শুরমা ফারর খবর ছিলটি জবানে ছিলটর খবর
Related Articles
ꠜꠣꠞꠔꠞ ꠡꠤꠇ꠆ꠇꠤꠔ ꠄꠈ ꠎꠤꠟꠣꠞ ꠘꠣꠝ ꠇꠦꠞꠦꠟꠣꠞ ꠝꠟꠣꠙꠙꠥꠞꠣꠝ। ꠅꠃ ꠡꠤꠇ꠆ꠇꠤꠔ ꠝꠣꠘꠡꠞ ꠝꠣꠎ ꠕꠣꠇꠤ ꠉꠐꠍꠦ ꠝꠘꠧ ꠈꠡ꠆ꠐ ꠚꠣꠅꠀꠞ ꠝꠔ ꠄꠈ ꠉꠐꠘꠣ। ꠄꠈꠐꠣ ꠉꠣꠜꠤꠘ ꠀꠔ꠆ꠔꠤ ꠈꠣꠅꠀꠞ ꠇꠥꠎꠦ ꠛꠣꠞꠁꠍꠟ ꠝꠟꠙꠙꠥꠞꠣꠞꠝ ꠚꠔꠦ ꠊꠣꠐꠦ। ꠄꠈ ꠘꠣꠢꠥꠝꠣꠞ ꠝꠣꠘꠡꠦ ꠀꠘꠣꠘꠣꠡꠞ ꠜꠤꠔꠞꠦ ꠀꠔꠡꠛꠣꠎꠤꠞ ꠛꠣꠞꠥꠔ ꠢꠣꠞꠣꠁꠀ ꠀꠘꠣꠞꠡ ꠈꠣꠅꠀꠁꠟꠤꠍꠦ ꠀꠔ꠆ꠔꠤꠞꠦ। ꠉꠣꠜꠤꠘ ꠀꠔ꠆ꠔꠤꠄ ꠀꠘꠣꠘꠣꠡ ꠈꠣꠅꠀꠞ ꠚꠞꠦ ꠝꠥꠇꠞ ꠜꠤꠔꠞꠦ ꠚꠣꠐꠤꠅꠣ ꠝꠥꠇꠞ ꠜꠤꠔꠞꠦ ꠛꠠ ꠎꠈꠝ ꠅꠁꠉꠦꠍꠦ।
ꠝꠥꠇꠞ ꠎꠈꠝ ꠟꠁꠀ ꠚꠦꠐꠞ ꠛꠥꠇꠦ ꠉꠣꠜꠤꠘ ꠀꠔ꠆ꠔꠤ ꠍꠣꠁꠞꠧꠜꠣꠄ ꠊꠥꠞꠣꠊꠥꠞꠤ ꠈꠞꠍꠦ ꠈꠣꠅꠀꠞ ꠟꠣꠉꠤ! ꠇꠤꠘ꠆ꠔꠥ ꠎꠈꠝ ꠟꠁꠀ ꠇꠥꠘꠔꠣ ꠈꠣꠁꠔ ꠚꠣꠞꠍꠦꠘꠣ। ꠚꠥꠠꠣ ꠎꠈꠝ ꠀꠞ ꠚꠦꠐꠞ ꠛꠥꠇꠞ ꠎꠣꠟꠣ ꠟꠁꠀꠅ ꠚꠔꠦ ꠊꠣꠐꠦ ꠇꠥꠘ ꠝꠣꠘꠡꠞ ꠈꠦꠔꠤ ꠈꠞꠍꠦꠘꠣ। ꠄꠈ ꠚꠞꠎꠣꠅ ꠛꠣꠌ꠆ꠍꠣꠞ ꠡꠣꠘ꠆ꠔꠤꠞ ꠟꠣꠉꠤ ꠘꠤꠎꠞ ꠛꠤꠔꠞꠞ ꠎꠣꠟꠣ ꠈꠝꠣꠁꠛꠣꠞ ꠟꠣꠉꠤ ꠄꠈ ꠉꠣꠋꠉ ꠉꠤꠀ ꠘꠣꠝꠍꠦ। ꠛꠣꠖꠦ ꠛꠘ ꠛꠤꠜꠣꠉꠞ ꠝꠣꠘꠡꠦ ꠎꠣꠘꠔꠣ ꠚꠣꠞꠤꠀ ꠛꠃꠔ ꠐꠣꠘꠣꠐꠣꠘꠤ ꠈꠞꠍꠁꠘ ꠃꠐꠣꠁꠛꠣꠞ ꠟꠣꠉꠤ।
ꠇꠤꠘ꠆ꠔꠥ ꠉꠣꠜꠤꠘ ꠀꠔ꠆ꠔꠤ ꠚꠣꠘꠤ ꠕꠣꠇꠤ ꠀꠞ ꠃꠐꠍꠦꠘꠣ। ꠅꠄꠔ ꠜꠣꠛꠍꠦ ꠎꠔ ꠡꠝꠄ ꠁ ꠘꠤꠡ꠆ꠐꠥꠞ ꠖꠥꠘꠤꠀꠁꠔ ꠀꠍꠤ ꠚꠦꠐꠞ ꠛꠣꠌꠌꠣꠉꠥꠔꠣꠞꠦ ꠐꠣꠘ꠆ꠒꠣ ꠞꠣꠇꠤꠀ ꠎꠣꠁ, ꠀꠝꠤꠔ ꠀꠞ ꠛꠣꠍꠔꠣꠝ ꠘꠣꠄ! ꠢꠣꠄ ꠀꠚꠍꠥꠍ, ꠄꠈꠣꠖꠣꠞꠦ ꠔꠤꠘꠖꠤꠘ ꠚꠣꠘꠤꠔ ꠕꠣꠇꠤꠀ ꠀꠔ꠆ꠔꠤꠉꠥꠔꠣ ꠉꠔ ২৭ꠝꠦ ꠛꠥꠗꠛꠣꠞ ꠝꠞꠤꠉꠦꠟꠧ। ꠝꠣꠘꠥꠡ ꠉꠤꠅꠣꠘ ꠛꠤꠉꠉꠣꠘ ꠡꠁꠔꠦ ꠢꠈꠟꠛꠣꠄ ꠅꠔꠧ ꠀꠉꠥꠀꠁꠀ ꠇꠤꠔꠣ ꠟꠣꠜ ꠎꠥꠖꠤ ꠄꠈꠐꠣ ꠛꠥꠛꠣ ꠚꠡꠥ ꠝꠣꠘꠡꠞ ꠘꠤꠡꠐꠥꠞꠔꠣ ꠉꠦꠍꠕꠣꠇꠤ ꠞꠦꠢꠣꠁ ꠘꠣ ꠚꠣꠄ। ꠔꠛꠦ ꠅꠔꠧ ꠅꠛꠣꠈ ꠅꠃꠀꠞ ꠇꠥꠘꠔꠣ ꠘꠣꠁ। ꠝꠣꠘꠡꠦ ꠝꠣꠘꠡꠞ ꠟꠉꠦ ꠎꠦ ꠛꠦꠛꠧꠀꠞ ꠈꠞꠦ- ꠎꠦ ꠝꠣꠄ ꠎꠘꠝ ꠖꠤꠟꠧ ꠅ ꠝꠣꠞꠦ ꠍꠦꠖꠣꠁꠀ ꠇꠥꠘ ꠈꠞꠤꠟꠤꠟꠧ! ꠀꠞꠈꠎꠘꠞꠦ ꠚꠣꠡꠣꠁꠛꠣꠞ ꠟꠣꠉꠤ ꠍꠣꠇꠇꠥ ꠖꠤꠀ ꠚꠥꠀꠞ ꠉꠟꠣ ꠈꠣꠐꠤꠀ ꠀꠛꠣꠞ ꠅꠃ ꠍꠣꠇꠇꠥ ꠚꠥꠀꠞ ꠚꠦꠐꠧ ꠢꠣꠞꠣꠁꠀ ꠉꠣꠍꠞ ꠟꠉꠦ ꠟꠐꠈꠣꠁꠀ ꠞꠣꠇꠤꠖꠤꠟꠧ! ꠎꠦ ꠢꠞꠥꠝꠞꠥ ꠚꠥꠠꠤꠅꠦ ꠖꠥꠘꠤꠀ ꠎꠤꠘꠤꠡꠐꠣ ꠇꠤꠔꠣ ꠄꠈꠘꠧ ꠈꠁꠔꠣ ꠚꠣꠞꠔꠘꠣꠄ, ꠅꠃ ꠚꠥꠠꠤꠞꠦ ꠗꠞꠡꠘ ꠈꠞꠤꠅꠣ ꠛꠣꠖꠦ ꠎꠣꠘꠦꠝꠣꠞꠤꠀ ꠟꠣꠡ ꠟꠥꠇꠣꠁꠀ ꠞꠣꠇꠤꠖꠤꠟꠧ! ꠁꠔꠣ ꠡꠛꠔꠣꠃ ꠝꠣꠘꠡꠞ ꠇꠥꠈꠣꠝ।
ꠔꠣꠁꠟꠦ ꠎꠦꠈꠣꠘꠧ ꠝꠣꠘꠡꠞ ꠉꠦꠍ ꠕꠣꠇꠤ ꠝꠣꠘꠥꠡ ꠘꠤꠞꠣꠚꠖ ꠘꠣꠄ ꠁꠇꠣꠘꠧ ꠛꠘꠞ ꠚꠡꠥ ꠘꠤꠞꠣꠚꠖ ꠕꠣꠈꠛꠧ ꠁꠇꠐꠣ ꠍꠤꠘꠔꠣꠅ ꠈꠞꠣ ꠎꠣꠄꠘꠣ। ꠄꠞꠛꠣꠖꠦꠅ ꠀꠡꠣ ꠈꠞꠤ ꠉꠤꠀꠘ ꠛꠤꠉꠉꠣꠘꠞ ꠟꠉꠦ ꠟꠉꠦ ꠝꠣꠘꠥꠡꠞ ꠡꠛꠣꠜ ꠜꠣꠟꠣ ꠅꠃꠇ। ꠝꠣꠘꠥꠡꠞ ꠀꠔ ꠕꠣꠇꠤ ꠝꠣꠘꠥꠡ ꠘꠤꠞꠣꠚꠖ ꠕꠣꠈꠇ, ꠝꠣꠘꠥꠡꠞ ꠀꠔ ꠕꠣꠇꠤ ꠛꠘꠞ ꠛꠥꠛꠣ ꠚꠡꠥꠅ ꠘꠤꠞꠣꠚꠖ ꠕꠣꠈꠇ। ꠛꠘ ꠖꠚꠔꠞꠧꠞ ꠇꠞꠝꠇꠞꠔꠣ, ꠎꠣꠞ ꠡꠣꠝꠘꠦ ꠁ ꠊꠐꠘꠣ ꠊꠐꠍꠤꠟ, ꠔꠣꠁꠘ ꠖꠥꠇ꠆ꠇ ꠜꠞꠣ ꠝꠘ ꠘꠤꠀ ꠅꠃ ꠉꠐꠘꠣ ꠚꠦꠁꠍꠛꠥꠇꠧ ꠟꠦꠈꠍꠟꠣ। ꠎꠣꠞ ꠈꠣꠞꠘꠦ ꠉꠘꠝꠣꠁꠖꠖꠝ ꠡꠁꠔꠦ ꠡꠛꠞ ꠡꠣꠝꠘꠦ ꠀꠁꠍꠦ।
