শুরমা ফারর খবর ছিলটি জবানে ছিলটর খবর
Related Articles
ꠝꠣꠔꠣꠝꠣꠔꠤꠞ ꠡꠁꠋꠇꠣꠛꠣꠄ ꠍꠤꠟꠐꠤ ꠅꠁꠟ ꠉꠤꠀ ꠖꠥꠘꠤꠀꠞ ꠢꠇꠟ ꠔꠘꠦ ꠛꠦꠡꠝꠣꠔꠞꠣ ꠝꠣꠔꠞ ꠝꠣꠎꠦ ৯৭ ꠟꠝ꠆ꠛꠞ⁕ ꠁ ꠜꠣꠡꠣꠞ ꠔꠣꠞ ꠀꠚꠘ ꠢꠞꠚ ꠅ ꠀꠍꠦ⁕ ꠎꠣ ꠍꠤꠟꠐꠤ ꠘꠣꠉꠞꠤ, ꠎꠣꠟꠣꠟꠣꠛꠣꠖꠤ ꠘꠣꠉꠞꠤ, ꠚꠥꠟ ꠘꠣꠉꠞꠤ ꠡꠁꠔꠦ ꠛꠃꠔ ꠘꠣꠝꠦ ꠒꠣꠈꠣ ꠅꠄ⁕
ꠍꠤꠟꠐꠤ ꠜꠣꠡꠣ ꠀꠞ ꠔꠣꠞ ꠢꠞꠚꠞꠦ ꠡꠝꠣꠎꠞ ꠢꠇ꠆ꠇꠟ ꠎꠣꠔꠤ ꠝꠣꠘꠡꠞ ꠉꠦꠍꠦ ꠍꠤꠘꠣꠘꠤꠞ ꠖꠣꠄ ꠝꠣꠍꠐꠣꠞꠙꠤꠍ ꠛꠣꠋꠟꠣꠖꠦꠡ ꠀꠞ ꠁꠃꠄꠘꠒꠤꠙꠤ’ꠞ ꠃꠖꠖꠥꠉꠦ ৫ ꠝꠣꠡ ꠝꠤꠀꠖꠤ ꠚꠇꠟ꠆ꠚꠞ ꠀꠘꠥꠡ꠆ꠑꠣꠘꠤꠇ ꠎꠣꠔ꠆ꠞꠣ ꠡꠥꠞꠥ ꠅꠁꠍꠤꠟ ꠉꠦꠍꠦ ꠎꠥꠘ ꠝꠣꠡꠞ ꠝꠣꠏꠣꠝꠣꠏꠤ ꠡꠝꠄ⁕ ꠎꠦ ꠚꠈꠟ꠆ꠚꠞ ꠝꠣꠏꠦ ꠈꠣꠡꠤ ꠀꠞ ꠝꠘꠤꠚꠥꠞꠤ ꠝꠣꠔ ꠅ ꠅꠁꠍꠦ⁕ ꠅꠘꠦ ꠁ ꠚꠇꠟ꠆ꠚ ꠙ꠆ꠞꠣꠄ ꠢꠦꠡ ꠝꠥꠇꠣꠄ⁕ ꠎꠣꠞ ꠖꠣꠄ ꠅꠘꠇꠦ ꠟꠣꠄꠟꠣꠄ ꠚꠠꠞꠣ ꠅꠈꠟꠞꠦ ꠟꠂꠀ ꠎꠣꠍꠣꠁ ꠛꠣꠍꠣꠁ ꠀꠞꠝ꠆ꠜ ꠅꠁꠍꠦ⁕ ꠎꠦ ꠉꠔꠤꠇꠦ, ꠚꠕꠝ ꠚꠞꠤꠇ꠆ꠇꠣ ꠢꠤꠡꠣꠛꠦ ꠉꠦꠍꠦ ২০ ꠅꠇ꠆ꠐꠥꠛꠞ ꠛꠥꠗꠛꠣꠞ ꠛꠤꠀꠘꠤꠛꠣꠎꠣꠞ ꠃꠚꠎꠤꠟꠣꠞ ꠛꠤꠜꠤꠘ꠆ꠘ ꠁꠍꠇꠥꠟꠞ ৪০ ꠎꠘ ꠚꠠꠞꠣ ꠅꠈꠟꠞꠦ ꠟꠁꠀ ꠚꠃꠞꠡꠜꠣꠞ ꠉꠃꠞꠤꠘꠣꠕ ꠡ.ꠙ꠆ꠞꠣ.