শুরমা ফারর খবর ছিলটি জবানে ছিলটর খবর
Related Articles
ꠍꠤꠟꠐꠤ ꠝꠣꠔꠧꠞ ꠄꠇꠐꠤꠜꠤꠍ꠆ꠐ ꠝꠦꠁꠍ ꠢꠇꠦ (Mace Hoque) ২০২২ ꠡꠣꠟꠧꠞ ꠉ꠆ꠟꠧꠛꠣꠟ ꠟꠦꠋꠉꠥꠄꠎ ꠄꠒꠜꠧꠇꠦꠍꠤ ꠒꠦꠞ (Global Language Advocacy Day) ꠃꠍꠤꠟ꠆ꠟꠣꠄ ꠇꠥꠀꠟꠤꠡꠘ ꠚꠞ ꠟꠦꠋꠉꠥꠄꠎ ꠞꠣꠁꠐ꠆ꠍꠞ (Coalition for Language Rights) ꠖꠣꠄ ꠙꠧꠍ꠆ꠐꠈꠣꠘꠔꠣ ꠟꠦꠈꠍꠤꠟꠣ। ꠅꠛꠤꠇꠟ ꠔꠞꠏꠝꠣ ꠈꠞꠤꠀ ꠡꠥꠞꠝꠣ ꠚꠣꠠꠞ ꠈꠛꠞꠧ ꠁꠇꠣꠘ ꠍꠤꠟꠐꠤ ꠝꠣꠔꠦ ꠢꠤꠞꠤ ꠍꠣꠚꠣꠘꠤ ꠅꠁꠟꠧ ⁕
ꠎꠤꠍꠤꠄꠟꠀꠞ (GCLR)-ꠄ ꠄꠈꠦꠞꠦ ꠊꠞꠥꠀ ꠌꠦꠡ꠆ꠐꠣ ꠔꠖꠛꠤꠞꠞ ꠈꠣꠁꠡꠞꠦ ꠡꠝꠞ꠆ꠔꠘ ꠈꠞꠦ ꠀꠞ ꠀꠝꠞꠣꠞ ꠛ꠆ꠟꠉꠅ ꠔꠣꠞꠣꠞꠦ ꠟꠁꠀ ꠍꠣꠚꠣꠘꠤꠞ ꠝꠣꠁꠖ꠆ꠖꠝꠦ ꠖꠥꠘꠤꠀꠏꠥꠠꠤ ꠝꠣꠔꠧꠞ ꠍꠣꠙꠥꠐꠣꠞꠧꠞ ꠀꠅꠀꠏꠞꠦ ꠍꠤꠔ꠆ꠞꠣꠁꠀ ꠖꠦꠁ ⁕ ꠁ ꠙꠥꠡ꠆ꠐꠅ ꠍꠣꠚꠣ ꠝꠔꠣꠝꠔ ꠟꠦꠈꠞꠣꠞ ꠘꠤꠎꠞ ꠛꠥꠏ ꠔꠘꠦ ꠟꠦꠈꠣ, ꠔꠄ ꠁꠇꠐꠣ ꠎꠥꠐꠧꠞ ꠅꠛꠍꠔꠣꠘꠞꠦ ꠛꠥꠏꠣꠄ ꠘꠣ ⁕
ꠝꠥꠁ ꠄꠈꠏꠘ ꠛꠤꠐꠤꠡ ꠛꠣꠋꠟꠣꠖꠦꠡꠤ, ꠎꠘꠝ ꠀꠞ ꠛꠣꠠꠤꠀ ꠃꠐꠍꠤ ꠛ꠆ꠞꠤꠐꠦꠘꠧ, ꠀꠞ ꠍꠤꠟꠐꠤ ꠝꠣꠔꠤ, ꠄꠈꠣꠘ ꠎꠛꠣꠘ ꠏꠦꠈꠐꠣꠞꠦ ꠡꠞꠈꠣꠞꠤꠜꠣꠛꠦ ꠢꠣꠄ ꠖꠤꠍꠦ ꠘꠣ ⁕ ꠃꠚꠔꠦ, ꠍꠤꠟꠐꠤ ꠛꠥꠟꠦ “ꠀꠘꠥꠡ꠆ꠐꠣꠘꠤꠇ” ꠛꠣꠋꠟꠣꠞ ꠄꠈꠣꠘ ꠜꠣꠋꠉꠣ ꠃꠚꠜꠣꠡꠣ ⁕ ꠍꠤꠟꠐꠤ ꠄꠝꠘ ꠄꠈꠣꠘ ꠝꠣꠔ ꠏꠦꠉꠥ ꠏꠥꠇꠤꠞ ꠝꠣꠏꠦ ꠀꠍꠦ: ꠝꠥꠁ ꠜꠥꠠꠣꠝꠣꠔ ꠢꠥꠘꠔꠦ ꠢꠥꠘꠔꠦ ꠇꠣꠢꠤꠟ, ꠟꠉꠦ ꠛꠣꠖꠥꠀ ꠝꠘꠔꠂꠛ꠆ꠛ ꠀꠞ ꠅꠚꠝꠣꠘ ꠔꠧ ꠀꠍꠦꠃ, ꠄꠝꠘꠇꠤ ꠝꠞ ꠎꠤꠛꠘ ꠅ ꠢꠥꠝꠇꠤꠞ ꠝꠥꠇꠧ ꠚꠠꠍꠦ ⁕ ꠔꠦ ꠀꠞ ꠚꠠꠥꠀ ꠈꠞꠔꠣꠝ ꠖꠥꠘ?
