শুরমা ফারর খবর ছিলটি জবানে ছিলটর খবর
Related Articles
ꠚꠥꠛ ꠚꠣꠇꠤꠍꠔꠣꠘꠅ ꠄꠢꠤꠀꠞ ꠀꠝꠟꠅ ꠁꠡꠇꠥꠟꠞ ꠢꠣꠟꠔ ꠟꠁꠀ Cmi Khaled-ꠄ 1৩ ꠘꠜꠦꠝ꠆ꠛꠞ Γ01V ꠚꠤꠞꠣ ꠃꠁ ꠍꠤꠟꠦꠐꠤꠎ [We SYLHETis] ꠚꠦꠁꠍꠛꠥꠇ ꠉꠥꠁꠐꠅ ꠔꠟꠞ ꠙꠥꠡ꠆ꠐ ꠅꠈꠣꠘ ꠈꠞꠂꠘ ⁕
ꠄꠈꠘ ꠚꠥꠞꠣ ꠝꠘ ꠅꠞ ꠘꠣ, ꠁꠀꠢꠤꠀ ꠈꠣꠘ ꠡꠝ꠆ꠜꠛꠔ d9 ꠡꠣꠟꠞ ꠝꠣꠞ꠆ꠌꠞ ꠢꠦꠡꠦꠖꠤ ꠇꠤ ꠄꠙ꠆ꠞꠤꠟꠞ ꠚꠄꠟꠣ ꠛꠣꠄꠖꠤ ꠝꠣꠞ꠆ꠡꠣꠟ’ꠟ ꠖꠤꠀ ꠚꠣꠇꠤꠍ꠆ꠔꠣꠘꠞ ꠙ꠆ꠞꠦꠡꠤꠒꠦꠘ꠆ꠐ ꠀꠞ ꠙ꠆ꠞꠗꠣꠘ ꠡꠣꠝꠞꠤꠇ ꠀꠁꠘ ꠙ꠆ꠞꠡꠣꠡꠇ ꠅꠁ ꠉꠦꠟꠣ — ꠈꠔ ꠡꠝꠄ ꠚꠞꠦ ꠚꠞꠦ ꠞꠦꠒꠤꠅꠔ ꠃꠞ꠆ꠖꠥ, ꠛꠣꠋꠟꠣ ꠀꠞ ꠁꠋꠟꠤꠡꠦ ꠄꠘꠣꠃꠘ꠆ꠍꠝꠦꠘ꠆ꠐ ꠈꠞꠣ ꠅꠞ ⁕ ꠀꠞ ꠝꠣꠏꠈꠣꠘꠅ ꠖꠦꠡꠣꠔ꠆ꠔꠛꠥꠗꠇ ꠉꠣꠘ ‘ꠙꠦꠀꠞꠣ ꠙꠣꠇꠤꠍ꠆ꠔꠣꠘ ꠢꠣꠝꠣꠞꠣ ꠙꠦꠀꠞꠣ ꠙꠣꠇꠤꠡ꠆ꠔꠣꠘ’-ꠎꠣꠔꠤ ꠉꠣꠘ ꠅꠈꠟꠅ ꠛꠣꠎꠣꠘꠤ ꠅꠞ, ꠀꠞ ꠞꠣꠍ꠆ꠔꠣꠔ ꠝꠣꠁꠇ ꠖꠤꠀ ꠝꠣꠞ꠆ꠡꠣꠟ’ꠟꠞ ꠘꠤꠅꠝ ꠇꠣꠘꠥꠘ, ꠡꠣꠡ꠆ꠔꠤꠞ ꠛꠦꠛꠍ꠆ꠔꠣ ꠎꠣꠘꠣꠁꠀ ꠟꠤꠚꠟꠦꠐ ꠛꠣꠐꠣ ꠍꠟꠦꠞ — ꠀꠞ ꠀꠝꠞꠣ ꠢꠥꠞꠥ ꠢꠈꠟꠦ ꠁꠔꠣ ꠀꠎꠛ ꠇꠤꠍꠤꠝꠞ ꠈꠣꠄ ꠈꠣꠞꠛꠣꠞ ꠖꠦꠇꠤꠀ ꠢꠈꠟ ꠄꠈꠛꠣꠞꠦ ꠔꠛꠖꠥꠟ ꠟꠣꠉꠤ ꠉꠦꠍꠁꠘ ⁕ ꠛꠣꠡꠣꠔ ꠍꠣꠍꠣ, ꠝꠣꠝꠣ ꠀꠞꠅ ꠀꠔꠤꠅ ꠅꠈꠟ ꠀꠁꠞꠣ, ꠈꠦ ꠇꠤꠔꠣ ꠈꠞꠔꠣ ꠘꠣꠈꠞꠔꠣ ꠅꠔꠣ ꠟꠁꠀ ꠝꠣꠔ ꠈꠔꠣ ꠀꠞ ꠛꠦꠍ꠆ꠔꠔꠣ ⁕ ꠀꠞ ꠛꠠꠔꠣꠁꠘꠔꠞ ꠁꠔꠣ ꠛꠦꠍ꠆ꠔꠔꠣꠞ ꠝꠣꠏꠦ ꠀꠝꠞꠣꠞ ꠇꠤꠍꠥ ꠡꠥꠛꠤꠗꠣ ꠅꠁꠟ, ꠄꠈ ꠚꠞꠝꠣꠘꠦ ꠁꠀꠢꠤꠀ ꠈꠣꠘꠦ ꠚꠥꠞꠣ ꠖꠦꠡꠞ ꠁꠡ꠆ꠇꠥꠟ-ꠇꠟꠦꠎ-ꠜꠣꠞ꠆ꠍꠤꠐꠤ ꠛꠘ꠆ꠗ ꠈꠞꠤ ꠖꠤꠟꠣ ⁕ ꠁꠔꠣꠔ ꠇꠥꠘꠥ ꠚꠠꠣꠟꠦꠈꠣ ꠘꠣꠁ, ꠀꠞ ꠛꠣꠡꠣꠔ ꠎꠦꠈꠣꠘꠅ ꠡꠛ ꠡꠝꠄ ꠚꠠꠣꠞ ꠟꠣꠉꠤ ꠀꠝꠞꠣꠞ ꠃꠚꠞꠦ ꠛꠣꠡꠣꠞ ꠝꠣꠞ꠆ꠡꠣꠟ’ꠟ ꠔꠣꠈꠦ ꠁꠇꠣꠘꠅ ꠝꠄ ꠝꠥꠞꠥꠛ꠆ꠛꠤ ꠢꠈꠟꠞ ꠞꠥꠎꠇꠥꠞ ꠝꠤꠐꠤꠋ ꠀꠞ ꠡꠣꠝꠞꠤꠇ ꠚꠞꠝꠣꠘ ꠝꠥꠈꠍ꠆ꠔ, ꠀꠞ ꠛꠥꠏꠣꠛꠥꠏꠤ ꠈꠞꠣꠞ ꠟꠣꠉꠤ ꠀꠝꠞꠣ ꠚꠣꠁꠟꠣꠝ ꠍꠥꠐ꠆ꠐꠤ ⁕ ꠔꠣꠘꠔꠣꠘꠞ ꠀꠝꠞꠣꠞ ꠚꠠꠣ ꠟꠦꠈꠣꠞ ꠛꠣꠄꠖꠤ ꠍꠣꠃꠀꠞꠃ ꠡꠝꠄ ꠘꠣꠁ ⁕ ꠀꠞ ꠁ ꠡꠥꠎꠥꠉꠦ ꠛꠣꠡꠣꠔ ꠀꠁꠀ ꠚꠠꠣꠅꠞꠣ ꠝꠣꠡ꠆ꠐꠞꠡꠣꠛꠞꠦꠅ ꠜꠣꠁ ꠛꠁꠘ ꠢꠈꠟꠦ ꠝꠤꠟꠤꠀ ꠞꠣꠍ꠆ꠔꠣꠔ ꠉꠤꠀ ꠈꠣꠠꠣ ꠔꠣꠇꠤꠀ, ꠢꠘ ꠔꠣꠇꠤꠃ ꠛꠤꠖꠣꠄ ꠈꠞꠤ ꠖꠤꠟꠣꠝ ⁕ ꠎꠣꠘꠣꠁ ꠖꠤꠟꠣꠝ, ꠛꠣꠛꠣꠄ ꠈꠁꠍꠁꠘ ꠁꠡ꠆ꠇꠥꠟ ꠘꠣ ꠈꠥꠟꠣ ꠚꠞ꠆ꠎꠘ꠆ꠔ ꠚꠠꠣ ꠟꠣꠉꠔ ꠘꠣꠄ, ꠁꠡ꠆ꠇꠥꠟ ꠈꠥꠟꠟꠦ ꠀꠚꠘꠦ ꠀꠁꠔꠣ — ꠝꠣꠡ꠆ꠐꠞꠡꠣꠛ ꠔ ꠄꠈꠡ ꠜꠣꠉ ꠝꠤꠍꠣ ꠝꠣꠔꠈꠣꠘ ꠛꠤꠡ꠆ꠡꠣꠡ ꠈꠞꠤꠀ ꠍꠣꠁꠇꠦꠟ ꠊꠥꠞꠣꠁꠀ ꠉꠦꠟꠣꠉꠤ, ꠀꠞ ꠀꠝꠞꠣ ꠅꠁ ꠉꠦꠟꠣꠝꠉꠤ ꠚꠥꠞꠣ ꠚ꠆ꠞꠤ ⁕ ꠡꠈꠣꠟꠦ ꠘꠣꠍ꠆ꠔꠣ ꠡꠦꠡ ꠅꠁꠟꠦꠃ ꠛꠁꠀ ꠛꠣꠠ ꠍꠣꠃꠀ ꠇꠥꠘ ꠡꠝꠄ ꠛꠣꠛꠣ ꠛꠣꠞꠁꠀ ꠎꠣꠁꠛꠣ, ꠚꠣꠠꠣꠞ ꠡꠋꠉꠤ-ꠡꠣꠕꠤ ꠢꠈꠟꠦꠅ ꠖꠥꠞ ꠖꠥꠞ ꠊꠥꠞꠞꠣ, ꠢꠈꠟꠞ ꠘꠤꠅꠔ ꠄꠈ — ꠛꠣꠛꠣ ꠞꠅꠀꠘꠣ ꠅꠃꠀꠞ ꠟꠉꠦ ꠟꠉꠦ ꠊꠥꠒ꠆ꠒꠤ ꠟꠣꠐꠣꠁ, ꠝꠣꠞ꠆ꠛꠦꠟ, ꠍꠣꠁꠇꠦꠟꠞ ꠍꠣꠇ꠆ꠇꠣ, ꠎꠣꠞ ꠎꠦꠔꠣ ꠀꠍꠦ ꠟꠁꠀ ꠝꠣꠑ ꠀꠎꠤꠞ ⁕ ꠝꠣꠗꠣꠘ ꠄꠈꠐꠣ ꠚꠞ꠆ꠎꠘ꠆ꠔ ꠖꠥꠘꠤꠀ ꠀꠈꠦꠞ ꠢꠈꠟꠔꠣ ꠄꠈ, ꠖꠥꠁꠐꠣꠔ ꠛꠣꠛꠣ ꠀꠁꠀ ꠈꠣꠃꠀꠞ ꠐꠦꠛꠤꠟ ꠚꠣꠁꠟꠦꠃ ꠅꠁꠟ ⁕ ꠀꠞ ꠝꠣ ꠁ ꠡꠝꠄ ꠊꠞꠞ ꠈꠣꠝ ꠈꠣꠎ ꠟꠁꠀ ꠕꠣꠇꠁꠘ, ꠛꠦꠍ꠆ꠔꠔꠣ ꠀꠞꠅ ꠛꠣꠠꠤ ꠎꠣꠁꠔ ꠇꠣꠞꠘ- ꠡꠣꠠꠤ ꠔꠣꠇꠤ ꠟꠁꠀ ꠎꠔꠎꠣꠔꠤꠞ ꠐꠥꠇꠐꠣꠇ ꠎꠤꠘꠤꠡ ꠀꠍꠦ ꠁꠔꠣꠞ ꠚꠦꠞꠤꠀꠟꠣ ꠢꠈꠟꠦ ꠛꠦꠍꠣꠛꠤꠇꠤꠞ ꠟꠣꠉꠤ ꠇꠤꠌ꠆ꠌꠥ ꠘꠣ ꠖꠦꠈꠣꠁꠀ ꠎꠣꠁꠔꠣꠘꠣ, ꠝꠣ-ꠝꠣꠝꠤꠞꠣꠅ ꠖꠦꠈꠣꠞ ꠡꠝꠄ ꠘꠣꠁ ꠈꠁꠀꠅ ꠢꠈꠟꠔꠣꠃ ꠖꠦꠈꠔꠣ, ꠀꠞ ꠁ ꠖꠦꠈꠣꠞ ꠔꠥꠟꠘꠣꠄ ꠇꠤꠘꠣ ꠈꠝ ꠀꠍꠤꠟ ⁕ ꠡꠛ ꠡꠥꠎꠥꠉ ꠚꠣꠁꠀ ꠇꠥꠛ ꠜꠣꠟꠣꠃ ꠈꠣꠐꠣꠔ ꠀꠍꠤꠟ, ꠇꠤꠘꠔꠥ ꠚꠘ꠆ꠞꠛꠤꠡ ꠖꠤꠘ ꠚꠣꠠꠤ ꠖꠤꠛꠣꠞ ꠚꠞꠦ ꠀꠈꠔꠣ ꠘꠣꠝꠟ ꠖꠥꠘꠤꠀꠜꠤ ꠉꠎꠛ, ꠔꠣꠘ ꠘꠎꠞ ꠚꠠꠟ ꠀꠝꠞꠣꠞ ꠛꠣꠄꠖꠤ ⁕ ꠡꠣꠝꠞꠤꠇ ꠚꠞꠝꠣꠘ ꠎꠣꠞꠤ ꠈꠞꠤꠀ ꠈꠁꠟꠣ, ꠄꠈꠘ ꠔꠣꠇꠤ ꠚꠠꠣꠡꠥꠘꠣ ꠀꠞꠝ꠆ꠜ, ꠞꠥꠎꠞꠥꠎ ꠇ꠆ꠟꠣꠡ ꠎꠣꠃꠀ ꠟꠣꠉꠛ, ꠎꠦꠘꠔꠦꠘ ꠈꠞꠤ ꠉꠦꠟꠦ ꠅꠁꠔ ꠘꠣꠄ, ꠍꠣꠌ꠆ꠌꠣ ꠚꠣꠇꠤꠍ꠆ꠔꠣꠘꠤ ꠝꠥꠍꠟꠝꠣꠘ ꠢꠣꠎꠤꠀ ꠎꠣꠁꠔꠦ ꠅꠁꠛ ⁕ ꠄꠞ ꠟꠣꠉꠤ ꠚꠤꠘꠔꠦ ꠅꠁꠛ ꠚꠣꠇꠤꠍ꠆ꠔꠣꠘꠤ ꠁꠃꠘꠤꠚꠞ꠆ꠝ, ꠀꠞ ꠁꠔꠣ ꠛꠣꠘꠣꠘꠤꠞ ꠝꠣꠚꠎꠥꠇ ꠢꠈꠟꠔꠣ ꠝꠤꠟꠛ ꠁꠡ꠆ꠇꠥꠟꠅ, ꠝꠣꠕꠣꠔ ꠔꠣꠈꠛ ꠐꠥꠚꠤ ⁕ ꠚꠞꠞ ꠖꠤꠘ ꠝꠘꠞ ꠖꠥꠇ ꠟꠁꠀ ꠉꠦꠟꠣꠝ ꠁꠡ꠆ꠇꠥꠟꠅ, ꠡꠛ ꠍꠣꠞ ꠅꠈꠟꠞ ꠝꠣꠔ ꠈꠔꠣ ꠢꠥꠋꠇꠣꠞ ꠢꠥꠘꠤꠀ ꠝꠘ ꠅꠁꠟ ꠔꠣꠁꠘ ꠔꠣꠁꠘꠅ ꠚꠣꠇꠤꠍ꠆ꠔꠣꠘ ꠀꠞ꠆ꠝꠤꠔ ꠎꠄꠘ ꠖꠤꠀ ꠀꠁꠍꠁꠘ, ꠀꠐꠥ ꠚꠞ꠆ꠎꠘ꠆ꠔ ꠡꠣꠖꠣ ꠚꠥꠟ ꠡꠣꠞ꠆ꠐ, ꠌꠛ꠆ꠛꠤꠡ ꠁꠘ꠆ꠌꠤ ꠊꠦꠞꠞ ꠚꠣꠄꠎꠣꠝꠣ ꠚꠣꠃꠞ ꠊꠘ꠆ꠐꠤꠞ ꠃꠚꠞꠦ ꠕꠣꠈꠔꠦ ꠅꠁꠛ, ꠟꠉꠦ ꠚꠥꠟꠐꠣꠁꠝ ꠎꠤꠘ꠆ꠘꠣꠢ ꠇꠦꠙ, ꠛꠣ ꠟꠤꠀꠇꠔ ꠇꠦꠙ, ꠍꠣꠞꠞ ꠉꠦꠍꠦ ꠛꠥꠏꠣꠔ ꠉꠦꠟꠦꠃ ꠟꠉꠦ ꠈꠣꠁꠔꠦ ꠅꠞ ꠗꠝꠇ, ꠀꠞ ꠇ꠆ꠟꠣꠍꠞ ꠖꠥꠡ꠆ꠐꠣ ꠚꠞꠤꠍ’ꠄ ꠚꠞꠤꠍꠤꠔꠞꠣ ꠍ꠆ꠇꠦꠟꠞ ꠄꠈ ꠛꠣꠠꠤ, ꠝꠥꠈ ꠛꠣꠘꠤ- ‘ꠀꠞꠅ ꠐꠦꠒꠤ ꠚꠤꠘꠔꠣꠄꠘꠤ, ꠄꠈꠘ ꠢꠈꠟ ꠡꠣꠛꠥꠖ,’ ꠡꠣꠔꠖꠤꠘ ꠚꠞꠦ ꠁꠃꠘꠤꠚꠞ꠆ꠝ ꠍꠣꠠꠣ ꠀꠁꠟꠦ ꠀꠍ꠆ꠔꠣꠖꠤꠘ ꠝꠣꠑ ꠈꠣꠠꠣ ꠔꠣꠈꠔꠦ ꠅꠁꠛ ⁕
ꠢꠣꠁꠘꠎꠣꠞ ꠡꠝꠄ ꠛꠣꠛꠣꠞ ꠟꠉꠦ ꠉꠤꠀ ꠖꠞ꠆ꠎꠤꠞ ꠈꠣꠍꠣꠔ ꠝꠣꠚ ꠖꠤꠀ ꠀꠁꠟꠣꠝ, ꠔꠤꠘꠖꠤꠘ ꠛꠣꠖꠦ ꠒꠦꠟꠤꠜꠣꠞꠤ, ꠝꠣꠕꠣꠞ ꠟꠣꠉꠤ ꠎꠤꠘ꠆ꠘꠣꠢ ꠇꠦꠙꠅ ꠇꠤꠘꠣ ꠅꠁꠟ ⁕ ꠚꠞꠞ ꠖꠤꠘ ꠍ꠆ꠇꠥꠟꠅ ꠉꠤꠀ ꠖꠦꠇꠤ ꠈꠔꠎꠘꠦ ꠁꠃꠘꠤꠚꠞ꠆ꠝ ꠚꠤꠘ꠆ꠖꠤꠀꠃ ꠀꠁꠌ꠆ꠌꠁꠘ, ꠔꠣꠞꠣꠞ ꠛꠦꠡꠤꠞ ꠜꠣꠉꠞ ꠚꠞꠤꠛꠣꠞꠃ ꠝꠥꠍꠟꠤꠝ ꠟꠤꠉ ꠈꠞꠞꠣ, ꠔꠣꠞꠣ ꠖꠞ꠆ꠎꠤꠞ ꠖꠥꠇꠣꠘ ꠛꠁꠀ ꠔꠣꠇꠤꠀ ꠈꠣꠚꠠ ꠡꠤꠟꠣꠁ ꠈꠞꠣꠁꠀ ꠀꠘꠍꠁꠘ ⁕ ꠀꠝꠞꠣ ꠛꠣꠇꠤ ꠢꠈꠟꠦ ꠝꠥꠐꠣꠝꠥꠐꠤ ꠔꠤꠘꠖꠤꠘꠞ ꠝꠣꠕꠣꠔ ꠀꠐꠥ ꠚꠞ꠆ꠎꠘ꠆ꠔ ꠏꠥꠟꠞ ꠡꠣꠖꠣ ꠚꠥꠟ ꠡꠣꠞ꠆ꠐ ꠖꠥꠁ ꠉꠣꠟꠣꠔ ꠍꠄ ꠁꠘ꠆ꠌꠤ ꠚꠞꠤꠝꠣꠘ ꠈꠣꠐꠣ, ꠛꠥꠇꠅ ꠚꠇꠦꠐ ꠄꠈꠐꠣ ꠟꠉꠦ ꠌꠛ꠆ꠛꠤꠡ ꠁꠘ꠆ꠌꠤ ꠊꠦꠞꠞ ꠚꠣꠄꠎꠣꠝꠣ, ꠚꠣꠃꠅ ꠎꠥꠔꠣ, ꠀꠞ ꠝꠣꠕꠣꠔ ꠎꠤꠘ꠆ꠘꠣꠢ ꠇꠦꠙ, ꠒꠣꠁꠘ ꠇꠣꠘ꠆ꠗ ꠡꠣꠔ ꠁꠘ꠆ꠌꠤ ꠚꠞꠤꠝꠣꠘ ꠃꠍꠣ ꠈꠣꠔꠣ-ꠛꠁ ꠞꠣꠇꠤꠀ ꠀꠞ ꠝꠣꠕꠣꠞꠦ ꠇꠤꠍꠥ ꠛꠣꠃꠄꠖꠤ ꠄꠟꠣꠁꠀ ꠔꠤꠘ ꠡꠣꠠꠦ ꠔꠤꠘ ꠝꠣꠁꠟ ꠖꠥꠞ ꠁꠡ꠆ꠇꠥꠟꠅ ꠞꠅꠀꠘꠣ ꠅꠁꠟꠣꠝ ⁕ ꠞꠣꠍ꠆ꠔꠣꠔ ꠘꠣꠝꠣꠞ ꠚꠞꠦ ꠖꠦꠈꠟꠣꠝ ꠍꠣꠁꠞꠛꠣꠄ ꠔꠣꠇꠤ ꠢꠈꠟ ꠝꠣꠘꠡꠦꠃ ꠍꠣꠁꠀ ꠖꠦꠈꠞꠣ, ꠈꠦꠃ ꠈꠦꠃ ꠢꠤꠞꠤꠛꠣꠞ ꠇꠁꠞꠣꠅ, ‘ꠒꠣꠘ꠆ꠒꠣ ꠉꠞꠝ ꠔꠦ ꠛꠣꠋꠉꠣꠟꠤ ꠘꠞꠝ’ ⁕ ꠢꠈꠟ ꠔꠣꠇꠤ ꠡꠞꠝ ꠛꠣ ꠛꠦꠁꠎ꠆ꠎꠔꠤ ꠟꠣꠉꠟ ꠎꠦ ꠡꠝꠄ ꠖꠦꠈꠟꠣꠝ ꠞꠤꠇꠡꠣꠔ ꠈꠞꠤ ꠁꠡ꠆ꠇꠥꠟꠅ ꠎꠣꠃꠞꠣ ꠚꠥꠠꠤꠘ ꠅꠈꠟꠦ ꠀꠝꠞꠣꠞ ꠛꠣꠄꠖꠤ ꠍꠣꠁꠀ ꠍꠣꠁꠀ ꠀꠡꠤꠀꠡꠤ ꠎꠣꠁꠞꠣ, ꠖꠥꠁꠄꠈꠎꠘ ꠔ ꠀꠡꠤꠞ ꠍꠥꠐꠦ ꠄꠈꠛꠣꠞꠦ ꠞꠤꠇꠡꠣ ꠔꠣꠇꠤꠃ ꠚꠠꠤ ꠎꠣꠁꠛꠣꠞ ꠅꠛꠍ꠆ꠔꠣ ⁕ ꠁꠡ꠆ꠇꠥꠟꠅ ꠉꠤꠀ ꠢꠤꠞꠤꠛꠣꠞ ꠡꠣꠞ꠆ꠐꠞ ꠏꠥꠟ ꠀꠞ ꠚꠣꠄꠎꠣꠝꠣꠞ ꠊꠦꠞꠞ ꠝꠣꠚ ꠖꠦꠃꠀ ꠟꠣꠉꠟ, ꠎꠦꠁꠘꠔꠣꠁꠘ ꠐꠦꠒꠤ ꠈꠣꠚꠠ ꠚꠤꠘꠔꠣ, ꠢꠦꠘꠔꠣꠘꠞꠦ ꠇ꠆ꠟꠣꠍꠞ ꠛꠣꠞꠦ ꠈꠣꠠꠣ ꠞꠣꠇꠤꠀ ꠡꠣꠍ꠆ꠔꠤ ꠖꠦꠃꠀ ꠅꠁꠟ ꠇꠣꠞꠘ ꠔꠣꠞꠣ ꠏꠥꠟ ꠀꠞ ꠊꠦꠞꠞ ꠝꠣꠚ ꠈꠝꠣꠁꠟꠣꠁꠍꠟꠣ ⁕