ꠛꠤ-ꠅ ꠍꠤꠟꠐꠤ ꠜꠣꠡꠣꠄ ꠘꠣꠉꠞꠤ ꠢꠞꠚꠞ ꠟꠦꠈꠣ ꠅ ꠝꠃꠈꠤꠇ ꠚꠥꠕꠤ ꠚꠠꠣ ꠝꠥꠟ꠆ꠟꠣꠄꠅꠘ ꠀꠃꠎꠘ ꠈꠞꠣ ꠅꠁꠍꠤꠟ⁕ ꠁ ꠈꠣꠞ꠆ꠎꠇꠞꠝꠞ ꠖꠥꠍꠞꠣ ꠚꠞꠤꠇ꠆ꠇꠣ ꠈꠣꠁꠟ ২৩ ꠔꠣꠞꠤꠇ ꠛꠤꠀꠘꠤꠛꠣꠎꠣꠞ ꠃꠚꠎꠤꠟꠣꠞ ꠃꠔ꠆ꠔꠞꠜꠣꠉ ꠡꠞꠈꠣꠞꠤ ꠚꠣꠡ꠆ꠡꠣꠟꠣ ꠁꠍꠇꠥꠟꠧ ꠅꠄ⁕ ꠎꠦꠘꠧ ꠍꠤꠟꠐꠞ ꠛꠣꠇꠇꠣ ꠁꠍꠇꠥꠟ ꠔꠘꠦ ২০ ꠎꠘ ꠚꠠꠥꠀꠄ ꠅꠋꠡ ꠘꠤꠍꠟꠣ⁕
ꠝꠥꠟ꠆ꠟꠣꠄꠅꠘ ꠚꠞꠤꠇ꠆ꠇꠣ ꠛꠣꠖꠦ ꠢꠈꠟ ꠚꠞꠞꠣ ꠅꠈꠟꠞꠦ ꠚꠥꠞꠥꠡ꠆ꠇꠣꠞ ꠀꠞ ꠍꠣꠞ꠆ꠐꠤꠚꠤꠇꠦꠐ ꠖꠦꠅꠀ ꠅꠄ⁕ ꠚꠞꠤꠇ꠆ꠇꠣ ꠖꠦꠅꠞꠣ ꠅꠈꠟꠞꠦ ꠝꠥꠟ꠆ꠟꠣꠄꠅꠘ ꠈꠞꠣꠔ ꠉꠤꠀ ꠖꠦꠈꠣ ꠎꠣꠄ ꠔꠣꠞꠣ ꠎꠦ ꠀꠉꠞꠧꠢꠧ ꠟꠂꠀ ꠘꠣꠉꠞꠤ ꠢꠤꠇꠦꠞ ꠀꠞ ꠡꠣꠝꠘꠞ ꠖꠤꠘꠧ ꠢꠤꠇꠔꠧ ꠍꠣꠄ⁕ ꠔꠣꠞꠣꠞ ꠉꠣꠞꠎꠦꠘ ꠅꠈꠟꠦꠅ ꠈꠁꠘ, ꠍꠤꠟꠐꠤ ꠜꠣꠡꠣꠞ ꠘꠣꠉꠞꠤ ꠢꠞꠚ ꠖꠤ ꠎꠦꠘꠧ ꠈꠝꠍꠦꠈꠝ ꠄꠈꠣꠘ ꠛꠁꠅ ꠁꠍꠇꠥꠟꠧ ꠚꠠꠣꠘꠤ ꠅꠄ⁕ ꠝꠣꠞꠝꠣꠔ ꠍꠤꠟꠐꠤ ꠢꠤꠡꠣꠛꠦ ꠅꠈꠣꠘꠧ ꠔꠣꠞꠣꠞ ꠀꠛꠖꠣꠞ⁕
ꠁꠛꠣꠄ ꠍꠤꠟꠐ ꠛꠤꠜꠣꠉꠞ ꠍꠣꠁꠞ ꠎꠤꠟꠣꠞ ꠝꠣꠏꠦ ꠔꠥꠠꠣ ꠡꠤꠝꠣꠛꠖ꠆ꠖꠔꠣꠞ ꠖꠣꠄ ꠢꠛꠤꠉꠁꠘ ꠁ ꠚ꠆ꠞꠉ꠆ꠞꠣꠝꠧ ꠅꠋꠡ ꠘꠤꠔꠧ ꠚꠣꠞꠎꠦ ꠘꠣ⁕ ꠎꠣꠞ ꠈꠣꠞꠘꠦ ꠝꠣꠍꠐꠣꠞꠙꠤꠍ ꠛꠣꠋꠟꠣꠖꠦꠡꠞ ꠇ-ꠅꠞꠒꠤꠘꠦꠐꠞ ꠎꠣꠝꠤꠟ ꠢꠥꠍꠦꠘ ꠍꠣꠛꠦ ꠅꠘꠦ ꠇꠥꠛ ꠈꠣꠐꠘꠤ ꠈꠣꠐꠞꠣ ꠔꠣꠞꠣꠞꠦꠅ ꠘꠤ ꠁ ꠚ꠆ꠞꠉ꠆ꠞꠣꠝꠧ ꠎꠥꠉ ꠈꠞꠤꠀ ꠍꠤꠟꠐꠤ ꠜꠣꠡꠣꠞ ꠚꠍꠣꠞ ꠚꠡꠣꠞ ꠀꠞꠧ ꠛꠦꠡꠤ ꠝꠣꠘꠡꠞ ꠉꠦꠍꠦ ꠈꠞꠣ ꠎꠣꠄ⁕