ꠍꠤꠟꠐꠤꠞ ꠖꠣꠄ ꠃꠛꠣꠘꠤꠞ ꠟꠣꠉꠤ ꠝꠞ ꠛꠦꠈ꠆ꠔꠤꠉꠔ ꠚꠄꠍꠣꠟꠣ ꠝꠞ ꠢꠥꠞꠥꠔ꠆ꠔꠣꠘ꠆ꠔꠞꠦ ꠟꠁꠀ ꠀꠞꠝ꠆ꠜ ꠈꠞ꠆ꠍꠟꠣꠝ ⁕ ꠇꠤꠘ꠆ꠔꠥꠇ ꠁꠇꠣꠘ ꠛꠥꠏꠣꠘꠤꠞ ꠟꠣꠉꠤꠘ ꠀꠝꠞꠣꠞꠦ ꠛꠃꠔ ꠈꠞꠦꠖꠤ ꠏꠣꠅꠀ ꠟꠣꠉꠛꠧ ⁕
ꠝꠞ ꠖꠣꠖꠣꠏꠤꠄ ১৯৭১ ꠡꠣꠟꠧ ꠛꠣꠋꠟꠣꠖꠦꠡꠞ ꠡꠣꠗꠤꠘꠔꠣ ꠀꠞ ꠛꠣꠋꠟꠣ ꠝꠣꠔ ꠞꠇ꠆ꠇꠣꠞ ꠖꠣꠄ ꠟꠠꠣꠁ ꠈꠞꠤꠍꠟꠣ ⁕ ꠢꠤ ꠡꠝꠄꠇꠥ ꠔꠣꠘ ꠐꠣꠁꠘ ꠅꠃ ꠄꠎꠦꠘꠒꠣ ꠚꠦꠡ ꠈꠞꠣ ꠅꠁꠍ꠆ꠟꠧ, ꠄꠝꠘꠇꠤ ꠔꠣꠁꠘ ꠁꠟꠣꠘꠧ ꠀꠈꠟꠛꠣꠘ ꠀꠍꠟꠣ ꠘꠣ ꠏꠦ ꠛꠣꠋꠟꠣꠖꠦꠡꠞ ꠖꠣꠄ ꠀꠏꠣꠖꠤ ꠢꠣꠍꠤꠟ ꠍꠤꠟꠐꠤ ꠝꠣꠔꠞ ꠉꠏꠛ ꠊꠐꠣꠁꠟꠛꠧ ⁕ ꠀꠞ ꠏꠣꠘꠔꠦ ꠚꠣꠞꠟꠦꠅ, ꠚꠌ꠆ꠌꠤꠝ ꠚꠣꠇꠤꠍꠔꠣꠘ ꠔꠘꠦ ꠛꠣꠋꠟꠣꠖꠦꠡꠞ ꠡꠣꠗꠤꠘꠔꠣ ꠛꠦꠡꠤ ꠎꠠꠥꠞꠤ ꠀꠍꠤꠟ ⁕
ꠀꠝꠞꠣꠞ ꠀꠛ꠆ꠛꠣꠞ ꠍꠤꠠꠤꠔ ꠉꠦꠟꠦ, ꠔꠣꠞꠣ ꠅꠟꠣꠘ ꠄꠈ ꠡꠝꠄꠇꠥ ꠛꠠ ꠅꠁꠍꠂꠘ ꠏꠦꠛꠟꠣ ꠔꠣꠞꠣ ꠅꠚꠤꠡꠤꠀꠟꠤ ꠡꠣꠗꠤꠘꠔꠣ ꠚꠣꠁꠘ ⁕ ꠛꠣꠋꠟꠣꠞꠦ ꠞꠣꠡꠐꠤꠅ ꠝꠣꠔ ꠛꠣꠘꠣꠘꠤ ꠅꠄ, ꠀꠞ ꠔꠣꠞꠣ ꠛꠣꠋꠟꠣꠖꠦꠡꠞ ꠃꠘ꠆ꠘꠔꠤꠔ ꠝꠘ ꠖꠦꠁꠘ ⁕ ꠏꠣꠞꠖꠣꠄ ꠄꠈꠣꠘ ꠞꠣꠡꠐꠤꠅ ꠝꠣꠔ ꠀꠞ ꠘꠄꠀ ꠈꠞꠤ ꠛꠣꠋꠟꠣꠖꠦꠡꠤ ꠛꠦꠋꠉꠟꠤ ꠅꠁꠛꠣꠞ ꠚꠞꠤꠍꠄ ꠛꠤꠘꠣ ꠛꠣꠁꠇ꠆ꠇꠦ ꠝꠣꠘꠤꠀ ꠘꠦꠁꠘ ⁕ ꠍꠤꠟꠐꠤ ꠝꠣꠔ ꠏꠦ ꠢꠠꠤꠏꠣꠁꠛ ꠁꠇꠣꠘ ꠇꠥꠘꠥꠛꠣꠟꠣꠅ ꠔꠣꠘꠔꠣꠘꠞ ꠝꠣꠕꠣꠔ ꠀꠁꠍꠦ ꠘꠣ ⁕ ꠅꠈꠣꠘ ꠍꠣꠅꠀꠞ ꠀꠍꠤꠟ, ꠛꠣꠋꠟꠣꠖꠦꠡꠤ ꠡꠛ ꠝꠣꠘꠥꠁꠘꠞꠦ ꠛꠦꠋꠉꠟꠤ ꠔꠈꠝꠣ ꠘꠣ ꠟꠣꠉꠣꠁꠀ ꠛꠣꠋꠟꠣꠖꠦꠡꠤ ꠈꠅꠀꠞ ꠅꠗꠤꠇꠣꠞ ꠖꠦꠅꠀ ꠃꠍꠤꠔ ꠀꠍ꠆ꠟ ⁕ ꠏꠥꠖꠤꠘꠧ ꠀꠝꠞꠣꠞꠦ ꠇꠥꠘꠥ ꠛꠁꠟꠧ ꠁ ꠛꠤꠇꠟ꠆ꠚ ꠖꠦꠅꠀ ꠅꠁꠍꠤꠟ ꠘꠣ, ꠀꠞ ꠅꠔꠣꠞꠖꠣꠄ ꠅꠘꠇꠥꠞ ꠛꠦꠡꠤꠜꠣꠉ ꠍꠤꠟꠐꠤꠘ꠆ꠔꠦ ꠈꠥꠖ ꠘꠤꠏꠞꠦ ꠛꠣꠋꠟꠣꠖꠦꠡꠤ ꠛꠦꠋꠉꠟꠤ ꠈꠁꠀ ꠚꠞꠤꠍꠄ ꠖꠦꠁꠘ, ꠛꠣꠋꠟꠣꠖꠦꠡꠤ ꠍꠤꠟꠐꠤ ꠘꠣ ꠈꠁꠀ ⁕
ꠀꠝꠞꠣꠞ ꠍꠤꠠꠤꠔ ꠀꠁꠟꠦ, ꠝꠥꠁ ꠟꠦꠈꠣꠚꠠꠣꠔ ꠟꠣꠉꠤꠀ ꠛꠣꠋꠟꠣ ꠢꠤꠇꠤꠀ ꠛꠠ ꠅꠁꠍꠤ, ꠈꠦꠘꠦꠘꠣ ꠗꠣꠞꠘꠣ ꠀꠍꠤꠟ ꠛꠥꠟꠦ ꠝꠞ ꠍꠤꠟꠐꠤ “ꠛꠥꠟꠤ” ꠛꠣꠋꠟꠣꠞ ꠄꠉꠥ ꠃꠚꠜꠣꠡꠣ ꠍꠣꠠꠣ ꠇꠥꠘꠔꠣꠅ ꠘꠣꠄ ⁕ ꠏꠦꠈꠣꠞꠘꠦ, ꠄꠇꠣꠒꠦꠝꠤꠇꠜꠣꠛꠦ ꠀꠉꠥꠀꠁꠀ ꠏꠣꠅꠀꠞ ꠖꠣꠄ “ꠖꠣꠚ꠆ꠔꠞꠤꠇ” ꠛꠣꠋꠟꠣ ꠃꠘ꠆ꠘꠔ ꠈꠞꠣ ꠀꠝꠣꠞ ꠟꠣꠉꠤ ꠎꠠꠥꠞꠤ ꠀꠍꠤꠟ ⁕ ꠝꠞꠦ ꠄꠈꠧꠖ ꠛꠣꠞꠇꠥꠅ ꠛꠣꠔꠣꠘꠤ ꠅꠁꠍꠦ ꠏꠦ ꠍꠤꠟꠐꠤꠅ ꠄꠈꠣꠘ ꠝꠣꠔ ⁕ ꠝꠥꠁ ꠄꠞꠣꠉꠦ ꠢꠤꠇꠍꠤꠟꠣꠝ ꠘꠣ ꠏꠦ ꠀꠝꠞꠣꠞꠧ ꠘꠤꠏꠞ ꠟꠦꠈꠘ ꠚꠖ꠆ꠖꠔꠤ ꠀꠍꠦ, ꠏꠦꠈꠐꠣ ꠍꠤꠟꠐꠤ ꠘꠣꠉꠞꠤ ⁕ ꠝꠞ ꠏꠤꠛꠘꠦ ꠄꠈ ꠖꠞ꠆ꠏꠘꠞ ꠛꠦꠡꠤꠛꠣꠞ ꠛꠣꠋꠟꠣꠖꠦꠡꠧ ꠚꠣꠈꠣꠘꠤꠔ ꠉꠦꠍꠤ ꠀꠞ ꠁꠔꠣꠞ ꠛꠦꠡꠤꠜꠣꠉꠃ ꠀꠍꠤꠟ ꠟꠦꠈꠣꠚꠠꠣꠞ ꠃꠖ꠆ꠖꠦꠡ꠆ꠡꠦ ⁕ ꠄꠞ ꠛꠣꠖꠦꠅ ꠁꠔꠣ ꠅꠜꠤꠉ꠆ꠉꠣꠔ ꠝꠞꠦ ꠇꠥꠘꠥ ꠟꠣꠈꠣꠘꠅ ꠛꠣꠔꠣꠘꠤ ꠅꠁꠍꠦ ꠘꠣ ꠀꠝꠞꠣꠞ ꠍꠤꠟꠐꠤ ꠅꠁꠔꠤꠎ꠆ꠎ ꠟꠁꠀ ⁕
ꠅꠘꠦ ꠝꠞ ꠛꠣꠁꠌ꠆ꠌꠣꠘ꠆ꠔꠞ ꠍꠤꠠꠤꠔ, ꠛꠣꠋꠟꠣꠖꠦꠡꠞ ꠟꠉꠦ ꠡꠝ꠆ꠙꠞ꠆ꠇ ꠈꠝ ꠀꠞ ꠈꠝꠔꠦꠅ ꠀꠍꠦ ⁕ ꠝꠞ ꠚꠥꠞꠔ꠆ꠔꠣꠁꠘ ꠇꠥꠟ꠆ꠟꠦ ꠄꠈꠛꠣꠞꠃ ꠛꠣꠋꠟꠣꠖꠦꠡꠧ ꠉꠦꠍꠤꠟ, ꠀꠋꠡꠤꠇꠜꠣꠛꠦ ꠀꠞ꠆ꠕꠤꠇ ꠈꠣꠞꠘꠧ ꠀꠍꠦ, ꠇꠤꠘ꠆ꠔꠥꠇ ꠁꠔꠣꠍꠣꠠꠣꠅ ꠔꠣꠞꠣ ꠈꠥꠖ ꠘꠤꠏꠞꠦ ꠛꠤꠖꠦꠡꠤ ꠛꠣꠋꠟꠣꠖꠦꠡꠤꠞ ꠔꠘꠦ ꠛꠤꠡ꠆ꠡ ꠚꠞꠏꠣꠄꠞ ꠡꠘ꠆ꠔꠣꠘ ꠢꠤꠡꠣꠛꠦ ꠛꠦꠡꠤ ꠝꠣꠘꠦ ⁕ ꠁꠋꠟꠤꠡ ꠀꠝꠞꠣꠞ ꠊꠞ ꠀꠞ ꠅꠁꠘ꠆ꠘ ꠚꠞꠤꠛꠣꠞ ꠅ ꠡꠣꠝꠣꠏꠤꠇ ꠘꠦꠐꠅꠀꠞ꠆ꠇꠧ ꠏꠥꠉꠣꠏꠥꠉꠞ ꠝꠣꠁꠖ꠆ꠖ ꠛꠘꠤ ꠉꠦꠍ ⁕ ꠄꠟ꠆ꠟꠣꠉꠤ ꠝꠣꠁꠅꠞꠝꠣꠔ ꠄꠈ ꠈꠖꠝ ꠈꠞꠟꠣꠝꠤ ꠉꠦꠍꠦ ⁕ ꠝꠥꠁ ꠛꠥꠗ ꠚꠣꠁꠟꠣꠝ, ꠀꠝꠣꠞ ꠛꠣꠁꠌ꠆ꠌꠣꠁꠘ꠆ꠔꠦ ꠏꠦꠔꠥꠇ ꠝꠞ ꠝꠣꠁꠅꠞꠝꠣꠔꠦ ꠔꠣꠞꠣꠞꠦ ꠏꠣꠢꠤꠞ ꠈꠞꠔꠧ ꠘꠣ ꠚꠣꠞꠦ, ꠁꠇꠣꠘ ꠖꠦꠇꠤꠀ ꠝꠞ ꠢꠣꠁꠢꠥꠔꠣꠡ ꠘꠥ ꠟꠣꠉꠤ ꠏꠣꠄ ⁕ ꠏꠥꠖꠤꠘꠅ ꠛꠣ ꠔꠣꠞꠣ ꠍꠤꠟꠐꠤ ꠛꠥꠏꠦ, ꠔꠣꠞꠣ ꠘꠥ ꠄꠈꠁ ꠟꠉꠦ ꠏꠥꠀꠚ ꠖꠤꠔ ꠚꠣꠞꠦ ꠘꠣ, ꠄꠞ ꠟꠣꠉꠤ ꠁꠋꠟꠤꠡꠦ ꠝꠣꠔꠤꠟꠣꠄ ⁕
ꠔꠃ, ꠅꠈꠣꠘ ꠔꠘꠦꠃ ꠝꠞ ꠏꠣꠔ꠆ꠞꠣ ꠡꠥꠞꠥ ꠈꠞꠤ ⁕ ꠝꠥꠁ ꠚꠄꠍꠣꠟꠣ ꠈꠞꠤ ꠝꠞ ꠛꠣꠁꠌ꠆ꠌꠣꠉꠥꠁꠘ꠆ꠔꠣꠞꠦ ꠝꠞ ꠝꠣꠁꠅꠞꠝꠣꠔ ꠢꠤꠇꠣꠘꠤꠞ ꠟꠣꠉꠤꠘ ꠀꠝꠤ ꠘꠤꠏꠦꠃ ꠖꠣꠄ ꠘꠤꠝꠥ ꠀꠞ ꠝꠞ ꠡꠦꠛꠧꠞ ꠟꠣꠉꠤ ꠅꠘꠟꠣꠁꠘ ꠔꠘꠦ ꠖꠞꠈꠣꠞꠤ ꠍꠤꠏ ꠔꠥꠇꠣꠘꠤꠔ ꠟꠣꠉꠤꠉꠦꠟꠣꠝ ⁕ ꠅꠘꠦ, ꠁꠇꠣꠘ ꠔ ꠅꠃ ꠏꠦꠉꠣ ꠏꠦꠈꠣꠘ ꠜꠣꠟꠣꠃ ꠟꠣꠉꠦꠞ ⁕ ꠝꠥꠁ ꠏꠦꠔꠥꠇ ꠅꠘꠟꠣꠁꠘ ꠖꠥꠘꠤꠀ ꠔꠥꠇꠣꠘꠤꠔ ꠟꠣꠉꠍꠤꠟꠣꠝ, ꠢꠤꠡꠝꠄ ꠚꠣꠁꠟꠣꠝ “ꠚꠞ꠆ꠝꠣꠟ” ꠛꠣꠋꠟꠣ ꠢꠤꠇꠣꠞ ꠖꠣꠄ ꠀꠝꠖꠣ ꠏꠤꠘꠤꠡꠣꠁꠘ ꠞꠁꠍꠦ, ꠏꠦꠏꠣꠉꠣꠔ ꠍꠤꠟꠐꠤ “ꠝꠣꠔ” ꠢꠤꠇꠣꠘꠤꠞ ꠇꠥꠘꠥ ꠍꠤꠎꠅ ꠘꠣꠁ ⁕ ꠁꠇꠣꠘ ꠏꠣꠘꠤꠀ ꠀꠞꠧ ꠛꠦꠡꠤ ꠀꠍꠝ꠆ꠛꠤꠔ ꠅꠁꠉꠦꠍꠟꠣꠝ ꠏꠦ ꠍꠤꠟꠐꠤ ꠝꠣꠔꠧꠞ ꠘꠤꠏꠞ ꠢꠞꠚ, ꠡꠁꠋꠇꠣ, ꠀꠞ ꠟꠦꠈꠘ ꠚꠖ꠆ꠖꠔꠤ ꠞꠁꠍꠦ ⁕
ꠅꠃ ꠙꠄꠘ꠆ꠐ ꠔꠘꠦ, ꠝꠥꠁ ꠅꠈꠣꠘ ꠛꠤꠡ꠆ꠡꠣꠡ ꠈꠞꠍꠤꠟꠣꠝ ꠝꠞ ꠝꠣꠁꠅꠞꠝꠣꠔ ꠍꠤꠟꠐꠤ ꠅꠁꠟꠧ ꠉꠤꠀ ꠛꠣꠋꠟꠣꠞ ꠄꠈꠣꠘ ꠅꠘꠣꠘꠥꠡꠐꠣꠘꠤꠇ ꠝꠣꠔ ⁕ ꠔꠄ, ꠏꠦꠁꠔ ꠝꠥꠁ ꠀꠞꠧ ꠛꠦꠡꠤ ꠈꠣꠘꠖꠣꠔꠘꠦ ꠛꠤꠔꠥꠛꠤꠔꠥ ꠈꠞꠤꠀ ꠖꠦꠈꠟꠣꠝ, ꠝꠥꠁ ꠛꠥꠏꠔꠣꠝ ꠚꠣꠞꠟꠣꠝ ꠏꠦ ꠛꠣꠋꠟꠣ ꠀꠞ ꠍꠤꠟꠐꠤꠔ ꠀꠅꠀꠏ ꠀꠞ ꠃꠌ꠆ꠌꠣꠞꠘꠧ ꠅꠒꠤꠟ ꠚꠣꠞꠣꠈ ꠞꠁꠍꠦ, ꠀꠞ ꠁꠇꠣꠘ ꠏꠦꠍꠣ ꠛꠣꠋꠟꠣꠖꠦꠡꠤꠞ ꠟꠣꠉꠤ ꠄꠈ ꠝꠣꠔ ꠔꠘꠦ ꠀꠞꠈꠣꠘꠞꠦ ꠍꠤꠘꠣ ꠄꠈꠛꠣꠞꠦ ꠡꠥꠏꠣ ⁕
ꠛ꠆ꠞꠤꠐꠦꠘꠞ ꠛꠦꠡꠤꠞꠜꠣꠉ ꠛꠤꠖꠦꠡꠤ ꠛꠣꠋꠟꠣꠖꠦꠡꠤꠘ ꠍꠤꠟꠐꠤ ꠅꠁꠔꠤꠎ꠆ꠎꠖꠣꠞꠤ, ꠇꠤꠘ꠆ꠔꠥꠇ ꠀꠁꠏ ꠅꠛ꠆ꠖꠤ ꠝꠣꠁꠘ꠆ꠘꠔꠣ ꠝꠤꠟ꠆ꠟꠘꠣ ꠏꠦ ꠍꠤꠟꠐꠤ ꠈꠥꠖ ꠘꠤꠎꠦꠃ ꠄꠈꠣꠘ ꠀꠉꠟꠣ ꠝꠣꠔ, ꠈꠣꠞꠘ ꠅꠟꠣꠘ ꠃ ꠘꠥ ꠢꠤꠇꠣꠘꠤ ꠅꠁꠍꠦ ⁕ ꠁꠇꠣꠘꠞ ꠛꠣꠇ꠆ꠇꠣ ꠛꠖ ꠀꠍꠧꠞ ꠖꠦꠈꠣ ꠏꠣꠄ ⁕ ꠏꠦꠟꠣꠘ, ꠛ꠆ꠞꠤꠐꠦꠘꠞ ꠛꠣꠋꠟꠣꠖꠦꠡꠤꠘ꠆ꠔꠞ ꠟꠣꠉꠤ ꠁꠖꠣꠘꠤꠋꠈꠣꠟꠧ ꠄꠘꠄꠁꠌꠄꠍ ꠇꠜꠤꠒ ꠢꠥꠡꠤꠀꠞꠤꠘꠣꠝꠣ ꠢꠤꠞꠛꠣꠞ ꠍꠤꠟꠐꠤ ꠎꠛꠣꠘꠦ ꠔꠞꠎꠝꠣ ꠈꠞꠣ ꠟꠣꠉꠍꠤꠟ, ꠈꠦꠘꠦꠘꠣ ꠍꠤꠟꠐꠤ ꠅꠈꠟꠦ “ꠚꠞꠝꠣꠟ” ꠛꠣꠋꠟꠣ ꠈꠝ ꠃ ꠛꠥꠏꠁꠘ ⁕ ꠄꠝꠘꠇꠤ ꠐꠣꠅꠀꠞ ꠢꠦꠝꠟꠦꠐ꠆ꠍꠞ ꠝꠔꠘ ꠏꠦꠉꠣꠁꠘꠔꠧ, ꠏꠦꠔꠣꠔ ꠛ꠆ꠞꠤꠐꠦꠘꠞ ꠝꠣꠏꠦ ꠡꠛꠍꠦ ꠛꠦꠡꠤ ꠍꠤꠟꠐꠤꠘ꠆ꠔꠞ ꠛꠡꠛꠣꠡ ꠞꠁꠍꠦ, ꠁꠔꠣꠔ ꠏꠥꠉꠣꠏꠥꠉꠞ ꠡꠝꠂꠡ꠆ꠡꠣ ꠅꠁꠏꠣꠄ ⁕ ꠏꠦꠛꠟꠣ ꠖꠥꠜꠣꠡꠤ ꠍꠣꠞꠜꠤꠍꠞ ꠖꠞꠈꠣꠞ ꠟꠣꠉꠦ, ꠛꠣꠋꠟꠣꠞꠦ ꠢꠤꠛꠣꠟꠣ ꠏꠥꠁꠔꠝꠔꠘ ꠝꠣꠔ ꠉꠍꠤꠀ ꠛꠤꠇꠟ꠆ꠚ ꠢꠤꠡꠣꠛꠦ ꠗꠞꠣ ꠅꠄ ⁕ ꠏꠣꠁꠅꠇ, ꠏꠥꠖꠤꠘ ꠖꠥꠜꠣꠡꠤꠄ “ꠚꠞ꠆ꠝꠣꠟ” ꠛꠣꠋꠟꠣꠄ ꠝꠣꠔꠔꠣ ꠕꠣꠈꠂꠘ, ꠔꠦ ꠍꠤꠟꠐꠤ ꠛꠦꠈꠔꠤꠄ ꠛꠥꠏꠣꠞ ꠟꠣꠈ ꠘꠣ ꠅ ꠅꠁꠔꠣ ꠚꠣꠞꠂꠘ ꠏꠥꠖꠤꠘ ꠔꠣꠁꠘ ꠄꠞꠣꠉꠦ ꠁ ꠝꠣꠔꠈꠕꠣꠞ ꠗꠣꠞꠧꠈꠣꠍꠧ ꠘꠣ ꠉꠤꠀ ꠕꠣꠈꠂꠘ ⁕ ꠅꠃꠔꠣꠞꠖꠣꠄ, ꠖꠄꠈꠣꠘ ꠝꠣꠔꠞꠦ ꠏꠥꠁꠔꠝꠔꠘ ꠚꠞꠤꠍꠄ ꠀꠞ ꠝꠣꠁꠘ꠆ꠘꠔꠣꠞ ꠟꠣꠉꠤ ꠁꠍꠚꠡ꠆ꠐ ꠈꠞꠣ ꠏꠠꠥꠞꠤ ⁕
