শুরমা ফারর খবর ছিলটি জবানে ছিলটর খবর
Related Articles
ꠅꠚꠣꠞ ꠍꠤꠟꠐ, ꠢꠚꠣꠞ ꠍꠤꠟꠐ
ꠁꠔꠤꠀꠡꠛꠤꠖ ꠒ. ꠝꠥꠝꠤꠘꠥꠟ ꠢꠇ
ꠀꠝꠞꠣ ꠍꠤꠟꠐꠤ ꠈꠦꠃ ꠃ ꠅꠚꠣꠞ ꠍꠤꠟꠐ ꠢꠚꠣꠞ ꠍꠤꠟꠐ ꠈꠁ ꠘꠣ⁕ ꠀꠝꠞꠣꠞ ꠍꠤꠟꠐꠤꠘ꠆ꠔꠞ ꠝꠣꠏꠦ ꠝꠣꠀ ꠖꠄꠀ ꠈꠝ ꠘꠣ ꠇꠤꠔꠣ? ꠎꠖꠤꠅ ꠕꠣꠈꠦ ꠔꠣꠞ ꠛꠣꠖꠦꠅ ꠢꠈꠟꠞꠦ ꠖꠦꠈꠣꠁꠀ ꠈꠦꠃ ꠈꠁꠘ ꠘꠣ⁕
ꠛꠣꠋꠉꠣꠟꠤꠘ꠆ꠔꠦ ꠎꠦꠟꠣ ‘ꠄꠙꠣꠞ ꠛꠣꠋꠟꠣ ꠅꠙꠣꠞ ꠛꠣꠋꠟꠣ’ ꠈꠁꠀ ꠍꠠꠣ, ꠇꠛꠤꠔꠣ, ꠉꠟ꠆ꠙ ꠟꠦꠈꠁꠘ ꠀꠞ ꠡꠝꠝꠦꠟꠘ ꠈꠞꠁꠘ⁕ ꠄꠈ ꠛꠣꠋꠟꠣ ꠕꠣꠇꠤ ꠀꠞꠈ ꠛꠣꠋꠟꠣꠔ ꠀꠅꠀ ꠎꠣꠅꠀꠅ ꠈꠞꠁꠘ⁕ ꠀꠝꠞꠣ ꠍꠤꠟꠐꠤꠘ꠆ꠔꠦꠅ ꠅꠟꠣ ꠈꠞꠣ ꠖꠞꠈꠣꠞ⁕ ꠁꠔꠣ ꠚꠄꠟꠣ ꠝꠥꠁ ꠈꠁꠍꠤ ꠀꠞ ꠟꠦꠈꠣ ꠡꠥꠞꠥ ꠈꠞꠍꠤ⁕ ꠀꠡꠣ ꠈꠞꠞꠣꠝ ꠄꠛꠟꠣ ꠢꠈꠟ ꠍꠤꠟꠐꠤꠘ꠆ꠔꠦꠅ ꠈꠁꠛꠣ⁕ ꠍꠤꠟꠐ ꠜꠣꠉ ꠅꠀꠞ ꠚꠞꠦ ꠁꠇꠣꠘ ꠈꠅꠀ ꠖꠞꠈꠣꠞ ꠀꠍꠤꠟ⁕
ꠅꠛꠤꠜꠈ꠆ꠔ ꠛꠣꠋꠟꠣ ꠈꠅꠀ ꠅꠄ ꠟꠦꠈꠣ ꠢꠄ ꠇꠤꠘ꠆ꠔꠥ ꠀꠝꠞꠣ ꠍꠤꠟꠐꠤꠘ꠆ꠔꠦ ꠅꠛꠤꠜꠈ꠆ꠔ ꠍꠤꠟꠐ ꠈꠦꠘꠦ ꠈꠁ ꠘꠣ? ꠅꠛꠤꠜꠈ꠆ꠔ ꠍꠤꠟꠐ ꠈꠅꠀꠞ ꠅ ꠖꠞꠈꠣꠞ ꠀꠍꠦ⁕ ꠅꠔ ꠖꠤꠘ ꠛꠣꠖꠦ ꠅꠁꠟꠦꠅ ꠝꠥꠁ ꠈꠅꠀ ꠡꠥꠞꠥ ꠈꠞꠣꠄ ꠛꠃꠔ ꠜꠣꠟꠣ ꠟꠣꠉꠦꠞ⁕
ꠅꠚꠣꠞ ꠍꠤꠟꠐꠞ ꠄꠈꠎꠘ ꠝꠦꠅꠞ, ꠇꠝꠤꠡꠘꠣꠞ ꠀꠘ꠆ꠘꠣꠁꠟꠦ ꠡꠤꠇ꠆ꠇꠣꠛꠤꠖ, ꠢꠚꠣꠞ ꠍꠤꠟꠐ ꠡꠞꠈꠣꠞꠤꠜꠣꠛꠦ ꠀꠁꠘ ꠎꠣꠁꠘ ꠘꠣ⁕ ꠢꠚꠣꠞ ꠍꠤꠟꠐ ꠔꠘꠦꠅ ꠈꠦꠃ ꠀꠁꠘ ꠎꠣꠁꠘ ꠘꠣ⁕ ꠀꠝꠞꠣꠞ ꠁꠟꠣ ꠀꠅꠀ ꠎꠣꠅꠀꠞ ꠖꠞꠈꠣꠞ ꠀꠍꠦ⁕
ꠍꠤꠟꠐꠞ ꠝꠘꠤꠚꠥꠞꠤ ꠇꠛꠤ ꠡꠣꠢꠤꠔ꠆ꠔꠤꠇ ꠎꠦꠞꠣ ꠀꠍꠁꠘ ꠔꠣꠞꠣ ꠜꠣꠞꠔꠞ ꠝꠘꠤꠚꠥꠞ ꠞꠣꠎ꠆ꠎꠞ ꠝꠥꠇ꠆ꠇ ꠝꠘ꠆ꠔ꠆ꠞꠤ ꠟꠣꠉꠣꠁꠀ ꠢꠈꠟꠞ ꠟꠉꠦ ꠡꠞꠈꠣꠞꠤꠜꠣꠛꠦ ꠎꠥꠉꠣꠎꠥꠉ ꠀꠞ ꠎꠣꠔꠣꠀꠔ ꠀꠍꠦ⁕
ꠑꠤꠇ ꠅꠟꠣ ꠅꠚꠣꠞ ꠍꠤꠟꠐ ꠀꠞ ꠢꠚꠣꠞ ꠍꠤꠟꠐꠞ ꠖꠥꠁ ꠅꠋꠡꠞ ꠝꠣꠁꠘꠡꠞ ꠝꠣꠏꠦ ꠎꠥꠉꠣꠎꠥꠉ ꠀꠞ ꠝꠣꠄꠀ ꠝꠢꠛ꠆ꠛꠔ ꠕꠣꠈꠣ ꠖꠞꠈꠣꠞ⁕
