শুরমা ফারর খবর ছিলটি জবানে ছিলটর খবর
Related Articles
ꠓꠣꠇꠣ-ꠍꠤꠟꠦꠐ ꠝꠦꠁꠘ ꠞꠣꠍꠔꠣꠔ (ꠍꠤꠟꠦꠐꠞ ꠞꠡꠤꠖꠙꠥꠞ) ꠖꠥꠁ ꠛꠠ ꠉꠣꠠꠤ ꠡꠣꠝꠘꠣ ꠡꠣꠝꠘꠤ ꠐꠇ꠆ꠇꠞ ꠅꠁꠍꠦ, ꠄꠞ ꠚꠟꠦ ꠀꠐꠎꠘꠞ ꠝꠃꠔ ꠅ ꠅꠘ꠆ꠔꠔ ৫০ ꠎꠘ ꠎꠈꠝꠤ
ꠀꠁꠎ ꠛꠤꠀꠘꠦ ꠍꠤꠟꠦꠐꠞ ꠖꠇꠇꠤꠘ ꠡꠥꠞꠝꠣꠞ ꠞꠡꠤꠖꠙꠥꠞ ꠄꠟꠣꠇꠣꠔ ꠓꠣꠇꠣ-ꠍꠤꠟꠦꠐ ꠝꠦꠁꠘ ꠞꠣꠍꠔꠣꠔ ꠖꠥꠁ ꠛꠠ ꠉꠣꠠꠤ ꠡꠣꠝꠘꠣ ꠡꠣꠝꠘꠤ ꠐꠇ꠆ꠇꠞ ꠅꠁꠍꠦ, ꠄꠞ ꠚꠟꠦ ꠀꠐꠎꠘꠞ ꠝꠃꠔ ꠅ ꠅꠘ꠆ꠔꠔ ৫০ ꠎꠘ ꠎꠈꠝꠤ ꠅꠀꠞ ꠈꠛꠞ ꠚꠣꠅꠀ ꠉꠦꠍꠦ⁕
ꠀꠁꠎ ২৬/২/২০২১ ꠡꠥꠇꠇꠥꠞꠛꠣꠞ ꠅꠃ ꠖꠥꠞꠊꠐꠘꠣ ꠊꠐꠍꠦ⁕ ꠎꠣꠘꠣ ꠉꠦꠍꠦ, ꠓꠣꠇꠣ ꠕꠣꠇꠤ ꠍꠣꠠꠤꠅꠣ ꠀꠅꠀ ꠟꠘ꠆ꠒꠘ ꠄꠇ꠆ꠡꠙꠦꠞꠦꠍꠞ ꠄꠈ ꠛꠠ ꠉꠣꠠꠤꠞ ꠟꠉꠦ ꠍꠤꠟꠦꠐ ꠕꠣꠇꠤ ꠍꠣꠠꠤꠀ ꠎꠣꠅꠀ ꠓꠣꠇꠣꠝꠥꠇꠤ ꠄꠘꠣ ꠙꠞꠤꠛꠢꠘꠞ ꠄꠈ ꠛꠠ ꠉꠣꠠꠤꠞ ꠝꠥꠇꠣꠝꠥꠇꠤ ꠐꠇ꠆ꠇꠞ ꠅꠄ, ꠄꠔꠦ ꠖꠥꠘꠧ ꠉꠣꠠꠤꠞ ꠀꠉꠛꠣꠎꠥ ꠜꠣꠋꠉꠤꠀ ꠍꠦꠞꠣꠛꠦꠞꠣ ꠅꠁꠉꠦꠍꠦ ꠀꠞ ꠖꠥꠘꠧ ꠉꠣꠠꠤꠞ ꠒꠣꠁꠛꠣꠞ ꠟꠉꠦ ꠟꠉꠦ ꠝꠣꠞꠣ ꠉꠦꠍꠁꠘ ꠛꠟꠤ ꠔꠣꠘꠤꠅ ꠝꠣꠘꠞ ꠉꠦꠍꠕꠣꠇꠤ ꠢꠥꠘꠣ ꠉꠦꠍꠦ⁕
ꠖꠥꠞꠊꠐꠘꠣꠞ ꠛꠣꠖꠈꠣꠘꠁ ꠚꠥꠟꠤꠡ ꠉꠤꠀ ꠍꠣꠁꠞꠎꠘꠞ ꠟꠣꠡ ꠃꠖꠖꠣꠞ ꠈꠞꠤꠀ ꠄꠝꠄꠎꠤ ꠅꠍꠝꠣꠘꠤ ꠝꠦꠒꠤꠇꠦꠟ ꠇꠟꠦꠎꠦꠞ ꠝꠞꠉꠦ ꠙꠣꠑꠣꠁꠍꠁꠘ⁕ ꠛꠣꠖꠦ ꠀꠡꠚꠣꠔꠣꠟꠧ ꠘꠦꠅꠀꠞ ꠚꠕꠦ ꠀꠞꠅ ꠡꠣꠔꠎꠘꠞ ꠝꠃꠔ ꠅꠁꠍꠦ ꠛꠟꠤꠀ ꠈꠛꠞ ꠚꠣꠅꠀ ꠉꠦꠍꠦ⁕
ꠈꠛꠞ ꠢꠥꠘꠣꠞ ꠛꠣꠖꠦ ꠔꠣꠘꠤꠅ ꠅꠈꠟꠞ ꠟꠉꠦꠟꠉꠦ ꠚꠥꠟꠤꠡ ꠅ ꠚꠣꠄꠀꠞ ꠡꠣꠞꠛꠤꠡꠞ ꠇꠞꠝꠤ ꠅꠈꠟꠦ ꠃꠖꠖꠣꠞ ꠇꠣꠎ ꠍꠣꠟꠣꠁꠍꠁꠘ⁕
ꠀꠞꠧ ꠎꠣꠘꠣꠉꠦꠍꠦ ꠎꠈꠝꠤꠀ ꠅꠈꠟꠞ ꠝꠣꠎꠦ ꠀꠞꠧ ꠛꠃꠔꠎꠘ ꠄꠈꠛꠣꠞꠦ ꠉꠥꠞꠥꠔꠞ ꠎꠈꠝꠤꠀ⁕
ꠖꠥꠞꠊꠐꠘꠣꠞ ꠛꠣꠖꠦ ꠒꠣꠇꠣ-ꠍꠤꠟꠦꠐ ꠝꠦꠁꠘ ꠚꠕꠞ ꠉꠣꠠꠤ ꠎꠣꠅꠀ ꠀꠅꠀ ꠈꠔ ꠡꠝꠄ ꠛꠘ꠆ꠖ ꠀꠍꠟꠧ ꠄꠈꠘ ꠡꠣꠛꠣꠛꠤꠇ ꠅꠁꠍꠦ⁕
