শুরমা ফারর খবর ছিলটি জবানে ছিলটর খবর
Related Articles
_____________ꠍꠟꠤꠝ ꠀꠢꠝꠖ ꠌꠃꠗꠥꠞꠤ (ꠞꠣꠎꠤꠘꠞ ꠛꠣꠚ)
ꠛꠣꠇ꠆ꠇꠣ ꠈꠄꠖꠤꠘ ꠕꠣꠇꠤ ꠔꠥꠝꠣꠔꠣꠘꠞ ꠟꠉꠦ ꠇꠥꠘꠥ ꠉꠚꠡꠚ ꠛꠣ ꠇꠤꠌ꠆ꠌꠣ ꠇꠣꠢꠤꠘꠤ ꠈꠁꠍꠤꠘꠣ, ꠀꠞ ꠔꠥꠝꠣꠔꠣꠘꠞ ꠟꠉꠦ ꠈꠄꠖꠤꠘ ꠉꠚꠡꠚ ꠘꠣ ꠅꠁꠟꠦ, ꠘꠤꠏꠞ ꠏꠣꠘꠅ ꠇꠤꠔꠣꠞ ꠟꠣꠉꠤ ꠀꠁꠡꠔꠣꠁꠡ ꠈꠞꠦ⁕
ꠖꠤꠘꠦꠖꠤꠘꠦ ꠖꠣꠄꠖꠣꠁꠔ꠆ꠔ ꠛꠣꠠꠦꠞ, ꠟꠉꠦ ꠈꠣꠝꠈꠣꠏꠅ ꠛꠣꠠꠦꠞ, ꠉꠚ ꠔꠧ ꠖꠥꠞꠁꠞ ꠈꠕꠣ ꠡꠣꠘ꠆ꠔꠤꠝꠔ ꠜꠁꠀ ꠝꠥꠔꠤꠛꠣꠞꠃ ꠚꠥꠞꠍꠔ ꠚꠣꠁꠀꠞ ꠘꠣ⁕
ꠏꠣꠃꠇ ꠢꠤꠛꠣꠏꠥ, ꠄꠛꠟꠣ ꠉꠚ ꠅꠁꠟꠧ➖
ꠄꠈꠛꠣꠞ ꠖꠥꠁ ꠛꠘ꠆ꠗꠥ ꠄꠈ ꠟꠉꠦ ꠄꠈꠁ ꠔꠣꠟꠧ ꠖꠥꠁꠅꠏꠘ ꠈꠣꠅꠀꠔ ꠛꠁꠍꠁꠘ⁕ ꠄꠈ ꠛꠘ꠆ꠗꠥꠄ ꠍꠤꠘ꠆ꠔꠣ ꠈꠞꠟꠧ, ➖ꠁ ꠈꠣꠘꠤ ꠖꠥꠁꠏꠘꠦ ꠈꠣꠁꠟꠦ ꠖꠥꠁꠅ ꠏꠘꠞ ꠚꠦꠐ ꠜꠞꠔꠧ ꠘꠣꠄ, ꠔꠣꠁꠟꠦ ꠇꠤꠔꠣ ꠈꠞꠣ?
ꠛꠃꠔ ꠍꠤꠘ꠆ꠔꠣ ꠈꠞꠤꠀ ꠟꠉꠞ ꠛꠘ꠆ꠗꠥꠞꠦ ꠈꠁꠟꠧ, ꠀꠌ꠆ꠌꠣ ꠖꠥꠍꠔꠧ ꠔꠞ ꠛꠣꠚ ꠇꠤꠟꠣꠘ ꠝꠣꠞꠣ ꠉꠦꠟꠣ? ꠇꠤꠘ꠆ꠔꠥ ꠘꠤꠅꠔ ꠅꠁꠟꠧ ꠄꠁꠘ ꠛꠣꠚ ꠝꠞꠣꠞ ꠊꠐꠘꠣ ꠈꠅꠀꠔ ꠟꠣꠉꠛꠣ, ꠀꠞ ꠅ ꠚꠣꠈꠦꠖꠤ ꠘꠤꠏꠦ ꠚꠥꠞꠣ ꠈꠣꠘꠤ ꠈꠣꠁꠟꠤꠛꠧ?!