ꠄꠞ ꠟꠣꠉꠤ, ꠌꠦꠟꠦꠘ꠆ꠎ ꠘꠣ ꠕꠣꠈꠧꠇ, ꠝꠞ ꠖꠣꠄ ꠁꠇꠣꠘ ꠛꠃꠔ ꠛꠠ ꠛꠦꠚꠣꠞ ꠏꠦ ꠍꠤꠟꠐꠤ ꠄꠈꠣꠘ ꠘꠤꠎꠡ꠆ꠡ ꠝꠣꠔ ꠝꠥꠁ ꠁ ꠈꠕꠣ ꠏꠣꠠꠤ ꠞꠣꠈꠝꠥ ⁕ ꠝꠞ ꠛꠣꠁꠌ꠆ꠌꠣꠘ꠆ꠔꠞ ꠟꠣꠉꠤꠘꠧ ꠁꠇꠣꠘ ꠉꠥꠞꠥꠔ꠆ꠔꠚꠥꠞ꠆ꠘ, ꠄꠝꠘꠇꠤ ꠍꠤꠟꠐꠤ ꠝꠣꠔꠣ ꠡꠛ ꠝꠣꠘꠥꠡꠝꠦꠟꠧꠞ ꠐꠣꠁꠘꠧ ⁕ ꠅꠁꠔꠧ ꠚꠣꠞꠦ ꠝꠞ ꠛꠣꠁꠌ꠆ꠌꠣꠘ꠆ꠔꠞ ꠡꠝꠄ ꠅ ꠔꠣꠞꠣ ꠈꠁꠔ ꠚꠣꠞꠛꠧ, ꠀꠝꠞꠣꠞ ꠝꠣꠔ ꠅꠚꠤꠡꠤꠀꠟꠤ ꠝꠎꠥꠖ ꠀꠍꠦ ⁕ ꠍꠤꠟꠐꠤ ꠝꠣꠔ ꠇꠥꠟ꠆ꠟꠦꠉꠣꠄ ꠚꠍꠣꠞ ꠈꠞꠤꠀ ꠛꠤꠜꠦꠖ ꠔꠣꠁꠀꠞ ꠈꠞꠣ ꠝꠞ ꠝꠔꠟꠛ ꠘꠣꠄ, ꠃꠚꠔꠦ ꠀꠝꠞꠣꠞ ꠛꠦꠡꠈꠝ ꠀꠞ ꠝꠤꠟ ꠛꠣꠄ ꠡ꠆ꠞꠖ꠆ꠖꠣ ꠀꠞ ꠝꠣꠘꠤꠀꠟꠀꠞꠦ ꠃꠔꠡꠣꠢꠤꠔ ꠈꠞꠣ, ꠀꠘꠖꠥ ꠗꠣꠞꠘꠣ, ꠇꠥꠡꠋꠍ꠆ꠇꠣꠞ ꠀꠞ ꠛꠠꠔ꠆ꠔ ꠅ ꠢꠤꠘꠝꠂꠘ꠆ꠘꠔꠣ ꠢꠠꠣꠘꠤꠞ ꠟꠉꠦꠟꠉꠦ ꠛꠃꠔꠎꠣꠔꠤ ꠝꠣꠔ꠆ꠞꠣꠁꠘ꠆ꠔꠞ ꠅꠁꠔꠤꠎ꠆ꠎꠞꠦ ꠐꠤꠇꠣꠁꠀ ꠞꠣꠈꠣ ꠏꠦꠠꠣꠞ ꠎꠠ ꠅꠘꠇꠦꠞ-ꠉꠠꠣ ꠎꠣꠔꠤꠘ꠆ꠔꠞ ꠁꠔꠤꠀꠡ ꠔꠘꠦ ꠛꠃꠔ ꠀꠉꠦꠖꠤ ꠉꠣꠠꠣ ⁕
