শুরমা ফারর খবর ছিলটি জবানে ছিলটর খবর
Related Articles
ꠖꠇ꠆ꠇꠤꠘ ꠡꠥꠞꠝꠣ ꠡꠞꠇꠣꠞꠤ ꠒꠤꠉ꠆ꠞꠤ ꠇꠟꠦꠎ ꠉꠦꠁꠐꠧ ꠍꠥꠞꠤꠖꠤ ꠚꠣꠞꠣꠁꠀ ꠀꠞꠤꠚꠥꠟ ꠁꠍꠟꠣꠝ ꠞꠣꠢꠣꠔ (২০) ꠘꠣꠝꠦ ꠛꠣꠞꠧ ꠇꠦꠟꠣꠍꠧ ꠄꠈ ꠚꠠꠞꠣꠞꠦ ꠍꠣꠔ꠆ꠞꠟꠤꠉ ꠈꠞ꠆ꠝꠤꠄ ꠈꠣꠔꠟ ꠈꠞꠍꠦ⁕
ꠚꠥꠟꠤꠡ ꠀꠞ ꠇꠟꠦꠎ ꠈꠞꠔꠤꠚꠇ꠆ꠇꠦ ꠎꠣꠘꠣꠄ, ꠛꠤꠞꠡꠁꠔꠛꠣꠞ ꠝꠣꠖꠣꠘ ꠖꠦꠠꠐꠣ ꠛꠣꠄ ꠇꠟꠦꠎꠞ ꠝꠥꠟ ꠉꠦꠁꠐ ꠔꠘꠦ ১৫ ꠉꠎ ꠜꠤꠔꠞꠦ ꠞꠣꠍ꠆ꠔꠣꠔ ꠞꠣꠢꠣꠔꠞꠦ ꠄꠈ ꠛꠣ ꠄꠈꠞꠛꠦꠡꠤ ꠚꠥꠀꠁꠘ꠆ꠔꠦ ꠍꠥꠞꠤꠖꠤ ꠉꠣꠃꠀꠁꠀ ꠜꠣꠉꠤꠎꠣꠄ⁕
ꠍꠤꠇ ꠢꠥꠘꠤꠀ ꠝꠣꠘꠡꠦ ꠚꠥꠟꠤꠡꠞ ꠡꠣꠁꠎ꠆ꠎ ꠟꠁꠀ ꠔꠣꠞꠦ ꠅꠍꠝꠣꠘꠤ ꠝꠦꠒꠤꠇꠦꠟ ꠇꠟꠦꠎ ꠀꠡꠚꠣꠔꠣꠟ ꠟꠁꠀ ꠉꠦꠟꠦ ꠢꠤꠘꠞ ꠒꠣꠈꠔꠞꠦ ꠔꠣꠞꠦ ꠝꠞꠣ ꠈꠁꠀ ꠊꠥꠡꠘꠣ ꠖꠦꠁꠘ⁕
ꠇꠟꠦꠎꠞ ꠙ꠆ꠞꠤꠘ꠆ꠍꠤꠙꠣꠟ ꠝꠥꠢꠣꠝ꠆ꠝꠖ ꠡꠣꠝꠍꠥꠟ ꠁꠍꠟꠣꠝꠦ ꠈꠁꠘ, ꠇꠦꠟꠣꠍꠝꠤꠐ ꠅꠈꠟꠞꠦ ꠎꠤꠇꠣꠁꠀ ꠇꠥꠘꠤꠞꠦ ꠛꠣꠈꠞꠣꠞ ꠍꠦꠡ꠆ꠐꠣ ꠔꠖꠛꠤꠞ ꠍꠟꠦꠞ⁕
ꠖꠇ꠆ꠇꠤꠘ ꠡꠥꠞꠝꠣ ꠕꠣꠘꠣꠞ ꠈꠞ꠆ꠝꠈꠞ꠆ꠔꠣꠞꠣꠄ ꠈꠁꠘ, ꠍꠥꠞꠤꠖꠤ ꠞꠣꠢꠣꠔꠞꠦ ꠇꠥꠘ ꠈꠞꠣ ꠅꠁꠍꠦ ꠈꠞꠤ ꠚꠣꠕꠝꠤꠇꠜꠣꠛꠦ ꠗꠣꠞꠘꠣ ꠈꠞꠣ ꠅꠄ⁕ ꠛꠤꠜꠤꠘ꠆ꠘ ꠎꠞꠤꠀꠄ ꠎꠠꠤꠔ ꠅꠈꠟꠞꠦ ꠄꠞꠦꠡꠐꠞ ꠅꠜꠤꠎꠣꠘ ꠍꠣꠟꠣꠞ ꠈꠔꠐꠣ ꠐꠤꠝꠦ⁕
ꠍꠣꠔ꠆ꠞ ꠈꠣꠔꠟꠞ ꠊꠐꠘꠣꠄ ২৬ ꠅꠇ꠆ꠐꠥꠛꠞ ꠚꠞ꠆ꠎꠘ꠆ꠔ ꠚꠠꠣꠟꠦꠈꠣ ꠛꠘ꠆ꠗ ꠊꠥꠡꠘꠣ ꠈꠞꠍꠦ ꠈꠞ꠆ꠔꠤꠚꠇ꠆ꠇꠦ⁕ ꠔꠄ ꠚꠞꠤꠇ꠆ꠇꠣ ꠍꠟꠛꠧ⁕ ꠇꠟꠦꠎꠞ ꠙ꠆ꠞꠤꠘ꠆ꠍꠤꠙꠣꠟ ꠝꠥꠢꠣꠝ꠆ꠝꠖ ꠡꠣꠝꠍꠥꠟ ꠁꠍꠟꠣꠝꠦ ꠎꠣꠘꠣꠁꠘ, ꠊꠐꠘꠣ ꠔꠖꠘ꠆ꠔꠞ ꠖꠣꠄ ৩ ꠡꠖꠂꠡ꠆ꠡ ꠛꠤꠡꠤꠡ꠆ꠐ ꠔꠖꠘ꠆ꠔ ꠇꠝꠤꠐꠤ ꠉꠑꠘ ꠈꠞꠣ ꠅꠁꠍꠦ⁕ ꠇꠝꠤꠐꠤꠄ ꠀꠉꠣꠝꠤ ৩ ꠈꠣꠞ꠆ꠎꠖꠤꠛꠡꠞ ꠝꠣꠏꠦ ꠞꠤꠙꠞ꠆ꠐ ꠖꠤꠛ⁕
