Breaking News
Home / ꠖꠦꠡꠞ ꠈꠛꠞ / ꠝꠣꠟ꠆ꠐꠣ ꠌꠥꠞꠤꠞ ꠖꠣꠄ ৩ ꠀꠚꠦꠞꠔꠣꠞꠦ ꠉꠣꠍꠧ ꠛꠣꠘ꠆ꠗꠤ ꠘꠤꠞ꠆ꠎꠣꠔꠘ

ꠝꠣꠟ꠆ꠐꠣ ꠌꠥꠞꠤꠞ ꠖꠣꠄ ৩ ꠀꠚꠦꠞꠔꠣꠞꠦ ꠉꠣꠍꠧ ꠛꠣꠘ꠆ꠗꠤ ꠘꠤꠞ꠆ꠎꠣꠔꠘ

ꠄꠈꠛꠣꠞꠦ ꠉꠞꠤꠛ ꠙꠞꠤꠛꠣꠞꠞ ꠔꠤꠘ ꠀꠚꠦꠞꠔꠣ ꠡꠣꠗꠤꠘ (১২) ꠔꠣꠅꠢꠤꠖ (১১) ꠀꠞ ꠘꠣꠁꠝ (১২) ꠄꠈ ꠝꠥꠞꠉꠤꠞ ꠚꠣꠞꠝꠧ ꠈꠣꠝ ꠈꠞꠦ⁕ ꠡꠘꠤꠛꠣꠞ ꠛꠤꠀꠘꠦ ꠈꠣꠝꠞ ꠡꠝꠄ ꠔꠣꠞꠣꠞ ꠜꠥꠇ ꠟꠣꠉꠟꠦ ꠚꠔꠤꠛꠦꠡꠤ ꠎꠛ꠆ꠛꠣꠞ ꠝꠤꠀꠞ ꠝꠣꠟ꠆ꠐꠣ ꠛꠣꠉꠣꠘꠧ ꠓꠥꠇꠤꠀ ꠈꠄꠈꠐꠣ ꠝꠣꠟ꠆ꠐꠣ ꠚꠣꠠꠍꠤꠟ⁕ ꠁ ꠅꠚꠞꠣꠗꠦ ꠀꠚꠦꠞꠔꠣ ꠔꠤꠘꠉꠥꠞꠦ ꠗꠞꠤ ꠉꠣꠍꠞ ꠟꠉꠦ ꠛꠣꠘ꠆ꠗꠤꠀ ꠎꠥꠔꠣ ꠖꠤ ꠚꠤꠐꠤꠀ ꠅꠝꠣꠘꠥꠡꠤꠇ ꠘꠤꠞ꠆ꠎꠣꠔꠘ ꠈꠞꠦ ꠛꠣꠉꠣꠘ ꠝꠣꠟꠤꠇ ꠀꠞ ꠢꠦꠘ ꠚꠥꠀꠄ⁕

ꠛꠣꠖꠦ ꠀꠚꠦꠞꠔꠣꠁꠘꠔꠞ ꠉꠣꠞꠎꠦꠘ ꠅꠈꠟ ꠀꠁꠀ ꠔꠣꠞꠣꠞꠦ ꠍꠥꠐꠣꠁꠀ ꠘꠦꠁꠘ⁕ ꠊꠐꠘꠣꠐꠣ ꠊꠐꠍꠦ ꠙꠤꠞꠧꠎꠙꠥꠞꠞ ꠡꠞꠥꠙꠇꠣꠑꠤ ꠄꠟꠣꠇꠣꠞ ꠛꠟꠖꠤꠀ ꠁꠘꠤꠅꠘꠧꠞ ꠌꠣꠝꠤ ꠉꠣꠃꠔ⁕ ꠚꠥꠟꠤꠡ ꠀꠞ ꠄꠟꠣꠇꠣꠛꠣꠡꠤꠞ ꠛꠞꠣꠔꠦ ꠎꠣꠘꠣ ꠉꠦꠍꠦ, ꠡꠘꠤꠛꠣꠞ ꠛꠤꠀꠘꠦ ꠁ ꠔꠤꠘ ꠀꠚꠦꠞꠔꠣ ꠄꠇꠤ ꠄꠟꠣꠇꠣꠞ ꠀꠛ꠆ꠖꠥꠟ ꠎꠛ꠆ꠛꠣꠞꠞ ꠝꠣꠟ꠆ꠐꠣ ꠛꠣꠉꠣꠘꠦ ꠓꠥꠇꠤꠀ ꠝꠣꠟ꠆ꠐꠣ ꠚꠣꠠꠤꠀ ꠟꠁꠀ ꠎꠣꠅꠀꠔ ꠀꠍꠤꠟ⁕ ꠅꠃ ꠡꠝꠄ ꠛꠣꠉꠣꠘꠞ ꠝꠣꠟꠤꠇ ꠎꠛ꠆ꠛꠣꠞ ꠀꠞ ꠔꠣꠘ ꠚꠥꠀ ꠢꠣꠍꠣꠘ ꠁꠔꠣꠁꠘꠔꠞꠦ ꠗꠞꠤꠀ ꠖꠠꠤ ꠖꠤ ꠄꠈꠣꠘꠧ ꠄꠇꠐꠣ ꠉꠣꠍꠞ ꠟꠉꠦ ꠛꠣꠘ꠆ꠗꠤꠀ ꠎꠥꠔꠣ ꠚꠤꠐꠣ ꠈꠞꠦ⁕

