ꠔꠍꠟꠣ ꠛꠣꠠꠤ (ꠍꠤꠟꠐꠤ ꠇꠤꠌ꠆ꠌꠣ)
ꠛꠣꠇ꠆ꠇꠣ ꠖꠤꠘ ꠀꠉꠞ ꠈꠕꠣ। ꠄꠈꠡꠝꠄꠇꠥ ꠄꠈꠛꠣꠠꠤꠞ ꠚꠥꠇꠞꠤꠔ ꠔꠍꠟꠣ (ꠛꠣꠡꠘꠚꠣꠔꠤ) ꠛꠣꠁꠔ। ꠎꠦꠔꠣ ꠖꠤ ꠢꠣꠞꠣ ꠉꠣꠅꠞ ꠝꠣꠘꠡꠦ ꠡꠤꠘ꠆ꠘꠤ-ꠍꠣꠟꠣꠔ, ꠛꠤꠀ-ꠡꠣꠖꠤ ꠉꠣꠁꠔꠣ। ꠛꠣꠖꠦꠘꠥ ꠄꠈꠖꠤꠘ ꠄꠈ ꠅꠘꠥꠡꠐꠣꠘꠞꠛꠣꠟꠣ ꠈꠦ ꠛꠥꠟꠦ ꠄꠉꠥ ꠍꠤꠎ ꠟꠥꠇꠣꠁꠟꠤꠟ। ꠀꠞ ꠎꠦꠞꠣ ꠅꠘꠥꠡꠐꠣꠘꠞ ꠟꠣꠉꠤ ꠊꠐꠤꠛꠣꠐꠤ ꠘꠤꠍꠟꠣ, ꠔꠣꠞꠣ ꠎꠦꠛꠟꠣ ꠚꠤꠞꠣꠁꠀ ꠖꠦꠅꠀꠔ ꠉꠦꠟꠣ, ꠅꠘꠦ ꠔ ꠀꠞ ꠁꠔꠣ ꠜꠥꠠꠦ ꠘꠣ!
ꠁꠛꠣꠄ ꠢꠣꠞꠣ ꠄꠟꠣꠇꠣꠔ ꠎꠣꠘꠣꠎꠣꠘꠤ ꠅꠁꠉꠦꠟ ꠔꠍꠟꠣꠁꠘ ꠖꠥꠁꠖꠤꠘ ꠗꠞꠤ ꠜꠥꠠꠦꠞ ꠘꠣ। ꠅꠖꠤꠘ ꠘꠤꠡꠣꠛꠣꠟꠣ ꠄꠈ ꠝꠥꠠꠤꠄ ꠇꠥꠀꠛ ꠖꠦꠈꠟꠣ ꠈꠦ ꠁ ꠔꠍꠟꠣ ꠔꠣꠚꠣꠁ ꠈꠞꠍꠦ। ꠔꠣꠘꠞꠦ ꠇꠥꠀꠛꠅ ꠎꠣꠘꠣꠘꠤ ꠅꠁꠟ ꠎꠔ ꠛꠁꠟ ꠁ ꠔꠍꠟꠣ ꠚꠤꠞꠣꠁꠀ ꠖꠦꠅꠀ ꠅꠁꠔ ꠘꠣꠄ, ꠔꠔ ꠛꠁꠟ ꠁ ꠊꠐꠤꠛꠣꠐꠤꠘ ꠜꠥꠠꠔ ꠘꠣꠄ। ꠀꠞ ꠈꠦꠃꠅ ꠁꠉꠥꠘ꠆ꠔꠞꠦ ꠍꠁꠔ ꠚꠣꠞꠔ ꠘꠣꠄ।
ꠛꠣꠖꠦ ꠁ ꠛꠥꠠꠤꠝꠣꠁꠄ ꠔꠣꠘ ꠇꠥꠀꠛꠞ ꠈꠕꠣ ꠢꠇ꠆ꠇꠟꠞꠦ ꠎꠣꠘꠣꠁꠟꠣ। ꠀꠞ ꠁ ꠔꠍꠟꠣ ꠁꠉꠥ ꠇꠥꠘ ꠛꠣꠠꠤꠞ ꠈꠣ’ꠐꠣꠁꠘ ꠀꠍꠦ ꠅꠈꠣꠘꠅ ꠈꠁꠟꠣ। ꠔꠣꠘ ꠈꠕꠣ ꠀꠘꠝꠣꠘ ꠄꠈ ꠛꠣꠘ꠆ꠖꠤ ꠛꠦꠐꠤꠞ ꠍꠇꠤꠞ ꠔꠟꠦ ꠍꠣꠟꠤꠞ ꠛꠣꠟꠐꠤꠔ ꠄꠉꠥ ꠚꠦꠟꠣ ꠟꠥꠇꠣꠁꠟ ꠝꠤꠟꠟ। ꠝꠣꠁꠡꠦ ꠅꠉꠥ ꠚꠤꠞꠣꠁꠀ ꠀꠘꠤꠀ ꠖꠤꠛꠣꠞ ꠛꠣꠖꠦ ꠔꠃ ꠒꠦꠉꠛꠣꠡꠘ ꠜꠥꠠꠟ। ꠢꠃ ꠎꠦ ꠜꠥꠠꠟ, ꠀꠞ ꠛꠣꠁꠍꠦ ꠘꠣ ꠇꠥꠘꠥꠖꠤꠘ। ꠄꠞꠖꠣꠄ ꠍꠤꠟꠐꠤꠔ ꠄꠉꠥ ꠍꠤꠟ꠆ꠟꠈ ꠈꠀ ꠅꠄ, “ꠄꠉ꠆ꠉꠦ ꠖꠥꠡ ꠈꠞꠦ, ꠖꠡꠉꠦ ꠈꠣꠘ ꠗꠞꠦ“।