শুরমা ফারর খবর ছিলটি জবানে ছিলটর খবর
Related Articles
ꠉꠂꠖ꠆ꠖ: ꠜꠣꠁꠀꠚꠤ-Γ (ꠢꠣꠍꠣꠞꠇꠥꠞ ꠊꠐꠘꠣꠔꠘꠦ)
ꠟꠦꠈꠞꠣ: ꠄ ꠄꠍ ꠌꠃꠗꠥꠞꠤ
ꠘꠣꠘꠣ ꠝꠍꠤꠖ ꠎꠣꠁꠞꠣ ꠖꠦꠇꠤꠀ ꠀꠝꠤꠅ ꠈꠞꠦ ꠈꠞꠦ ꠝꠍꠤꠖ ꠉꠦꠟꠣꠝ — ꠝꠍꠤꠖꠞ ꠈꠣꠘ꠆ꠖꠣ-ꠝꠥꠇꠣ ꠚꠥꠛꠞ ꠚꠣꠠ ꠚꠞ꠆ꠛꠔ ꠛꠣꠁꠀ ꠄꠈ-ꠍꠣ ꠍꠠꠣ (ꠝꠣꠘꠦ ꠢꠘꠞ ꠝꠣꠘꠥꠡꠦ ꠉꠣꠋ ꠈꠁꠘ) ꠀꠁꠍꠦ ⁕ ꠚꠥꠛꠞ ꠚꠣꠠꠣꠞ ꠢꠇ꠆ꠇꠟꠦ ꠅꠘ ꠅꠎꠥ ꠉꠥꠍꠟ ꠈꠞꠁꠘ ⁕ ꠀꠝꠤꠅ ꠢꠈꠟꠞ ꠟꠉꠦ ꠅꠎꠥ ꠚꠠꠤ ꠘꠝꠣꠎ ꠚꠠꠟꠣꠝ ⁕ ꠖꠤꠘ ꠀꠍꠤꠟ ꠡꠥꠇ꠆ꠇꠥꠞꠛꠣꠞ — ꠁ-ꠖꠤꠘ ꠅꠃ ꠝꠍꠤꠖ ꠔꠥꠡꠣꠞ ꠡꠤꠘ꠆ꠘꠤ ꠀꠍꠤꠟ – ꠝꠍꠤꠖ ꠢꠣꠝꠣꠁꠛꠣꠞ ꠟꠉꠦ ꠟꠉꠦ ꠘꠣꠈ ꠉꠦꠞꠣণ ꠟꠣꠉꠍꠦꠞꠦ ꠜꠣꠁ – ꠇꠤꠔꠣ ꠇꠁ ⁕
ꠘꠝꠣꠎ ꠛꠣꠖꠦꠃ ꠛꠣꠐꠣ ꠅꠁꠛ – ꠝꠍꠤꠖ ꠜꠞꠣ ꠝꠣꠘꠥꠡ ⁕
ꠀꠝꠤꠅ ꠘꠝꠣꠎ ꠛꠣꠖꠦ ꠡꠤꠘ꠆ꠘꠤ ꠈꠣꠁꠔꠣꠝ ꠈꠞꠤ ꠟꠣꠁꠘ ꠛꠁꠀ ꠞꠁꠍꠤ ⁕
ꠡꠤꠘ꠆ꠘꠤ ꠛꠣꠐꠔ꠆ ꠀꠍꠟꠣ ꠞꠥꠡꠘꠣꠞ ꠛꠣꠚ, ꠢꠦꠘꠞꠦ ꠒꠣꠇꠤꠀ ꠖꠇꠘꠞ ꠊꠞꠞ ꠘꠣꠘꠣꠄ ꠈꠁꠞꠣ, “ꠀꠝꠣꠞ ꠝꠗꠥꠞꠣꠁ’ꠞ ꠘꠣꠔꠤ’ꠞꠦ ꠖꠥꠁ ꠍꠣꠘ꠆ꠖꠣ ꠖꠤꠅ ꠞꠦ ꠛꠣ ⁕ ꠅꠃ ꠄꠈ ꠘꠣꠔꠤ ꠀꠝꠣꠞ ꠛꠠꠁ ꠝꠣꠄꠀꠞ ⁕ ꠔꠣꠞ ꠟꠉꠦ ꠉꠚꠡꠚ ꠈꠞꠔꠦ ꠎꠦ ꠜꠣꠟꠣ ꠟꠣꠉꠦ” ⁕