ꠀꠝꠞꠣ ꠛꠦꠡꠤꠞ ꠜꠣꠉꠃ ꠚꠣꠡ ꠖꠤꠟꠣꠝ ⁕ ꠀꠝꠣꠞ ꠖꠥꠍ꠆ꠔ Saki Choudhury ꠡꠛ ꠡꠝꠄꠞ ꠟꠣꠈꠣꠘ ꠀꠝꠣꠞ ꠔꠣꠇꠤ ꠛꠦꠡꠤ ꠘꠝ꠆ꠛꠞ ꠚꠣꠁꠀꠃ ꠚꠤꠡ ꠈꠞꠍꠤꠟ ꠁꠇꠣꠘꠅ ꠇꠥꠘꠥ ꠡꠘ꠆ꠖꠦꠢ ꠘꠣꠁ — ꠀꠞꠦꠈꠣꠘ ꠈꠔꠣ ꠢꠤ ꠡꠝꠄ ꠡꠛ ꠝꠣꠔ꠆ꠞ ꠛꠣꠞ ꠛꠍꠞ ꠛꠄꠡ ꠚꠣꠞ ꠅꠁꠍꠤ ⁕ ꠇ꠆ꠟꠣꠍꠅ ꠈꠔ ꠡꠝꠄ ꠚꠞꠦ ꠚꠞꠦ ꠝꠣꠕꠣ ꠊꠣꠝꠦ ꠜꠤꠎꠤ ꠎꠣꠁꠔ ⁕ ꠐꠥꠚꠤꠖꠤ ꠝꠣꠕꠣꠔ ꠛꠣꠔꠣꠡ ꠈꠞꠣ ꠟꠣꠉꠔ ⁕ ꠁ ꠡꠝꠄ ꠗꠞ꠆ꠝꠡꠤꠇ꠆ꠇꠣ, ꠃꠞ꠆ꠖꠥꠞ ꠍꠣꠞ ꠢꠈꠟꠦꠅ ꠍꠣꠠ ꠖꠤꠟꠦꠅ ꠝꠔꠤꠟꠣꠟ ꠛꠣꠛꠥ ꠍꠣꠞꠞ ꠇꠣꠍꠦ ꠇꠥꠘꠥ ꠍꠣꠠ ꠀꠍꠤꠟ ꠘꠣ ⁕ ꠇꠥꠟꠣꠞ ꠟꠉꠦ ꠟꠉꠦ ꠝꠣꠕꠣꠔ ꠛꠦꠔꠞ ꠇꠥꠍꠣ ꠚꠠꠔ ⁕ ꠁꠔꠣ ꠟꠁꠀ ꠛꠃꠔꠔꠣ ꠟꠦꠈꠣꠞ ꠀꠍꠤꠟ ⁕ ꠛꠦꠡꠤ ꠟꠣꠝ꠆ꠛꠣ ꠅꠁꠉꠦꠍꠦ ꠖꠦꠇꠤꠀ ꠡꠦꠡ ꠈꠞꠤꠟꠣꠁꠀꠞ ⁕ ꠈꠣꠟꠤ ꠄꠈꠣꠘ ꠈꠔꠣ ꠈꠦꠃ ꠝꠘ ꠈꠞꠣꠁꠀ ꠖꠤꠟꠦ ꠜꠣꠟꠣ ꠅꠁꠛ – ꠛꠦꠡꠤ ꠈꠞꠤꠀ ꠖꠥꠍ꠆ꠔ Saki Choudhury ꠛꠣ ꠉꠥꠞꠥ Ambarish Datta’ꠞ ꠎꠣꠘꠣ ꠕꠣꠇꠔ ꠚꠣꠞꠦ — ꠀꠝꠞꠣꠞꠦ ꠔ ꠍꠣꠌ꠆ꠌꠣ ꠚꠣꠇꠤꠍ꠆ꠔꠣꠘꠤ ꠝꠥꠍꠟꠝꠣꠘ ꠛꠣꠘꠣꠘꠤꠞ ꠟꠣꠉꠤ ꠁꠔꠣ ꠈꠞꠣ ꠅꠁꠍꠤꠟ, ꠅꠘ꠆ꠘ ꠗꠞ꠆ꠝꠞ ꠛꠘꠗꠥꠁꠘꠔꠞꠦ ꠍꠣꠌ꠆ꠌꠣ ꠛꠣꠘꠣꠘꠤꠞ ꠟꠣꠉꠤ ꠇꠤꠔꠣ ꠈꠞꠣ ꠅꠁꠍꠤꠟ ?
