ꠛꠣꠋꠟꠣꠖꠦꠡꠞ ꠘꠣꠘꠣꠘ ꠍꠤꠐꠤꠘ꠆ꠔ ꠉꠣꠞꠤꠞ ꠎꠣꠝ ꠎꠦꠘ ꠇꠥꠘꠥꠝꠘ꠆ꠔꠦꠅ ꠍꠥꠐꠣꠞ ꠘꠣꠝ ꠘꠣꠁ ⁕ ꠃꠚꠔꠦ ꠖꠤꠘꠇꠦ ꠖꠤꠘ ꠛꠟꠔꠦꠃ ꠀꠍꠦ ⁕ ꠛꠣꠘꠣꠛꠣꠘꠣ ꠞꠣꠍꠔꠣꠁꠘ, ꠃꠞꠣꠟꠍꠞꠈ, ꠝꠦꠐ꠆ꠞꠞꠦꠟ ꠈꠔ ꠔꠣ ꠏꠦ ꠛꠣꠘꠣꠘꠤ ꠅꠁꠟ, ꠔꠦꠛ ꠎꠣꠘꠎꠐ ꠍꠣꠞꠦꠞ ꠘꠣ ⁕ ꠄꠉꠥ ꠖꠦꠡꠞ ꠞꠣꠎꠗꠣꠘꠤ ꠃꠀꠞ ꠛꠣꠖꠦꠅ ꠎꠣꠘꠎꠐꠞ ꠉꠔꠤꠇꠦ ꠓꠣꠈꠣ ꠅꠘꠇꠦ ꠖꠥꠘꠤꠀꠞ ꠡꠛꠍꠦ ꠟꠣꠄꠟꠣꠄꠞ ꠡꠢꠞ ⁕ ꠎꠣꠘꠎꠐꠞ ꠟꠣꠉꠤ ꠝꠣꠘꠡꠞ ꠎꠤꠘ꠆ꠖꠦꠉꠤꠞꠦ ꠎꠦꠎꠣꠔ ꠢꠣꠖꠣꠘꠤ ꠢꠣꠖꠣꠁꠍꠦ ꠁꠔꠣ ꠈꠁꠀ ꠡꠦꠡ ꠈꠞꠣꠞ ꠘꠣꠄ ⁕ ꠄꠈꠝꠣꠔ꠆ꠞ ꠎꠦꠁꠘꠔꠣꠁꠘ ꠢꠦꠖꠣꠔ ꠚꠣꠁꠞꠣ, ꠄꠁꠘꠔꠣꠁꠘ ꠛꠥꠏꠞꠣ ⁕
ꠀꠁꠎꠇꠥ ꠍꠥꠐ꠆ꠐꠤꠞ ꠖꠤꠘ ꠅ ꠓꠣꠈꠣ-ꠍꠤꠐꠣꠉꠣꠋ ꠢꠣꠁꠅꠄꠞ ꠘꠣꠞꠣꠄꠘꠉꠂꠘ꠆ꠎ ꠅꠋꠡꠔ ꠛꠦꠔꠣꠟꠣ ꠎꠣꠘꠎꠐ ꠟꠣꠉꠍꠦ ⁕ ꠖꠦꠠꠤ ꠉꠣꠞꠤꠘ꠆ꠔꠞ ꠍꠣꠚꠦ ꠡꠥꠇ꠆ꠇꠥꠞꠛꠣꠞ ꠛꠤꠀꠘ ꠝꠣꠘ꠆ꠔꠦ ꠘꠣꠞꠣꠄꠘꠉꠂꠘ꠆ꠎꠞ ꠡꠥꠘꠣꠞꠉꠣꠅꠞ ꠌꠂꠔ꠆ꠞꠤ ꠉꠣꠞ꠆ꠝꠦꠘ꠆ꠐꠍ ꠄꠟꠣꠇꠣ ꠔꠘꠦ ꠝꠦꠊꠘꠣꠊꠣꠐ ꠐꠥꠟ ꠙ꠆ꠟꠣꠎꠣ ꠁꠝꠣ ꠙ꠆ꠞꠣꠄ ꠚꠣꠍ ꠇꠤꠟꠥꠝꠤꠐꠣꠞ ꠄꠟꠣꠇꠣꠔ ꠉꠣꠞꠤꠘ꠆ꠔꠞ ꠟꠣꠝ꠆ꠙꠣ ꠟꠣꠋꠉꠣꠁꠞ ꠗꠞꠍꠦ ⁕ ꠎꠦꠉꠔꠤꠇꠦ ꠚꠦꠍꠤꠘ꠆ꠖꠣꠞꠈꠟꠞ ꠝꠕꠣꠎ ꠈꠣꠞꠣꠚ ꠅꠁꠀ ꠛꠦꠀꠋꠉꠣꠎ ꠟꠣꠉꠤꠉꠦꠍꠦ ⁕
ꠡꠞꠎꠝꠤꠘ ꠖꠦꠈꠣ ꠎꠣꠄ, ꠛꠤꠜꠤꠘ꠆ꠘ ꠈꠣꠝꠦ ꠛꠣꠞ ꠅꠃꠀ ꠚꠦꠍꠤꠘ꠆ꠖꠣꠞꠈꠟ ꠎꠣꠘꠎꠐꠞ ꠖꠣꠄ ꠉꠣꠞꠤꠔꠃ ꠟꠣꠝ꠆ꠙꠣ ꠡꠝꠄ ꠗꠞꠤ ꠛꠣꠞꠍꠣꠁꠞꠣ ⁕ ꠝꠢꠣꠍꠞꠈꠅ ꠉꠣꠞꠤꠘ꠆ꠔꠞ ꠛꠦꠡꠦꠛꠣ ꠍꠣꠚ ꠞꠁꠍꠦ ⁕ ꠈꠈꠎꠘ ꠚꠦꠍꠤꠘ꠆ꠖꠣꠞꠦ ꠈꠁꠘ, ꠚꠞꠤꠛꠣꠞꠞ ꠢꠇ꠆ꠇꠟꠞꠦ ꠟꠁꠀ ꠚꠣꠈꠣꠘꠤꠔ ꠎꠣꠁꠞꠣ ⁕ ꠇꠤꠘ꠆ꠔꠥꠇ ꠎꠣꠘꠎꠐꠞ ꠟꠣꠉꠤꠘ ꠛꠃꠡ꠆ꠡꠝꠄ ꠔꠘꠦ ꠘꠥ ꠄꠈ ꠎꠦꠉꠣꠔ ꠛꠁ ꠕꠣꠈꠣ ꠟꠣꠉꠦꠞ ⁕ ꠟꠉꠞ ꠀꠚꠦꠞꠔꠣꠁꠘ꠆ꠔ ꠀꠞ ꠛꠦꠐꠤꠘ꠆ꠔꠞ ꠛꠦꠡꠦꠛꠣ ꠈꠡ꠆ꠐ ꠅꠁꠎꠣꠞ ⁕