শুরমা ফারর খবর ছিলটি জবানে ছিলটর খবর
Related Articles
ꠇꠦꠔꠣꠛ ꠢꠣꠟꠔꠥꠘ꠆ꠘꠛꠤ
ꠝꠥꠘ꠆ꠡꠤ ꠡꠣꠖꠦꠇ ꠀꠟꠤ
ꠝꠦꠢꠦꠞꠣꠎꠦꠞ ꠈꠛꠞꠦꠞ ꠛꠄꠀꠘ *
ꠔꠣꠎꠥꠖꠦꠞ ꠘꠝꠣꠎ ꠙꠠꠤꠟꠣ ꠙꠦꠉꠣꠝ꠆ꠛꠞ ॥
ꠛꠤꠟꠣꠟꠦ ꠀꠎꠣꠘ ꠖꠤꠟꠣ ꠢꠁꠟ ꠚꠎꠞ *
ꠘꠝꠣꠎ ꠙꠠꠤꠀ ꠡꠛꠦ ꠘꠛꠤꠎꠤꠞꠦ ꠌꠣꠄ ॥
ꠀꠌꠣꠘꠇ ꠘꠥꠞꠦꠞ ꠞꠥꠡꠘ ꠖꠦꠈꠣ ꠎꠣꠄ *
ꠛꠡꠤꠀ ꠡꠇꠟ ꠇꠕꠣ ꠇꠢꠦ ꠙꠦꠉꠣꠝ꠆ꠛꠞ ॥
ꠀꠎꠤ ꠝꠥꠁ ꠉꠤꠀꠍꠤꠟꠥ ꠀꠞꠡꠦꠞ ꠃꠙꠞ *
ꠛꠠ ꠛꠠ ꠘꠍꠤꠢꠔ ꠇꠞꠤꠍꠦ ꠀꠟ꠆ꠟꠣꠄ ॥
ꠔꠤꠡ ꠢꠣꠎꠣꠞ ꠇꠕꠣ ꠡꠛꠦ ꠁꠝꠣꠘ ꠀꠘ ꠔꠣꠄ *
ꠙꠣꠌ ꠅꠇ꠆ꠔ ꠘꠝꠣꠎ ꠀꠞ ꠞꠥꠎꠣ ꠔꠤꠡ ꠖꠤꠘ ॥
ꠢꠥꠇꠥꠝ ꠢꠁꠍꠦ ꠇꠞꠤꠔꠣꠄ ꠡꠇꠟ ꠝꠥꠝꠤꠘ *
ꠅꠎꠥ ꠉꠥꠍꠟ ꠢꠣꠄꠎ ꠘꠦꠚꠣꠍ ꠎꠘꠣꠛꠔ ॥
ꠈꠣꠘꠣ ꠙꠤꠘꠣ ꠀꠘꠣ ꠎꠣꠘꠣ ꠇꠞꠤꠔꠣ ꠇꠤꠝꠔ *
ꠎꠔ ꠙꠣꠞ ꠄꠛꠣꠖꠔ ꠅꠔꠢꠤ ꠛꠦꠙꠣꠞ ॥
ꠘꠚꠟ ꠘꠝꠣꠎ ꠞꠥꠎꠣ ꠎꠔ ꠙꠣꠞ ꠀꠞ *
ꠇꠞꠤꠟꠦ ꠍꠅꠀꠛ ꠀꠍꠦ ꠘꠣ ꠇꠞꠤꠟꠦ ꠘꠣꠁ ॥ ꠚꠞꠎꠦꠞ ꠍꠅꠀꠛ ꠢꠁꠛ ꠎꠦ ꠇꠞꠤꠛ ꠜꠣꠁ *
ꠀꠞ ꠄꠇ ꠇꠕꠣ ꠀꠟ꠆ꠟꠣ ꠇꠞꠤꠍꠦ ꠇꠞꠣꠞ ॥
