শুরমা ফারর খবর ছিলটি জবানে ছিলটর খবর
Related Articles
ꠍꠤꠟꠦꠐ ꠄꠝꠍꠤ ꠇꠟꠦꠎ ꠈꠣꠟꠤ ꠐꠣꠃꠘꠞ ꠝꠣꠘꠥꠡ ꠘꠣꠄ, ꠛꠣꠞꠣꠈꠣꠘ ꠔꠘꠦꠅ ꠁꠘꠅ ꠝꠣꠘꠥꠡ ꠚꠣꠈꠣꠘꠤꠔ ꠎꠣꠁꠘ⁕ ꠇꠤꠘ꠆ꠔꠥꠇ ১২৮ ꠛꠍꠞꠞ ꠅꠁꠔꠤꠎ꠆ꠎꠞ ꠃꠚꠞ ꠇꠟꠋꠇꠞ ꠈꠣꠟꠤ ꠟꠦꠚꠤ ꠖꠤꠟ ꠍꠤꠟꠦꠐ ꠄꠝꠍꠤ ꠇꠟꠦꠎꠞ ꠄꠈꠖꠟ ꠝꠣꠘꠥꠡ ꠞꠥꠚꠤ ꠡꠄꠔꠣꠘ ꠅꠈꠟꠦ⁕ ꠎꠣꠝꠣꠁꠞꠦ ꠀꠈꠐꠣꠁꠀ ꠞꠣꠈꠤꠀ ꠍꠣꠔ꠆ꠞ ꠟꠤꠉꠞ ꠚꠣꠍ ꠍꠄꠉꠥ ꠛꠦꠐꠣꠄ ꠖꠟꠛꠣꠘꠗꠤ ꠉꠘꠗꠞ꠆ꠡꠘ ꠈꠞꠍꠦ ꠄꠈ ꠛꠦꠐꠤꠞꠦ⁕ ꠁꠛꠣꠟꠣ ꠇꠟꠦꠎ ꠇꠦꠝ꠆ꠙꠣꠍ ꠔꠘꠦ ꠍꠣꠔ꠆ꠞꠟꠤꠉꠞ ৫-৬ ꠎꠘ ꠘꠦꠔꠣꠇꠞ꠆ꠝꠤꠄ ꠔꠣꠞꠣ ꠎꠣꠝꠣꠁ-ꠛꠃꠞꠦ ꠎꠥꠞ ꠎꠛꠞꠖꠍ꠆ꠔꠤ ꠈꠞꠤꠀ ꠇꠟꠦꠎꠞ ꠢꠟꠅ ꠟꠁꠀ ꠎꠣꠄ⁕ ꠛꠣꠖꠦ ꠚꠥꠟꠤꠡꠦ ꠈꠛꠞ ꠚꠣꠁꠀ ꠢꠟꠅ ꠉꠤꠀ ꠁ ꠛꠦꠐꠤ ꠀꠞ ꠔꠣꠘ ꠎꠣꠝꠣꠁꠞꠦ ꠃꠖ꠆ꠖꠣꠞ ꠈꠞꠦ⁕ ꠡꠥꠇ꠆ꠞꠛꠣꠞ ꠞꠣꠁꠔ ১০ꠐꠣꠔ ꠡꠣꠢꠚꠞꠣꠘ ꠕꠣꠘꠣ ꠚꠥꠟꠤꠡ ꠔꠣꠞꠣꠞꠦ ꠃꠖ꠆ꠖꠣꠞ ꠈꠞꠦ⁕ ꠅꠘꠦ ꠁ ꠛꠦꠐꠤꠞ ꠍꠤꠟꠦꠐ ꠅꠍꠝꠣꠘꠤ ꠝꠦꠒꠤꠇꠦꠟ ꠇꠟꠦꠎ ꠀꠡꠙꠣꠔꠣꠟꠞ ꠅꠍꠤꠍꠤꠔ ꠒꠣꠈꠔꠞꠤ ꠍꠟꠦꠞ⁕
ꠡꠥꠇ꠆ꠇꠥꠞꠛꠣꠞ ꠛꠤꠀꠟꠦ ꠔꠣꠞꠣ ꠎꠣꠝꠣꠁ ꠛꠃ ꠚꠣꠈꠣꠘꠤꠔ ꠉꠦꠟꠦ ꠁ ꠈꠛꠤꠍꠤ ꠈꠣꠝ ꠁꠇꠣꠘ ꠊꠐꠦ⁕ ꠊꠐꠘꠣ ꠎꠣꠘꠣ ꠎꠣꠘꠤ ꠅꠁꠟꠦ ꠅꠟꠤ ꠀꠃꠟꠤꠀꠞ ꠖꠦꠡꠅ ꠁꠔꠣ ꠈꠝꠤꠘ꠆ꠖꠤ ꠈꠣꠝꠞ ꠖꠣꠄ ꠍꠤꠟꠐ ꠡꠥꠁꠖ꠆ꠖꠣ ꠀꠍꠔꠣ ꠖꠦꠡꠞ ꠝꠣꠘꠥꠡ ꠉꠞꠝ ꠅꠁꠎꠣꠁꠘ⁕ ꠗꠞ꠆ꠡꠈ ꠅꠈꠟꠞ ꠍꠛꠤꠅ ꠢꠣꠞꠣꠇ꠆ꠇꠣꠞꠣ ꠍꠣꠁꠞ ꠛꠣꠄ ꠍꠤꠔ꠆ꠞꠤ ꠎꠣꠄ⁕
ꠁꠛꠣꠄ, ꠄꠝꠍꠤ ꠇꠟꠦꠎꠞ ꠅꠘꠇꠦꠞ ꠀꠞ ꠀꠉꠞ ꠚꠠꠥꠀꠁꠘ꠆ꠔꠦ ꠝꠤꠟꠤ ꠝꠣꠘꠛ ꠛꠘ꠆ꠗꠘ ꠈꠞꠍꠂꠘ⁕ ꠚꠥꠟꠤꠡꠦꠅ ꠁꠔꠣ ꠈꠝꠤꠘ꠆ꠖ ꠅꠈꠟꠞꠦ ꠄꠞꠦꠡ꠆ꠐꠞ ꠖꠣꠄ ꠢꠣꠞꠣ ꠞꠣꠁꠔ ꠅꠜꠤꠎꠣꠘ ꠍꠣꠟꠣꠁꠍꠦ⁕