ꠛꠣꠖꠦ ꠔꠣꠞꠣꠞ ꠉꠣꠞꠎꠦꠘꠦ ꠈꠛꠞ ꠚꠣꠁꠀ ꠔꠣꠞꠣꠞꠦ ꠍꠥꠐꠣꠁꠀ ꠀꠘꠁꠘ⁕ ꠘꠤꠞ꠆ꠎꠣꠔꠘꠞ ꠍꠛꠤ ꠍꠧꠡꠣꠟ ꠝꠤꠒꠤꠀꠔ ꠍꠤꠔ꠆ꠞꠤ ꠉꠦꠟꠦ ꠢꠣꠞꠣꠇ꠆ꠇꠣꠞꠣ ꠜꠣꠁꠞꠣꠟ ꠅꠁꠎꠣꠄ⁕ ꠚꠥꠟꠤꠡ ꠈꠞꠛ ꠚꠣꠁꠀ ꠊꠐꠘꠣꠞ ꠟꠉꠦ ꠎꠠꠤꠔ ꠛꠣꠉꠣꠘ ꠝꠣꠟꠤꠇ ꠎꠛ꠆ꠛꠣꠞ ꠀꠞ ꠔꠣꠘ ꠚꠥꠀ ꠢꠣꠍꠣꠘꠞꠦ ꠀꠐꠈꠣꠁꠀ ꠕꠣꠘꠣꠔ ꠟꠁꠀ ꠀꠁꠘ⁕ ꠁ ꠊꠐꠘꠣꠄ ꠞꠣꠁꠔ ꠘꠤꠞ꠆ꠎꠣꠔꠤꠔ ꠀꠚꠦꠞꠔꠣ ꠔꠣꠅꠢꠤꠖꠞ ꠀꠛ꠆ꠛꠣ ꠀꠟꠣꠃꠖ꠆ꠖꠤꠘ ꠛꠣꠖꠤ ꠅꠁꠀ ꠘꠦꠍꠣꠞꠣꠛꠣꠖ ꠕꠣꠘꠣꠔ ꠄꠇꠐꠣ ꠝꠣꠝꠟꠣ ꠈꠞꠁꠘ⁕ ꠚꠥꠟꠤꠡ ꠞꠁꠛꠣꠞ ꠛꠤꠀꠘꠦ ꠉꠦꠙ꠆ꠔꠣꠞ ꠅꠀꠁꠘꠞꠦ ꠙꠤꠞꠧꠎꠙꠥꠞ ꠇꠧꠞ꠆ꠐꠧ ꠚꠣꠐꠣꠁ ꠖꠦꠄ⁕

ꠘꠦꠍꠣꠞꠣꠛꠣꠖ ꠕꠣꠘꠣꠞ ꠜꠣꠞꠚꠣꠅꠀ ꠇꠞ꠆ꠝꠇꠞ꠆ꠔꠣ (ꠅꠍꠤ) ꠝꠧ. ꠇꠣꠝꠞꠥꠎ꠆ꠎꠣꠝꠣꠘ ꠔꠣꠟꠥꠇꠖꠣꠞꠦ ꠈꠁꠘ, ꠡꠋꠛꠣꠖ ꠚꠣꠁꠀ ꠊꠐꠘꠣꠞ ꠁꠘꠧ ꠚꠥꠟꠤꠡ ꠚꠣꠑꠣꠁꠀ ꠡꠤꠡꠥ ꠘꠤꠞ꠆ꠎꠣꠔꠘꠈꠣꠞꠤ ꠛꠣꠚ ꠀꠞ ꠚꠥꠀꠞꠦ ꠀꠐꠇ ꠇꠞꠣ ꠅꠄ⁕ ꠁ ꠊꠐꠘꠣꠄ ꠕꠣꠘꠣꠔ ꠝꠣꠝꠟꠣ ꠖꠣꠄꠞꠧꠞ ꠛꠣꠖꠦ ꠀꠡꠣꠝꠤꠘꠞꠦ ꠙꠤꠞꠧꠎꠙꠥꠞ ꠀꠖꠣꠟꠔ ꠙꠣꠑꠣꠘꠤ ꠅꠁꠍꠦ⁕

Rate this post

About surmafarorkhobor

Check Also

ꠁꠞꠣꠘ ꠇꠥꠞꠀꠘ ꠔꠤꠟꠣꠃꠀꠔꠅ ꠚꠄꠟꠣ ꠉꠥꠐ꠆ꠐꠣ ꠟꠁꠍꠂꠘ ꠛꠣꠋꠟꠣꠖꠦꠡꠞ ꠛꠡꠤꠞ ꠀꠢꠝꠣꠖ

ꠁꠞꠣꠘꠞ ꠞꠣꠎꠗꠣꠘꠤ ꠔꠦꠢꠞꠣꠘ ꠅꠃꠀ ꠛꠤꠡ꠆ꠡ ꠇꠥꠞꠀꠘ ꠔꠤꠟꠣꠃꠀꠔꠅ ꠚꠕꠝ ꠎꠣꠉꠣ ꠟꠁꠟꠍꠂꠘ ꠢꠛꠤꠉꠘ꠆ꠎꠞ ꠚꠥꠀ ꠢꠣꠚꠤꠎ ꠛꠡꠤꠞ ꠀꠢꠝꠣꠖꠦ …