শুরমা ফারর খবর ছিলটি জবানে ছিলটর খবর
Related Articles
ꠝꠣꠍꠐꠣꠞꠙꠤꠍ ꠛꠣꠋꠟꠣꠖꠦꠡ ꠀꠞ ꠁꠃꠄꠘꠒꠤꠙꠤ’ꠞ ꠃꠖꠖꠥꠉꠦ ꠡꠣꠝꠣꠎꠤꠇ ꠡꠝ꠆ꠙ꠆ꠞꠤꠔꠤ ꠚꠔꠤꠡ꠆ꠑꠣꠄ ꠍꠤꠟꠐꠤ ꠘꠣꠉꠞꠤ ꠟꠤꠙꠤ, ꠝꠘꠤꠚꠥꠞꠤ ꠀꠞ ꠈꠣꠡꠤ ꠜꠣꠡꠣꠞ ꠡꠍꠦꠔꠘꠔꠣ ꠛꠤꠡꠄ ৫ ꠝꠣꠡ ꠝꠤꠀꠖꠤ ꠚꠇꠟ꠆ꠚꠞ ꠀꠘꠥꠡ꠆ꠑꠣꠘꠤꠇ ꠎꠣꠔ꠆ꠞꠣ ꠡꠥꠞꠥ ꠅꠁꠍꠤꠟ ꠉꠦꠍꠦ ꠎꠥꠘ ꠝꠣꠡꠞ ꠝꠣꠏꠣꠝꠣꠏꠤ ꠡꠝꠄ⁕ ꠎꠦ ꠉꠔꠤꠇꠦ ꠍꠤꠟꠐ ꠛꠤꠜꠣꠉꠞ ꠛꠤꠜꠤꠘ꠆ꠘ ꠎꠦꠟꠣꠞ ১২০ ꠎꠘ ꠚꠞꠞꠣꠞꠦ ꠍꠤꠟꠐꠤ ꠜꠣꠡꠣꠞ ꠅꠇ꠆ꠇꠞ ꠘꠣꠉꠞꠤ ꠢꠞꠚ, ꠖꠥꠁꠐꠣ ꠔꠥꠞꠣ ꠘ꠆ꠞꠤ-ꠉꠥꠡ꠆ꠑꠤꠞ ꠜꠣꠡꠣ ꠈꠣꠡꠤ ꠅ ꠝꠘꠤꠚꠥꠞꠤ ꠜꠣꠡꠣꠞ ꠍꠞꠍꠣ ꠚꠠꠣꠘꠤ ꠢꠦꠡꠦ ꠔꠣꠞꠣꠦꠞ ꠎꠣꠍꠣꠁ ꠈꠞꠣ ꠡꠥꠞꠥ ꠅꠁꠍꠦ⁕
ꠁ ꠎꠣꠍꠣꠁ ꠛꠣꠍꠣꠁ ꠗꠣꠙꠦ ꠗꠣꠙꠦ ꠍꠟꠛꠧ⁕ ꠉꠦꠍꠦꠈꠣꠁꠟ ২০ ꠅꠇ꠆ꠐꠥꠛꠞ ꠛꠥꠗꠛꠣꠞ ꠛꠤꠀꠘꠤꠛꠣꠎꠣꠞ ꠃꠚꠎꠦꠟꠣꠞ ꠛꠤꠜꠤꠘ꠆ꠘ ꠁꠍꠇꠥꠟꠞ ৪০ ꠎꠘ ꠚꠞꠞꠣ ꠅꠈꠟꠞꠦ ꠟꠁꠀ ꠚꠃꠞꠡꠜꠣꠞ ꠉꠃꠞꠤꠘꠣꠕ ꠡ.ꠙ꠆ꠞꠣ.ꠛꠤ-ꠅ ꠘꠣꠉꠞꠤ ꠢꠞꠚꠞ ꠟꠦꠈꠣ ꠅ ꠝꠃꠈꠤꠇ ꠚꠥꠕꠤ ꠚꠠꠣ ꠝꠥꠟ꠆ꠟꠣꠄꠅꠘ ꠀꠃꠎꠘ ꠈꠞꠣ ꠅꠄ⁕