ꠃꠝ꠆ꠝꠔꠦꠞ ꠛꠦꠢꠦꠡ꠆ꠔ ꠢꠁꠛ ꠡꠥꠛꠣ ꠘꠣꠁ ꠔꠣꠞ *
ꠀꠉꠦ ꠇꠞꠦ ꠡꠛ ꠇꠕꠣ ꠇꠢꠤꠟꠣ ꠞꠍꠥꠟ ॥
ꠀꠛꠥꠛꠇ꠆ꠇꠞ ꠛꠥꠟꠦ ꠝꠞ ꠡꠇꠟ ꠇꠛꠥꠟ *
ꠡꠇ ꠡꠥꠛꠣ ꠇꠤꠍꠥ ꠘꠣꠁ ꠢꠥꠎꠥꠞꠤ ꠇꠣꠟꠣꠝ ॥
ꠔꠦꠇꠣꠞꠘꠦ ꠀꠛꠥꠛꠇ꠆ꠇꠞ ꠍꠤꠖꠖꠤꠇ ꠢꠂꠟ ꠘꠣꠝ *
ꠡꠇꠟꠦ ꠝꠣꠘꠤꠟꠣ ꠇꠕꠣ ꠀꠍꠣꠛꠣ ꠁꠀꠞ ॥
ꠄꠇ ꠄꠞꠣꠛꠤꠄ ꠡꠥꠘꠤ ꠇꠞꠤꠟ ꠄꠘꠇꠣꠞ
ꠄꠇ ꠞꠣꠔꠞꠤ ꠉꠦꠟꠣ ꠔꠥꠝꠤ ꠇꠔ ꠟꠣꠇ ꠢꠣꠎꠣꠞ ॥
ꠀꠟ꠆ꠟꠣꠇꠦ ꠖꠦꠈꠤꠟꠣ ꠔꠥꠝꠤ ꠀꠞꠡ ꠝꠣꠏꠣꠞ *
ꠘꠛ꠆ꠛꠁ ꠢꠣꠎꠣꠞ ꠛꠣꠔ ꠌꠤꠔ ꠇꠞꠤꠟ ꠀꠟ꠆ꠟꠣꠄ ॥
ꠅꠔ ꠝꠤꠍꠣ ꠇꠕꠣ ꠔꠥꠝꠤ ꠇꠤꠟꠣ ꠡꠤꠈꠤꠟꠣꠄ *
ꠝꠥꠞꠤꠖ ꠢꠁꠔꠦ ꠀꠉꠦ ꠀꠡꠣ ꠍꠤꠟ ꠝꠞ ॥
ꠔꠣꠢꠣꠔꠦ ꠎꠣꠘꠤꠟꠥ ꠔꠥꠝꠤ ꠏꠥꠐꠣ ꠙꠦꠉꠣꠝ꠆ꠛꠞ * ꠇꠦꠅꠀꠠꠦꠞ ꠎꠤꠘ꠆ꠎꠤꠞ ꠢꠤꠟꠦ ꠛꠤꠍꠣꠘꠣꠔꠦ ꠃꠝ ॥
ꠔꠥꠝꠣꠞ ꠚꠦꠞꠦꠛ ꠀꠝꠣꠞ ꠢꠁꠟ ꠝꠣꠟꠥꠝ
ꠘꠛꠤ ꠛꠥꠟꠦ ꠍꠣꠌ꠆ꠍꠣ ꠝꠤꠍꠣ ꠀꠟ꠆ꠟꠣ ꠎꠣꠘꠦ ꠔꠣꠞ ॥
ꠘꠣꠖꠣꠘꠦ ꠛꠥꠏꠤꠛꠦ ꠇꠤꠟꠣ ꠇꠥꠖꠞꠔ ꠀꠟ꠆ꠟꠣꠞ *
ꠄꠞꠣꠛꠤꠄ ꠉꠥꠍꠣ ꠇꠞꠤ ꠊꠞꠦ ꠌꠟꠤ ꠎꠣꠄ ॥
ꠖꠦꠈꠘꠣ ꠔꠣꠝꠣꠡꠣ ꠄꠇ ꠖꠦꠈꠣꠁꠟ ꠀꠟ꠆ꠟꠣꠄ *