ꠢꠣꠍꠣꠞ ꠝꠥꠟ ꠢꠣꠍꠣ – ꠞꠥꠡꠘꠣꠞ ꠛꠣꠚꠦꠅ ꠀꠝꠣꠞꠦ ꠖꠥꠁ ꠍꠣꠘ꠆ꠖꠣ ꠡꠤꠘ꠆ꠘꠤ ꠖꠤꠟꠣ ⁕
ꠡꠤꠘ꠆ꠘꠤ ꠀꠔ ꠟꠁꠀꠃ ꠇꠥꠘꠐꠣꠁ-ꠇꠥꠘꠐꠣꠁ ꠝꠥꠇ ꠖꠤꠔꠦ ꠟꠣꠉꠟꠣꠝ ⁕
ꠝꠣꠁ ꠉꠦ ꠝꠣꠁ ꠎꠦ ꠝꠎꠣ – ꠝꠣꠏꠦ ꠝꠣꠏꠦ ꠄꠟꠣꠍꠤ ꠅ ꠀꠍꠦ, ꠝꠥꠇ ꠚꠠꠟꠦꠃ ꠞꠣꠉ ꠃꠑꠔ ⁕ ꠀꠁꠎ ꠚꠞ꠆ꠎꠘ꠆ꠔ ꠢꠃ ꠄꠟꠣꠍꠤ ꠀꠝꠣꠞ ꠟꠉ ꠍꠣꠠꠍꠦ ꠘꠣ ⁕ ꠒꠦꠉꠞ ꠝꠣꠏꠦ ꠎꠖꠤ ꠖꠥꠁꠐꠣ ꠄꠟꠣꠍꠤ ꠕꠣꠈꠦ – ꠢꠃ ꠖꠥꠘꠐꠣ ꠀꠝꠣꠞ ꠅꠋꠡꠔ ꠚꠠꠛ ꠎꠦ ꠚꠠꠛ ⁕
ꠔꠃ ꠈꠁꠍꠟꠣꠝ ꠔꠥꠡꠣꠞ ꠡꠤꠘ꠆ꠘꠤꠞ ꠈꠕꠣ ⁕ ꠖꠥꠀꠣꠁ ꠀꠟ꠆ꠟꠣꠞ – ꠡꠤꠘ꠆ꠘꠤ ꠛꠣꠐꠣꠞ ꠡꠝꠄ ꠄꠈ ꠐꠦꠟꠣ ꠐꠦꠟꠤ ꠎꠦ ꠟꠣꠉꠟ – ꠇꠤꠉꠥꠞꠦ ꠝꠣꠞꠤꠀ ꠇꠤꠉꠥꠄ ꠈꠣꠁꠔ – ꠔꠃꠛꠣ ꠔꠃꠛꠣ ⁕
ꠈꠦꠃ ꠈꠦꠃ ꠄꠈ ꠍꠣꠘ꠆ꠖꠣ ꠛꠣꠖꠦꠅ ꠀꠞꠈ ꠍꠣꠘ꠆ꠖꠣꠞ ꠟꠣꠉꠤ ꠊꠥꠞꠤꠀ ꠀꠁꠔꠣ ⁕ ꠀꠞ ꠇꠤꠍꠥ ꠇꠤꠍꠥ ꠝꠣꠘꠥꠡ ꠡꠤꠘ꠆ꠘꠤ ꠟꠁꠀ ꠛꠣꠠꠤꠔ ꠎꠣꠁꠞꠣ ꠀꠞ ꠈꠦꠃ ꠈꠦꠃ ꠝꠍꠤꠖꠞ ꠟꠉꠦ ꠕꠣꠈꠣ ꠈꠣꠑꠟ ꠉꠣꠍꠞ ꠍꠣꠄꠀꠔ ꠛꠁꠀ ꠉꠚ ꠈꠞꠞꠣ ⁕ ꠀꠝꠤ ꠅ ꠡꠤꠘ꠆ꠘꠤ ꠟꠁꠀ ꠢꠃ ꠈꠣꠑꠟ ꠉꠣꠍꠞ ꠍꠣꠄꠀꠔ ꠛꠁꠀ ꠀꠍꠤ, ꠄꠝꠘ ꠡꠝꠄ ꠘꠣꠘꠣ (ꠍꠝꠤꠞꠞ ꠛꠣꠚ) ꠀꠈꠔꠣ ꠢꠈꠟꠞ ꠡꠣꠝꠘꠦ ꠃꠑꠤꠀ ꠈꠁꠘ — ꠅ ꠛꠣ ꠉꠣꠃꠞ ꠝꠣꠘꠥꠡ ꠅꠈꠟ, “ꠢꠥꠘ ꠢꠥꠘ, ꠡꠣꠝꠘꠞ ꠛꠤꠞꠡꠁꠔꠛꠣꠞ ꠀꠝꠤ ꠝꠞꠤ ꠎꠣꠝꠥ – ꠔꠥꠝꠞꠣ ꠡꠥꠇ꠆ꠞꠛꠣꠞꠦ ꠘꠝꠣꠎ ꠛꠣꠖꠦ ꠀꠝꠣꠞ ꠎꠣꠘꠣꠎꠣ ꠚꠠꠤꠀ ꠅꠃ ꠈꠣꠘꠦ (ꠁꠡꠣꠞꠣꠄ) ꠝꠣꠐꠤ ꠖꠤꠟꠣꠁꠅ ⁕ ꠔꠛꠦ, ꠀꠞ ꠢꠥꠘ ꠛꠣ ꠢꠥꠘ – ꠅꠛꠣ ꠢꠥꠘꠤꠀ ꠞꠣꠈ ꠚꠞꠦꠞ ꠡꠥꠇ꠆ꠇꠥꠞꠛꠣꠞꠦ ꠀꠝꠣꠞ ꠖꠥꠍ꠆ꠔ, ꠁꠀꠞ, ꠀꠝꠣꠞ ꠛꠣꠁꠀꠚ ꠞꠥꠡꠘꠣꠞ ꠛꠣꠚ ꠞꠦ ꠅ ꠀꠝꠤ ꠒꠣꠇꠤꠟꠣꠁꠝꠥ – ꠔꠣꠁꠘ ꠅ ꠝꠞꠤ ꠎꠣꠁꠛꠣ ⁕ ꠔꠣꠘꠞꠦ ꠔꠁꠀ ꠔ ꠢꠣꠞꠣ ꠎꠤꠘ꠆ꠖꠦꠉꠤ ꠇꠥꠘꠥ ꠈꠣꠘ ꠉꠦꠟꠣꠝ ꠘꠣ, ꠇꠥꠘꠥ ꠔꠣ ꠈꠣꠁꠟꠣꠝ ꠘꠣ ⁕ ꠔꠣꠁꠘ ꠝꠞꠟꠦꠅ ꠄꠈꠟꠣ ꠔꠣꠈꠔꠦ ꠚꠣꠞꠔꠣꠝ ꠘꠣꠄ ⁕ ꠔꠣꠘꠞꠦ ꠘꠤꠝꠥ ꠉꠤ ⁕ ꠀꠚꠘꠣꠞꠣ ꠀꠝꠣꠞ ꠈꠕꠣ ꠝꠘꠅ ꠞꠣꠈꠁꠘ ꠎꠣꠘ” — ꠁ ꠈꠕꠣ ꠢꠥꠘꠤꠀ ꠈꠦꠃ ꠈꠦꠃ ꠝꠣꠕꠣꠔ ꠀꠔ, ꠈꠦꠃ ꠈꠦꠃ ꠈꠁꠞꠣ – ꠅꠃ ꠢꠥꠘꠛꠣ ꠛꠤꠎꠣꠟꠣ ꠛꠥꠠꠣꠞ ꠈꠕꠣ ⁕
ꠀꠘ꠆ꠖꠥ ꠍꠣꠘ꠆ꠖꠥ ꠇꠤꠔꠣ ꠕꠣꠇꠤ ꠇꠤꠔꠣ ꠈꠁꠟꠣ ⁕
ꠁꠔꠣ ꠝꠣꠕ ꠢꠥꠘꠔꠦ ꠢꠥꠘꠔꠦ ꠘꠣꠘꠣꠄ ꠈꠁꠘ – “ꠀꠁꠌ꠆ꠌꠣ ꠎꠣꠁꠉꠤ, ꠀꠍꠍꠣꠟꠣꠝꠥ ꠀꠟꠣꠁꠇꠥꠝ” ⁕
—— ꠛꠣꠖꠞ ꠈꠔꠣ ꠟꠁꠀ ꠀꠁꠞꠣꠝ