ꠝꠥꠟ꠆ꠟꠣꠄꠅꠘ ꠛꠣꠖꠦ ꠢꠈꠟ ꠚꠞꠞꠣ ꠅꠈꠟꠞꠦ ꠚꠥꠞꠥꠡ꠆ꠇꠣꠞ ꠀꠞ ꠍꠣꠞ꠆ꠐꠤꠚꠤꠇꠦꠐ ꠖꠦꠅꠀ ꠅꠄ⁕ ꠁꠛꠣꠟꠣ ꠚꠗꠣꠘ ꠅꠔꠤꠕꠤ ꠢꠤꠡꠣꠛꠦ ꠚꠞꠞꠣ ꠅꠈꠟꠞ ꠀꠔꠧ ꠚꠥꠞꠥꠡ꠆ꠇꠣꠞ ꠀꠞ ꠍꠣꠞ꠆ꠐꠤꠚꠤꠇꠦꠐ ꠔꠥꠟꠤꠀ ꠖꠦꠁꠘ ꠛꠤꠀꠘꠤꠛꠣꠎꠣꠞ ꠙꠃꠞꠡꠜꠣꠞ ꠝꠦꠅꠞ ꠝꠥ: ꠀꠛ꠆ꠖꠥꠍ ꠡꠥꠇꠥꠞ⁕
ꠝꠥꠟꠔ ꠍꠤꠟꠐꠞ ꠅꠁꠔꠤꠎꠎ ꠀꠞ ꠡꠋꠁꠍꠇ꠆ꠞꠤꠔꠤ ꠗꠞꠤ ꠞꠣꠈꠣꠞ ꠟꠣꠉꠤ ꠍꠤꠟꠐꠤ ꠜꠣꠡꠣꠞ ꠢꠞꠚ ꠘꠣꠉꠞꠤ ꠟꠤꠚꠤꠞꠦ ꠅꠘꠇꠥꠞ ꠎꠛꠣꠘꠣꠞ ꠢꠥꠞꠥꠔꠣꠁꠘ꠆ꠔꠞ ꠉꠦꠍꠦ ꠚꠃꠍꠣꠁꠀ ꠖꠦꠅꠀ ꠀꠞ ꠄꠞ ꠍꠞ꠆ꠌꠣ ꠗꠞꠤ ꠞꠣꠈꠣꠞ ꠟꠣꠉꠤ ꠝꠣꠍ꠆ꠐꠣꠞꠙꠤꠍ ꠛꠣꠋꠟꠣꠖꠦꠡ ꠁ ꠃꠖ꠆ꠖꠥꠉ ꠘꠦꠄ ꠀꠞ ꠁꠃꠄꠘꠒꠤꠙꠤ (ꠎꠣꠔꠤꠡꠋꠊ ꠃꠘ꠆ꠘꠅꠘ ꠇꠞ꠆ꠝꠡꠥꠌꠤ) ꠔꠣꠞꠣꠞ ꠟꠉꠦ ꠄꠈ ꠅꠁꠀ ꠀꠞꠣꠈꠣꠟꠤ ꠅꠁꠉꠤꠔꠦ ꠕꠣꠈꠣ ꠁ ꠟꠤꠚꠤꠞꠦ ꠎꠤꠀꠁꠀ ꠞꠣꠈꠣꠞ ꠖꠣꠄ ꠄꠈꠟꠉꠦ ꠈꠣꠝ ꠈꠞꠣꠞ ꠖꠣꠄ ꠡꠝ꠆ꠝꠔꠤ ꠎꠣꠘꠣꠄ⁕ ꠟꠣꠄꠟꠣꠄ ꠁ ꠇꠞ꠆ꠝꠡꠥꠌꠤꠞ ꠝꠥꠟ꠆ꠟꠣꠄꠅꠘ ꠈꠞꠣ ꠅꠁꠛꠧ ꠀꠞ ꠚꠥꠞꠥꠡ꠆ꠇꠣꠞ ꠅ ꠍꠣꠞ꠆ꠐꠤꠚꠤꠇꠦꠐ ꠖꠦꠅꠀ ꠅꠁꠛꠧ⁕
