Breaking News
Home / ꠍꠤꠟꠐ / ꠍꠤꠟꠦꠐ ꠡꠥꠘꠣꠝꠉꠁꠘ ꠟꠣꠈꠟꠣꠈ ꠝꠣꠘꠥ ꠚꠣꠘꠤꠛꠘ꠆ꠖꠤ

ꠍꠤꠟꠦꠐ ꠡꠥꠘꠣꠝꠉꠁꠘ ꠟꠣꠈꠟꠣꠈ ꠝꠣꠘꠥ ꠚꠣꠘꠤꠛꠘ꠆ꠖꠤ

ꠚꠐꠥ ꠁꠘꠐꠣꠞꠘꠦꠐ ꠔꠘꠦ

ꠅꠘꠛꠞꠔ ꠝꠦꠊ ꠀꠞ ꠚꠣꠠꠤ ꠓꠟꠞ ꠖꠣꠄ ꠍꠤꠟꠐꠞ ꠉꠣꠋ-ꠉꠥꠚꠣꠐ ꠅꠈꠟ ꠚꠣꠘꠤ ꠛꠣꠠꠔꠦ ꠀꠍꠦ। ꠉꠦꠍꠦꠈꠣꠁꠟ ꠞꠁꠛꠣꠞ ꠅ ꠘꠄꠀ ꠘꠄꠀ ꠄꠟꠣꠇꠣꠔ ꠚꠣꠘꠤ ꠃꠑꠤꠉꠦꠍ। ꠇꠥꠘꠥ ꠇꠥꠘꠥ ꠎꠦꠉꠣꠔ ꠚꠣꠘꠤ ꠔꠥꠞꠣ ꠈꠝꠟꠦꠅ ꠚꠣꠘꠤꠛꠘ꠆ꠖꠤ ꠄꠟꠣꠇꠣ ꠛꠣꠠꠍꠦ। ꠔꠛꠦ ꠀꠁꠎ ꠔꠘꠦ ꠚꠣꠘꠤ ꠘꠣꠝꠤ ꠎꠣꠁꠔ ꠚꠣꠞꠤ ꠈꠁꠍꠦ ꠚꠣꠘꠤ ꠃꠘ꠆ꠘꠅꠘ ꠛꠅꠒ (ꠚꠣꠃꠛ)। ꠝꠦꠊꠛꠣꠖꠟꠤ ꠇꠝꠤꠀ ꠀꠅꠀꠄ ꠚꠣꠘꠤ ꠛꠣꠠꠣ ꠈꠝꠛ ꠈꠞꠤ ꠈꠁꠍꠦ ꠚꠣꠃꠛꠦ। ꠇꠤꠘ꠆ꠔꠥꠇ ꠖꠥꠁ ꠔꠤꠘ ꠛꠣꠖꠦ ꠀꠞꠛꠣꠞ ꠝꠦꠊꠛꠣꠖꠟꠤ ꠀꠞꠝꠜ ꠅꠁꠔ ꠚꠣꠞꠦ ꠈꠞꠤ ꠡꠋꠍꠤꠟꠤꠡꠐ ꠅꠈꠟꠦ ꠎꠣꠘꠣꠁꠘ।

 

ꠚꠣꠘꠤ ꠃꠘ꠆ꠘꠅꠘ ꠛꠅꠒꠞ ꠔꠁꠔꠕ ꠝꠔꠦ, ꠡꠥꠞꠝꠣ ꠀꠞ ꠡꠣꠞꠤ ꠘꠖꠤꠞ ꠚꠣꠘꠤ ꠀꠞ ꠛꠣꠠꠍꠦ। ꠡꠥꠞꠝꠣ ꠘꠖꠤꠞ ꠚꠣꠘꠤ ꠉꠦꠍꠦꠈꠣꠁꠟ ꠞꠁꠛꠣꠞ ꠍꠤꠟꠐ ꠙꠄꠘꠐ ꠛꠤꠚꠖ ꠡꠤꠝꠣ ꠚꠣꠠ ꠅꠁꠉꠦꠍ। ꠉꠦꠍꠦꠈꠣꠁꠟ ꠞꠁꠛꠣꠞ ꠢꠣꠁꠘ꠆ꠎꠣꠛꠣꠟꠣ ৬ꠐꠣꠔ ꠍꠤꠟꠐ ꠙꠄꠘꠐ ꠚꠣꠘꠤ ꠛꠤꠚꠖ ꠡꠤꠝꠣꠞ ২ ꠍꠦꠘ꠆ꠐꠤꠝꠤꠐꠣꠞ ꠃꠚꠞ ꠖꠤ ꠉꠦꠍꠦ। ꠈꠣꠘꠣꠁꠊꠣꠐ ꠙꠄꠘꠐ ꠚꠁꠟ ꠖꠤꠘ ꠔꠘꠦ ꠛꠤꠚꠖ ꠡꠤꠝꠣꠞ ꠃꠚꠞ ꠖꠤ ꠎꠣꠞ। ꠇꠝ꠆ꠙꠣꠘꠤꠉꠁꠘ ꠃꠙꠎꠤꠟꠣꠔ ꠜꠥꠞꠤꠉꠦꠍ ꠉꠣꠃꠉꠦꠞꠣꠝ।

 

ꠁꠛꠣꠄ, ꠡꠥꠘꠣꠝꠉꠁꠘ ꠎꠤꠟꠣꠞ ꠡꠥꠘꠣꠝꠉꠁꠘ ꠡꠖꠞ, ꠛꠤꠡ꠆ꠡꠝꠜꠞꠚꠥꠞ, ꠍꠣꠔꠇ, ꠖꠥꠀꠞꠣꠛꠣꠎꠣꠞ, ꠖꠤꠞꠣꠁ, ꠡꠣꠟ꠆ꠟꠣ, ꠗꠞ꠆ꠝꠙꠣꠡꠣ ꠡꠥꠁꠖꠖꠣ ꠙꠦꠞꠣꠄ ꠚꠥꠞꠣ ꠎꠤꠟꠣꠔ ꠀꠈꠔꠣ ꠚꠣꠘꠤ ꠈꠞꠤꠟꠍꠦ। ꠡꠥꠘꠣꠝꠉꠁꠘ ꠡꠢꠞ ꠅꠈꠘꠅ ꠚꠣꠘꠤꠞ ꠔꠟꠦ। ꠍꠣꠔꠇ ꠃꠙꠎꠤꠟꠣꠞ ꠟꠉꠦ ꠎꠥꠉꠣꠎꠥꠉ ꠍꠥꠐꠤꠉꠦꠍ। ꠍꠠꠇ ꠜꠥꠠꠤ ꠎꠣꠅꠀꠅ ꠍꠣꠔꠇ-ꠍꠤꠟꠐ, ꠍꠣꠔꠇ-ꠡꠥꠘꠣꠝꠉꠁꠘꠞ ꠟꠉꠦ ꠎꠥꠉꠣꠎꠥꠉ ꠍꠥꠐꠤꠉꠦꠍ। ꠡꠥꠘꠣꠝꠉꠁꠘ-৫ ꠀꠡꠘꠞ ꠡꠋꠡꠖ ꠡꠖꠁꠡ꠆ꠡ ꠝꠥꠢꠤꠛꠥꠞ ꠞꠢꠝꠣꠘ ꠝꠣꠘꠤꠇꠦ ꠚꠣꠘꠤ ꠅꠀ ꠄꠟꠣꠇꠣ ꠊꠥꠞꠤꠀ ꠖꠦꠈꠍꠁꠘ। ꠄꠍꠣꠠꠣ ꠗꠞ꠆ꠝꠙꠣꠡꠣꠞ  ২০-২২ꠐꠣ ꠉꠣꠅꠞ ꠝꠣꠘꠥ ꠚꠣꠘꠤꠛꠘ꠆ꠖꠤ ꠅꠁꠉꠦꠍ। ꠛꠃꠔ ꠎꠦꠉꠣꠔ ꠐꠤꠚꠈꠟ ꠜꠥꠠꠤ ꠎꠣꠅꠀꠅ ꠈꠣꠁꠛꠣꠞ ꠚꠣꠘꠤꠞ ꠡꠋꠇꠐ ꠖꠦꠈꠣ ꠖꠤꠍꠦ। ꠛꠃꠔ ꠃꠙꠎꠤꠟꠣꠔ ꠜꠥꠠꠤ ꠉꠦꠍ ꠡ ꠡ ꠢꠦꠇꠐꠞ ꠀꠃꠡ ꠚꠡꠟ, ꠀꠝꠘꠞ ꠀꠟꠤꠍꠦꠞꠣ ꠀꠞ ꠔꠣꠞꠈꠣꠞꠤ ꠛꠤꠍꠞꠣ। ꠎꠣꠞꠖꠣꠄ ꠖꠥꠞꠉꠔꠤꠔ ꠚꠞꠤꠉꠦꠍꠁꠘ ꠡꠣꠗꠣꠞꠘ ꠀꠝ-ꠚꠣꠛ꠆ꠟꠤꠇ।

 

ꠚꠣꠃꠛ ꠍꠤꠟꠐꠞ ꠘꠤꠞ꠆ꠛꠣꠢꠤ ꠚꠇꠃꠡꠟꠤ ꠝꠥꠢꠣꠝ꠆ꠝꠖ ꠡꠢꠤꠖꠥꠎ꠆ꠎꠣꠝꠘ ꠡꠞꠇꠣꠞꠦ ꠈꠁꠘ, ꠡꠥꠞꠝꠣ ꠘꠖꠤꠞ ꠚꠣꠘꠤ ꠈꠣꠘꠣꠁꠊꠣꠐ ꠀꠞ ꠍꠤꠟꠐ ꠙꠄꠘꠐ ꠛꠤꠚꠖ ꠡꠤꠝꠣꠞ ꠃꠚꠞꠦ ꠖꠤ ꠎꠣꠞ। ꠝꠦꠊ ꠈꠝꠍꠦ। ꠀꠁꠎꠇꠥ ꠡꠝꠛꠣꠞ ꠔꠥꠞꠣ ꠃꠘ꠆ꠘꠔꠤ ꠅꠁꠛ। ꠅꠈꠘ ꠛꠣꠞꠤꠡꠣ; ꠅꠔꠣꠞꠖꠣꠄ ꠝꠦꠊ ꠅꠁꠛꠃ। ꠔꠛꠦ ꠚꠞꠤꠍꠔꠤꠔꠤ ꠝꠥꠇꠣꠛꠦꠟꠣꠔ ꠚꠣꠃꠛ ꠞꠦꠒꠤ ꠀꠍꠦ।

5/5 - (1 vote)

About Abu Sayeed

ꠝꠥꠁ ꠀꠛꠥ ꠍꠣꠁꠖ, ꠡꠥꠞꠝꠣ ꠚꠣꠞꠞ ꠈꠛꠞ ꠅꠄꠛꠍꠣꠁꠐꠞ ꠍꠣꠚꠣꠃꠞꠣ⁕ ꠛꠣꠋꠟꠣ ꠀꠞ ꠁꠋꠟꠤꠡ ꠚꠔꠞꠤꠇꠣꠁꠘ꠆ꠔ ꠟꠦꠈꠣꠟꠦꠇꠤꠞ ꠅꠜꠤꠉ꠆ꠉꠔꠣ ꠔꠘꠦ ꠝꠞ ꠝꠣꠁꠅꠞꠝꠣꠔ ꠍꠤꠟꠐꠤꠔꠦꠅ ꠟꠦꠈꠣꠞ ꠔꠣꠉꠤꠖ ꠛꠥꠗ ꠈꠞꠤ⁕ ꠅꠘꠟꠣꠁꠘꠅ ꠍꠤꠟꠐꠤ ꠅꠈꠟꠞ ꠟꠣꠉꠤ ꠝꠣꠉꠘꠣ ꠢꠤꠇꠣꠞ ꠟꠣꠈ ꠏꠤꠘꠤꠡ ꠛꠤꠡꠦꠡ ꠈꠞꠤ ꠍꠤꠟꠐꠤꠘ꠆ꠔꠞ ꠁꠔꠤꠀꠡ, ꠞꠍꠝ, ꠈꠣꠘꠤꠛꠘꠤ, ꠡꠣꠁꠔ꠆ꠔ ꠡꠛꠞ ꠀꠔ ꠀꠔ ꠚꠃꠍꠣꠘꠤꠞ ꠈꠣꠝ ꠈꠞꠞꠣꠝ, ꠏꠣꠔꠦ ꠁꠔꠣ ꠈꠣꠟꠤ ꠉꠛꠦꠡꠇ ꠅꠈꠟꠞ ꠐꠣꠁꠘ ꠘꠣ ꠕꠣꠇꠤꠀ ꠢꠈꠟꠞ ꠀꠔꠅ ꠉꠤꠀ ꠔꠣꠘ ꠚꠣꠄ⁕ ꠁꠔꠣ ꠖꠦꠇꠤꠀ ꠀꠞꠅ ꠝꠣꠘꠥꠡꠣꠁꠘ ꠀꠉꠥꠀꠁꠀ ꠀꠁꠘ⁕ ꠟꠉꠦ ꠕꠣꠈꠣꠞ ꠀꠞ ꠚꠣꠄꠚꠞꠣꠝꠤꠡ ꠖꠤꠀ ꠡꠣꠖ ꠖꠤꠛꠣꠞ ꠟꠣꠉꠤ ꠡꠛꠞꠦ ꠡꠥꠇꠥꠞ⁕

Check Also

ꠁꠞꠣꠘ ꠇꠥꠞꠀꠘ ꠔꠤꠟꠣꠃꠀꠔꠅ ꠚꠄꠟꠣ ꠉꠥꠐ꠆ꠐꠣ ꠟꠁꠍꠂꠘ ꠛꠣꠋꠟꠣꠖꠦꠡꠞ ꠛꠡꠤꠞ ꠀꠢꠝꠣꠖ

ꠁꠞꠣꠘꠞ ꠞꠣꠎꠗꠣꠘꠤ ꠔꠦꠢꠞꠣꠘ ꠅꠃꠀ ꠛꠤꠡ꠆ꠡ ꠇꠥꠞꠀꠘ ꠔꠤꠟꠣꠃꠀꠔꠅ ꠚꠕꠝ ꠎꠣꠉꠣ ꠟꠁꠟꠍꠂꠘ ꠢꠛꠤꠉꠘ꠆ꠎꠞ ꠚꠥꠀ ꠢꠣꠚꠤꠎ ꠛꠡꠤꠞ ꠀꠢꠝꠣꠖꠦ …