ꠝꠣꠍ ꠇꠤꠘꠤ ꠖꠤꠟ ꠘꠤꠀ ꠀꠙꠘꠣꠞ ꠊꠞꠦ ॥
ꠔꠣꠉꠣꠖꠣ ꠇꠞꠤꠟ ꠚꠤꠞꠤ ꠈꠣꠘꠣ ꠈꠣꠁꠛꠣꠞꠦ *
ꠎꠘꠘꠣꠄ ꠛꠥꠟꠦ ꠀꠁꠡ ꠉꠥꠍꠟ ꠇꠞꠤꠀ ॥
ꠈꠣꠘꠣ ꠞꠣꠘ꠆ꠖꠤ ꠖꠤꠝꠥ ꠀꠝꠤ ꠄꠁ ꠝꠣꠍ ꠇꠣꠐꠤꠀ *
ꠔꠛꠦ ꠡꠦ ꠄꠞꠣꠛꠤꠄ ꠉꠦꠟ ꠉꠥꠍꠟ ꠇꠞꠤꠔꠦ ॥
ꠎꠘꠘꠣꠄ ꠡꠥꠞꠥ ꠇꠂꠟꠣ ꠝꠣꠍ ꠛꠣꠘꠣꠁꠔꠦ *
ꠇꠣꠙꠠ ꠞꠣꠈꠤꠀ ꠙꠣꠞꠦ ꠟꠦꠋꠉꠣ ꠃꠛꠡ꠆ꠔꠥꠞ ॥
ꠄꠞꠣꠛꠤ ꠙꠣꠘꠤꠔꠦ ꠘꠣꠝꠦ ꠇꠞꠤꠔꠦ ꠉꠥꠍꠟ *
ꠙꠣꠘꠤꠔꠦ ꠘꠣꠝꠤꠀ ꠒꠥꠛ ꠖꠤꠟ ꠔꠣꠞ ꠙꠞꠦ ॥
ꠀꠌꠣꠘꠇ ꠔꠤꠞꠤ ꠢꠁꠟ ꠖꠦꠈꠦ ꠀꠙꠘꠣꠞꠦ *
ꠅꠎꠥꠖꠦ ꠙꠄꠞꠤꠍꠦ ꠖꠦꠈꠦ ꠛꠔ꠆ꠔꠤꠡ ꠅꠟꠋꠇꠣꠞ ॥
ꠙꠥꠞꠥꠡꠦꠞ ꠇꠤꠍꠥ ꠘꠣꠁ ꠘꠣꠞꠤꠞ ꠀꠇꠣꠞ
ꠒꠥꠛ ꠖꠤꠔꠦ ꠔꠤꠞꠤ ꠢꠂꠀ ꠇꠥꠘꠥ ꠖꠦꠡꠦ ꠎꠣꠄ ॥
ꠇꠕꠣ ꠢꠘꠦ ꠇꠕꠣ ꠉꠦꠟ ꠖꠤꠡꠣ ꠘꠣꠢꠤ ꠙꠣꠔ꠆ꠞ *
ꠙꠥꠛꠦ ꠘꠣ ꠙꠡ꠆ꠌꠤꠝꠦ ꠎꠣꠘꠤ ꠇꠥꠘꠥ ꠖꠦꠡꠦ ꠉꠦꠟ ॥
ꠟꠦꠋꠉꠣ ꠄꠇ ꠉꠣꠍꠦꠞ ꠔꠟꠦ ꠛꠡꠤꠀ ꠞꠢꠤꠟ *
ꠀꠞꠦꠇ ꠙꠥꠞꠥꠡ ꠔꠣꠘꠦ ꠡꠥꠘ꠆ꠖꠞ ꠖꠦꠈꠤꠀ ॥
ꠔꠣꠢꠣꠞꠦ ꠇꠞꠤꠟ ꠡꠣꠖꠤ ꠘꠤꠎ ꠊꠞꠦ ꠘꠤꠀ *
ꠄꠞꠣꠛꠤꠄ ꠜꠣꠛꠦ ꠝꠘꠦ ꠇꠤ ꠢꠁꠟ ꠢꠣꠟ ॥
