Breaking News
Home / ꠍꠤꠟꠐ / ২৩৯ ꠛꠌ꠆ꠌꠞꠦ ꠚꠣꠅ ꠖꠤꠟ ꠍꠤꠟꠐ

২৩৯ ꠛꠌ꠆ꠌꠞꠦ ꠚꠣꠅ ꠖꠤꠟ ꠍꠤꠟꠐ

ꠍꠤꠟꠐ ꠘꠣꠄ ꠍꠤꠟꠦꠐ ꠅꠁꠟ ꠛꠣꠋꠟꠣꠖꠦꠡꠞ ꠃꠔ꠆ꠞ ꠚꠥꠛꠞ ꠄꠉꠥ ꠝꠦꠐ꠆ꠞꠙꠟꠤꠐꠘ ꠄꠞꠤꠀ⁕ ꠍꠤꠟꠐ ꠛꠤꠜꠣꠉ ꠀꠞ ꠎꠦꠟꠣꠞ ꠝꠦꠁꠘ ꠐꠣꠃꠘ⁕ ꠡꠥꠞꠝꠣ ꠉꠣꠋꠉꠞ ꠚꠣꠞ ꠍꠤꠟꠐ ꠐꠣꠃꠘ ꠚꠠꠍꠦ⁕ ꠍꠤꠟꠐꠞ ꠢꠣꠅꠀꠛꠣꠔꠣꠡ ꠝꠃꠡꠥꠝꠤ ꠀꠞ ꠎꠣꠉꠣꠁꠘ ꠔꠥꠞꠣ ꠐꠤꠟ꠆ꠟꠣꠐꠣꠟ꠆ꠟꠣꠞ ꠟꠣꠈꠣꠘ, ꠛꠣꠖꠛꠣꠇꠤ ꠚꠝꠣꠘ ꠀꠘ꠆ꠘꠣꠄ ꠀꠅꠞꠣꠁꠘ⁕

ꠍꠤꠟꠐꠞ ꠁꠔꠤꠢꠣꠡ ꠛꠃꠔ ꠚꠥꠞꠣꠘꠣ⁕ ꠛꠣꠞ ꠜꠥꠁꠀꠞ ꠀꠝꠟ ꠔꠘꠦ ꠁ ꠎꠘꠚꠖ ꠝꠥꠊꠟ ꠅꠈꠟꠞ ꠛꠤꠞꠥꠖ꠆ꠖꠦ ꠘꠤꠎꠡ꠆ꠡꠔꠣ ꠛꠎꠣꠄ ꠞꠣꠈꠔ⁕ ꠛꠣꠖꠦ ꠀꠍꠔꠦ ꠀꠍꠔꠦ ꠀꠞ ꠎꠣꠉꠣꠁꠘꠔꠞ ꠟꠣꠈꠣꠘ ꠍꠤꠟꠐ ꠅ ꠛꠤꠐꠤꠡ ꠁꠘꠒꠤꠀꠞ ꠅꠋꠡ ꠅꠄ⁕ ꠎꠣꠞ ꠖꠣꠄ ꠍꠤꠟꠐꠞ ꠜꠃꠉꠟꠤꠇ ꠄꠟꠣꠇꠣ ꠛꠣꠞꠛꠣꠞ ꠃꠟꠐꠚꠣꠟꠐ ꠅꠄ⁕ ꠀꠁꠍꠇꠥꠞ ꠅ ꠖꠤꠘ ১৭৮২ ꠡꠣꠟꠞ ৩ ꠎꠣꠘꠥꠀꠞꠤ ꠀꠡꠣꠝꠞ ꠔ꠆ꠞꠤꠙꠥꠞꠣ ꠞꠣꠁꠎ꠆ꠎ ꠔꠘꠦ ꠉꠘꠜꠥꠐꠞ ꠝꠣꠁꠖ꠆ꠖꠝꠦ ꠛꠤꠢꠔ꠆ꠔꠞ ꠍꠤꠟꠐꠞ ꠎꠘ꠆ꠝ!
ꠡꠥꠜ ꠎꠘ꠆ꠝꠖꠤꠘ ꠙ꠆ꠞꠤꠅ ꠡꠤꠟꠦꠐ⁕

