শুরমা ফারর খবর ছিলটি জবানে ছিলটর খবর
Related Articles
ꠚꠥꠟꠤꠡꠦ ꠉꠥꠡꠞ ꠐꠦꠈꠣ ꠡꠝꠄꠝꠔ ꠘꠣ ꠚꠣꠅꠀꠄ ꠝꠣꠁꠞꠖꠁꠞ ꠈꠞꠤꠀ ꠄꠈ ꠎꠥꠀꠘ ꠛꠦꠐꠣꠞꠦ ꠎꠣꠘꠦ ꠝꠣꠞꠤꠟꠤꠍꠁꠘ, ꠉꠑꠘꠣꠄ ꠎꠠꠤꠔ ꠍꠣꠁꠞ ꠚꠥꠟꠤꠡ ꠛꠞꠈꠣꠍ꠆ꠔ
ꠛꠘ꠆ꠖꠞ ꠛꠣꠎꠣꠞ ꠚꠥꠟꠤꠡ ꠚꠣꠠꠤꠔ ꠚꠥꠟꠤꠡꠞ ꠝꠣꠁꠞ ꠖꠁꠞꠦ ꠞꠣꠄꠢꠣꠘ ꠘꠣꠝꠞ ꠄꠈ ꠎꠥꠀꠘ ꠛꠦꠐꠣꠞ ꠝꠃꠔꠞ ꠈꠣꠞꠘꠦ ꠚꠣꠠꠤꠞ ꠁꠘꠌꠣꠞ꠆ꠎ ꠄꠡꠀꠁ ꠀꠇꠛꠞ ꠢꠥꠡꠦꠘ ꠜꠥꠁꠀꠡꠁꠔꠦ ꠍꠣꠁꠞ ꠚꠥꠟꠤꠡ ꠡꠖꠁꠡ꠆ꠡꠞꠦ ꠡꠣꠝꠁꠇ ꠛꠞꠈꠣꠍ꠆ꠔ ꠈꠞꠍꠁꠘ ꠡꠤꠟꠦꠐ ꠝꠦꠐ꠆ꠐꠙꠟꠤꠐꠘ ꠚꠥꠟꠤꠡꠦ⁕ ꠄꠈꠁ ꠟꠉꠦ ꠔꠤꠘ ꠚꠥꠟꠤꠡ ꠡꠖꠁꠡ꠆ꠡꠞꠦ ꠙꠔ꠆ꠔꠣꠀꠞ ꠈꠞꠣ ꠅꠁꠍꠦ⁕
ꠍꠤꠟꠦꠐ ꠝꠦꠐ꠆ꠐꠙꠟꠤꠐꠘ ꠚꠥꠟꠤꠡꠞ ꠄꠈ ꠎꠞꠤꠀ ꠕꠣꠇꠤ ꠁ ꠛꠤꠡꠄ ꠘꠤꠡꠌꠤꠔ ꠅꠀ ꠉꠦꠍꠦ ⁕
ꠉꠔ ꠞꠁꠛꠣꠞ(১১ ꠅꠇ꠆ꠐꠧꠛꠞ) ꠛꠤꠀꠘꠦ ꠚꠥꠟꠤꠡꠞ ꠝꠣꠁꠞ ꠖꠁꠞꠦ ꠞꠣꠄꠢꠣꠘ ꠃꠖ꠆ꠖꠤꠘ (৩৩) ꠘꠣꠝꠞ ꠄꠈ ꠎꠥꠀꠘ ꠛꠦꠐꠣꠞ ꠝꠃꠔ ꠅꠀꠞ ꠅꠜꠤꠎꠧꠉ ꠔꠥꠟꠍꠁꠘ ꠟꠣꠡꠞ ꠇꠥꠐꠥꠝꠈꠦꠡꠦ⁕ ꠝꠃꠔ ꠅꠀ ꠎꠥꠀꠘ ꠛꠦꠐꠣ ꠍꠤꠟꠦꠐꠞ ꠀꠈꠣꠟꠤꠀꠞ ꠘꠦꠢꠣꠞꠤꠚꠣꠠꠣꠞ ꠝꠤꠞꠔꠧ ꠞꠚꠤꠇꠥꠟ ꠁꠍꠟꠣꠝꠞ ꠚꠥꠀ⁕
ꠚꠥꠟꠤꠡꠞ ꠔꠞꠚ ꠕꠣꠇꠤ ꠈꠀ ꠅꠄ, ꠍꠤꠘꠔꠣꠁꠈꠣꠟꠦ ꠉꠘꠚꠤꠐꠥꠘꠤꠔ ꠝꠣꠞꠣ ꠉꠦꠍꠁꠘ ꠞꠣꠄꠢꠣꠘ⁕ ꠔꠛꠦ ꠝꠤꠞꠔ ꠞꠣꠄꠢꠣꠘꠞ ꠊꠞꠞ ꠝꠣꠘꠡꠞ ꠅꠜꠤꠎꠧꠉ, ꠚꠥꠟꠤꠡꠦ ꠗꠞꠤꠀ ꠘꠤꠀ ꠈꠦꠍꠣꠝꠣꠁꠞ ꠖꠤꠀ ꠞꠣꠄꠢꠣꠘꠞꠦ ꠢꠔ꠆ꠔꠣ ꠈꠞꠣ ꠅꠁꠍꠦ ⁕ ꠊꠞꠞ ꠝꠣꠘꠡꠞ ꠅꠜꠤꠎꠧꠉꠞ ꠜꠤꠔ꠆ꠔꠤꠔꠦ ꠔꠖꠘ꠆ꠔ ꠇꠝꠤꠐꠤ ꠉꠑꠘ ꠈꠞꠍꠁꠘ ꠍꠤꠟꠦꠐ ꠝꠦꠐ꠆ꠐꠙꠟꠤꠐꠘ ꠚꠥꠟꠤꠡ⁕
ꠅꠍꠤ ꠀꠇꠛꠞ
ꠁꠖꠤꠇꠦ ꠞꠁꠛꠣꠞ ꠖꠤꠘꠉꠔ ꠞꠣꠁꠔ ꠘꠤꠢꠔ ꠞꠣꠄꠢꠣꠘꠞ ꠛꠃ ꠛꠣꠖꠤ ꠅꠁꠀ ꠅꠉꠉꠣꠔ ꠇꠄꠇꠎꠘ ꠀꠡꠣꠝꠤ ꠈꠞꠤ ꠇꠧꠔꠧꠀꠟꠤ ꠕꠣꠘꠣꠄ ꠇꠦꠁꠍ ꠈꠞꠍꠁꠘ⁕
ꠞꠣꠄꠢꠣꠘꠞ ꠝꠣ ꠍꠣꠟꠝꠣ ꠛꠦꠉꠝ ꠅ ꠌꠣꠌꠣ ꠢꠣꠛꠤꠛꠥꠟꠟ꠆ꠟꠣꠢ ꠈꠁꠍꠁꠘ, ꠞꠣꠄꠢꠣꠘ ꠘꠉꠞꠤꠞ ꠞꠤꠇꠣꠛꠤꠛꠣꠎꠣꠞꠧ ꠁꠡꠐꠦꠒꠤꠀꠝ ꠝꠣꠞꠇꠦꠐꠦ ꠒꠣ. ꠀꠛꠖꠥꠟ ꠉꠚ꠆ꠚꠣꠞꠞ ꠌꠦꠝ꠆ꠛꠣꠞꠧ ꠍꠣꠈꠞꠤ ꠈꠞꠔꠣ⁕ ꠞꠣꠄꠢꠣꠘ ꠛꠤꠀꠔꠤ ꠅ ꠄꠈ ꠢꠞꠥꠔꠣꠞ ꠛꠣꠚ ꠀꠍꠟꠣ⁕
ꠉꠔ ꠡꠘꠤꠛꠣꠞ ꠞꠣꠁꠔ ꠈꠣꠝ ꠕꠣꠇꠤꠞꠣꠄꠢꠣꠘ ꠛꠣꠡꠣꠔ ꠀꠁꠔꠦ ꠖꠦꠞꠤ ꠅꠀꠄ ꠞꠣꠁꠔ ১০ꠐꠣꠞ ꠖꠤꠇꠦ ꠔꠣꠘꠞ ꠛꠃ ꠝꠧꠛꠣꠁꠟ ꠚꠘꠧ ꠇꠟ ꠖꠤꠅꠦ ꠛꠘ꠆ꠖ ꠚꠣꠁꠘ⁕ ꠛꠣꠖꠦ ꠛꠤꠀꠘ ꠞꠣꠁꠔ ৪ꠐꠣꠞ ꠖꠤꠇꠦ ꠅꠚꠞꠤꠍꠤꠔ ꠘꠝ꠆ꠛꠞ ꠕꠣꠇꠤ ꠞꠣꠄꠢꠣꠘꠦ ꠔꠣꠘ ꠝꠣꠞ ꠝꠧꠛꠣꠁꠟ ꠚꠘꠧ ꠇꠟ ꠖꠤꠀ ꠎꠣꠘꠣꠁꠍꠁꠘ, ꠔꠣꠘꠞꠦ ꠛꠘ꠆ꠖꠞꠛꠣꠎꠣꠞ ꠙꠥꠟꠤꠡ ꠚꠣꠠꠤꠔ ꠗꠞꠤꠀ ꠘꠦꠅꠀ ꠅꠁꠍꠦ ꠄꠛꠋ ১০ ꠀꠎꠣꠞ ꠐꠦꠈꠣ ꠖꠤꠟꠦ ꠚꠥꠟꠤꠡꠦ ꠍꠣꠠꠤꠖꠤꠛꠧ ꠈꠁꠍꠦ⁕
ꠄꠞꠛꠣꠖꠦ ꠞꠣꠥꠢꠣꠘꠞ ꠝꠣ ꠞꠣꠄꠢꠣꠘꠞ ꠌꠣꠌꠣ ꠢꠣꠛꠤꠛꠥꠟ꠆ꠟꠣꠢꠞꠦ ৫ ꠀꠎꠣꠞ ꠐꠦꠈꠣ ꠖꠤꠀ ꠚꠎꠞꠞ ꠘꠣꠝꠣꠎꠞ ꠛꠣꠖꠈꠣꠘꠃ ꠛꠘ꠆ꠖꠞꠛꠣꠎꠣꠞ ꠚꠥꠟꠤꠡ ꠚꠣꠠꠤꠔ ꠙꠣꠑꠣꠁꠘ⁕ ꠁ ꠡꠝꠅ ꠡꠣꠖꠣ ꠚꠧꠡꠣꠇꠦ ꠚꠣꠠꠤꠔ ꠕꠣꠈꠣ ꠄꠈ ꠚꠥꠟꠤꠡ ꠡꠖꠁꠡ꠆ꠡ ꠢꠣꠛꠤꠛꠥꠟ꠆ꠟꠣꠢꠞꠦ ꠈꠁꠘ, ১০ ꠀꠎꠣꠞ ꠐꠦꠈꠣ ꠘꠤꠀ ꠀꠅꠀꠞ ꠈꠕꠣ, ꠔꠣꠁꠘ ৫ ꠀꠎꠣꠞ ꠟꠁꠀ ꠉꠦꠍꠁꠘ ꠈꠦꠘꠦ, ꠀꠞ ꠈꠁꠘ ꠖꠡ ꠀꠎꠣꠞ ꠟꠁꠀ ꠀꠁꠅ ꠄꠈꠘ ꠎꠣꠅꠉꠤ ꠞꠣꠄꠢꠣꠘ ꠊꠥꠝꠣꠞ⁕ꠀꠞ ꠎꠦ ꠇꠞꠝꠧꠇꠞꠔꠣꠄ ꠖꠞꠤꠀ ꠀꠘꠌꠁꠘ ꠔꠣꠁꠘꠧ ꠚꠣꠠꠤꠔ ꠘꠣꠄ ৯ꠐꠣꠞ ꠖꠤꠇꠦ ꠀꠁꠅ
ꠅꠃ ꠚꠥꠟꠤꠡꠞ ꠈꠕꠣꠝꠔꠧ ꠢꠣꠛꠤꠛꠥꠟ꠆ꠟꠣꠢ ꠛꠤꠀꠘ ৯ꠐꠣꠞ ꠡꠝꠄ ꠀꠛꠣꠞ ꠚꠣꠠꠤꠔꠦ ꠉꠦꠍꠁ⁕ ꠁ ꠡꠝꠅ ꠚꠣꠠꠤꠔꠦ ꠕꠣꠈꠣ ꠙꠥꠟꠤꠡ ꠡꠖꠁꠡ꠆ꠡ ꠅꠈꠟꠦ ꠎꠣꠘꠣꠁꠘ, ꠞꠣꠄꠢꠣꠘ ꠅꠡꠥꠡꠔꠧ ꠅꠀꠄ ꠔꠣꠘꠞꠦ ꠅꠡꠝꠣꠘꠤ ꠝꠦꠒꠤꠇꠦꠟ ꠇꠟꠦꠎ ꠀꠡꠚꠣꠔꠣꠟꠧ ꠚꠣꠐꠣꠘꠤ ꠅꠁꠍꠦ⁕ ꠔꠈꠘ ꠢꠣꠛꠤꠛꠥꠟ꠆ꠟꠣꠢ ꠟꠉꠦꠟꠉꠦ ꠅꠡꠝꠣꠘꠤ ꠀꠡꠚꠣꠔꠣꠟꠧ ꠉꠤꠀ ꠇꠧꠎ ꠘꠤꠀ ꠎꠣꠘꠔꠣ ꠚꠣꠞꠁꠘ ꠞꠣꠄꠢꠣꠘꠞ ꠟꠣꠡ ꠝꠞꠉꠦ ꠞꠣꠈꠣ ⁕ ꠝꠄꠘꠣꠔꠖꠘ꠆ꠔ ꠇꠞꠤꠀ ꠞꠁꠛꠣꠞ ꠛꠤꠀꠟ ৪ꠐꠣꠞ ꠖꠤꠇꠦ ꠊꠞꠞ ꠝꠣꠘꠡꠞ ꠟꠣꠡ ꠡꠝꠎꠣꠘꠤ ꠅꠁꠍꠦ⁕