ꠄꠝꠘ ꠔꠣꠎ꠆ꠎꠥꠛ ꠘꠣ ꠖꠦꠈꠤꠍꠤ ꠇꠥꠘꠥ ꠇꠣꠟ *
ꠙꠥꠞꠥꠡ ꠢꠁꠔꠦ ꠔꠤꠞꠤ ꠇꠜꠥ ꠡꠥꠘꠤ ꠘꠣꠁ ॥
ꠇꠔ ꠖꠥꠞ ꠇꠤꠟꠣ ꠀꠁꠟꠥ ꠛꠥꠎ ꠘꠣꠁ ꠙꠣꠁ *
ꠄꠁ ꠝꠔꠦ ꠡꠣꠔ ꠛꠍꠞ ꠉꠦꠟ ꠔꠣꠞ ꠙꠞ ॥
ꠡꠣꠔ ꠎꠘ ꠚꠞꠎꠘ꠆ꠖ ꠢꠁꠟꠣ ꠔꠣꠞ ꠊꠞ *
ꠀꠞ ꠖꠤꠘ ꠡꠦ ꠖꠦꠡꠦꠞ ꠘꠣꠞꠤꠉꠘ ꠡꠣꠕꠦ ॥ *
ꠊꠣꠐꠦ ꠉꠤꠀ ꠒꠥꠛ ꠖꠤꠟꠣ ꠉꠥꠍꠟ ꠇꠞꠤꠔꠦ *
ꠃꠑꠤ ꠖꠦꠈꠦ ꠘꠤꠎ ꠖꠦꠡ ꠊꠣꠐ ꠀꠙꠘꠣꠞ ॥
ꠇꠣꠙꠠ ꠞꠢꠤꠍꠦ ꠔꠣꠞ ꠙꠣꠘꠤꠞ ꠇꠤꠘꠣꠞ *
ꠀꠙꠘꠣꠞꠦ ꠖꠦꠈꠦ ꠚꠤꠞꠤ ꠙꠥꠞꠥꠡꠦꠞ ꠝꠔꠦ ॥
ꠛꠠꠢꠤ ꠔꠣꠎꠎꠥꠛ ꠢꠁꠟ ꠄꠡꠛ ꠖꠦꠈꠤꠔꠦ *
ꠊꠞꠦ ꠉꠤꠀ ꠎꠘꠘꠣꠞꠦ ꠟꠣꠚ ꠇꠣꠚ ꠇꠄ ॥
ꠡꠣꠔ ꠛꠞꠍ ꠄꠛ ꠛꠥꠏꠤ ꠞꠣꠘ꠆ꠖꠣ ꠘꠣꠢꠤ ꠢꠄ *
ꠎꠘꠘꠣꠄ ꠛꠥꠟꠦ ꠔꠥꠝꠤ ꠄꠛ ꠉꠦꠟꠣ ꠀꠁꠟꠣ ॥
ꠅꠔ ꠝꠤꠍꠣ ꠇꠕꠣ ꠔꠥꠝꠤ ꠇꠤꠟꠣ ꠡꠤꠇꠤꠟꠣ *
ꠢꠣꠔꠦꠞ ꠝꠣꠍ ꠢꠣꠔꠦ ꠀꠍꠦ ꠊꠠꠤ ꠄꠇ ꠎꠣꠄ ॥
ꠡꠣꠔ ꠛꠞꠍ ꠉꠦꠟ ꠔꠥꠝꠤ ꠇꠤꠟꠣ ꠇꠢꠤꠟꠣꠄ *
ꠀꠞꠤ ꠙꠞꠤ ꠡꠛ ꠒꠣꠇꠤ ꠇꠢꠦ ꠡꠝꠣꠌꠣꠞ ॥
ꠘꠛꠤꠎꠤꠞ ꠇꠕꠣ ꠝꠥꠁ ꠇꠞꠤꠟꠥ ꠄꠘꠇꠣꠞ *
ꠡꠦꠁ ꠝꠔꠦ ꠡꠣꠔ ꠛꠞꠍ ꠉꠥꠎꠞꠦ ꠀꠝꠣꠞ ॥