ꠌꠣꠁꠘꠤꠎ ꠄꠈ ꠁꠔꠤꠀꠡꠤꠛꠤꠖꠦ ꠍꠤꠟꠐꠞꠦ ꠡꠤꠌꠣꠟꠢꠣꠔꠣꠘ ꠘꠣꠝ ꠈꠁꠍꠁꠘ⁕ ꠍꠤꠟꠐ ꠝꠣꠘꠥꠡꠞ ꠛꠣꠡ ꠈꠄꠈ ꠢꠣꠎꠣꠞ ꠛꠞꠍ ꠗꠞꠤ, ꠄꠈꠡꠝꠅ ꠍꠤꠟꠐ ꠀꠍꠤꠟ ꠇꠣꠝꠞꠥꠙ ꠞꠣꠁꠎ꠆ꠎꠞ ꠜꠤꠔꠞꠦ⁕ ꠛꠣꠖꠦ ꠄꠈꠡꠝꠅ ꠍꠤꠟꠐ ꠉꠃꠞ ꠉꠛꠤꠘ꠆ꠖꠞ ꠞꠣꠎ ꠀꠍꠤꠟ, ꠁ ꠡꠝꠄ ꠍꠤꠟꠐꠞ ꠝꠣꠘꠥꠡꠞ ꠃꠚꠞꠦ ꠈꠥꠛ ꠅꠔ꠆ꠔꠣꠌꠣꠞ ꠅꠁꠍꠦ, ꠛꠤꠡꠦꠡ ꠈꠞꠤ ꠝꠥꠍꠟꠝꠣꠘ ꠀꠞ ꠛꠃꠖ꠆ꠖ ꠅꠈꠟꠞ ꠃꠚꠞꠦ⁕ ꠄꠞꠛꠣꠖꠦ ꠡꠣꠢ ꠎꠣꠟꠣꠟꠦ ৩৬০ ꠀꠃꠟꠤꠀ ꠟꠁꠀ ꠀꠁꠀ, ꠍꠤꠟꠐ ꠛꠤꠎꠄ ꠈꠞꠤꠀ ꠍꠤꠟꠐꠞ ꠝꠣꠘꠡꠞꠦ ꠃꠖ꠆ꠖꠣꠞ ꠈꠞꠟꠣ⁕ ꠔꠣꠘ ꠘꠣꠝꠦ ꠄꠈꠡꠝꠄ ꠍꠤꠟꠐꠞ ꠘꠣꠝ ꠀꠍꠤꠟ ꠎꠣꠟꠣꠟꠣꠛꠣꠖ⁕ ꠛ꠆ꠞꠤꠐꠤꠡ ꠀꠁꠛꠣꠞ ꠛꠣꠖꠦ ꠍꠤꠟꠐꠞ ꠉꠥꠞꠥꠔ꠆ꠔ ꠛꠣꠞꠤꠎꠣꠄ, ꠑꠣꠘ꠆ꠒꠣ ꠎꠣꠉꠣ ꠅꠀꠄ ꠍꠤꠟꠐ ꠛ꠆ꠞꠤꠐꠤꠡ ꠅꠈꠟꠞ ꠚꠍꠘ꠆ꠖ ꠅꠁꠍꠤꠟ ꠀꠞ ꠀꠡꠣꠝ ꠀꠞ ꠛꠣꠋꠟꠣꠞ ꠝꠣꠏꠦ ꠅꠀꠄ ꠍꠤꠟꠐ ꠀꠍꠤꠟ ꠈꠥꠛ ꠖꠞꠈꠣꠞꠤ ꠄꠈ ꠎꠣꠉꠣ⁕ ꠛꠣꠋꠟꠣ ꠀꠞ ꠀꠡꠣꠝꠞꠦ ꠖꠥꠁ ꠐꠥꠝꠣꠔ ꠛꠣꠐ ꠈꠞꠣꠞ ꠛꠣꠖꠦ ꠍꠤꠟꠐ ꠚꠞꠤ ꠎꠣꠄ ꠀꠡꠣꠝ⁕ ꠁꠇꠐꠣ ꠟꠁꠀ ꠍꠤꠟꠐꠤ ꠅꠈꠟ ꠘꠣꠞꠣꠎ ꠀꠍꠟꠣ, ꠔꠃ ꠎꠦꠛꠟꠣ ꠛꠋꠉꠜꠋꠉ ꠅꠁꠟ, ꠍꠤꠟꠐ ꠒꠥꠇꠟ ꠚꠥꠛꠞ ꠛꠣꠋꠟꠣꠔ⁕ ꠖꠦꠡ ꠜꠣꠉꠞ ꠡꠝꠄ ꠍꠤꠟꠐ ꠖꠥꠁ ꠐꠥꠝꠣ ꠅꠁꠎꠣꠄ, ꠄꠈ ꠐꠥꠝꠣ ꠕꠣꠈꠦ ꠚꠣꠇꠤꠍ꠆ꠔꠣꠘ ꠀꠞꠈꠐꠥꠝꠣ ꠁꠘ꠆ꠒꠤꠀꠔ⁕ ꠍꠤꠟꠐ ꠎꠦꠟꠣ ꠚꠣꠇꠤꠍ꠆ꠔꠣꠘꠅ ꠀꠄ⁕ ১৯৭১ ꠅꠞ ꠡꠋꠉ꠆ꠞꠣꠝꠅ ꠍꠤꠟꠐꠤ ꠅꠈꠟꠞ ꠜꠥꠝꠤꠇꠣ ꠀꠍꠤꠟ⁕ ꠡꠋꠉ꠆ꠞꠣꠝꠞ ꠡꠝꠄ ꠎꠦꠘꠣꠞꠦꠟ ꠀꠍꠟꠣ ꠍꠤꠟꠐꠞ ꠃꠍꠝꠣꠘꠤ, ꠀꠞ ꠖꠦꠡꠞ ꠚꠄꠟꠣ ꠡꠣꠖꠤꠘ ꠕꠣꠘꠣ ꠅꠁꠟ ꠍꠤꠟꠐ ꠎꠦꠟꠣꠞ ꠎꠇꠤꠉꠘꠎ ꠕꠣꠘꠣ⁕

About abu sayeed

Check Also

ꠐꠤꠝ ꠛ꠆ꠞꠥꠇ꠆ꠍꠞ ꠡꠝ꠆ꠝꠣꠘꠦ ꠛꠤꠡ꠆ꠡ ꠡꠁꠋꠇꠣꠟꠊꠥ ꠢꠞꠚꠦ ꠀꠔꠟ꠆ꠟꠦꠈꠣꠞ ꠖꠤꠘ

ꠐꠤꠝ ꠛ꠆ꠞꠥꠇ꠆ꠍ (Tim Brookes), ꠎꠦꠁꠘ ꠀꠠꠤꠎꠣꠅꠀꠞ ꠀꠔ ꠔꠘꠦ ꠡ ꠡ ꠝꠣꠔ ꠅꠈꠟꠞ ꠛꠥꠘꠤꠀꠖꠤ ꠢꠞꠚꠞꠦ ꠎꠝꠣ …