꠔ ꠖꠥꠇ…”