ꠘꠛꠤꠎꠤꠞ ꠉꠦꠟ ꠎꠣꠘꠤ ꠇꠔ ꠟꠣꠇ ꠢꠣꠎꠣꠞ *
ꠝꠦꠢꠦꠞꠣꠎ ꠘꠣ ꠝꠣꠘꠤꠀ ꠑꠦꠇꠤꠟꠥ ꠎꠦ ꠙꠣꠄ ॥
ꠔꠣꠢꠣꠞ ꠔꠣꠝꠦꠍꠣ ꠝꠞꠦ ꠖꠦꠈꠣꠁꠟꠣ ꠀꠟ꠆ꠟꠣꠄ *
ꠖꠦꠡ ꠈꠦꠡ ꠟꠁꠀ ꠌꠟꠦ ꠉꠘ ꠉꠥꠡꠐꠤ ꠀꠞ ॥
ꠘꠛꠤꠞ ꠀꠉꠦ ꠝꠥꠞꠤꠖ ꠢꠁꠀ ꠇꠢꠦ ꠡꠝꠣꠌꠣꠞ *
ꠘꠛꠤꠎꠤ ꠡꠥꠘꠤꠀ ꠇꠞꠦ ꠢꠣꠎꠣꠞ ꠡꠥꠇꠥꠞ ॥
ꠖꠦꠈꠤꠟꠣ ꠔꠣꠎꠎꠥꠛ ꠔꠥꠝꠤ ꠡꠥꠜꠣ ꠢꠁꠟ ꠖꠥꠞ *
ꠔꠣꠎꠎꠥꠛ ꠢꠁꠟꠣ ꠇꠔ ꠟꠥꠇ ꠡꠥꠘꠤꠀ ꠛꠄꠀꠘ ॥
ꠈꠣꠢꠤꠡꠦ ꠇꠟꠤꠝꠣ ꠙꠠꠤ ꠢꠁꠟꠣ ꠝꠍꠟꠝꠣꠘ *
ꠀꠍꠝꠣꠘꠤ ꠇꠕꠣ ꠡꠥꠘꠤ ꠘꠞꠝ ꠢꠁꠟ ꠖꠤꠟ ॥ ꠝꠦꠢꠦꠞꠣꠎꠦꠞ ꠎꠔ ꠇꠕꠣ ꠇꠣꠝꠣꠟ ꠖꠟꠤꠟ *
ꠀꠟ꠆ꠟꠣꠞ ꠢꠥꠎꠥꠞꠤ ꠛꠠ ꠇꠕꠣ ꠑꠤꠇ ꠛꠣꠔ ॥
ꠞꠍꠥꠟꠦꠞ ꠎꠛꠣꠘꠤ ꠡꠥꠘꠤ ꠁꠝꠣꠘ ꠀꠘ ꠔꠣꠔ * ꠀꠛꠥꠎꠦꠢꠦꠟ ꠡꠥꠘꠤ ꠢꠣꠡꠦ ꠇꠢꠦ ꠟꠣꠘꠔꠣꠘ ॥
ꠎꠤꠔꠣ ꠝꠤꠍꠣ ꠇꠕꠣꠄ ꠟꠥꠇꠦ ꠀꠘꠤꠟꠣ ꠁꠝꠣꠘ *
ꠘꠣꠖꠣꠘ ꠀꠝ꠆ꠝꠇ ꠟꠥꠇ ꠘꠤꠢꠣꠔ ꠉꠅꠀꠞ ॥
ꠝꠢꠣꠝ꠆ꠝꠖꠦ ꠎꠔ ꠇꠁ ꠙꠍꠘ꠆ꠖ ꠔꠣꠞꠣꠞ *
ꠘꠣ ꠎꠣꠘꠤ ꠇꠤ ꠎꠣꠖꠥ ꠎꠣꠘꠦ ꠡꠤꠈꠤꠟ ꠇꠥꠕꠣꠄ ॥
ꠝꠥꠟꠥꠇ ꠈꠞꠣꠛ ꠇꠁꠟ ꠘꠣ ꠖꠦꠈꠤ ꠃꠙꠣꠄ *