ꠝꠣꠍꠐꠣꠞꠙꠤꠍ ꠛꠣꠋꠟꠣꠖꠦꠡꠞ ꠇ-ꠅꠞ꠆ꠒꠤꠘꠦꠐꠞ ꠎꠣꠝꠤꠟ ꠢꠥꠍꠦꠘ’ꠞ ꠚꠞꠤꠍꠣꠟꠘꠣꠄ ꠁ ꠙ꠆ꠞꠇꠟ꠆ꠙꠐꠣ ꠛꠣꠍ꠆ꠔꠛꠣꠄꠔ ꠅꠁꠍꠦ⁕
ꠄꠍꠣꠠꠣꠅ ꠃꠚꠍ꠆ꠔꠤꠔ ꠀꠍꠟꠣ ꠝꠣꠍꠐꠣꠞꠙꠤꠍ ꠛꠣꠋꠟꠣꠖꠦꠡꠞ ꠃꠙꠖꠦꠡ꠆ꠐꠣꠝꠘ꠆ꠒꠟꠤꠞ ꠡꠖꠡ꠆ꠡ ꠢꠣꠍꠣꠘ ꠡꠣꠢꠞꠤꠀꠞ, ꠙꠣꠔꠘ-২ ꠡ.ꠙ꠆ꠞꠣ.ꠛꠤ’ꠞ ꠢꠦꠒꠍꠣꠞ ꠟꠥꠔ꠆ꠚꠥꠟ ꠢꠇ ꠌꠃꠗꠥꠞꠤ, ꠇꠡꠛꠣ ꠛꠣꠟꠤꠇꠣ ꠃꠌ꠆ꠌ ꠛꠤꠖ꠆ꠖꠣꠟꠄꠞ ꠡꠢ: ꠡꠤꠇ꠆ꠇꠇ ꠝꠥꠢꠣꠝ꠆ꠝꠖ ꠡꠣꠢꠤꠖꠥꠞ ꠞꠢꠝꠣꠘ,ꠡꠢ: ꠡꠤꠇ꠆ꠇꠇ ꠟꠣꠁꠟꠤ ꠛꠦꠉꠝ,ꠇꠡꠛꠣ ꠡ.ꠙ꠆ꠞꠣ.ꠛꠤ’ꠞ ꠡꠢ: ꠡꠤꠇ꠆ꠇꠇ ꠟꠤꠙꠤꠀ ꠁꠀꠍꠝꠤꠘ, ꠖꠥꠛꠣꠉ ꠡ.ꠙ꠆ꠞꠣ.ꠛꠤ ꠡꠢ: ꠡꠤꠇ꠆ꠇꠇ ꠙꠣꠘ꠆ꠘꠣ ꠛꠦꠉꠝ,ꠇꠐꠥꠈꠣꠟꠤꠞꠙꠣꠠ ꠡ.ꠙ꠆ꠞꠣ.ꠛꠤ’ꠞ ꠡꠢ: ꠡꠤꠇ꠆ꠇꠇ ꠞꠥꠎꠤ ꠛꠦꠉꠝ, ꠡꠣꠢꠎꠣꠟꠣꠟ ꠡ.ꠙ꠆ꠞꠣ.ꠛꠤ’ꠞ ꠡꠢ: ꠡꠤꠇ꠆ꠇꠇ ꠝꠥ: ꠀꠟꠤ ꠢꠥꠡꠦꠘ⁕ ꠝꠣꠍꠐꠣꠞꠙꠤꠍ ꠛꠣꠋꠟꠣꠖꠦꠡꠞ ꠡꠤꠘꠤꠅꠞ ꠡꠖꠂꠡ꠆ꠡ ꠀꠛ꠆ꠖꠥꠟ ꠀꠝꠤꠘ, ꠁꠝꠣꠝ ꠢꠣꠍꠘꠣꠔ ꠡꠣꠎꠥ, ꠘꠥꠞꠥꠟ ꠁꠍꠟꠣꠝ ꠡꠥꠝꠘ, ꠄꠢꠍꠣꠘ ꠇꠞꠤꠝ ꠈꠥꠇꠘ, ꠡꠣꠢꠦꠖ ꠀꠢꠝꠖ, ꠛꠖꠞꠥꠟ ꠁꠍꠟꠣꠝ⁕ ꠀꠞ ꠛꠤꠜꠤꠘ꠆ꠘ ꠄꠟꠣꠇꠣ ꠔꠘꠦ ꠚꠞꠞꠣ ꠅꠈꠟꠞ ꠉꠣꠞꠎꠦꠘ ꠔ ꠀꠍꠟꠣ ꠅ⁕