ꠏꠦꠝꠘ ꠍꠤꠘ꠆ꠔꠣ ꠔꠦꠝꠘ ꠈꠣꠝ⁕ ꠄꠁꠘ ꠈꠣꠘ꠆ꠖꠤ ꠈꠣꠘ꠆ꠖꠤ ꠈꠅꠀ ꠡꠥꠞꠥ ꠈꠞꠟꠣ, ꠇꠤꠟꠣꠘ ꠔꠣꠘꠞ ꠛꠣꠚꠞ ꠔꠣꠚ ꠃꠑꠟꠧ, ꠇꠤꠟꠣꠘ ꠀꠡꠚꠣꠔꠣꠟ ꠟꠁꠀ ꠉꠦꠟꠣ, ꠇꠤꠟꠣꠘ ꠄꠈ ꠀꠡꠚꠣꠔꠣꠟ ꠕꠣꠇꠤ ꠀꠞꠈ ꠀꠡꠚꠣꠔꠣꠟꠅ ꠖꠃꠠꠤꠟꠣ, ꠇꠤꠟꠣꠘ ꠌꠤꠇꠤꠔꠡꠣꠔ ꠛꠦꠞ꠆ꠔ ꠅꠁꠟꠣ ꠁꠔ꠆ꠔꠣꠖꠤ ꠁꠔ꠆ꠔꠣꠖꠤ, ꠀꠞ ꠅꠛꠡꠦꠡꠦ ꠔꠣꠘꠞ ꠛꠣꠚ ꠀꠡꠚꠣꠔꠣꠟꠧ ꠝꠣꠞꠣ ꠉꠦꠟꠣ⁕
ꠀꠞ ꠁꠛꠣꠄꠖꠤ ꠁ ꠛꠘ꠆ꠗꠥꠄ ꠔꠣꠘꠞꠦ ꠉꠚꠅ ꠟꠣꠉꠣꠁꠀ ꠝꠥꠞꠥꠇꠞ ꠝꠔꠧ ꠊꠝꠊꠝꠣꠁꠀ ꠢꠣꠛꠥꠉꠥꠟꠤ ꠈꠣꠘꠤ ꠡꠦꠡ ꠈꠞꠔꠦ ꠘꠣ ꠈꠞꠔꠦ ꠢꠦꠘꠞ ꠍꠃꠇ ꠈꠣꠘꠤꠛꠣꠄ ꠚꠠꠔꠦ ꠖꠦꠈꠁꠘ ꠁꠉꠥꠄ ꠔꠧ ꠉꠠꠦ ꠢꠣꠛꠥꠁ ꠈꠣꠘꠤ ꠈꠣꠁꠟꠌꠦ ꠔꠣꠘꠞꠦ ꠉꠚꠧ ꠟꠣꠉꠣꠁꠀ?!
ꠢꠤꠉꠤꠄ ꠔꠣꠘꠞꠦ ꠉꠚꠧ ꠟꠣꠉꠣꠘꠤꠞ ꠝꠔꠟꠛ ꠄꠁꠘ ꠛꠥꠏꠤ ꠟꠣꠃꠀꠄ ꠔꠣꠟꠞ ꠅꠛꠡꠤꠡ꠆ꠐ ꠈꠣꠘꠤ ꠘꠤꠏꠦ ꠈꠣꠅꠀꠞ ꠟꠣꠉꠤ ꠄꠁꠘ ꠄꠛꠟꠣ ꠚꠘ꠆ꠖꠤ ꠀꠇꠤꠟꠣ ꠀꠞ ꠈꠁꠟꠣ, ꠄꠛꠟꠣ ꠔꠥꠁꠘ ꠈꠧ ꠍꠣꠁꠘ ꠔꠞ ꠛꠣꠚ ꠝꠞꠟꠣ ꠇꠤꠟꠣꠘ?
ꠢꠤꠉꠥꠄ ꠏꠥꠀꠚ ꠖꠤꠟꠧ- ꠔꠣꠞ ꠛꠣꠚ ꠃꠛꠣ ꠕꠣꠇꠤ ꠚꠠꠍꠁꠘ, ꠀꠞ ꠟꠉꠦ ꠟꠉꠦ ꠝꠣꠞꠣ ꠉꠦꠍꠁꠘ⁕ ꠅꠈꠣꠘ ꠈꠁꠀ ꠀꠛꠣꠞ ꠍꠥꠛ ꠍꠣꠟꠣꠁꠍꠦ ꠚꠥꠍꠤꠀ ꠈꠣꠅꠀꠞ ꠟꠣꠉꠤ⁕
ꠄꠁꠘ ꠔꠧ ꠄꠈꠣꠞꠦ ꠢꠣꠇ꠆ꠇꠣ ꠛꠇ꠆ꠇꠣ………
ꠙ꠆ꠞꠡ꠆ꠘ- ꠁ ꠇꠤꠌ꠆ꠌꠣ ꠕꠣꠇꠤ ꠇꠤꠔꠣ ꠢꠤꠇꠟꠣꠄ?
ꠏꠥꠀꠚ- ꠄꠈꠟꠉꠦ ꠈꠣꠘꠤꠔ ꠛꠁꠟꠦ ꠈꠦꠃꠞꠧꠞ ꠝꠣꠔꠦ ꠝꠞꠣꠏꠤꠔꠣꠞ ꠇꠥꠘ ꠉꠚ ꠘꠣ ꠈꠞꠤꠀ ꠈꠣꠅꠀꠞ ꠝꠥꠇꠣ ꠞꠥꠡ ꠖꠤꠔꠦ ꠅꠄ⁕
